¹ Nga runi, naquiñe gataná nu ti qué nin tobi de laatu gilui' ma biché tu ra ugandatu ca ni na Diuxi chi gudí laatu, ni ma biaana para laatu, ne zacá guiziiladxi nee tu laabe. ² Purti gudxi cabe laanu de ca didxa cubi que casi pe cá cani. Peru ca didxa que qué ñaca né di cani ca'ni que ñuni cre né ca cani bizuuba diidxa. ³ Purti laanu cani runi cre nu la? laanu nga chi chú nu ra guiziiladxi' nu, casi na Diuxi: "CASI GUNIÉ ORA BIDXICHE, 'QUE ZIU DXI CHÚ' CABE LU GUENDARIZI'LADXI XTINE." Ne ngué, biluxe né ca dxiña ni biinibe ora bizaabe guidxilayú di. ⁴ Purti Diuxi ma guní, ra zeda yanda gadxe gubidxa: "LU GADXE GUBIDXA DE CUZÁ' DIUXI GUIDXILAYÚ BIZIILA'DXI DE GUIRÁ DXIIÑA NI BI'NI'." ⁵ Xti tiru na be: "QUE ZIU' DXII GUIUU CABE NDANI GUENDARIZIILA'DXI XTINE." ⁶ Purti nuru tu la' zanda ru guiziila'dxi, ne dede dxi ca Iraelita binadiaga ca' ca didxa cubi di la? que niziila'dxi di ca purti que nuzuuba ca diidxa. ⁷ Diuxi gulaqui xtí' xti dxii: "YANNA DXII." Guidiidi si xtale dxii guní ne Diuxi David, casi ca ma hua yete ni: "PA GUNADIAGA TU RIIDXI XTIBE LA? CADI GUQUIIDXI DI TU LADXIDÓ TO." ⁸ Purti pa Josué nu dii laacabe niziila'dxi cabe la?, que ninní né di Diuxi lacabe de xti dxi que. ⁹ Ngue runi guyuu xti dxi de guendariziila'dxi para guidxi xti Diuxi, ¹⁰ Purti ni guiuu lu guendariziila'dxi xti Diuxi la? laca ma biziila'dxi de guni dxiña, casi pe Diuxi bi'ni' ne ca xti. ¹¹ Ngue runi, guluíla'dxi nu guiziila'dxi nu, ti za ca' nin tobi que guiaba de lu' guenda que ruzuuba diidxa ra biaba ca xcadxi que. ¹² Purti nabani xtiidxa Diuxi ne ruchuugu ni jmá que ti espada ni naduxhu guiropa ladu. Ndi la? riazi ni dede guindáni guenda xti espiritu ne dxitaladi binni. Zanda gunibiá ni ni riní ique ne ni racaladxi ladxidó' tobi. ¹³ Gaxti di ni gu'yaa nagachi nezalu' Diuxi. Zanda gaca ca ndi ne nezalu' pe Diuxi ni laanu chi gudii nu cuenta. ¹⁴ Napa nu ti Sacerdote gola ni nabé nandxó' ni zee ibá, ne nga nga Jesús Xiiñi Diuxi, nga runi chi guzuhua' chahui nu lu guendaruni cre xtinu. ¹⁵ Que gapa nu ti Sacerdote gola ni que guia' laanu ora que gapa nu xtipa, napa nu Jesús laa ma gudiidi guiraa ca guendanagána casi ca cadiidi nu di, xisi la? Laabe que ruché di be'. ¹⁶ Nga runi zanda guidxiña nu ra nuu Diuxi xitinu, ti gudii be laanu guenda riá xtibe, ne guidxela guendaracané xtibe ora caquiñe nu laabe.