¹ Jich ta ora to te jo'otik te mach'atik ay yip te jkot'antike ya me sk'an xkujch' jku'untik te mach'atik mayuk yip yot'anike, sok ma me sk'an xbajt' jkot'antik te bila lek ya yaiy te jkot'antik ta jwentatik naxe. ² Ta jujutulotik aka me jletik te bila lek yot'an yu'un te jpat-xujk'tike, ja te bila lek yu'une, sok te ya x-ipaj yot'anik swenta xch'unel te Diose. ³ Ja nix jich te Cristo ma jauk la sle te bila lek yot'an yu'unaxe. Yan te bila k'ot ta swenta stukel, jich k'ot te bit'il ts'ibubil ta sjun Dios: ''TE SBOLK'OPIK TE MACH'ATIK LA SBOLK'OPTEYATE JA K'OT TA JWENTA''. ⁴ Melel te bila ts'ibubil jilel ta sjun te Dios, la yich' ts'ibuyel yu'un p'ijubteseltik, swenta yu'un ay me ta smaliyel te bek ya spas ta jtojoltik te Dios sok ay yip jkot'antik yu'un te bila ts'ibubil jilele jich yakuk me jtatik smuk'ul jkot'antik yu'un. ⁵ Jich ta ora to, te Dios te ja ya yak' te ayuk smalib jku'untik sok te ya yak'botik yip jkot'antik , aka me at'ejuk ta awot'anik swenta junuk nax snopjibal awu'unik ta swenta Cristo Jesús. ⁶ Jich me junax ak'opik ya awich'ik ta muk' te Dios te ja stat te Jkajwaltik Jesucristoe. ⁷ Jich yu'un ik'a-mabaik ta tulutul, jich te bit'il la yik'atik uuk te Cristo, swenta yu'un sk'ayoj Dios. ⁸ Ja yu'un ya jkalbeyex te ja tal Cristo yu'un te ya yak' sba ta abatinel ta stojol te judioetike yu'un ya yak' ta ilel te bek smelelil yu'un te Diose, swenta yu'un ya me yak' k'otuk ta pasel te bila yaloj Dios ta stojol te namey chich-mamiletike, ⁹ sok yakuk me yalbeyik yutsil te Dios yu'un te sk'uxul yot'an, te mach'atik yantik lumetike. Jich te bit'il ts'ibiubil ta sjun te Diose: ''JA YU'UN YA ME JKICH'AT TA MUK' TA YOLIL TE YAN LUMETIKE SOK YA ME JK'AJINTAYBAT TE ABIILE.'' ¹⁰ ya yal xa: ''BINUK NAX ME AWOTANIK ,JAEX TE YAN LUMEXE, SOK TE LUM YU'UN TE DIOSE.'' ¹¹ Jich ya yal xa: ''ICH'AIKME TA MUK TE KAJWATIKE, TA APISILIK TE YAN LUMEXE; AK'AIK ME TE YAKUK YICH'IK TA MUK' SPISIL TE ANST-WINIKETIKE.'' ¹² Jich la yal xa te Isaiase: ''YA XCHIKNAJ STS'UMBAL TE ISAÍ, SOK YA XJAJCH'TEL SWENTA YU'UN YA YAY AJWALINEL TA STOJOL TE YANTIK LUMETIKE. JICH YA ME STAIK SMUK'UL YOT'ANIK TE YANTIK LUMETIK TA SWENTA. ¹³ Jich ta ora to te Dios te ja yak' smuk'ul jkot'antik aka snojesbex bayal tse'ej-ot'anil sok lamal k'inal yu'un te ja ch'uunike, yu'un ayuk me bayal smuk'ul awot'anik , ta swenta te yuel te Ch'ul Espíritu. ¹⁴ kermanotak, jch'unejix jkot'an ta atojolik. Jch'uunej te ay bayal slekil awot'anik, sok te ay bayal bin ana'ojik ta stojol te Diose. Jch'uunej te ya xu' awu'unik te ya ajech koltayabaike. ¹⁵ Jauk me to, ma la jxi' jts'ibuybeyextel cha'ox kum ayejetik ta atojolik, yu'un ya jkak'beyex ana'ik xan, swenta yu'un te majt'anil te yak'obon te Diose. ¹⁶ Ja in majt'anil to ja swenta te ya jkak'ba ta abatinel yu'un te Cristo Jesús te ja la stikunon bael sok te mach'atik yan lumetik aye, ya jchol te lek yach'il k'op yu'un Dios jich bit'il jun sacerdote. Ja swenta yu'un te jich ya jpas to yu'un te k'alal ya yak'ik smajt'anik ta stojol Dios te mach'atik yan lumetike lek ya yil te Dios, sok utstesbil yu'un te Ch'ul Espíritue. ¹⁷ Te bit'il bayal sbujts' kot'an ta stojol te Cristo Jesús sok te bit'il ayon ta abatinel yu'un te Dios. ¹⁸ Swenta yu'un te lek ya xch'uunik te Dios te mach'atik yan lumetike ja nax ya jkal te beluk la spas te Cristo ta jwentae. Jich la jpas ta skuenta ta jk'op sok ta jkat'el, ¹⁹ ta swenta yip señaetik sok chajp' at'eliletik, sok te yuel te Ch'ul Espiritue. Ta k'alal Jerusalén sok ta k'alal sjoyobal sk'inal Ilírico ta bay Italia ya stak' jkich' baela te yach'il k'op yu'un te Cristo. ²⁰ Ja yu'un to, te sk'anjel jkot'ane ja te ya jcholbey te yach'il sk'op te Dios, te banti mayuk to ya'iyojik stojol te sbiil te Cristo swenta yu'un te ma ba la sk'an jkot'an te ya x-ochon ta at'el te banti jajch'emix yat'el te yan winike. ²¹ Jich te bit'il ts'ibubil ta sjun te Dios: ''TE MACH'ATIK MA BA ALBOT YA'IYIK SK'OPLALE JA ME YA YILIK, SOK TE MACH'ATIK MA TO YA'IYOBEYIK STOJOL SK'OPLALE, YA ME XK'OT TA YOT'ANIK.'' ²² Ja swentail te bayal mach'atik la smakon jich yu'un ma ba ju' jku'un tal jkilex. ²³ Jich ta ora to, ju'ix jku'un te jkat'el le' to ta bay spamal te k'inale, sok bayalix jawil te yakon ta sk'anel sok jkot'an te yakuk xbon te banti ayexe ²⁴ Jich yu'un te k'alal ya xbo-on ta España, kot'anuk ya xk'ax kilex, teme la joinex che'oxeb k'aal, yakuk me awak'bonik jbeib te k'alal ya xbo-on le'a. ²⁵ Jich ta ora to neel ya xbo-on ta Jerusalén swenta yu'un ya xba jkoltey te mach'atik ch'uunjeletik. ²⁶ Binax yot'anik te Macedonia sok Acaya, ta stsobel tak'in yu'un skoltayel te mach'atik me'baetik te ayik ta yolil te ch'uunjeletik ta Jerusalén. ²⁷ Jich, lek la ya'iy sbaik te jich la spasik, melel ya sna'ik te ay sbetik ta stojol te judioetike. Melel te ch'uunjeletik ta bay Jerusalén la stikunbeyik ta stojolik te bek ch'ultesbile, jich ya me sk'an skoltayik uuk te judioetik swenta te bila ya xtu-un yu'unike. ²⁸ Jich yu'un, te k'alal ya xlaj jkot'an ta spasel in to sok k'alal ya jkijk'tebey jilel ta sk'abik te majt'anil tak'ine, le xjajch'onix ta beel ta España abi , jich me ya xk'ax kilex te jaexe. ²⁹ Ya jna' te k'alal ya xk'oon ta bay ayexe, ya yak'beyex bayal bendicion te Cristoe. ³⁰ Ta ora to ya jkalbeyex wokol, kermanotak, ta swenta te kajwaltik Jesucristo, sok te xk'uxul yot'an te Espíritu, ak'beyameik yipal ta sk'oponel Dios ta jwenta. ³¹ K'oponbonik me Dios swenta yu'un te ma ba yak' ipajuk sk'ab te mach'atik mayuk xch'uunjel yot'anik te ayik ta Judea, sok binuk yot'anik swenta yu'un skoltayelik te ch'uunjeletik ta bay Jerusalén. ³² K'oponbonik me Dios swenta yu'un yakuk me stak' xk'o-on ta atojolik sok spisil sbujts' kot'an teme jich ya sk'an yot'an te Dios, jich yakuk me stak' jkich' lewa ta atojolik. ³³ Aka me sjoinex te Dios te ja yak'obotik lamal kinal. Jichuk.