¹ Alubo jwi lya Jehova lyakasika kulindime kaliti, ² ''Mwana wamuntu, sinsima aatala abasinsimi balikusinsima mu Izilayeli, alimwi waambe kulibaabo balikusinsima zizwa mumiyeeyo yabo, 'Muswiilile kujwi lya Jehova. ³ Mwami Jehova waamba eechi: Maawe kubasinsimi bafubafuba batobelela myuuya yabo, pesi batakwe nchibakabona! ⁴ Izilayeli, basinsimi bako bakaba mbuli bamwaaba bali munyika zitachikwe lugwasyo pe. ⁵ Tamunaakwiinka pe kung'anzi zyabulambo buzyungulukide Izilayeli kuti mukabubambulule kuti bukakonzye kwiimikila munkondo mubuzuba bwa Jehova. ⁶ Bantu babona zilengano zyakubeja akwaamba zizazitalinzizyo, aabo baamba kuti, ''Eechi acheechi nkwaamba kwa Jehova.'' Jehova tabatumide pe, pesinikuba boobo bakachita bantu kuti babe aabulangilizi kuti milumbe yabo iyoozuzikizigwa. ⁷ Sa tamunaabona zyakubeja a kwaamba zyakubeja ziza imywe nimwaamba kuti, ''Eechi acheechi nkwaamba kwa Jehova'' aawo mebo mpesyaambwiide pe?' ⁸ Nkinkaako Mwami Jehova waamba boobu, 'Akaambo kakuti mwakali aazilengano zyakubeja alimwi mwakaamba mabejo - nkinkaako nkoku kwaamba kwa Mwami Jehova aatala anduwe: ⁹ Kuboko kwangu kuyoolwisya basinsimi bali aazilengano zyakubeja alimwi baamba zitali nzizyo ziza. Tabakoyooba mumbungano yabantu bangu, na kulembwa mumalembe aang'anda ya Izilayeli; tabeelede pe kwiinka kunyika ya Izilayeli. Muyooziba kuti ndime Mwami Jehova! ¹⁰ Akaambo kacheechi akuti bakazulwida bantu bangu chakubasowa akwaamba kuti, ''Luumuno!'' aawo aatakwe luumuno, balikuyaka bulambo mbubatazoozile ampende iituba ibuuluka.' ¹¹ Baambile aabo balikuzila bulambo ampende iituba ibuuluka kuti, 'Buyookolomoka; kuyoowa mvula mpati alimwi ndiyootumina chivula mabwe kuti bukawide aansi, aguwo pati kuti likawuwisizye aansi. ¹² Bona, bulambo buyoowida aansi. Bamwi tebakakwaambila na kuti, ''Ilikuli mpende iituba ibuuluka njimwakabikide aalimbubo?'' ¹³ Nkinkaako Mwami Jehova waamba eechi: Ndiyoyeta guwo pati mukubijilwa kwangu kupati, alimwi kuyooba mazambangulwe aamvula mukunyema kwangu kupati! Chivula mabwe mukubijilwa kwangu kupati chiyoobanyonyoona. ¹⁴ Nkaambo ndiyookwamwida aansi bulambo mbumwazila ampende iituba ibuuluka, alimwi ndiyoowudilisizya aansi akumwaya ntalisyo yawo. Aboobo uyoowa alimwi muyoonyonyoonwa aakati kabo. Mpawo muyooziba kuti ndime Jehova. ¹⁵ Mukubijilwa kwangu kupati ndiyoonyonyoona bulambo antoomwe abaabo bakabuzila mpende iituba ibuuluka. Ndiyooti kulindinywe, ''Bulambo tabuchiwo pe, nikuba aabo bakabuzila ampende iituba ibuuluka - ¹⁶ basinsimi ba Izilayeli aabo bakasinsima aatala a Jelusalemu alimwi bakali aazilengano zya luumuno aatala anjiyo. Pesi takwe luumuno pe! - ooku nkwaambuula kwa Jehova.''' ¹⁷ Aboobo we mwana wamuntu, bika busyu bwako aatala abana basimbi babantu bako basinsimi zizwa mumiyeeyo yabo, alimwi ukasinsimi aatala ambabo. ¹⁸ Amba kuti, 'Mwami Jehova waamba eechi: Maawe ku banakazi aabo basuna zimpanganiko kuli chimwi achimwi chimpanzi chakuboko kwabo akulichitila zidabba zyamitwe yabo zyamyeelwe yoonse, zibelesegwa kukuvwimya bantu. Sena mulavwima bantu bangu pesi kamukwabilila mawumi eenu? ¹⁹ Mwandisampawula aakati kabantu bangu akaambo ka bbali uuzwide jaanza, abufwefwelenga bwachinkwa, kujaya bantu bateelede kufwa, akubamba mawumi aabaabo bateelede kupona, akaambo kamabejo aanu kubantu bakamumvwa. ²⁰ Nkinkaako Mwami Jehova waamba eechi: Ndilikulwanisya zimpanganiko nzimwakabelesya kukucha mawumi aabantu mbuli kuti ntuyuni. Nchobeni ndiyoobadeluula kuzwa mumaanza aanu; ndiyoowangununa aabo mbimwakacha mbuli tuyuni. ²¹ Ndiyoodeluula ziddaba zyanu zyakumitwe alimwi nkavune bantu bangu kuzwa kujaanza lyanu. Tabachiyoobi kabachedwe limbi mu maboko aanu. Muyooziba kuti ndime Jehova. ²² Akaambo kakuti mulatyompa moyo wa musalali amabejo, nikuba tendalikuyanda kutyompwa kwakwe, akuti mulasungwaazya nchito zyamuntu uutaluleme kuti atakonzyi kuzwa munzila yakwe kuti afutule buumi bwakwe - ²³ nkinkaako tochiyoobi aazilengano zyakubeja limbi pe na kwiinkilila nkowamba lyejunza, nkaambo ndiyoovuna bantu bangu kuzwa kujaanza lyako. Muyooziba kuti ndime Jehova.