¹ Cadi tindenélu ni nagola. Ni gúnilu nga, bisiidi labe xi gunibe casi ca laabe ñacabe casi ti bixoze tuuxa. Bisiidi xi guni ca badunguiu casi ca bi'chicabe ñacacabe. ² Bisiidi xi guni ca gunaa gola casi ca ñaatu,ne ca badud dxaapa casi ca ñaca bizaanatu ni que huadána. ³ Gucané ca gunaa ni ma guti xeela, ca ni dxandi ma que gapa tu gúya laa. ⁴ Peru pa gunaa ni ma guti xeela di' napa xiiñi o napa xiaga, bidii que laacabe niru guisiidicabe gacanécabe ca binni lidxicabe. La gudii que laacabe quixecabe ca bixozecabe ni bi'ni pur lacabe, purti ndi nga ni riuladxi Diuxi. ⁵ Peru ti gunaa ni guti xeela, ni ma biaana sin guiruti' tu gúya laa. Laabe risigapabe xquendanabanibe lu ná Diuxi. Laabe ira dxi cayabibe Diuxi xi caquiiñebe sin guidxagabe, ne canababe izaaladxi laabe casi ca ridxi' casi ca huaxini. ⁶ Peru yanna, gunaa ni nabani para guni modo pe racaladxi, laa ma guti, necape laa nabani ru'. ⁷ Bisiidi de ca ndi ti ma laacabe que gapacabe xi pur quiñeyú binni lacabe. ⁸ Peru pa nuu tobi que gacane ca ni nuu tu raca, ne jma ru' ca binni nuu ndani lidxi, laa ma bidxii deche xguendaruni cre, ne naca jma feu que tobi ni que runi cre. ⁹ Bidii icá lá lu gui'chi casi gunaa ni ma guti xeela, gunaa ni que gaca jma nahuiini de chona late gande íza, gunaa de ti xeela sí. ¹⁰ Laabe naquiiñe' gunibia cabe laabe pur ca ni galán bi'nibe, pa guyuu dxi gúpabe xcuidi o pa guyuu dxi gúpabe ndaani lidxibe binni ni zeeda de zitú, o pa gudiibibe ñee ca ni runi cre, o ma bissiandabe binni naná ladxido',o pa yenandabe bi'nibe ne guendanachahui ira ni galán bi'nibe. ¹¹ Peru ca gunaa ni jma nahuiini ni ma guti xeela, que udiilu icá láca' lu gui'chi. Purti ora gueedanda guquiinde laacabe guchee ne cabe xcuerpu cabe ni rudxii deche ni na Cristu, laacabe zapacabe gana guichaganácabe. ¹² Ne de pur ndi riguiiba donda iquecabe, purti laaacabe rusiaandacabe de niiru compromisu biinicabe. ¹³ Ne cadi ngasi, riaacabe gacacabe nachaaba. Laacabe rizacabe yoo pur yoo. Ne cadi richaaba si cabe, riní cabe de xtobi ne rugiruaacabe ra que caquiiñe cu'ruaacabe. Laacabe riní cabe de ni que riquiiñe guiniicabe. ¹⁴ Naa la', racalaxde que ca gunaa nahuini ni ma guti xeela guichaganáca', ti ma gápaca xiiñica', cuaquichahuica ndani yoo, ti ma zacá que gapa binni xi pur cú xquejanu pur cayuninu ni nadxaaba. ¹⁵ Purti caadxi ma biniibica neza ra nuu binidxába. ¹⁶ Pa tobi de ca gunaa ni ma runi cre napa gunaa ni ma guti xeela de lade ca binilídxi, lagudii que laacabe gacanecabe laaca, sacá yu'du' que sua' xtale xique ne sacá sanda gacanee ca ni dxandi' ma guti xeela ni guiruti gu'ya' laa. ¹⁷ Bidii lugar ca hermanu gola ni runi mandar xneza ganda guiáxaca chupa tiru, jma rusi ca ni canayuí ne canagusiidi xtiidxa Diuxi. ¹⁸ Purti ca xqui'chi' Diuxi ná: "LII QUE SUGU'LU GUIXEXII RUAA BUEY ORA CAGUÍBI XUBA" ne "NI RUNI DXIIÑA NAQUIIÑE GUIAXA". ¹⁹ Cadi gucaa diagu ora guedanecabe xqueja ca hermanu gola pa cadi guyuu chupa o chona ni bi'ya pa dxandi'. ²⁰ Gudindene ni bichee neza lú guira' ti ma sacá restu guidxíbica'. ²¹ Naa xneza pe' cayabe lii gu'nu' nezalú Diuxi, xti Cristu Jesús, ne ca angel ni ma ulí Diuxi, que Lii gu'nu' ca ndi', sin guninálu', ne nin ca gapú ni jma gu'nu' pur laa. ²² Cadi casi zeú quixu ndaaya lugia tu'xa. Cadi chu'lu lu guendaruchee xti' xtobi. Lii naquiiñe' nayá pe nga guiaanalu'. ²³ Lii que Naquiiñe' geu' nisa. Lu xcar nga lá naquiiñe' gelu' cadxi nisa uva para ndaani lu' ne ca guendahuara risaacu'. ²⁴ Ca guendaruchee xti cadxi binni rihuini pe ca ní, ne laaca ri usuhua'ca neza lu cabe para juiciu. Peru xcaadxi guendaruchee rididisi ratu riuini ca'. ²⁵ Ne sacaca, cadxi de ca guendanachahui xti tu'xa rihuinipe ca ni, peru nuu pe xcaadxi guiendanachahui ni rucaachicabe que siaanacani nagachi.