¹ Lino mumunyaka wakkumi amusanu ayitatu ya Jehosyafati mwami wa Juda, Jolamu mwana wa Ahabbu wakatalika kwendelezya Izilayili mu Samaliya; wakeendelezya minyaka ilikkumi ayibili. ² Wakachita chakabija mumenso a Jehova, pesi kakutali mbuli wisi abanyina; nkambo wakagwisya munsemu wabbwe lya Bbaala elyo wisi ndyakachitide. ³ Nikuli bobo wakajatilila kuzibi ezyo zya Jelobbowamu mwana wa Nebbati, wakachitya Izilayili kuti abisye; takazwide kuzwa kulimbabo. ⁴ Lino Mesya mwami waba Mowabbu kavubide mbelele. Wakayelede kupa mwami wa Izilayili mwaanda wazyuulu (100,000) aboya bwabagutu bali mwaanda wazyuulu. ⁵ Pesi Ahabbu kali wafwa, mwami wa Mowabbu wakapapila mwami wa Izilayili. ⁶ Elyo mwami Jolamu wakasiya Samaliya kuchindi nchiichecho wayobolola boonse ba Izilayili kunkondo. ⁷ Wakatuma mulayizyo kuli Jehosyafati mwami wa Juda, wakati, ''Mwami wa Mowabbu wandipapila. Ulayinka ambebo na kukulwisya Mowabbu? Jehosyafati wakasandula, ''Ndilayinka. ndili mbuli mbumbede, bantu bangu bali mbuli bantu bako, mabbiza angu alimbuli aako.'' ⁸ Lino wakati, ''Lino tutole ilinzila yakulwana ayo?'' Jehosyafati wakavwiila, ''Anzila yakunkanda ya Edomu.'' ⁹ Elyo mwami wa Izilayili wakiinka amwami wa Juda mpawo amwami wa Edomu. Bakazyunguluka mazuba alimusanu aabili, mpawo tekwakaba maanzi abasilumamba nikuba abanyama mbibakayinkide abo. ¹⁰ Elyo mwami wa Izilayili wakati, ''Niinzi eechi? Sa Jehova wayita baami batatu kukubapa kujanza lya Mowabbu?'' ¹¹ Pesi Jehosyafati wakati, ''Takwe na omuno musinsimi wa Jehova, kuchitila kuti tubuzye Jehova kwindila mulinguwe?'' Umwi wabalanda bamwami wa Izilayili wakavwiila wati, ''Elisha mwana wa Syafati mpali, iwakatila manzi amaboko a Elija.'' ¹² Jehosyafati wakati, ''Ijwi lya Jehova lili anguwe.'' Awo mwami wa Izilayili, Jehosyafati, amwami wa Edomu bakaya kuli nguwe. ¹³ Elisha wakati kumwami wa Izilayili, ''Nchite biyeni andinywe? Kamuya kubasinsimi babamawuso amanyokwe. ''Mpawo mwami wa Izilayili wakati kulinguwe, ''Pepe, nkambo Jehova wayita aba baami batatu antomwe kukubapa kujanza lya Mowabbu.'' ¹⁴ Elisha wakasandula, mbuli Jehova mbwapona, oyo ngundiyimikila kunembo lyakwe, ikuti tendalemeka kubawo kwa Jehosyafati mwami wa Juda, Nsikoyoswilizya chintu kuli nduwe, nikuba kulanga kuli nduwe. ¹⁵ Pesi ngamundeetele sikantimbwa, ''Lino sikantimbwa nakali kulizya, ijanza lya Jehova lyakaza ali Elisha. ¹⁶ Nkambo Jehova wakaamba obu, 'Ndachita kalonga aka kayumu kazule tulambwa.' ¹⁷ Nkambo Jehova waamba echi, 'Tamukoyobona muuwo, nikuba kubona mvula, pesi mumpata wamulonga ngozuzigwa amanzi, elyo mulonywa, Inywebo azivuubwa zyenu abanyama banu boonse.' ¹⁸ Echi nchintu chuuba kumenso a Jehova. Uyomupa kuzunda ba Mowabbu. ¹⁹ Muyozunda zisi zyonse zila malambo azisi zibotu, muyotema minsamu yoonse mibotu, muyoyimikizya tusawu twamanzi, amyunda yoonse mibotu muyoyizuzya mabwe.'' ²⁰ Elyo chifumo achindi chakupa chipayiizyo, kwakaza manzi kuzwa kubbazu lya Edomu; chisi chakazuzigwa manzi. ²¹ Lino ba Mowabbu nibakamvwa kuti baami baza kukuzobalwisya, bakaliyobolola antomwe, boonse balikukonzya kuzwata zilitabilizyo zyankondo, elyo bakiimikila kumugano. ²² Bakamuka chifumo mpawo izuba lyakamunika manzi. Awo ba Mowabbu bakabona manzi, akaboneka kasalala mbuli ganzi. ²³ Bakagamba kuti, ''Eli ndiganzi! Baami nchonzyo banyonyoonwa, elyo bajaya umwi amwenzinyina! Elyo lino, Mowabbu, atwende tukawusale!'' ²⁴ Nibakasika kumaanda aba Izilayeli, Izilayeli wakanyampuka akulwisya ba Mowabbu, abo bakaya kuli mbabo. Impi ya Izilayili yakatanda ba Mowabbu munyika, kabaya bujaya. ²⁵ Bakamwaya madolopo, akubusena boonse bubotu bwanyika bantu bakawala mabwe kusikila kwakazula mabwe. Bakasinka tusawu toonse twamanzi akugonkela ansi yoonse minsamu mibotu. Biyo Kkili Haleseti wakalisyedeamabwe awo. Pesi basilumamba bakajisi nswiipo bakawuzyunguluka akuunyonyoona. ²⁶ Lino mwami Mesha waba Mowabbu wakabona kuti nkondo yabatama, wakayinka amyaanda musanu ayibili yabalumi basimasumu kuti bakalwane mwami wa Edomu, pesi bakakachilwa. ²⁷ Mpawo wakabweza mwana wakwe mupati, wakeelede kwendelezya musule lyakwe, akumupa mbuli chipayizyo chakutenta abulambo. Elyo kwakaba kunyemena ba Izilayili yakasiya mwami Mesha akubweda kuchisi chakwabo.