¹ Yana la? ma zeda yanda dxi raca saa xti ca gueta xtia' ni qui gapa levadura, la' pascua. ² Ca xhaique xti ca sacerdote ne ca escriba guní didxa ca xhimodo gúti ca jesus, purti ridxibi cabe ca binni que'. ³ Guyú binidxaba Judas Iscariote, tobi de ca chii ne chupa. ⁴ Guyé Judas ne buí didxa ne ca xhaique ca sacerdote ne xhaique ca dxú de xhimodo laabe zanda gudíbe laaca Jesus. ⁵ Laaca bieche' ca ne biaana cabe gudí cabe laabe bidxichi. ⁶ Laabe bisiguendabe, ne dede dxi que nisi biyubi be xhimodo gudíbe Jesus Laaca zitu de guira binni que'. ⁷ Bedandáa dxi xti ca gueta xtia' ni qui gapa levadura, ra xhá dandxu de saa pascua que' naquiñe gati. ⁸ Jesus biseenda Pedru ne Juan, rabibe laaca: "Lache' ne laguni guendaroo ni guidono lu saa pascua. ⁹ Ne laacabe gunabadidxa cabe laabe: Paraa racaladxu guni du' ca ni ya?" ¹⁰ Laabe bicabi be laaca; "Lagucaa diaga, ora latu gui'tu ndani guidxi que la?, ti badu nguiu ni ndáni ti ríi nisa zadxagalu' laatu. La sa' nanda laabe dede ra yoo ra chindabe. ¹¹ Ne lagabi xpixhuana yoo que': "Maistru rabi lii : "paraa nu' yoo ra chi tahua nia ca discipulu xtine lu saa xti pascua?" ¹² Laabe zului'be laatu ti yoo ni zuchahui, ne gaxti cayadxa ndani. ¹³ Ne guye' cabe, ne bidxela cabe guiraa ni modo pe' Maistru que gudxi laacabe. Ne laacabe biini cabe guendaroo para saa pascua que'. ¹⁴ Ora bedandá hora que la? Jesus gurí ne ca apostol xti. ¹⁵ Ne oraque' rabi be laaca: "Iza' naroba guenda riuladxi ni napa de gahua nia' laaty lu saa xti pascua di' ante tide lu guenda nagana. ¹⁶ Ti purti na' zabe laatu, qui zahua dia' nin xti bieque, dede ra gueda guizaa gaca guenda runi mandar xti Diuxhi." ¹⁷ Ne oraque' gucua' jesus nisa uvas ne ora bidiibe xquixhe la'? naabe: "la gue' ni', n elaquiizi ni lade tu'. ¹⁸ Tí ma na cayabe ca' laatu, qui zee rua' nisa uvas xti bieque, dede oura guedanda guenda runi mandar xti Diuxi." ¹⁹ Ne oraque' gucuabe gueta xtia' ne ora bidiibe xquixhe la?, gunda'be ni, ne bidiibe ni laaca, ne naa be: "ndi nga cuerpu xtine ni chi gudie' laatu. laguni casi cayuninu di' ti guietenaladxi tu' naa." ²⁰ Zaqueca gucuabe nisa uvas que biluxhe si gudo' xhíi cabe ne naabe: "nisa uvas di nacani didxa nacubi ni cutagua nia' latu lu rini xtine, ni chi guixhii pur laatu. ²¹ Huaxha la guca' diaga na'. ni la gudxii deche na' nu' ne naa lu mexha di. ²² Dxandipe nga xhiiñi hombre zee casi modo pe nexhe sa'. Huaxha guyagasi' tu la guchee ne laabe! ²³ Ne guzulu' ca gunabadidxa lisaa ca, tu de laaca nga chi guni ni'. ²⁴ Raque' biasa ti guenda ridinde lade cabe de tu laa de lacabe nga ni jmá risaca. ²⁵ Jesus rabi laacabe: "ca xhaique xti ca ni cadi judiu runi mandar laca, ne ca cani runi mandar lacabe ca la? ribee lá cabe laaca xhaique ni risaca. ²⁶ Huaxha cadi zaca di gaca ni ne laatu. sinuque, la gudi ni jma risaca nu' lade tu casi ni jmá huaxhie' risaca. Ne la gudi gaca ni jmá risaca ca casi ni runi xhiña xtobi. ²⁷ Ti purti ¿tunga ni jmá risaca, ni ribí rua mexha la? o ni rugu' guendaro'. ¿cadi naca ni' ni ribí rua mexha la? Neca zaca', na nua ladetu' casi ti ni runi xhiña xtobi. ²⁸ Huaxha latu nga ca ni huayú ne ná lu ca guenda nagana xtine. ²⁹ Na zudie' laatu ti guenda runi mandar, casi ca bixhoze' bidii naa ti guenda runi mandar, ³⁰ ra laatu ganda go'tu ne gue'tu rua mexha ra guenda runi mandar xtine. Ne laatu zabii tu la ca bangu' ni gudi Diuxhi laatu, ti guyatu pa bia' jneza cayuni ca chii ne chupa tribu ni zaa de israel. ³¹ Simón, simón, gunadxiichi binidxaba gunabadidxa guica' lii, ti quíibi be lii casi riguibi cabe semia'. ³² Huaxha naa, ma gunaba lu Diuxhi pur lii, ti cadi guiadxha guenda runi cre' lii. No ora guibigueta lu la? bidii xtipa ca biichi lu'." ³³ Na pedru rabi laabe: "señor, ma zuhua cha'hue para chinia' lii, ndani lidxi guiiba ne dede lu guenda guti." ³⁴ Jesus rabi laabe: gabe ca' lii pedru, dxi di' que zunda di' gallu, dede que lii guini' lu que runi bia' lu naa chona tiru." ³⁵ Ne raque' na' Jesus rabi laacabe: "Dxi naa bisenda laatu sin ixhiapa, nin ti sacu ra nidxa' ni ñoo' tu, ni guica' ñee' tu, ¿biadxa xhiixha latu la?" Ne laacabe bicabi cabe: "Gaxti." ³⁶ Ne oraque' rabi be laaca: "Huaxha yana la? ni napa ixhiapa chine' ni' ne laaca chine' ti sacu ra guidxaa ni goo'. Ni naquiiñe guto' xhaba ne síi tobi. ³⁷ Huaxha gabe ca' laatu, ni ca' de naa la? naquiñe saca cani modo pe' ca'ni. NE GUCUA CABE LAABE CASI BINNI GUBAANA. Cani guní cabe gaca de naa la? cayaca cani." ³⁸ Oraque' rabi cabe laabe: "Señor, biiya! raríi nu' chupa espada." Ne laabe rabi be laaca:"Ne ngasi'." ³⁹ Gudiidi si ora gudo' xhii cabe la?, Jesus guyé , casi maca huayuni be, lu daani Olivu, ne ca discipulu guzá nanda ca laabe. ⁴⁰ Ora laacabe yenda' cabe, gudxibe laaca:"laguinii ne Diuxhi ti que guiaba tu lu ni guquiinde laatu." ⁴¹ Ne bixhelebe zitu de laaca bia' rilaa ti guie', ne bizuxhibi be ne guní ⁴² nebe Diuxi: ne naabe. "Bixhoze, pa racaladxu la? bituba guenda nana di' de ná. cadi gaca di i racaladxe, ne gaca ni racaladxu." ⁴³ Ne oraque' ti angel de guiba' bidxiña ra nuu be ne bidi xtipa laabe. ⁴⁴ Ne lu yuuba cadidi be que la?, laabe jmáru si' reciu guni nebe Diuxhi ne nisa lúna xtibe guca ni casi ti gota mbolo de rini ni biaba dede layú. ⁴⁵ Ora Jesus bisa de ra caníne Diuxhi que la? guyebe ra nu ca discipulu xtibe ne bidxelabe laaca nisiasi ca' runi guenda nagúndu xtí ca, Ne gunabadidxa ⁴⁶ be laaca: "xhi ñee nisiasi tu pue? laguiasa ne laguiníne Diuxhi, ti que guiabatu lu ni guquinde laatu". ⁴⁷ Caní'ru be malasi záa xtale binni ne judas, tobi de ca chi ne chupa, zá niru lú ca'. Ne laa bidxiña ra nu' jesus bidii ti bixidu laabe, ⁴⁸ Huaxha Jesus rabi laabe: "Judas, cudxíi dechelu xhiñi binni guidxilayu ne ti bixhidu?" ⁴⁹ Ora biya ca ni nu' gaxha de Jesus ca ni cayaca di la? naa ca: " Señor, naquiñe gudxí ludu ne espada la? ⁵⁰ Oraque tobi de laaca bichenda espada ti mozo xti haique xti ca secerdote, ne bigábe ti chú diaga ladu derechu. ⁵¹ Ná Jesus: "ma bia' cati, ne laabe gudánabe diaga, ne bisiandabe laa. ⁵² Ná Jesus rabi ca xhaique xti ca sacerdote, Xhaique xti ca ni rapa ra yu'du', ne ca binn gola ni seda guca lu' ca laabe: "Laatu zeeda tu, casi ora zeeda cabe luguia ti gubaana, ne espada, ne yaga? ⁵³ Ora naa guyua nia laatu guira dxi ndani yu'du', laatu que nibaquina di' tu luguia'ya. Huaxha yana nga ora xtitu ne xhaique guela cahui." ⁵⁴ Gunaze cabe laabe, yené cabe laabe zitu, ne de raque yené cabe laabe ra lidxi xhaique xti ca sacerdote. ⁵⁵ Pedru nanda laacabe zitu zitu. Gudídi si' de bíni cabe bele galáa ra nu' cabe que, gurí pedru galahui de laacabe. ⁵⁶ Ne ti guná runi dxiiña raque biiya laabe zuuba be lu biaani xti bele que ne biyadxi laabe ne ná: "Nguiu di laaca nu' ne laabe." ⁵⁷ Huaxha Pedru ná co', ne guní' sicarí: " guná, naa que lica runebiaaya laabe." ⁵⁸ Ne jmá huadxi que biiya xtobi laabe ne ná: Líi laaca tobi de laacabe líi." Huaxha Pedru ná: "Badu nguiu, cadi naa ni'." ⁵⁹ Gudídi si bia' ti xhigaba de ngue' xti nguiu caziñe ne laabe ne ná: "Dxandi dxandipe' nguiu di laaca guyu ne laabe, ti purti nacabe Galileu. ⁶⁰ Huaxha Pedru ná: "Badu nguiu, naa que gana dia' xhíndi caya'bu naa." Ne oraqueca, laga laabe caní be, biinda ti gallu. ⁶¹ Bidxigueta lu' Jesus ne biyadxi be Pedru. Ne Pedru biete naládxi didxa xti Jesus, ora laa gudxi laabe: "Nin lica caru gúnda gallu, yanadxi ca zaní lu que runibia' lu naa chona tiru. ⁶² Pedru biré zi yuuna naná. ⁶³ Ne ca nguiu ni cayapa Jesus bidxidi ca laa ne gudiñe cabe laa. ⁶⁴ Gudídi si bindiibi cabe lu' be, ne canaba cabe laabe, ne ná cabe: "Guní ni ná Diuxhi yana!, túnga gudiñe líi?." ⁶⁵ Laacabe guní cabe xtale ru didxa lugia Jesus, ne gudxi cabe laabe didxa dxaba. ⁶⁶ Casi pe bira gueela, ca binni gola de guidxi que' , Gucua' lisaa ca, guiropa xhaique ca Sacerdote ne ca Escriba. Yené cabe laabe ra nu' ca xhaique xti ca yu'du'. ⁶⁷ Ne ná ca: "pa líi nga cristu, gudxi laadu." Huaxha laabe rabi be laaca: "Pa naa gabe laatu, que zuni cre' tu naa." Ne pa naa guinaba didxa laatu la? ⁶⁸ que zucabi tu naa. ⁶⁹ Huaxha dede yana, xhiñi binni guidxilayu' zabí ladu derechu xti guenda nandxo' xti Diuxhi." ⁷⁰ Guirá ca guní ca: "yana líi nga xhiñi Diuxhi la? Ne jesus rabi laaca: " Laatu tu ná tu naca ni." ⁷¹ Laaca guní ca: "¿Xhi ñe' caquiiñe ru nu tu guiní luguiabe pue? Ti purti lácanu ma binadiaga nu de rua' pe be."