¹ Lino Namani, muzuluzi weempi yamwami waku Alamu, wakali mupati alimwi kali mwalumi ulemekwa mumenso a simalelo wakwe, nkambo mulinguwe Jehova wakamupa luzundo ku Alamu. Alimwi wakali singuzu, mwalumi mukozu, pesi wakali sichinsenda. ² Ba Alamu bakali bazwa aanze kuyobukukulula mubwingi alimwi bakakutolekezya akasimbi kanini kuzwa munyika ya Izilayeli. Wakali kubelekela mwanakazi wa Namani. ³ Kasimbi kanini kakambila basimalelo bako kuti, ''Ndalikupeekezya kuti kwanoli simalelo wangu wali amusinsimi oyo uli mu Samaliya! Elyo walikuyo walikuyo muponesya simalelo wangu kuchinsenda chakwe.'' ⁴ Elyo Namani wakiinka wakwambila mwami ezyo nzyakabuzigwa akasimbi kanini kazwa munyika yaba Izilayeli. ⁵ Elyo mwami wa Alamu wakati, ''Koya lino so, alimwi ndiyotumina lugwalo kumwami wa Izilayeli.'' Namani wakazwa alimwi wakalibwezela zipo zilikkumi zyansiliva, zyuulu musanu achimwi zyazikkoto zyangolida, alimwi ekkumi lyampasya zyamisyobo misyobo. ⁶ Alimwi wakabweza alugwalo kumwami wa Izilayeli lwakali kuti, ''Kwayino olu lugwalo lweetwa kulinduwe, ulabona kuti ndatuma Namani mubelesi wangu kulinduwe, kuchitila kuti umusilike kuchilwazi chachinsenda.'' ⁷ Elyo mwami wa Izilayeli nakabala lugwalo olu, wakadelula zyakuzwata zyakwe akwamba kuti, ''Ndime Leza na, utajaye alimwi akupa buumi, zyakuti oyumwalumi uyanda kuti mebo ndimuponesye kuchinsenda chakwe? Kubaanga ulokuyandula kutalika lukazyanio andime.'' ⁸ Elyo Elisha muntu wa Leza nakamvwa kuti mwami wa Izilayili wadelula zizwato zyakwe, wakatumina ijwi kumwami lyamba kuti, ''Nkaambonzi niwadelula ingubo zyako? Amumuleke ndilyo lino asike kulindime, alimwi uyoziba kuti kuli musinsimi mu Izilayili.'' ⁹ Elyo Namani wakeza amabbiza aakwe antomwe ankalaki alimwi wakima amulyango wang'anda ya Elisha. ¹⁰ Elisha wakatuma simutola twambo kulinguwe, wakati, ''Koya ukasambe chakulinika mulwizi Jodani zyiindi zili musanu azibili, alimwi mubili wako uyoba kabotu; uyosalala.'' ¹¹ Pesi Namani wakanyema alimwi wakeenda mpawo wakati, ''Amubone, mebo ndalikuyeeya kuti zyanchoonzyo walikunobbuda anze kulindime alimwi akuzoyima mpawo akuzoyita izina lya Jehova Leza wakwe, alimwi akuzovukuzya kuboko kwakwe ajulu alimwi akuzondiponesya kuchipele changu. ¹² Takulikuti Abbana a Fapa, milonga yaku Damasiko, milonga mibotu kwinda maanzi wonseni a Izilayili? Nsikonga njosamba na mulinjiyo akuba kabotu?'' Mpawo wakanyona akupiluka weenda mulwendo lwakwe. ¹³ Alimwi balanda ba Namani bakeza afwifwi alimwi bakambula anguwe; ''Ndeende wangu, kuti musinsimi wakulayilila webo kuti uchite chimwi chintu chiyumuyumu, tensi walikunochichita na? Chilibuti kwindilila, elyo, awo mpaakwambila webo, ''Kolinika lwako omwini usalale'?'' ¹⁴ Mpawo wakakunuka alimwi wakakulinika mwini zyiindi zili musanu azibili mumulonga Jodani, watobelezya malayilile amuntu wa Leza. Mubili wakwe wakapona wabanga nchikumba chamwana, alimwi wakapona. ¹⁵ Alimwi wakabweda kumuntu wa Leza, lwakwe ambakalabo, alimwi wakeza mpawo wazoyima kunembo lyakwe. Wakati, ''Bona, kwalino ndaziba kuti Leza tawope munyika yonse kunze kwamu Izilayili. Lino kakuliboobo, ndakomba utole chipo echi kuzwa kumulanda wako.'' ¹⁶ Pesi Elisha wakasandula, ''Mbuli Jehova mbwapona, ngwenjiimvwi kunembo lyakwe, mebo nsikoyotambula chintu.'' Namani wakamusungilizya Elisha kuti atole chipo, pesi wakakaaka. ¹⁷ Elyo Namani wakati, ''Kuti kakutali boobo, elyo ndakukumbila kuti uzumizye kuti zipegwe balanda bako mikuli iibili yamuseele, kuzwa linoobu, mulanda wako tachiyoopi limbi nechiba chipo chakutentela nekuba zipayizyo kuli baleza pesi kuli Jehova. ¹⁸ Enzila yomwe njiyeyi akube kuti Jehova alekelele mulanda wako, chamba kuti, muchiindi mwami wangu nayonjila mung'anda ya Limoni kukuyokomba, alimwi ngandafugama lwangu mung'anda yalimoni, akube kuti Jehova ngalekele mulanda wakomukambo aka.'' ¹⁹ Elisha wakati kulinguwe, ''Koya mulumuno.'' Elyo Namani wakiinka. ²⁰ Wakali weenda kwakasinzo kafwifwi biyo, elyo Gehazi mulanda wa Elisha muntu wa Leza wakalyambila kuti, ''Langa, simalelo wangu waleka oyu Namani mu Alamu mukutatambula zipo kuzwa kujanza lyakwe ezyo nzyayetede. Mbuli Jehova mbwapona, mebo ndiyomuchijanina alimwi nkatambule chimwi chintu kulinguwe.'' ²¹ Mpawo Gehazi wakatobela Namani. Muchiindi Namani wakabona muntu uyobuchijana musule lyakwe, wakaselukila ansi kuzwa munkalaki, ''Zyonse zilikabotu na?'' ²² Gehazi wakati, ''Zyonse zilikabotu. Simalelo wangu wandituma, wamba kuti, 'Bona, lino kwazosika kulindime baalumi bobile kuzwa kunyika yakuchilundu mbana babasinsimi. Ndakumbila ubape matalenta ansiliva alimwi azyakusama zyobile.'' ²³ Namani wakasandula, ''Ndakondwa maningi kukupa matalenta obile.'' Namani wakasungilizya Gehazi alimwi wakamwangila matalenta obile ansiliva muziputu zibili, antomwe azyakuzwata zyobile, alimwi wakazibika mumaanza abalanda bakwe bobile, abo bakabweza zibbudu zyansiliva kunembo lya Gehazi. ²⁴ Kuchiindi Gehazi nakasika kukalundu, wakabweza ziputu zyansiliva kuzwa kumaanza abo alimwi wakakuzisisa mung'anda yakwe; elyo wakati bantu aba ngabeende, alimwi bakiinka. ²⁵ Muchindi Gehazi nakanjila alimwi akwimikila kunembo lya simalelo wakwe, Elisha wakati kulinguwe, ''Wakuzwida kuli, Gehazi?'' Wakasandula, ''Mulanda wako takwepe nkwaabede.'' ²⁶ Elisha wakati kuli Gehazi, ''Muuya wangu tewali ayebo na muchindi muntu nanyona inkalaki yakwe akukuswanizya? Echi nchiindi chakutambula mali azyakuzwata na, myuunda yama olifa aya masansa, imbelele amankabe, alimwi abalanda bechalumi antomwe abechanakazi? ²⁷ Elyo chinsenda cha Namani chiyoba alinduwe antomwe alunyungu lwako kwalyoonse.'' Elyo Gehazi wakazwa anze kuzwa kumenso akwe, sichinsenda utuba buu.