¹ Lino mwanakazi wawumwi wabana balombe babasinsimi wakeza bukwila kuli Elisha, kuti ndemulanda wako mulumi wangu wafwa, alimwi ulizi kuti mulanda wako walikuyowa Jehova. Lino sizikwelete weza kuzotola bana bangu bobile kuti babe bazike bakwe.'' ² Aboobo Elisha wakati kulinguwe, ''Niinzi nchinga ndilakuchitila? Kondambila kuti ninzi ncholacho mukati kang'anda eyi?'' Wakati, ''Mulanda wako takwepe nchalacho mukati kang'anda, pele kanongo katufuta kupela.'' ³ Mpawo Elisha wakati, ''Koya ukakumbile zibikkilo kumbi kubenzinyokwe, zibikilo zitakwe chintu. Ukumbile zibe zyiingi. ⁴ Mpawo ukanjile mukati akujala mulyango kusule lyako abana bako balombe, mpawo ukatile mafuta muzibikilo eezyo zyoonse; ubike kumbali zibikilo ezyo zitazule.'' ⁵ Eelyo wakasiya Elisha mpawo wajala mulyango lwakwe abana bakwe balombe. Bakeeta zibikilo kuli nguwe, mpawo wazizuzya amafuta. ⁶ Nizyakazula zibikilo, wakati kumwanakwe mulombe, ''Ndetele iimbi nongo.'' Pesi wakati kuli nguwe, ''Tachikwepe zimbi nongo.'' Mpawo mafuta akaleka kunozwa. ⁷ Mpawo wakabola wambila muntu wa Leza. Wakati, ''Koya, ukawuzye mafuta; ukaliye chikwelete, akuyopona abana bako balombe buumi bwako boonse kuli atakasyale.'' ⁸ Bumwi buzuba Elisha wakaya ku Sunemu oko mwanakazi mulemu nkwalikukkala; wakamusungilizya kulya chakulya anguwe. Lino chindi choonse Elisha nakali kwiinda, wali kwiimikila aawo kuti alye. ⁹ Mwanakazi wakati kumwalumi wakwe, ''Bona, kwalino ndanzinzunukwa kuti oyu mwalumi uusalala wa Leza ukkala kayinda awa. ¹⁰ Atuyake kaanda kanini kuchiluli kabe ka Elisha alimwi tubikke bulo, atebuli, achuuno, alimwi alampi. Alimwi asika kulindiswe, ulakkala nkuko.'' ¹¹ Lino nibwakasika buzuba bumbi Elisha wakiimikila oko, wakakkala mung'anda akulyokezya mumo. ¹² Elisha wakambila Gehazi mulanda wakwe, ''Yiita oyu mwanakazi waku Sunemu.'' Nakamwiita wakiima kubusyu bwakwe. ¹³ Elisha wakamwambila kuti, ''Umwambile kuti, wapengeleka loko nkambo kesu, tukuchitileenzi ? Ngatula kwambilila na kumwami naa kuli silutwe wankondo ? ''Wakavuwa, ''Ndikkede akkati kabantu bangu.'' ¹⁴ Mpawo Elisha wakati, ''Ino tumuchitileenzi, mpo?'' Gehazi wakasandula, ''Nkasimpe, alimwi takwepe mwana mulombe, alimwi mwalumi wakwe wachembaala.'' ¹⁵ Elyo Elisha wakasandula, ''Mwiite lubo.'' Muchindi nakamwiita, wakaiimikila amulyango. ¹⁶ Elisha wakati, ''Kuchiindi echino chamunyaka, muchindi chamunyaka omwe, unoli konojisi mwana mulombe.'' Wakasandula kuti, ''Pepe, simalelo wangu alimwi koli muntu wa Leza, utaambi kaambo kakubeja pe kumulanda wako.'' ¹⁷ Nekuba boobo mwanakazi wakazominta mpawo watumbuka mwana mulombe kuchiindi echo nchichonya mumunyaka wakatobela, mbuli Elisha mbwakamwambila. ¹⁸ Lino mwana nakakomena, bumwi buzuba wakaya kuli wisi, nkwakabede abasikutebula. ¹⁹ Elyo wakambila wisi kuti, ''Mutwe wangu, mutwe wangu.'' Wisi wakambila balanda bakwe kuti, ''Mubweze akumutola kuli banyina.'' ²⁰ Muchindi mulanda nakamubweza kumutola kuli banyina, mwana wakakkala azibelo zyabanyina mane akalangabwaseme lumwi wafwa. ²¹ Mpawo mwanakazi wakanyampuka walazika mwanamulombe abulo bwamuntu wa Leza, wajala mulyango wabbuda aanze. ²² Wakaiita mulumakwe, wamwambila kuti, ''Akaaka nditumine womwe wabalanda andonki yomwe kuti mfwambanine kumuntu waLeza akaboole okuno.'' ²³ Mulumakwe wakamba kuti, ''Nkamboonzi noyanda kuya kuli nguwe sunobu? Tensi mwezi mupya na buzuba butegwa Sabata.'' Wakaamba kuti, ''Chiyoba kabotu.'' ²⁴ Mpawo wakaanga ndonki waambila mulanda wakwe, ''Yeenzya chakufwambaana; utayeenzyi bunini pe manedo nkakwambile obo.'' ²⁵ Aboobo wakiinka wakusika kumuntu waLeza kuchilundu chakuKkalameli. Lino muntu waLeza nakamubona kulekule, wakambila Gehazi mulanda wakwe, ''Bona, nguulya ulaza mwanakazi waku Sunemi. ²⁶ Ikaaka chijaana uswanane awe umwambile kuti, saa kuli chintu chibotu anduwe amulumwi wako amwana?'' Wakamba kuti, ''Kuli kabotu.'' ²⁷ Eelyo nakasika kuchilundu kumuntu waLeza, wakamujata kumawulu. Gehazi wakaswena afwifwi kuti amutonteele kule pele muntu wa Leza wakamba kuti, ''Muleke alikke, nkambo ulibijilidwe, pesi Jehova wandisisila makani, takwepe anchandambila.'' ²⁸ Lino wakati, ''Ndakakumbila mwana na kuli nduwe, simalelo wangu? Saa tendakaamba, Útandeneni pe mebo'?'' ²⁹ Mpawo Elisha wakaambila Gehazi kuti, ''Zwata tubweze lweendo alimwi bweza mufunko wangu mujanza lyako. Yinka kumunzi wakwe. Naa waswanana amuntu munzila, utamujuzyi, alimwi nawakujuzya, utamuvwiili. Ukalazike mufunko wangu kubusyu bwamwana.'' ³⁰ Elyo banyina mwana bakati, ''Mbuuli Jehova mbwalimuumi, ambuli mbopona, nsikoyokusiya pe.'' Aboobo Elisha wakanyampuka wamutobela. ³¹ Gehazi wakafwambana kunembo lyabo wakugumya mwana mufunko kubusyu bwamwana, pele mwana takwepe nakaambula nikuba kumvwa. Aboobo mpawo Gehazi wakapiluka kuzoswanana a Elisha akumwambila kuti, ''Mwana takwepe naasinsimuka.'' ³² Lino Elisha nakasika kung'anda , alimwi mwana wakali fwide alimwi kachili abulo kalede. ³³ Aboobo Elisha wakanjila wajala mulyango kabali bobile akukomba kuli Jehova. ³⁴ Mpawo wakatanta walala atala amwana; wabika mulomo wakwe amulomo wamwana, menso akwe wabika amenso amwana, amaboko akwe kumaboko amwana. Wakalyoloola aatala amulombe elyo mubili wamulombe wakatalika kukasaala. ³⁵ Mpawo Elisha wakabuka wendeenda mung'anda akulyolola lwabili atala amulombe. Mwna wakeesemuka zyiindi zili musanu azibili akujula menso akwe! ³⁶ Mpawo Elisha wakiita Gehazi wakti, ''Yiita ooyu mwanakazi wakusunemu!'' Mpawo wakamwiita, nakanjila mung'anda, Elisha wakati, ''Bweza mwanako.'' ³⁷ Mpawo wakalala walanzya busyu bwakwe ansi kumawulu aakwe wakataamina ansi, mpawo wabweza mwana wakwe wayinkaanze. ³⁸ Mpawo Elisha wakabweda alimwi kuGiligala. Kwakali inzala mpati muchisi echo, abana baba sinsimi bakali kkede kubusyu bwakwe. Wakambila mulanda wakwe kuti, ''Simpika chilongo chipati amulilo ujikile bana babasinsimi insima.'' ³⁹ Umwi wabo wakaya aanze mumuunda akuchela chisyu. Wakajana sansa lyamusokwe wachela kulindilyo masansa amusokwe manji azuzya chibikilo chakwe. Bakanenguula akwabikka mumusinza, pele kabatezi mbwabede. ⁴⁰ Elyo bakatila musina kuti bantu balye. Chiindi, nibakali kulya, bakakwila kuti, ''Omuntu wa Leza, lufu mululi muchilongo!'' Tebakakonzya kulya alimwi. ⁴¹ Pele Elisha wakati, ''Leta busu bunante.'' Wakatila muchilongo wakati, ''Wungula uwabile bantu, kuchitila kuti balye.'' Mpawo bakalya kamutachikwe bubi pe muchilongo. ⁴² Kwakasika muntu kuzwa ku Bbaala Syalisya kumuntu wa Leza akweeta zinkwa zyaka balwebalwe zinkwa zyabbale musaka lyakwe lyakunyumpwida zili makumi obile, amayila mapya akutoma kuzwa mugoloka pya. Wakati, ''Wabila bantu ezi kuti balye. ⁴³ Sikukutawuka wakati, ''Niinzi, mbike biyeni echi kubantu bali mwaanda?'' Mpawo Elisha wakati, ''Chaabile kubantu, kuti balye, nkambo mbwawamba Jehova, balalya akuzisiya.'' ⁴⁴ Elyo muzike wakwe wakazibika kubusyu bwabo; bakalya, akuzisiya, mbuli ijwi ndyakasyomezya Jehova.