¹ Ijwi lya Jehova lyakasika kuli ndime, kalyaamba kuti, ² '''Mwana wamuntu, omulombe, kwakali banakazi bobile, bana basimbi bazyalwa awumwi nyina. ³ Bakachita mbuli basibwamu mu Ijiputi muchiindi chabucheche bwabo. Bakachita mbuli basibwamu nkukooko. Inkolo zyabo zyakapwayigwa alimwi bunakalindu bwatunyonkelo twazyo twakaponywa nkukooko. ⁴ Mazina abo akali Owola - mukulana mupati a Owolibba - mwanike wakwe. Mpawo bakaba bangu alimwi bakazyala bana balombe abasimbi. Mazina aabo awamba eechi: Owola chaamba Samaliya, alimwi Owolibba chaamba Jelusalemu. ⁵ Pesi Owola wakachita mbuli sibwaamu nikuba kuti wakali waba wangu; wakali kwemuzya mbakali kuyandana aabo, kwaba Asiliya bakavulide kwiindila, ⁶ Imuleli wachilikiti wakali kusama zyamusyobo wamuteme, azyabasilutwe bakwe, bakasimide alimwi kabali babotu, boonse baalumi bakagede mbongolo. ⁷ Aboobo wakali pedekezya mbuli sibwaamu kuli mbabo, kuli boonse baalumi baku Asiliya babotu loko, alimwi wakali sofwazya - alimwi azyoonse zileza chikozyanisyo zyabo. ⁸ Nkambo takali wasiya pe kup[ona kwasibwamu bwakwe ku Ijiputi, aawo nibakoona anguwe nakachili kasimbi kanini, awo nibakakumbulula bunakalindu bwansalamo yakwe akutuntamuna kwemuzya kwabo aalinguwe. ⁹ Nkinkaako ndakamupedekezya mumaanza aabantu mbayandana aabo, mumaanza ama Asiliya mbaakali kweemuzya. ¹⁰ Bakavumbula chinkuna chakwe, babweza bana bakwe balombe abasimbi, bakamujaya apanga, alimwi wakaba sikondongania loko mukati kabamwi banakazi, aboobo bakamubeteka. ¹¹ Mwanike wakwe Owolibba wakachibona eechi, pesi nikuba boobo wakeemuzya chamoyo uupya loko akuchita mbuli sibwamu kwinda mukulana wakwe. ¹² Wakeemuzya ma Asiliya abasilutwe bakavulide kwindilila bakasamide zyebeka, bakali baalumi bakagede mabbiza. Boonse bakali simide, baalumi babotu. ¹³ Ndakabona kuti wakali walisofwazya. Chakali chimwinya kubasimbi babili. ¹⁴ Mpawo wakayungizya bwaamu bwakwe chakwindilila. Wakali kubona baalumi babezedwe abulambo, zyiimo zyama Kkalidyeni zilambidwe busalala, ¹⁵ bazweete mabbanti muzikungu zyabo, bali atusensa tweenda aamitwe yabo. Boonse bakali achiimo chabasilutwe benkalaki zyalumamba, ibukozyenie abwabana balombe ba Bbabbiloniya, bali anyika yakulimbabo iKkaludiya. ¹⁶ Kuzwa menso akwe nakababona, wakabeemuzya, aboobo wakatuma bantu kuli mbabo mu Kkaludiya. ¹⁷ Aawo ma Bbabbilonia bakaza kulinguwe akubulo bwakwe bwakwemuuzya, alimwi bakamusofwazya alulalano kuli nzyakali wachita wakati wasofwazigwa, aboobo wakabafutatila chakubijilwa. ¹⁸ Nakatondezya nchito zyakwe zyabwamu akuvumbula chinkuna chakwe, ndakachengunuka kuzwa kuli nguwe, mbuli mbundakali ndachengunuka chakubijilwa kuzwa kumukulana wakwe. ¹⁹ Mpawo wakayungizya bwaamu bwakwe aawo nakayeeya mazuba abucheeche bwakwe, nakali sibwamu munyika ya Ijiputi. ²⁰ Aboobo wakeemuzya mbwakali kuyandana aabo, ibakali ansiswa - chinkuna zyakali mbuli zyamadonki, alimwi bakali kuzwa nzyalamuntu yakali mbuli yamabbiza. ²¹ Mbuboobu mbwakachita inchito zyamawuse abucheeche bwako, aawo ibaku Ijiputi nibakaponya tunyonkelo twako akutyanka nkolo zyako zyabusimbi. ²² Nkinkaako, Owolibba, i Mwami Jehova waamba boobo, ''Boona! Ndiyochita kuti mboyandaabo bakakusule. Aabo mbwakachengunukila kuzwa kulimbabo, ndiyobeeta kuzokulwana kuzwa kumabbazu woonse: ²³ Baku Bbabbilonia aboonse maKkalidiya, Pekkodi, Syoya, aba Kkoya, alimwi aboonse baku Asiliya bakali ambabo, basimide, baalumi babotu, baleli bachilikiti, abasilutwe balumamba, boonse mbabelesi abalumi baleempuwo, boonse kabagede mabbiza. ²⁴ Bayooza chakusula azilwisyo, alimwi kabali ankalaki amyaango, alimwi kabali aabbunga lyabantu pati. Bayobamba intibi mpati, ntibi niini, angowani baka kuzyunguluke chakukulwana. Ndiyobapa mweenya wakukupa chisubulo, alimwi bayokupa chisubulo munchito zyabo. ²⁵ Nkaambo ndiyobikka bukali bwangu aalinduwe, alimwi bayobambilana anduwe kabanyemede. Bayonenga akugwisya mpemo yako amatwi, alimwi balyako bafutuka bayoowa achipanga. Bayobweza bana bako balombe abasimbi, alimwi balyako bafutuka bayoligwa amulilo. ²⁶ Bayokuzwatununa ngubo alimwi bakabweze zyoonse nchoko zyako zyalweebo. ²⁷ Aboobo ndiyogwisya kulinduwe inchito zyako zifwisya bweeme anchito zyako zyabwamu munyika ya Ijiputi. Tokoyokonzya pe kunyampula menso aako kubalanga chakupeekezya, alimwi tochikayeeyi Ijiputi lubo pe.' ²⁸ Nkaambo Mwami Jehova waamba boobu, 'Bona! Ndiyokupedekezya mujaanza lyabaabo mbosulide, kobweda mujanza lyabaabo mbwakafutatila. ²⁹ Bayobambilana anduwe chalusulano; bayobweza zyoonsenzyovubide bakakusiye chinkuna antanganana, alimwi chinkuna chako chinovumbwidwe mbuli nchiwakali kuchita imfunkununo zyalulalano abwaamu. ³⁰ Eezi zintu ziyochitwa alimwikulinduwe mukuchita kwako mubli sibwaamu, kweemuzya zisi ooko kuyokusofwazya azikozyanisyo zyabo zyabaleza. ³¹ Wakeenda munzila yamukulana wako, aboobo ndiyobikka nkomesi yakwe yachisubulo mujanza lyako.' ³² Mwami Jehova waamba boobu, Úyoonywa nkomesi yamukulana wako eeyi inikide alimi nimpati. Uyoba nsesya alimwi ukabe chintu chabuyo - eyi nkomesi ijisi mweelo mupati,. ³³ Uyozula ankolwi akuusa, inkomesi yaziyoosyo alunyonyoona; inkomesi yamukulana wako Samaliya. ³⁴ Uyoyinywa akuyiswimpa kumaninsya; mpawo uyoyipwaya akunenguula nkolo zyako muzimpanzi zyayo! Nkambo ndazyambilizya--eechi nchaambilizyo cha Mwami Jehova.' ³⁵ Nkinkaako, Mwami Jehova waamba boobu, 'Nkaambo wandiluba akundiwaala kule musule lyako, aboobo alubo uyolangana antentuuko zyetelezegwa aanchito zyako zifwisya bweeme anchito zyalulalano lwabwamu.''' ³⁶ Jehova wakati kuli ndime, ''Yomulombe mwana wamuntu, uyomubeteka na Owola a Owolibba? Aboobo batondezye inchito zyabo zisesemya, ³⁷ kuzwa nibakachita zyabumambi, akuzwa nikwakaba geze mumaanza aabo. Bakachita zyabumambi azikozyanisyo zyabo, alimwi bachita kuti bana babo balombe bayinde mumulilo, mbuli chakulya chazikozyanisyo zyabo. ³⁸ Mpawo binkilila anembo akuchita boobu kulindime: Basofwazya busena bwangu busalala, alimwi mubuzuba mbuboobo basofwazya buzuba butegwa nsabata yangu. ³⁹ Nkambo aawo mbakajaya banababo kuchitila zikozyanisyo zyabo, mpawo bakaza kubusena bwangu busalala ndilyo zuba akubusofwazya. Aboobo bona! Nzenzizyo nzibachita akati keng'anda yangu. ⁴⁰ Wakalayizizya bantu bakazwa kule, kuli aabo bakaza, aabo mbwakasambila, wabalambila menso aako, alimwi walibotyabotya anchoko zyalweebo. ⁴¹ Awo wakakkala abulo bubotu akutafula lyakabambidwe kunembo lyabo awo mpowakabika tununkilizyo twangu amafuta. ⁴² Aboobo kumvwikka kwamuyoliyoli walubunga wakali muzyungulukide; kuswanizya yoonse misuobo yabantu, nikuba ma Sabbiyeni bakeetwa kuzwa munkanda, alimwi bakabikwa zikobela kumaboko aabo angowani mbotu kumitwe yabo. ⁴³ Mpawo ndakati atala anguwe wakali wazakala abumambi, 'Lino bayooba alulalano anguwe, alakwe ambabo.' ⁴⁴ Bakanjila kuli nguwe, mbuli baalumi mbubanjila kulinguwe, muli yeeyi nzila bakanjila muli Owola a Owolibba, banakazi baamu. ⁴⁵ Pesi baalumi basalali bayochita lubeteko akubapa chisubulo mbuli basilumamba, alimwi bayobapa chisubulo amulandu wabaabo bakatila gaze, nkaambo mbasibwamu alimwi gaze lilimumaanza aabo. ⁴⁶ Aboobo Mwmai Jehova waamba boobu: Ndiyobusya nkamu yalumamba itakazyanie aabo akubaaba kuti bakondonganisigwe akumwayigwa. ⁴⁷ Mpawo eeyo inkamu yalumamba iyobatulula amabwe akubagonkoola azipanga zyabo. Bayojana bana balombe abasimbi akutenta maanda aabo. ⁴⁸ Nkaambo ndiyogwisya inchito zyamawuse kuzwa kunyika akuzyotolola boonse banakazi kuchitila kuti tabachiti mbuli basibwaamu lubo. ⁴⁹ Aboobo bayochita nchito zyako zyamawuse zikakusandukile. Uyolangana amilandu yazibi zyako azikozyanisyo zyako, alimwi muli yeeyi nzila uyoziba kuti ndime Mwami Jehova.''