¹ Lino Muuya wakandisumpula wandisisya kumulyango wakubuzwezuba wang'anda ya Jehova, uulangide kubuzwezuba nkabela kumanjililo kwakali baalumi bakali makkumi obile amusanu. Ndakabona Jazaniya mwana mulombe wa Azuli, a Pelatiya mwana mulombe wa Bbenaya, bazululi ba bantu, aakati kabantu. ² Leza wakati kulindime, ''Mwana wamuntu, aaba mbibaalumi babumba bubi, alimwi bapa lulayo lubi mumuunzi uno. ³ ''Bali kwaamba kuti, 'Lino teensi chiindi chakuyaka maanda pe; muunzi ooyu nimpoto, mpawo swe tuli nyama.' ⁴ Akaako sinsima chakubapa mulandu. Sinsima, mwana wamuntu.'' ⁵ Lino Muuya wa Jehova wakandiselukila wati ndaambe kuti: Oobu mbubo mbwaamba Jehova, ''Oobu mbubo mbolikwaamba, bg'anda ya Izilayeli; nkaambo ndilizi zilikuchitika mumiyeeyo yanu. ⁶ Mwavuzya bantu mbimwakajaya mumunzi ooyu alimwi mwazuzya migwagwa yawo ambabo. ⁷ Nkinkaako, Mwami Jehova waamba eechi: Bantu mbimwakajaya, aabo mbimulazikide mibili yabo mukati ka Jelusalemu, mbembabo nyama, alimwi muunzi ooyu ni mpoto. Pesi muyoogwisigwa kuzwa mukati kachisi eechi. ⁸ Mwayoowa panga, aboobo ndileeta panga aatala lyanu - ooku nkokwaamba kwa Mwami Jehova. ⁹ Ndiyoomugwisya kuzwa aakati lya muunzi alimwi ndikamubike mumaanza a bazwakule, nkaambo ndiyooyeta lubeta aalindinywe. ¹⁰ Muyoojiigwa aapanga. Ndiyoomubeteka mumigaano ya Izilayeli nkabela muyooziba kuti ndime Jehova. ¹¹ Ooyu muunzi tukoyooba mpoto yakujikila pe, nikuba nywebo kuyooba nyama aakati kawo. Ndiyoomubeteka mumigaano ya Izilayeli. ¹² Lino muyooziba kuti ndime Jehova ooyo uuli aambeta nzimwakatatobelezya pe alimwi ooy uuli aamilawu njimwakatachita pe. Pesi mwakachita milawu ya zisi zimuzyungulukide.'' ¹³ Zyakachitika kuti nindakalikusinsima, Pelatiya mwana mulombe wa Bbenayiya, wakafewa. Aboobo ndakavundama ndalila ajwi pati ndati, ''Akaka, Mwami Jehova, sena muyoolobya boonse bakasyeede ba Izilayeli?'' ¹⁴ Ijwi ly Jeova lyakandisikila lyakati, ¹⁵ ''Mwana wa muntu, bana bakwenu! Bana bakwenu! Baalumi bamukowa wako aboonse bang'anda ya Izilayeli! Boonse mbimbabo baambwa abaabo bakkala mu Jelusalemu kuti, 'Bali kulekuzwa kuli Jehova! Eeyi nyika twakayipegwa kuti twiivube.' ¹⁶ Aboobo amba kuti, 'MwamiJehova waamba eechi: Nikuba kuti ndabatandila kule aakati kamanyika alimwi nikuba ndabamwaya mumasena, pesi ndakabede chikombelo chabo kwachiindi chiniini mumasena ooko nkubaya.' ¹⁷ Nkinkaako amba kuti, 'MwamiJehova waamba eechi: Ndiyomubungania kuzwa kuli bamasi akumuyobolola kuzwa kuzisi nkumwakamwayikilide, alimwi ndiyoomupa nyika ya Izilayeli.' ¹⁸ Mpawo bayooyinka nkuko akuyoogwisya choonse chintu chisesemya azyoonse zilweza mubusena oobo. ¹⁹ Ndiyoobapa moyo womwe, alimwi ndiyoobika muuya mupya mulimbabo. Ndiyoogwisya moyo wabbwe kuzwa kunyama yabo akubapa moyo wanyama, ²⁰ kuti bakeende mumbeta zyangu, bakabweze milawu yangu akuyooyichita. Mpawo bayooba bantu bangu andime ndiyooba Leza wabo. ²¹ Pesi kuli baabo beende aziyandisyo zyabo kuzisesemyo a malweza aabo, ndiyooyeta nchito zyabo aamitwe yabo - ooku nkwaamba kwa Mwami Jehova.'' ²² Ba Kkelubbimu bakatandabika mababa aabo antoomwe amavili aakali kumbali lyabo, alimwi bulemu bwa Leza wa Izilayeli bwakali aajulu ambabo. ²³ Mpawo bulemu bwa Jehova bwakayinka kuzwa aakati kamuunzi akwiimikila aachilundu kujwe lya muunzi. ²⁴ Muuya wakandibweza akundeeta mu Chaludiya, kubantu bakachija kuzwa kunyika zyabo, mu chilengano kuzwa ku Muuya wa Leza, alimwi chilengano nchindakali ndabona chakazwa aalindime. ²⁵ Mpawo ndakaambila bantu aaba zyoonse zintu zya Jehova nzindakabona.