¹ Bamwi ba baalu ba Izilayeli bakasika kulindime, bakkala kunembo lyangu. ² Mpawo jwi lya Jehova lyakasika kulindime kaliti, ³ ''Mwana wamuntu, aaba baalumi nakabweza zitoombe zyabo mumyoyo yabo akubika chilebyo chazibi zyabo kunembo lya busyu bwabo. Kujana ndabuzigwa na aambabo? ⁴ Nkinkaako baambile eechi alimwi waambe kuti, 'Mwami Jehova waamba eechi: Woonse mwaalumi wa mung'anda ya Izilayeli uubika zitoombe mumoyo wakwe, na uubika chilebyo chazibi kunembo lyabusyu bwakwe, akuza ku musinsimi - imende Jehova, bweelene amweelo wazitoombe zyakwe. ⁵ Ndiyoochita boobu kuchitila kuti ndikaboozye ng'anda ya Izilayeli mumyooyo eeyo yakaba kule kuzwa kulindime akaambo kazitoombe zyabo.' ⁶ Nkinkaako wambila ng'anda ya Izilayeli kuti, 'Mwami Jehova waamba eechi: Musanduke akuzwa kuzitoombe zyaanu! Mugwisye masyu anu kuzwa ku zisesemyo zyanu zyoonse. ⁷ Nkaambo woonse wamung'anda ya Izilayeli a woonse muzwakule uukkala mu Izilayeli uunditantamuka, uubika zitoombe zyakwe mumoyo wakwe alimwi uubika chilebyo chachibi chakwe kunembo lya busyu bwakwe, mpawo waza ku musinsimi kuzoondiyanduula - ime nde Jehova ndiyoomusandula lwangu ndemwini. ⁸ Aboobo ndiyoobika busyubwangu kukumulwisya akumuchita chitondeezyo akasimpi nkaambo ndiyomugwisya aakati kabantu bangu, mpawomuyooziba kuti ndime Jehova. ⁹ Na musinsimi weenwa alimwi waamba mulumbe, mpawo me, nde Jehova, ndiyoyena musinsimi ooyo; ndiyotandabika kuboko kwangu kukumulwisya akumunyonyoona kuzwa aakati kabantu bangu ba Izilayeli. ¹⁰ Bayoobweza milandu yabo; milandu yabasinsimi iyookozyania amilandu ya sikubuzya kuzwa kulinguwe. ¹¹ Akaambokacheechi, ing'anda ya Izilayeli tiikoyoozungaana limbi kuzwa kulindime mukunditobela nikuba kuyoolisofwaazya limbi kwiindila mumilandu yabo. Bayooba bantu bangu alimwi ndiyooba Leza wabo - ooku nkwaamba kwa Mwami Jehova.''' ¹² Mpawo jwi lya Jehova lyakasika kulindime kaliti, ¹³ ''Mwana wamuntu, na nyika yandibisizya akuchita chibi chichita kuti nditandabike kuboko kwangu aatala anchicho akusinka ooko nkuchijana kulya, akutumina bbalangwe aatala anchicho akujaya bantu abanyama munyika; ¹⁴ mpawo nikuba aaba baalumi botatwe - Nowa, Daniyele, a Jobbu - nkakuli kuti bali aakati kanu, balikuyoovuna mawumi aabo luzutu akaambo ka bululami bwabo - ooku nkwaamba kwa Mwami Jehova. ¹⁵ Na ndatuma zinyama zibi munyika akwiichita kuti ibule michelo kuchitila kuti ibe nyika iitakwe chintu bantu nkubatakonzyi kutimbula akaambo kazinyama, ¹⁶ mpawo nikuba aaba baalumi botatwe bakali mulinjiyo - mbuli mbepona, mbwaamba Jehova - tebakali kuyookonzya pe nikuba kuvuna bana babo balombe na basimbi; luzutu mawumi aabo ngaali kuyoovunwa, pesi nyika yali kuyooba iitakwe lugwasyo. ¹⁷ Nikuba na ndayeta panga aatala anyika eeyo akwaamba kuti, 'Panga, koya munyika alimwi ujaye bantu abanyama,' ¹⁸ mpawo nikuba aaba baalumi botatwe bakali munyika - mbuli mbepona, mbwaamba Jehova - tebakali kuyookonzya pe nikuba kuvuna bana babo balombe na basimbi; luzutu mawumi aabo ngaali kuyoovunwa. ¹⁹ Nikuba na ndatuma chisubulo aatala anyika eeyi akutila bukali bwangu kwiindila mukutika kwa bulowa, kuti ndijaye bantu abanyama, ²⁰ mpawo nikuba Nowa, Daniyele, a Jobbu bakali munyika eeyo - tebakali kuyookonzya pe nikuba kuvuna bana babo balombe na basimbi; luzutu mawumi aabo ngaali kuyoovunwa akaambo kabululami bwabo. ²¹ Nkaambo Mwami Jehova waamba eechi: Ndiyoyindilizya kubijisya zintu akutuma zisubulo zyangu zine - bbalangwe, panga, banyama bamusokwe, a malwazi - aatala a Jelusalemu kukujaya bantu abanyama kuzwa kulinjiyo. ²² Pesi, langa! Bafutuke bayoochaala mulinjiyo, baponi batakayinke aanze abana balombe abana basimbi. Langa! Bayooza kulinduwe, alimwi uyoobona nzila anchito zyabo alimwi uyowumbulizigwa aatala achisubulo nchindatuma ku Jelusalemu, azyoonse nzindatuma aatala anyika. ²³ Bapona bayokuumbulizya waakubona nzila anchito zyabo, aboobo muyooziba zyoonse zintu nzindakachita aatala anjiyo kuti tendakazichita chabuyo! - ooku nkwaamba kwa Mwami Jehova.