¹ Nga runi, biche ni nandxo' ca, laatu napa tu ngueca si ti guenda ribiidxi' ni zeeda de guiba'. Laguini'ique de jesus, ni naca apostol ne sacerdote gola xti guenda riberua' guenda ruche xtinu. ² Laabe que nuche' nebe Diuxhi ni gulii laabe, casi ca Moises laca que nuché ndani lidxi Diuxhi. ³ Ti purti Jesus naca ni sanda guica jmá naróba guenda rusisaca que Moises, ti purti ni ruza' ti yoo' risaca jmá que yoo' que. ⁴ Ti purti guira yoo' guyu tu bizaa laa, peru ni bizaa de guira xixe nga Diuxhi. ⁵ Ti neza la? Moises ni bizuhua dxichi, casi ti ni runi xhiiña Diuxhi interu naca ndani lidxi. Laabe nga bilui' be guira ni chi guini' cabe huidxe. ⁶ Peru Cristu nga xhiiñi Diuxhi ni cayapa lidxi Diuxhi. Laanu nga lidxi be, pa laanu guzuhua dxichi nu ne guenda nadxibalu, ne ni runi cre' dxichi nu. ⁷ Nga runi, nacani casi Espiritu Nandxo' na: "YANADXI PA LAATU GUNADIAGA TU RIDXI XTIBE, ⁸ CADI GUQUIIDXI TU LADXIDO' TO CASI BINNI ISRAEL NI BIASA LUGUIA' BE, LU CA DXI RA CADÍDICA RA NA GANA RA QUE RINDANI GAXTI." ⁹ NDI GUCA DXI CA BIXHOZE GOLA TU BIASA CA LUGUIA'YA PARA GÚYA CA PA DXANDI NAA, DXI CHUPA LATEGANDE IZA LAACA BIIYA CA CA NI BIINE. ¹⁰ NGA RUNI BISHACALADXE' CA BINNI DE DXI' QUE. NAA GUNIE: 'LAACABE CANANITI CABE NDANI LADXIDO' CABE, LAACABE CA'RU GUNIBIA' CABE NEZA XTINE.' ¹¹ NDI NACA CASI NA GUNIE ZUUNE RA CADXIICHE': LAACABE QUE ZIU' CABE LU GUENDA HRISII'LADXI' XTINE." ¹² Laguya chaahui', biche ca, de que laadetu cadi chú tuuxha nadxaba ladxido' ne guenda que runi cre', ti ladxido' ni rixhale de Diuxhi ni nabani. ¹³ Laga ngala, la cú gana laaca laatu guira dxi, bia' guindá "yanadxi" ca, ti ma guiruti de laatu iguiidxi ladxido' pur guenda rusiguii xti guenda ruche'. ¹⁴ Ti purti ma beda gacanu ti ni rizaa ne Cristu, pa guiaana nu zuhua dxichi nu lu ni runi cre' nu de Laabe dede ra bizulu ne de ra guiluxhe. ¹⁵ De ndi ma guní cabe: "YANADXI, PA LAATU GUNADIAGA TU RIDXI XTIBE, CADI UQUIIDXI TU LADXIDO' TO CASI DXI CA BINNI ISRAEL BIASA LUGUIABE." ¹⁶ Tu laa nga binadiaga Diuxhi ne bica' lu laabe? cadi guca ca guira ca ni Moises gulee de Egipto? ¹⁷ Tuunga bidxichi neebe chupa lategande iza? cadi Ca ni bichee ne laabe, ca ni xcuerpu ca biaba ne guti ra que rindani gaxti que? ¹⁸ Tu laa nga bidii xtidxa be que ziu' ca lu guenda riziila'dxi xtibe, cadi ca ni que nuzuuba didxa? ¹⁹ Ru'yanu de que laacabe que ñanda ñuu cabe lu guenda riziila'dxi xtibe pur guenda que runi cre' xti cabe?.