الفصل 24
1
وفى لْفْجَر نْتَاع نْهَار الْحَدْ جَاوْ للْقبَر جَايْبِيْن مْعَاهُم لَحْنُوط لِي وجْدُه.
2
ولْڤَاوْ الْحجْرَة موَخرَة عْلَى لَقْبَرّْ.
3
وكِي دَخْلُوا مَالْڤَاوش لْجُثَة تَاعْ الْرَّب يَسٌوع.
4
وهُمَا مْتْحيرَاتْ وڤف لْهُم زُوجْ رْجَالْ لاَبْسِيْن بْيضْ.
5
خَافُو وْحطُو وْجُهْهُم فْلَرْض، وڤالُو لْهُم هَذُوكْ الرْجَالْ: "عْلاَش رَاكُو تْحَوسُو علَى الحَيْ بِينْ الْمُوتَا؟
6
مَارَاهْشْ هْنَا،بصَّحْ قَامْ من الْمُوتَا! تْفكْرُوا الهْدرَّة لِيْ ڤالْهَا لْكُم فْى الجَلِيلْ
7
كِي ڤال: إِبنْ الإِنْسَان يلِيقْ يتسلَمْ فيْ يدِيْن الْخَاطْيِين ويتْصلَب، وفِي نْهَار الثالْث يقُوم مْن لْمُوت".
8
وتْفَكَرُوا هْدَرْتَه،
9
ولاَّو من الَقِبَرّ، وخَبْرُوا الْتْلاَمذ حْدَاشْ وڤعْ لَخْرِيْن بْشِي لِيْ صْرا. ولِيْ خَبْرُوا الرُسُل همَا.
10
مَريَم المَجْدَلِيَة، يُوَنَّا ومَريَم يْمَاتْ يَعقُوب، ونْسَا لَخْرِين لِيْ رَاحُوا مْعَاهُمْ.
11
مَا أمْنُوهُومْش الرُّسُل عْلَى خَاطَر حَسْبُوهُم رَاهُم يتخَيْلُوا.
12
نَاضْ بُطرُس وْجرَّا للقْبَرّ، وكِي طَاطَا شَاف كَفَن مَلْفُوفْ وَحدَه، ومْبَعد رَاح مَخْلُوعْ مَنْ وَاشْ صْرَا.
13
و فِيْ دَاك النْهَار كَانُو زُوجْ مَنْهُم رَاحُو لْوَاحْد الدْوَار بْعِيْد عْلى أُورْشَلِيم بْسبعَة كِيْلُومِتر، يسمُوه «عَمْوَاسْ».
14
ويهدْرُوا بِينَاتْهُم عْلَى ڤاعْ وَاشْ صْرا.
15
كِيْ كَانُوا يْتحَاوْرُّوا، يَسُوع بْرُحَه ڤربْ لهُم وتْمشَى مْعَاهُم.
16
بْصَحْ حَجَة مَا خلاَتْش عَينِيهُم تْعَرْفَه.
17
وسْقسَاهُم: "شَا رَاكُم تْهدْروا بِيْنَاتْكُم ونْتُومَا مَاشيين مكتَائبِيْن ؟".
18
وجَاوْبَه واحَد، يسْمُوهْ كَلْيُوبَاص وڤالَه: "نْتَا وَاحْدَك البَرَانِيْ لِي سَاكنْ فِي أُورشَلِيْم ومَا رَاكْش عَارف وَاشْ صْرا فِي هَذي لْيَامَات؟".
19
ڤال لْهُم: "شَا صْرا؟". جَاوبُوه: "لِي صْرَا لْيَسُوعِ النَاصِرِيْ، لِيْ كَانْ نْبِيْ قَوِي فِيْ كْلاَمَهِ وْفْعَايْلَهْ ڤدَامْ الله وْڤاعْ الشَعْبْ.
20
وْكِيفَاهِ سَلْمُوهْ لْرُؤَسَاءْ رِجَالْ الدِيْنْ وْالحُكَامْ نْتَاوعْنَا بَاهْ يْحكمُوْ عْلِيْه بْلْمُوتْ وْيْصَلْبُوهْ.
21
وَحْنَا كُنَا نْترجَاو بلِيْ هُوَ لِيْ غَادِيْ يسْلَك إسْرَائِيل. بصَحْ، مْعَ هَاذ شِيْ ڤاع،هَاوْلاَ اليُومْ الثَالَث مَلِيْ صْرا هَاذْ الشِي.
22
بصَاحْ شِيْ نْسَا مْنْ عنْدنَا حَيْرُونَا عْلَى خَاطَرْ عَلَى رَاحُو لَقْبَرصْبَاحْ بكرِيْ،
23
كِي مَا لْڤاوش الْجُثَة تَاع يَسُوع، جَاوْ وْڤالُوا: شَافُو المَلاَيْكَة ڤالوا لهُمْ يَسُوع حَيْ.
24
ورَاحُوا جْمَاعة لِي كَانُوا مْعَانَا للقَبَرْ، ولْڤاوهْ كِيْمَا ڤالُوا النْسَا بْصَحْ هُمَ مَاشَافُوهْش".
25
وْڤالْ لهُم يسوع: "يَالِي ماتْفَاهْمُوش وإيمَانْكُم قْلِيل فِي الإيمَانْ لِي هَدْرُوه الأَنْبِيَاء!
26
مَاشِيْ كَانْ يْلِيقْ الْمَسِيح يتألْم ويدخُل لِمَجدَ نْتَاعَه؟".
27
وْبْدَا المَسْيح يفسَرْ لهُم ڤاع الكُتُب وبْدَا منْ مُوسى وڤاعْ الأَنْبِيَاءْ.
28
مْبَعْد ڤرْبُوا لَدوَار لِيْ كَانُوا رَايِحِينْ لَه، وْبَانْ لْهُم يَسُوع كَلِي رَايَح لْمُوضَع بْعِيد.
29
وْحَاوْلُوهْ وْڤالُو لَه: "ڤعَد مْعَانا، عْلَى خَاطَر نْهَارْ رَاح وْاللِيل ڤربْ». ودخل بَاشْ يْبَاتْ مْعَاهُم.
30
كِي تْكَا مْعَاهُم رفَد الْخُبْز ْوبَارْكْ وْڤطَعْ وْمدْلهُمْ،
31
وتْحلُو عَينِهُم وعَرْفُوه مْبَعد ما بَانش لهُم،
32
وْبْدَاو يْهدْرُوا مَا بِيْنَاتهُمْ وْيڤولُوْا: "مَاشِيْ كَانْ فِيْ قَلْبنَا لَحْرَارَة كِيْ كَانْ يَهْدَرْ لْنَا فِيْ الطرِيْڤ وْيفسَرْ لنَا الشَرِيعَةْ؟".
33
وْنَاضُوا فِيْ دِيْكْ السَاعَةْ وْرجْعُوا لأُورْشَلِيْمْ، وْلڤاوْ حْدَاشْ التْلَامْذْ مَتْلَايْمِينْ هُمْ وْلِيِ مْعَاهُمْ
34
وْهُمَا يْڤولُو : "الرَّبْ بْالحَقِيقَةْ قَامْ مْنْ المَوتْ وْبَانْ لْسَمْعَانْ!".
35
بْصَحْ هُمَا كَانُو يْعَاوْدُو الصْرَا فْي الطْرِيْڤ وْكِيْفَاهْ عَرْفُوهْ كِيْ ڤطَعْ الخُبْزْ.
36
وْكِيْ كَانُوا يْهَدْرُوْا بْهَاذْ الشِيْ وْڤفْ يَسُوعْ فِيْ وَسْطْهُمْ، وْڤالْ لْهُمْ : "سَلَامْ لِيْكُمْ!".
37
خَافُوا وْانْخَلعُوْا، وحْسْبُوا يَلِيْ شَافُو رُوحْ.
38
ڤالْ لْهُمْ يَسُوعْ: " عْلاَشْ رَاكُمْ مَخْلُوعِيْنْ، وَعْلَاشْ دْخَلْ الشَكْ فِي ڤلُوْبْكُمْ؟
39
شُوفُو يْدِيَا وْشُوفُو رْجْلِيَا: رَانِيْ أَنَا هُوَ! تْلْمسُونِيْ تْشُوفُوْا، خَاطَرْشْ الرُّوْحْ مَاعْندهَاشْ لْحَمْ وْلَعْظَمْ كِيْمَا رَاكُمْ تْشُوفُو فِيَا".
40
كِيْ ڤالْ لْهُمْ هَكَا وَرَالْهُمْ يْدِيْه وْرَجْلِيْه.
41
وْكِيْمَا هُمَا مَاشِيْ مْأَمْنِينْ مَلفَرْحَة ْوْ الخَلْعَة ڤالْهُمْ: "عَنْدْكُمْ هْنَا مَكْلَة".
42
"عْطَاوْهْ حُوتْ مَشْوِيْ وْشْوِيَا عْسَلْ.
43
دَاهْ وْكَلاَهْ قُدَامْهُمْ.
44
وْڤالْ لْهُمْ: "هَذَا هُوَ لْكْلَامْ لِيْ كْلَمْتْ لْكُمْ بِهْ وْأَنَا مَازَالْ مْعَاكُمْ: بْلِيْ يْلِيْقْ يْتحْقَقْ ڤاعْ لِيْ مَكْتُوبْ فِيْ شَرْعْ تَاعْ مُوسَى وكتُبْ الأَنْبِيَاء ".
45
تَمْتَمْ نَوَرْ لْهُم عْقَولْهُمْ بَاشْ يْفَهْمُوا كْتَابْ الله .
46
وْڤالْ لْهُمْ: "هَكَا مَكْتُوبْ، كَانْ يلِيقْ عْلَى المَسِيْح بَاشْ يْتْألَمْ وْ يْقُومْ مْن المُوتْ فِيْ اليَومْ الثَالْثْ،
47
بَاشْ يْبَشَرْ بْإِسْمَه بْالتَوبَة وْغُفْرَانْ الذْنُوبْ لْڤاعْ الشْعُوبْ، وْالبَدْيَةْ مَنْ أُوْرْشَلِيْمْ.
48
وْنْتُومَا شْهُودْ عْلَى هَاذْ الشِيْ.
49
وَأَنَا غَادِيْ نَرْسْل لْكُمْ لِي وْعَدْ بِه بُويَا. ڤعْدُو غِيْرْ فِيْ أُوْرشَلِيْم حْتَى تَنْزلْ عْلِيْكُمْ قُوَة مَنْ السّْمَا" .
50
خَرَجْهُمْ وْدَاهُمْ لْبِيْتْ عَنْيَا ، وْطَلَعْ يَدِيْه وْبَارْكهُمْ.
51
وْالوَقْتْ لِلْي كَانْ يْبَارْكْهُمْ ، فَارْقْهُمْ وْطْلَعْ لْسّْمَا.
52
سَجْدُو لَهْ وْولاَوْ لأُورْشَلِيْمْ وْهُمَا فَرْحَانِيْن،
53
وْكَانُوْا فِيْ كُلْ الوَقْتْ فْي الهَيْكَلْ يْسَبْحُوا ويْعَبْدُوا الله. أَمِيْنْ.