¹ Ik'ameik ta atojolik te mach'atik mayuk yip xch'unjel yot'anike, ma me awich' ta k'op ta bek sjokebeyel. ² Yu'un ay mach'a ay xch'unjel yot'an te ya stak' swe' ta spisile, ay yan te mach'a mayuk yip yot'ane, janax ya slajin te boketike. ³ Te mach'a ya swe' ta spisile, ma' me slaban te mach'a ma swe' ta spisile. Sok te mach'a ma swe' ta spisile ma slaban te mach'a ya swe' ta spisile. Melel ik'bil yu'un te Diose. ⁴ ¿Mach'aatika te ja'atike, te ya alikbeyik smul tul abat te yan mach'a yabate? Ja ta stojol nix te yajwal te ya stak' ya yik' ta stojol o ma xyik' te yabate. Jauk me to ya me yik' ta stojol, melel te kajwaltike ya yak' te ya x-ain ta stojole. ⁵ Ay te mach'a ya yich' bey bayal sk'oplal te jun k'aal, te bit'il yantik k'aaliletike. Ay yan te mach'a pajal ya yich'bey bayal sk'oplal te ju-jun k'aale. Ak'a te ta ju-ju tul te jichuk yakalik ta spasel te beluk ya snopike. ⁶ Te mach'a ya stsajtay te k'aale, tsajtaya ta swenta te kajwaltike. sok te mach'a ya xwe'e, ak'a weuk ta swenta te kajwaltike, melel ja ya yal wokol ta stojol te Diose. Te mach'a ma xwe'e, ja ya spas ta swenta te kajwaltike. janix jich ya yalbey wokoluk te Diose. ⁷ Melel mayuk tuluk te kuxinemotik nax ta jtukeltike, sok mayuk mach'a ya xlaj ta stukelnax. ⁸ Melel teme kuxulotike, ja kuxulotik ta stojol te kajwaltike. sok teme lajotike, ja ya xlajotik ta stojol te kajwaltike. Jich yu'un, teme kuxinotike o teme lajotike, ja yu'unotik te kajwaltike. ⁹ Melel ja swentail yu'un te laj ta cruz te Cristoe sok te cha' kuxe,te kajwaltike ja Yu'un ta xcha'-xchajp'al, te mach'a lajemike sok te mach'a kuxulike. ¹⁰ Jauk me to te Ja'ate, ¿Bistuk te ya alikbey smul te awermanoe? sok te ja'ate, ¿Bistuk te ya ap'aj te awermanoe? Melel ta jpisiltik pajal ya xk'o tejk'anbatik ta bay chajp'ajibal yu'un te Diose. ¹¹ Melel ts'ibubil: "MELEL JO'ON KUXULON, XI TE KAJWALTIKE, TA SPISILIK YA ME SKEJAN SBAIK TA JTOJOL, SOK SPISIL LUM YA ME YICH'IK TA MUK' TE DIOSE." ¹² Jich yu'un, ta ju'-ju' tul ya xk'o cholbeytik te Dios te beluk la jpastike. ¹³ Jich yu'un, ma me jlikbeyba jmultik xan sok te yantike, ja lek te jauk atsaik in to.Te manchuk me ay mach'a ya yak' yaluk ta mulil te yermanoe. ¹⁴ Ya jna' te, ta stojol te kajwaltik Jesuse, mayuk te beluk ma lekuk te ay ta stojole. Janax te mach'a te ya yal ta stojol te ma lekuke, ma' lekuk sk'oplal ta stojol abi. ¹⁵ Teme ta swenta nax we'lil te x-ech'entesbot yot'an te ja wermanoe, ma' yakatix ta spasel te k'uxul ot'anil abie. Ma me ayuk mach'a ajimbey xkuxinel ta swenta nax ja we'el, te mach'a ja laj ta stojol te Cristoe. ¹⁶ Jich yu'un, ma' me ya awak' te ma lekuk sk'oplal ya yalbey te beluk lek awalike. ¹⁷ Melel te ajwalinel yu'un te Diose ma jauk ta swenta we'el-ujch'ajel,ja ta swenta te beluk toje,te lamal k'inale sok te binax kot'antik ta stojol te Ch'ul Espiritue. ¹⁸ Te mach'a ya yak' sba ta abatinel ta stojol te Cristoe, ya me yich' ik'el ta stojol te Diose sok ya me yich' ich'el ta muk' yu'un te ants-winiketike. ¹⁹ Jich yu'un, ya me jle'tik te yakuk xkuxinotik yu'un te lamal k'inale, sok te beluk ya stak' xch'iik yu'un te xch'unjel yot'anik te yantike. ²⁰ Ma' me ajimbey te yat'el te Dios ta swenta nax te we'elike.Melel ta spisil te beluk aye lek stukel, jauk me to ja ma lekuk te me ya xwe' sok te ya yak' xyal ta mulile. ²¹ Ja lek te ma alajin tibale, sok te ma awuch' te ya'lel pajal ts'usube, sok ma xa apas te beluk ya stak' ja yales ta mulil te ja wermanoe. ²² Te xch'unjel awot'an te awich'oje stalelukme ay ta. stojol te Diose . Ya me yich' bendicion te mach'a ya sna te ma jauk smul te beluk ya spase. ²³ Te mach'a ma' xchu'une smul la staix a bi, melel ma ta xch'unjel yot'an ya spas. Te beluk ma jauk yu'un te ch'unjel ot'anile mulil me a bi.