¹ Lagudii que guira ca ni racamandar pur xpixuaana gusúbaca xtidxa xpixuaana ca'. Laaca naquiiñe' guni ca ndi' para guiruti guiní feu de lá Diuxi ne ca ni rusi'didú. ² Ca ni napa xpixuaana ne laca hermanu laa, que naquiiñe gusaanatu de usu'batu xtiidxa, pur si nacacabe hermanu. Sinu que, laacabe napaacabe xi de usubacabe guiraxixe xtiidxa ca. Purti ca xpixuaana ni racanécabe laa pur dxiiña ni cayuni laca runi cre ca ne laca nadxicabe laaca. Guni' ne bisiidi de ca ndi'. ³ Yanna guiní si nú que tobi guisiidi laatu adxe ne cadi cacaabe ca xtiidxa chahuidu, ca ndi nga, ca xtiidxa Señor Jesucristu. Guiní si nú de que laacabe que icaacabe ca ni canagusiididu ni riné ra nu guenda riá. ⁴ Hombre o gunaa di' raca cre be xtale ne que ganabe gaxti'. Laabe huarabe cuchendasibe binni ne ni riniibe de lu ca diidxa. Ca xtiidxabe runi cani que xtobi gu'ya' feu ca ni napa jma que laa, tindelizaa binni, enda rugú dí, que guini cre lizaacabe, ⁵ ne idubi ora tindelizacabe ne ca binni huara xpiaani. Laacabe bixalecabe de lu ni dxandi'. laacabe rini' xpiaanicabe de que ni sinanda Cristu runini para gapa xtale bidxichi. ⁶ Peru enda rinanda Cristu runi laanu ricu pa guiechenenu bia nápanu. ⁷ Purti laanu gaxti nga que ñedanenu ndaani guidxilayu, nin ca que zanda chinenu xixa de laa. ⁸ Sacari nga laani, chu'nu nayeche purti nápanu ni ido'no ne ni gacunu. ⁹ Yanna ca ni racaladxi gapa jma bidxichi riabaca lu guenda ruquiinde, ne riabaca lu na binidxaaba. Laaca riabaca lu xtale guendaruquiinde huati, ni runina si, ne ndaani xtale ru jma ni runi que binni guiáasi ra ixá ne guinitilu. ¹⁰ Purti guendaranaxi bidxichi nga xcú de guira tipu guendanadxaba. Caadxi binni ni racalaadxi ndi, ma bixaleca de lú guendaruni cre, ne laaca ma bedane xtubica lugiaaca xtale guenda nana. ¹¹ Peru lii, hombre xti Diuxi, bixooñe de ca ndi', guzananda ni bia'si, guenda racané, gu'nu' ni bidi xtiidxalu, guendaranaxi, bisuhua dxichi, ne guenda nachahui. ¹² Gudinde pur xquendarunicre lu, gunaze ná de guenda nabani ni que saluxe ra ma uca ri'dxu'. De ni lii ma bidiixtiidxalu neza lu xtale binni de ni runi cre lu. ¹³ Naa cayabe gunilu neza lú Diuxi, ni runi que guira xixe gapa guendanabani. Ne neza lú Cristu Jesus, ni laa gudxi Poncio Pilato xinga dxandi. ¹⁴ Gupa ca didxa di' bia'sí, sin guiruti cu' xquejalu', de dxi guibigueta Señor Jesucristu xtinu. ¹⁵ Diuxi ma nana pora gului laanu dxi laabe guibiguetabe; Diuxi, ni ma nuu nda'ya', ni laa si nga xtipa, xaique ro' ni cayuni mandar ne xpixuaana ni ma cayuni mandar. ¹⁶ Laasibe napabe quenda qu rati, ne nabanibe ndaani ti biaani ra guiruti randa chu'. Laabe gicaabe guira guendarusisaca ne guenda nandxo ni que rira. Saca gacaní(amen) ¹⁷ Gudxi ca ni napa xtale bidxichi ndani guidxilayu di' cadi gudxiibaca laca laaca, nin ca ica iqueca gulá xpidxichica laaca purti giruti gana pora guiráni. Lu xcar nga laa, laacabe naquiiñe cuaquicabe xquendanabani cabe lu na Diuxi. Laabe nga rudiibe ni dxandi risáca para usieche laanu. ¹⁸ Gudxi laacabe gunicabe ni sicarú, gaca cabe ricu pero de enda runi ni sicarú, gaca cabe nachahui, ne guiale de laacabe gudii cabe xtobi de ni napacabe. ¹⁹ Ne sacari', sutalecabe para laacabe ni guini' pur laacabe para ni ma yaca guedanda, ti saca laacabe guicaa cabe dxandi guendanabani. ²⁰ Timoteu, gúpa ni ma bidiicabe lii. Biree de ra cani' huaticabe saqueca de diidxa ni cadi dxandi ni rinicabe naca guendariúxpiaani. ²¹ Cadxi hombre cana guiníca de ca ndi' ne saca rixaleca de guenda runi cre. xquendanachahui Diuxi guianane lii.