¹ Alubo jwi lya Jehova lyakasika kulindime kaliti, ² ''Mwambaanzi nywebo nimubelesya kasimpi aatala anyika ya Izilayeli akuti, 'Ba mataata balya masaansa aapanyuka, alimwi meno aabana asibisigwa?' ³ Mbuli mbepona - ooku nkwaamba kwa Mwami Jehova - takuchiyooba limbi aawo mpumuyookonzya kubelesya kasimpi aaka mu Izilayeli. ⁴ Langa! Boonse buumi buzwa kuindime - buumi bwa wisi a bwa mwana mulombe, buzwa kulindime! Muntu uubisya nguwe uyoofwa! ⁵ Niinzi chinga chilaambwa aatala amuntu uululeme alimwi uubamba busalali a bululami - ⁶ na taalyida aajulu aachilundu na kunyampula menso aakwe kuzitoombe zya ng'anda ya Izilayeli, alimwi taasofwazya mwanakazi wa simayakilane wakwe, nikuba kwiinkila mwanakazi kuchiindi nali kumweezi, mwaalumi uululeme na? ⁷ Niinzi zinga zilaambwa aatala a mwaalumi utadyamizyi muntu nikuba umwi alimwi wabweedezya kuli basizikkwelete eezyo zyakabikidwe mbuli chijatisyo kumali yakucheneka? Alimwi tabbi pesi upa chakulya chakwe kuli basinzala aimwi ulavumba maya azizwaato, mwaalumi uululeme na? ⁸ Niinzi zinga zilaambwa aatala a mwaalumi uutayinzilizyi mbadalo kumali yakucheneka, aimwi uutajani mpindu yiindilide kuli zeezyo nzyawuzya? Zyaambidwe kuti uchita mbukweelede alimwi usimpika kusyomeka aakati kabantu. ⁹ Na mwaalumi ooyo weenda mumbeta zyangu akubamba malayilile aangu mukusyomeka, mpawo chisyomezyo cha mwaalumi ooyu ncheechi: Nchobeni uyoopona! - ooku nkwaamba kwa Jehova. ¹⁰ Pesi tutedi uli aamwana sinkondo ooyo uutila bulowa akuchita chimwi chazeezi zintu zyaambwa, ¹¹ (nikuba wisi taakachita nichiba chimwi chazeezi). Ulyida aajulu aachilundu alimwi ulasofwaazya mwanakazi wa simayakilane wakwe, nchiinzi chakwaamba aatala anguwe? ¹² Ooyu mwaalumi udyamizya bafwaba a babula, tanyanzyi alimwi ulabba, tabweedezyi chikkwelete, alimwi unyampula menso aakwe kuzitoombe akuchita zisesemyo, ¹³ alimwi ulacheneka mali yachimbazo, alimwi uchita mpindu mpati loko kuli zeezyo nzyasambala, mwaalumi ooyo weelede kupona na? Nchobeni takoyoopona pe! Nchobeni uyoofwa aimwi bulowa bwakwe bunoli aalinguwe nkaambo kakuti wakachita zyoonse zintu eezi zisesemya. ¹⁴ Pesi langa! Tutedi kuli mwaalumi wakazyaa mwana mulombe, aimwi mwana wakwe mulombe wabona zibi zyoonse zyakachitwa awisi, alimwi nikuba wazibona tazichiti pe zintu eezyo. ¹⁵ Mwana mulombe ooyu talyidi aajulu aachilundu, alimwi tanyampuli menso aakwe kuzitoombe zya ng'anda ya Izilayeli alimwi tasofwaazyi mwanakazi wa simayakilane wakwe, nchiinzi chwakwaamba aatala anguwe? ¹⁶ Ooyo mwana mulombe tadyamizyi naba womwe, na kunyanzya chisyomezyo chachipo na kubweza zintu zyakubba, pesi anikuti ulapa chakulya chakwe kuli basinzala alimwi ulavumba bali maya azizwaato. ¹⁷ Mwana mulombe ooyu tadyaamizyi naba womwe nikuba kubweza mali nyingi na kujana mpindu mpati kumali yakucheneka, pesi ubweza mbeta zyangu akweenda mumalayilie aangu; ooyomwana mulombe takoyoofwida chibi chawisi: Uyoopona chakasimpe! ¹⁸ Wisi wakwe, mbuli kuti wakadyaamizya bamwi akubajata changuzu akubbida mukulana wakwe, akuchita chibotu aakati kabantu - langa, uyoofwa muzibi zyakwe. ¹⁹ Pesi waamba kuti, 'Nkaamboonzi mwana mulombe natafwidi milandu yawisi?' Nkaambo mwana mulombe uchita bululami abusaali alimwi ulabamba mbeta zyangu zyoonse; ulazichita. Nchobeni uyoopona! ²⁰ Ooyo uubisya nguwe uutakafwe. Mwana mulombe tokoyoofwida milandu yawisi pe, alimwi wisi takoyoofwida milandu ya mwana wakwe mulombe pe. Bululami bwawoyo uuchita ziluleme bunooli aalinguwe, alimwi bubi bwa mubisyi bunooli aalinguwe. ²¹ Pesi na mubisyi wasanduka kuzwa kuzibi zyakwe zyoonse nzyakachita , alimwi wabamba mbeta zyangu zyoonse alimwi wachita bululami abusalai, nchibeni uyoopona takoyoofwa pe. ²² Milandu yakwe yoonse njanooli wakachita tichiyooyeeyegwi limbi aalinguwe. Uyoopona abusalali mbwanoli wachita. ²³ Kujana ndabotelwa kapati na aatala alufu lwa sizibi - ooku nkwaamba kwa Jehova - kutali kukuzwa kwakwe kunzila yakwe kuchitila kuti apone? ²⁴ Pesi na mululami wazwa kubululami bwakwe alimwi wachita chibi akuchita zitondwa zichitwa aasizibi, uyoopona na? Boonse bululami mbwakachita tabuchiyooyeeyegwi limbi aawo nayonduuzya. Aboobo uyoofwa muzibi nzyatanooli wachita. ²⁵ Pesi waamba kuti, 'Nzila ya Mwami tiili kabotu pe!' Swiilila, ng'anda ya Izilayeli! Nzila zyangu tazili kabotu na? Teensi nzila zyanu na zitali kabotu? ²⁶ Musalali nazwa kubusalali bwakwe, alimwi wachita zibi akufwa akaambo kanzizyo, mpawo uyoofwa muzibi nzyaachita. ²⁷ Pesi na mwaalumi sizibi wasanduka kuzwa kuzibi zyakwe eezyo nzyakachita aimwi wachita zili kabotu a buluami, unooli wabamba buumi bwakwe. ²⁸ Nkaambo unoli wabona akusanduka kuzwa kuzibi zyakwe nzyaakachita. Nchobeni uyoopona, alimwi takoyoofwa pe. ²⁹ Pesi na ng'anda ya Izilayeli yaamba kuti, 'Nzila ya Mwami tiilikabotu pe!' Inzila yangu tiilikabotu biyeni, ng'anda ya Izilayeli? Ninzila zyenu zitalikabotu. ³⁰ Nkinkaako ndiyoobeteka umwi awumwi mwaalumi aakati kanu kwiindila munzila zyakwe, ng'anda ya Izilayeli! - ooku nkwaamba kwa Mwami Jehova. Musanduke alimwi muzwe kuzibi zyanu zyoonse kuchitila kuti zitakabi zilebyo zyazibi aatala andinywe. ³¹ Kuzwa kulindinywe, mukasowe yoonse milandu yanu njimwakachita; mukalichitile moyo mupya a muuya mupya. Nkaambonzi nowelede kufwa, ng'anda ya Izilayeli? ³² Nkaambo nsikwe kubotelwa mulufu lwawoyo uufwa - ooku nkwaamba kwa Mwami Jehova - aboobo sanduka upone!''