الفصل 23
1
وْ نَاضُوا ڤَاعْ جْمَاعَتْهُمْ وْ دَاوْ يَسُوعْ لْبِيلَاطُسْ ،
2
وْ بْدَاوْ يْحَصْلُوا فِيهْ وْ يْڤُولُوا :" لْقِينَا هَادْ الْرَاجَلْ يْحَرَشْ فِي الْشَعْبْ ، بَاشْ مَيْخَلْصُوشْ الْجِزْيَة تَاعْ قَيْصَرْ وْ يْڤُولْ : بَلِي الْمَسِيحْ هُوَ الْمَلِكْ ".
3
وْ سَقْسَاهْ بِيلَاطُسْ : " نْتَ هُوْ مَلِكْ الْيَهُودْ ؟". وْ رَدْ عْلِيهْ وْ ڤَالَهْ :" نْتَ ڤُلْتْ ".
4
وْ ڤَالْ بِيلَاطُسْ لْرُؤَسَاءْ رْجَالْ الْدِّينْ وْ ڤَاعْ الْنَّاسْ :" مَالْقِيتْشْ حْتَى دَنْبْ فِي هَادْ الْإِنْسَانْ ".
5
كَانُوا شَادِّينْ فِي هَدْرَتْهُمْ وْ يْڤُولُوا :" هُوَ رَاهْ يْهَيَجْ فَشَعْبْ وْ يْعَلَّمْ فِي ڤَاعْ لْيَهُودِيَة بْدَا مَنْ لْجَلِيلْ حْتَى لَهْنَا ".
6
وْ كِي سْمَعْ بِيهَادْ لْهَدَرَة لِي كَانَتْ دَايْرَة فِي لْجَلِيلْ ، سَقْسَا : " هَادْ الْرَاجَلْ مَنْ الْجَلِيلْ ؟ "
7
وْ كِي عْرَفْ بَلِي هُوَ مَنْ لَبْلَادْ لِي يَحْكَمْ فِيهَا هِيرُودُسْ ، رَسْلَهْ لْعَنْدْ هِيرُودُسْ ، لِيكَانْ هُوَ تَانِي فِي أُورْشَلِيمْ .
8
وْ كِي شَافْ هِيرُودُسْ يَسُوعْ فَرْحَانْ بْزَافْ ، عْلَى خَاطَرْ كَانْ بَاغِي يْشُوفَهْ مَنْ زْمَانْ مَنْ كَثْرَة لِي سْمَعْ عْلِيهْ ، وْ بْغَا يْشُوفْ مَنَهْ مُعْجِزَة .
9
وْ سَقْسَاهْ بْزَافْ بَصَحْ مَاجَاوْبَهْشْ عْلَى حْتَى حَاجَة
10
.مَنْ بَعْدْ وْڤَفْ رُؤَسَاءْ رْجَالْ الدِّينْ وْ لْكَتَبَة يْحَصْلُوا فِيهْ بَالْعُنْفْ .
11
وْ حَڤْرَهْ هِيرُودُسْ مْعَ لْعَسْكَرْ تَاعَهْ وْ ضَحْكُوا عْلِيهْ وْ لَبْسُوهْ عْبَايَة مْنَوْرَة ، وْ رَدَّهْ لْعَنْدْ بِيلَاطُسْ .
12
وْ مَنْ بَعْدْ وْلَّى هِيرُودُسْ وْ بِيلَاطُسْ صْحَابْ مَنْ دَاكْ الْنْهَارْ ، عْلَى حخَاطَرْ كَانُوا مَنْ قْبَلْ عَدْيَانْ .
13
لَمْ بِيلَاطُسْ رُؤَسَاءْ رْجَالْ الْدِّينْ وْ الْزُعَمَاء وْ الْشَّعْبْ ،
14
وْ ڤَالَلْهُمْ : " جَبْتُولِي هَذَا الْإِنْسَانْ وْ ڤَلْتُولِي هُوَ لِي كَانْ يْضَلَلْ فِي الْشَعْبْ وْ هَا رَانِي سَقْسِيتَهْ ڤُدَامْكُمْ وْ مَالْقِيتْ فِيهْ حْتَى ذَنْبْ مَلِحَصَلْتْ فِيهْ .
15
وْ حَتَى هِيرُودُسْ مَالْقَا فِيهْ حْتَى ذَنْبْ وْ رَدَّهْ لِينَا وْ مَادَارْ وَالُوا بَاشْ يْسْحَقْ لْمُوتْ .
16
غَادِي نْجَلْدَهْ وْ نَطَلْڤَهْ يْرُوحْ ".
17
وْ كَانْ عْلِيهْ بَاشْ يَطْلَڤْ مَحَابْسِي وَاحَدْ كُلْ عِيدْ .
18
وْ كَانُوا يْزَڤُوا بْصُوتْ وَاحَدْ وْ يْڤُولُوا : " أدُوا هَدَا وْ طَلْڤُوا لِينَا بَارَابَاسْ!".
19
وْ بَارَابَاسْ كَانْ فِي لْحَبْسْ عْلَى خَاطَرْ كَانْ يْدِيرْ فِتْنَة فْلَمْدِينَة وْ يَڤْتُلْ .
20
وْ عَاوُدْ هْدَرْ مْعَاهُمْ بِيلَاطُسْ عْلَى خَاطَرْ كَانْ بَاغِي يَطْلَڤْ يَسُوعْ ،
21
وْ كَانُو يْزَڤُوا وْ يْڤُولُوا : <<صَلْبُوهْ !صَلْبُوهْ ! >>.
22
وْ سَقْسَاهُمْ لَلْمَرَة الْثَالْثَة : " شَاهُوَ الذَنْبْ لِي دَارَهْ هَادْ الْرَاجَلْ؟ مَ لْقِيتْ فِيهْ حْتَى ذَنْبْ يَسْتَاهَلْ عْلِيهْ لْمُوتْ ، غَادِي نَجَلْدَهْ وْ نَطَلْڤَهْ ".
23
وْكَانُوا يْزَڤُوابْجَهْدْهُمْ وْ يَطَلْبُوا مَنَهْ بَاشْ يْصَلْبَهْ . وْ صُوتْهُمْ كَانْ غَالَبْ .
24
وْ قَرَرْ بِيلَاطُسْ بَاشْ يْدِيرْ الْشِي لِي بْغَاوَهْ .
25
مَنْ بَعْدْ طْلَڤَلْهُمْ لِّي كَانْ فِي لْحَبْسْ بْسَبَتْ الْفِتْنَة وْ قَتْلَهْ ، لِّي طَلْبُوهْ ، وْ سَلَّمْ يَسُوعْ بَاشْ يْدِيرُوا فِيهْ شَا بْغَاوْ .
26
فَلْوَقْتْ لِّي كَانُوا غَادْيِينْ بِيهْ شَدُّوا وَاحَدْ الْرَاجَلْ مَنْ قَيْرَوَانْ سَمُوهْ سِمْعَانْ ، كَانْ مْوَلِي مَنْ لَخْلَى ، وْ حَطُوا عْلَى ظَهْرَهْ الخَشْبَة تَاعْ صَلِيبْ .
27
وْ تَبْعُوهْ بْزَافْ نَاسْ مَنْ الْشَعْبْ ، وْ نْسَا لِي كَانُوا يْنَدْبُوا عْلِيهْ .
28
وْ وْ دَارْ عَنْدْهُمْ يَسُوعْ وْ ڤَالْ : "يَا بْنَاتْ أُورْشَلِيمْ ، مَا تَبْكُوشْ عْلِيَّ بَصَحْ بْكُوا عْلَى رْوَاحْكُمْ وْ عْلَى وْلَادْكُمْ ،
29
لَخَاطَرْ غَادِي يْجُوا يَمَاتْ يْڤُولُوا فِيهَا : سَعْدَاتْ نْسَا لِي مَيَوَلْدُوشْ وْ مَيْرَضْعُوشْ !
30
فِي دَاكْ لْوَقْتْ يْبْدَاوْ يْڤُولُوا لَلْجْبَالْ : طِيحُوا عْلِينَا ! وْ وْ تِلَالْ غَطِينَا !
31
عْلَى خَاطَرْ اذَا دَرُوا هَدَا بَالءغُصْنْ لَخْضَرْ ، شَا غَدِي يْصْرَا بْالْيَابَسْ ؟".
32
وْ جَابُوا تَانِي زُوجْ خِيَانْ وَحْدُخْرِينْ بَاشْ يَڤَتْلُوهُمْ .
33
وْ كِي وَصْلُوا لَلْجُمْجُمَة صَلْبُوهْ تْمَّ مَعَ هَادُوكْ لْخِيَانْ ، وَاحَدْ عْلَى لْيْمِينْ وْ لَاخُرْ عْلَى لِيسَرْ .
34
وْ ڤَالْ يَسُوعْ : " يَا أَبَتَاهْ ، غْفَرَلْهُمْ ، لَخَاطَرْ مَعْلَابَالْهُمْشْ شَا رَاهُمْ يْدِيرُوا ". تْڤَاسْمُوا كَسَوْتَهْ وْ دَارُوا قُرْعَة عْلِيهَا .
35
وْ كَانُوا نَاسْ وَاڤْفِينْ وْ يْشُوفُوا ، وْ الْرُؤَسَاءْ تَانِي مْعَاهُمْ يْزَعْقُوا بِيهْ وْ يْڤُولُوا :" اذَا كَانْ لْمَسِيحْ مُخْتَارْ الله ، كِيمَا سَلَكْ لُخْرِينْ يْسَلَكْ رُوحَهْ! ".
36
وْ ضَحْكُوا عْلِيهْ لْعَسْكَرْ حْتَى هُومَا ڤَدْمُوا عَنْدَهْ وْ عْطَاوَهْ لْخَلْ ، وْ ڤَالُوا لِيهْ :
37
" اذَا كُنْتْ نْتَ مَلِكْ لْيَهُودْ سَلَكْ رُوحَكْ !".
38
وْ كَانْ فُوڤْ رَاسَهْ لُوحَة مَكْتُوبْ عْلِيهَا بْلْيُونَانِيَة وْ رُومَانِية وْ لْعِبْرِيَة : " هَدَا هُوَ مَلِكْ الْيَهُودْ ".
39
وْ كَانْ وَاحَدْ مَنْ الْخِيَانْ لَمَصْلُوبِينْ مْعَاهْ يْڤُولْ : " اذَا كُنْتْ أَنْتْ هُوَ الْمَسِيحْ ، سَلَكْ رُوحَكْ وْ سَلَكْنَا !".
40
بَصَحْ لَاخُرْ زَڤَى وْ ڤَالْ : مَتْخَافْشْ رَبِّي وْ نْتَا رَاكْ غَادِي تَتْعَدَبْ كِيفَهْ ؟
41
حْنَا نْسْتَاهْلُوا هَادْ لْعُقُوبَة ، عْلَى جَالْ لِّي دَرْنَاهْ، بَصَحْ هُوَ مَا دَارْ وَالُو ".
42
وْ ڤَالْ لْيَسُوعْ : " تْفَكَرْنِي كِي تْجِي فِي لْمَلَكُوتْ تَاعَكْ ".
43
جَاوْبَهْ يَسُوعْ وْ ڤَالَهْ : " الْحَقْ نْڤُولَكْ : غَادِي تْكُونْ مْعَايَا فِي الْجَنَّة ".
44
جْوَايَهْ طْنَاشْ تَاعْ نْهَارْ ظَلْمَتْ الْأَرْضْ حْتَى ثْلَاثَة تَاعْ لَعْشِيَة .
45
وْدَرْڤَتْ الْشَمْسْ وْ تَڤْطَعْ لْحْجَابْ تَاعْ لْهَيْكَلْ مَنْ لْوَسْطْ .
46
وْ زَڤَا يَسُوعْ مَنْ كُلْ جَهْدَهْ وْ ڤَالْ بِينْ يَدِيكْ نْسَلَمْ رُوحِي وْ كِي ڤَالْ هَادْ لْهَدْرَة سَلَمْ رُوحَهْ .
47
وْ كِي شَافْ مَسْؤُولْ تَاعْ لْعَسْكَرْ لِي صْرَا مَجَدْ الله وْ َڤَالْ : " بَلْحَقْ كَانْ هَدَا إِنْسَانْ مَا عْلِيهْ حْتَى ذَنْبْ !".
48
وْ ڤَاعْ نَاسْ لِّي حَضْرُوا وْ شَافُوا لِي صْرَا ، وْلَاوْ يْخَبْطُوا فِي صْدُورْهُمْ ،
49
وْ كَانُوا ڤَاعْ لِّي يْعَرْفُوهْ وْ نْسَا لِّي تَبْعُوهْ مَنْ الْجَلِيلْ وَاڤْفِينْ مَنْ بْعِيدْ يْشُوفُوا شَا رَاهْ صَارِي .
50
وْ كَانْ وَاحَدْ الْرَاجَلْ سَمُوهْ يُوسَفْ ، وْ كَانْ رَاجَلْ مْسَڤَمْ .
51
هَذَا مَا كَانشْ مْوَافَقْهُمْ فِي وَاشْ كَانُوا يْدِيرُوا . وْ هُوَ كَانْ مَنْ مْدِينَة جَايَة فِي لْيَهُودْ سَمُوهَا الرَّامَة وْ هُوَ تَانِي كَانْ يْقَارَعْ فِي ملَكُوتْ الله .
52
رَاحْ يُوسَفْ عَنْدْ بِيلَاطُسْ وْ طْلَبْ مَنَهْ الْجَسَدْ تَاعْ يَسُوعْ ،
53
نَزْلَهْ مَنْ الْخَشْبَة ، وْ لَفَّهْ بْلْكَتَّانْ ، وْ دَارَهْ فِي الْقْبَرْ جْدِيدْ مَا كَانْ فِيهْ حْتَى وَاحَدْ .
54
وْ كَانْ نْهَارْ تَوْجَادْ وْ نَهَارْ الْسَبْتْ جَايْ .
55
وْ تَبْعَهْ نْسَا جَاوْ مَنْ الْجَلِيلْ ، وْ شَافُوا الْقْبَرْ وْ كِيفَاشْ كَانْ مَحْطُوطْ لْدَاخَلْ .
56
وْلَاوْ وْ وَجْدُوا رْوَايَحْ وْ أَطْيَابْ . وْ نْهَارْ الْسَبْتْ رَيْحُوا عْلَى حْسَابْ الْوْصِيَة .