¹ Mpawo jwi lya Jehova lyakasika kulindime kaliti, ² ''Lino we, mwana mulombe wamuntu, ulabeteka na? Ulabeteka na dolopo lya bulowa? Muchite azibe zisesemyo zyakwe zyoonse. ³ Weelede kwaamba kuti, 'Mwami Jehiva waamba eechi: Ooyu muunzi uutila bulowa aakati kakwe kuti kuchitila kuti chiindi chakwe chisike; muunzi uuchita zitoombe kuti usofwaale. ⁴ Waba simuandu abuowa oobo mbuwakatila, aimwi wasofwaazigwa azitoombe eezyo nziwakachita. Wafwiinsya mazuba aako alimwi mamanino aaminyaka yako asika. Nkinkaako ndiyokuchita chisampuzi kuzisi a chisesyo kunyika zyoonse. ⁵ Boonse bali afwiifwi a bali kule anduwe bayookuninda - we nodolopo lisofweede - ampuwo koonse yakuba uuzwide lunyongano. ⁶ Langa! Bazululi ba Izilayeli, umwi awumwi amanguzu aakwe, baza kulinduwe kuzootila bulowa. ⁷ Balasampawula mawisi amanyina mulinduwe, alimwi bakasyanikizya bazwakule aakati kanu. Bakajata bubi bamuchaala a bamukabafu aakati kanu. ⁸ Mwakanyansya zintu zyangu zisalala alimwi mwakasofwaazya ma Sabata angu. ⁹ Baalumi balengela bamwi twaambo basika mulinduwe kuzootila bulowa, alimwi balyida aazilundu. Bachita bubi aakati kanu. ¹⁰ Mulinduwe baalumi bavumbula maya ya wisi. Mulinduwe balanyonyongania banakazi basofweede muchiindi chabo chakumweezi. ¹¹ Baalumi bachita zisesemyo abanakazi babasimayakilane aabo, alimwi baalumi basofwaazya bamukamwana babo chamawuse; baalumi bajata bubi bachizi babo - bana basimbi bamawisi aabo - zyoonse eezi zilachitwa mulinduwe. ¹² Aaba baalumi babweza nsinkamulomo mulinduwe kuti batile bulowa alimwi wakazibotelwa akujana mpindu mpati loko, alimwi mbimuyakilene aabo kwiinda mukudyaamizya, alimwi mwakandiluba - ooku nkwaamba kwa Mwami Jehova. ¹³ Bona! Akuboko kwangu ndawuma zijanwa chakutasyomeka nchiwakachita, akutika kwa bulowa aakati kako. ¹⁴ Uyooyima na moyo wako, ayoosima na maboko aako mumazuba ngendiyoolangana anduwe? Ime, Jehova, ndikwaamba eechi, alimwi ndiyoochichita. ¹⁵ Aboobo ndiyomumwayisya aakati kamasi akumusansaania mumanyika. Muli yeeyi nzila njoogwisya busofwaazi bwanu kuzwa kulindinywe. ¹⁶ Aboobo uyooba uusofweede kumenso aamanyika. Mpawo uyooziba kuti ndime Jehova.''' ¹⁷ Mpawo jwi lya Jehova lyakasika kulindime kaliti, ¹⁸ ''Mwana mulombe wamuntu, ng'anda ya Izilayeli yaba sifwisifwi kulindime. Boonse baba zyakulya zyasyaala zya mukuba a tiini, butale a liidi mulinduwe. Bayooba mbuli sifwisifwi lya nsiliva mumvuto yanu. ¹⁹ Nkinkaako Mwami Jehova waamba eechi, 'Akaambo kakuti moonse mwaba mbuli sifwisifwi, nkinkaako, langa! Ndaamba kumubungania aakati ka Jelusalemu. ²⁰ Mbuli muntu mbabungania nsiliva, mukuba, butale, liidi, tiini akubika mumvuto kuti ayiyeemune, alimwi balafulida mulilo aalinjiyo kuti iiyeemune, aboobo ndiyoomubungania mubukali amubunyeme bwangu, aimwi ndiyoomubika oomo akumuyeemune. ²¹ Ndiyoomubungania alimwi nkafulide mulilo wabukali bwangu alindinywe, alimwi muyoyeemunwa aakati kayo. ²² Mbuli nsiliva mbiiyeemunwa mumvuto, muyoyeemunwe mulinjiyo, alimwi muyooziba kuti ime, Jehova, ndatila bukali bwangu alindinywe!''' ²³ Ijwi lya Jehova lyakasika kulindime kaliti, ²⁴ ''Mwana mulombe wamuntu, mwaambile kuti, 'Ulinyika iitanasalazigwa pe. Takwe mvula mubuzuba bwabukali! ²⁵ Basinsimi bajatana mububi aakati kakwe, mbuli mulavu uuvuluma kaikukwamuna nchaajata. Balalya buumi akutola buvubi bweebeka; bachita bamukabafu biingi aakati kakwe! ²⁶ Bapayizi bakwe bachita lupyopyongano kumulawu wangu, alimwi balasofwaazya zintu zyangu zisalala. Tabasiyanisyi zintu zisalala azintu xzisofweede alimwi tabayisyi kusiyana kuliwo aakati kakutasalala akusalala. Balasisa menso aabo kuzwa ku ma Sabata angu kuchitila kuti ndisofwaazigwe aakati kabo. ²⁷ Bana balombe babami bali anguwe bali mbuli bawumpe bazavuula nzibajata. Balatila bulowa akunyonyoona buumi kuti bachite mpindu chakutasyomeka. ²⁸ Basinsimi bakwe babazila ampende iituba iikumbuuka; babona zilengano zyakubeja akubaambila zichiza zyakubeja. Balati, ''Mwami Jehova waamba eechi'' aawo Jehova mpataambwiide pe. ²⁹ Bantu bamunyika baladyaamizya chakubba a kunyanzya mbono, alimwi bajata bubi bafwaba a babula, baladyaamizya muzwakule kakutakwe kaambo. ³⁰ Aboobo ndakalanguula muntu aakati kabo utayake bulambo alimwi uutayimikile kunembo lyangu kayiminina nyika kuti nditayinyonyooni, pesi takwe ngundakajana pe. ³¹ Aboobo ndiyootila bukai bwangu alimbabo. Ndiyobamana amulilo wabukali bwangu akuchita nzila yabo aamitwe yabo beni - ooku nkwaamba kwa Mwami Jehova.