¹ Zyakachitika mumunyaka wamusanu ayibili, mubuzuba bwakkumi mumweezi wasanu, kuti bapati ba Izilayeli bakaza kuzoobuzya kuli Jehova akukkala kunembo lyangu. ² Mpawo jwi lya Jehova lyakasika kulindime kaliti, ³ ''Mwana wamuntu, amba kubapati ba Izilayeli alimwi utedi kulimbabo, 'Mwami Jehova waamba eechi: Mwaza kuzoobuzya na kuindime? Mbuli mbechipona, nsikoyoobuzigwa andinywe pe! - ooku nkwaamba kwa Jehova.' ⁴ Uyoobabeteka na? Mwana wamuntu, uyoobeteka na? Kabazibye aatala azisesemyo zyamawisi. ⁵ Katedi kulimbabo, 'Mwami Jehova waamba eechi: Mubuzuba oobuya mbundakasala Izilayeli akunyampula luboko lwangu kukukonka chizuminano kulunyungu lwa ng'anda ya Jakkobu ndakalizibya kulimbabo munyika ya Ijipiti, aawo nindakanyampula luboko lwangu kukukonka chizuminano kulimbabo. Ndakati, ''Ndime Jehova Leza wanu'' - ⁶ mubuzuba oobo ndakanyampula luboko lwangu kukukonka chizuminano kulimbabo kuti ndiyoobagwisya kuzwa munyika ya Ijipiti kuya munyika eeyo njindakabasalila chakuchenjela. Yakali kukunka malili abucha; yakali zilulwidwe kabotu loko aakati kanyika zyoonse. ⁷ Ndakati kulimbabo, ''Umwi awumwi muntu ngasowe zintu zisesemya kuzwa kubusyu bwakwe azitoombe zya Ijipiti. Mutalisofwaazyi; ndime Jehova Leza wanu.'' ⁸ Pesi bakandipapila aimwi tebakali kuyanda pe kuliswiilila. Takwe muntu pe wakasowa zintu zisesemya kuzwa kumenso aakwe nikuba wakaleka zitoombe zya Ijipiti, aboobo ndayeeya kutila bukali bwangu aalimbabo kuti ndikkutye lunyemo lwangu aakati kabo aakati kanyika ya Ijipiti. ⁹ Ndakachichita akaambo kazina lyangu kuti litasampawulwi kumenso aazisi ooko nkubakali kukkala. Ndalizibya kulimbabo, kumenso aabo, akubagwisya kuzwa munyika ya Ijipiti. ¹⁰ Aboobo ndakabagwisya kuzwa munyika ya Ijipiti akubeeta munkanda. ¹¹ Mpawo ndakabapa milayizyo yangu akuchita mbeta zyangu kuti zizibinkane kulimbabo, muli nzizyo muntu mwayooponena na wazilemeka. ¹² Alimwi ndakabapa ma Sabata aangu mbuli chitondeezyo aakati kangu ambabo, kukuziba kuti ndime Jehova uubachita kuti basalale. ¹³ Pesi ng'anda ya Izilayeli yakandipapila munkanda. Tebakeenda mumilayizyo yangu pe; pesi bakakaka mbeta zyangu eeyo muntu mwayooponena na wayilemeka. Bakasampawula loko ma Sabata angu, aboobo ndakati ndiyootila kunyema kwangu alimbabo munkanda kuchitila kubamaninsya. ¹⁴ Pesi ndakachichita kuti zina lyangu litasampawulwi kumenso aazisi, kunembo lyabo ooko nkundakabagwisya kuzwa ku Ijipiti. ¹⁵ Aboobo mebo lubo lwangu ndakanyampula luboko lwangu kukukonka chizuminano kulimbabo munkanda kuti nsikoyoobatola munyika eeyo njindakali kuyoobapa, nyika iikunka malili abuchi, eeyo iizilulwidwe kabotu loko aakati kamanyika woonse. ¹⁶ Ndakakonka eechi nkaambo bakakaka milayizyo yangu akusampawula ma Sabata angu, mbukunga myoyo yabo yakali kutobela zitoombe zyabo. ¹⁷ Pesi linso lyangu lyakabakwabilila kuzwa ku lunyinyooko lwabo alimwi tendakabanyonyoona pe munkanda. ¹⁸ Munkanda ndakaambila bana babo, ''Muteendi mumilayizyo yabamawuso, nikuba kubamba milawu yabo, na kuisofwaazya azitoombe zyabo. ¹⁹ Ndime Jehova Leza wanu, mweende mumilayizyo yangu; mubambe mbeta zyangu akuziswiilizya. ²⁰ Mubambe ma Sabata angu asalale kuti akabe chitondeezyo aakati kangu andinywe, mukuyooziba kuti ndime Jehova Leza wanu.'' ²¹ Pesi bana babobaombe abasimbi bakandipapila. Tebakeenda mumilayizyo yangu pe nikuba kubamba mbeta zyangu, oomo muntu mwakonzya kuponena na wazilemeka. Bakasofwaazya ma Sabata angu aboobo ndakayeeya kutila bukali bwangu alimbabo kuti nkutisye lunyemo lwangu aatala ambabo munkanda. ²² Pesi ndakakasya luboko lwangu kukuchitila zina lyangu kuti litasampawulwi kumenso aazisi ooko nkundakagwisya ba Izilayeli. ²³ Mebo lwangu ndakanyampula luboko lwangu kukukonka kulimbabo munkanda kuti ndiyoobasansaania aakati kabamaasi akubamwayisya mumanyika. ²⁴ Ndakayeeya kuchita eechi mbulu kuti tebakalemeka mbeta zyangu pe, akuti bakakaka milayizyo yabngu akusampawula ma Sabata angu. Menso aabo akalikupeekezya kuzitoombe zyabamawisi aabo. ²⁵ Mpawo mebo lubo ndakapa milayizyo eeyo yakatali mibotu ambeta nzibatakonzyi kuponena. ²⁶ Ndakabaamba kuti balisofweede kwiindila muzipo zyabo - bakachita zipayizyo zyabana babo bataanzi beda akubachita kuti biinde mumulilo - kuti ndikabazuzye achiyoosyo mukuyooziba kuti ndime Jehova!' ²⁷ Nkinkaako, mwana mulombe wamuntu, ambuula kung'anda ya Izilayeli alimwi utedi kuimbabo, 'Mwami Jehova waamba eechi: Muli cheechi alubo bamawuso bakandisampawula aawo nibakatasyomeka kulindime. ²⁸ Aawo nindakabanjizya munyika njindakakonkezya kubapa, eelyo mpawo kufumbwa nibakalikubona kalundu kulamfu amusamu uuli aamatu, bakali kupa zipayizyo zyabo, bakali kundinyemya azipo zyabo. Ooko alubo bakatenta tufwefwelenga twatununkilizyo akutila zipo zyakunywa. ²⁹ Mpawo ndakati kulimbabo, ''Mbuubuli busena oobu nkumweeta zipo nkuko?'' Aboobo zina litegwa Bbama kusikila buzuba oobuno.' ³⁰ Nkinkaako ambila ng'anda ya Izilayeli kuti, 'Mwami Jehova waamba eechi: Nkaamboonzi nimulisofwaazya anzila zyamawuso? Aboobo nkaamboonzi nimuchita mbuli ba sibwaamu, mukuyanduula zintu zisesemya? ³¹ Aawo nimupa zipo zyanu - nimuchita bana banu balombe kuti biinde mumulilo - kusikila sunu muchilisofwaazya azitoombe zyanu zyoonse. Aboobo nkaamboonzi nensikamuleke kuti mundiyanduule, yo ng'anda ya Izilayeli? Mbuli mbechipona - ooku nkwaamba kwa Jehova - nsikoyoomulekela kuti mukandiyanduule. ³² Muzeezo ooyo uulikubumbwa muboongo bwanu tukoyoochitika pe. Mulaamba kuti, ''Ngatube mbuli zimwi zisi, mbuli imwi mikowa iili muli zimwi nyika aabo bakomba chisamu abbwe.'' ³³ Mbuli mbechipona - ooku nkwaamba kwa Jehova - ndiyoomweendelezya ajanza lili aanguzu, kuboko kunyampwidwe, alunyemo luyootililwa alindinywe. ³⁴ Ndiyomugwisya kuzwa kuli bamwi bantu akumuyobolola kuzwa kumanyika nkumwakamwayikilide. Ndiyoochita eechi ajanza lyangu lili anguzu alunyemo lutilidwe. ³⁵ Mpawo ndiyoomweeta munkanda yabantu, alimwi nkukooko ndiyomubeteka kumenso akumenso. ³⁶ Mbuli mbundakabeteka bamawuso munkanda yanyika ya Ijipiti, aboobo ndiyomubeteka anywebo - ooku nkwaamba kwa Mwami Jehova. ³⁷ Ndiyomuchita kuti mukayinde aansi amufunko wangu, alimwi ndiyomuchita kuti mukalemeka ziyandwa achizuminano. ³⁸ Ndiyoosansamuna kuzwa aakati kanu bandipapila abasichinguni. Ndiyoobagwisya kuzwa munyika eeyo njibakkede mbuli bazwakule, pesi tabakoyoonjila nyika ya Izilayeli. Mpawo muyooziba kuti ndime Jehova. ³⁹ Aboobo kulindinywe, ng'anda ya Izilayeli, Mwami Jehova waamba eechi: Umwi awumwi wanu weelede kwiinka kuzitoombe zyakwe. Mukazikombe na mwakaka kuswiilila kulindime, pesi tamweelede limbi kusofwaazya zina lyangu lisalala azipo azitoombe zyanu. ⁴⁰ Nkaambo aachilundu changu chisalala, aansonge yachilundu cha Izilayeli - ooku nkwaamba kwa Jehova - boonse beng'anda ya Izilayeli bayondikomba munyika eeyo. Ndiyoobotelwa kuyanda zipo zyanu nkukooko, alimwi amichelo mitaanzi yanu antoomwe azintu zyanu zisalala. ⁴¹ Ndiyomutambula mbuli tufwefwelenga twatununkilizyo aawo ndaakumugwisya kuzwa kubantu akumuyobola kuzwa kumanyika nkumwakamwayikilide. Ndiyolitondeezya lwangu mbuli uusalala aakati kanu kuti manyika akabone. ⁴² Mpawo eelyo nindiyoomugwisya munyika ya Izilayeli, kunyika eeyo njindakanyampwida luboko lwangu kukukonka kwiipa kuli bamawuso, muyooziba kuti ndime Jehova. ⁴³ Ooko muyoyeeya nzila zyanu anchito zyanu nzimwakasofwaazya lwanu, alimwi muyolisola lwanu mumenso anu akaambo kanchinto zyanu mbi nzimwakachita. ⁴⁴ Aboobo muyooziba kuti ndime Jehova eelyo ndaakuchita eezi akaambo kazina lyangu, peepe kumilimu yanu mibi alimwi peepe kunchito zyanu zitaluleme, yo ng'anda ya Izilayeli - ooku nkwaamba kwa Jehova.''' ⁴⁵ Mpawo jwi lya Jehova lyakasika kulindime kaliti, ⁴⁶ ''Mwana mulombe wamuntu, lanzya busyu bwako kunyika zya kumusanza, alimwi waambuule aatala amusanza; sinsima aatala alusaka lwa ku Negevi. ⁴⁷ Ambila lusaka lwa Negevi, 'Ooku nkwaamba kwa Jehova - Mwami Jehova waamba eechi: Bona, ndiyoobika mulilo aakati kanu. Uyootenta musamu mutete amusamu muyumu aakati kanu. Mangalaba aatenta takoyoozimika pe; masyu woonse kuzwa kumusanza kusikila kunyika ayootentwa. ⁴⁸ Mpawo nyama yoonse iyoobona kuti ndime Jehova aawo ndaakuyasya mulilo, alimwi tukoyoozimika pe.''' ⁴⁹ Mpawo ndakati, ''Ala! Mwami Jehova, balikuti aatala andime, Tali sikwaamba zikozyano biyo na ooyu?'''