¹ Jich yu'un la jkil ta swael sk'ab te mach'a nakal ta bay te muk'ul naktijibale,ay jun balbil Jun te ay beluk ts'ibubil ta bay ta xcha'-mejch'el te june. Te la yich' ak'beyel jukeb selloe. ² La jkil tul ch'ul abat te bayal yipe te yak ta yalel ta tulan aw: "¿Mach'a ya xju' yu'un sjamel te balbil june?" ³ Mayuk tuluk ta bay ch'ulchan,ta balumilal,ta yet'al te balumilale te ju' yu'un sjamel te balbil june sok te la sk'opone. ⁴ Bayal ok'on yu'un melel mayuk mach'a la staik te ju' yu'un sjamel te balbil june sok te la sk'opone. ⁵ Ay tul te mamaletik te la yalbone: ma xmebaj awot'an. ¡ilawil! te muk'ul choj yu'un te sts'umbal Juda', te ja sts'umbal te Davide, la yayix tsalaw, ya xju' yu'un sjamel te balbil june sok te jukeb sello yich'oje. ⁶ La jkil kojt' alal chij te kotol ta bay te muk'ul naktijibale sok te ba ay te chaneb te beluk kuxatike sok te ay ta yolilal te mamaletike. Jich yilel te bit'il lowbilixe. ay jukeb xulub sok jukeb sit; ja in to ja te jukeb Espiritu yu'un te Diose te tukumbilik tel ta bay spamal balumilal. ⁷ Jich bajt' sok la stsak lokel te balbil june te ay ta swael sk'ab te mach'a nakal ta bay te muk'ul naktijibale. ⁸ Te k'alal la stsak te balbil june, te chaneb te beluk kuxatike sok te chaneb xcha' winik (24) mamaletik la skejan sbaik koel ta bay lum ta stojol te alal chije. Ta ju'-ju' tul yich'ojik yarpaik sok jun yawil te pasbil ta oro te nojel ta pom, te ja' te beluk ya yalik ta sk'oponel Dios te ch'unjeletike. ⁹ La sk'ajintayik yach'il k'ayoj: "Te ja'ate ja ya xju' awu'un stsakel te balbil june sok te ya ajam te selloetik yu'une. Melel ja'at la wich' milel, sok ta ach'ich'el la aman spisil ta chajp' te ants-winiketik yu'un te Diose,te yan-yantik sk'opik, yan-yantik lum,sok yan-yantik muk'ul lumetik. ¹⁰ Ja la awak' ta stojolik te mach'a ya xajwalinaj ta stojol Dios sok la awak' ta sacerdoteil swenta yu'un ya xch'uunbey smantal te Diose, ja me ya x-ajwalinajik ta bay balumilal." ¹¹ Jich yu'un la jkil sok la jkay stojol sk'op bayal ch'ul abatetik ta bay sjoyobal te muk'ul naktijibale, sok te beluk kuxatike,sok te mamaletike. Te bayal ta mil millones te yajk'talule. ¹² Sok la yalik ta tulan aw: " Ja ay ta swenta te alalchij te la yich' milel swenta yu'un ya yich' yu'el, sk'ulejal, sp'ijil, yip, ich'el ta muk', albeyel yutsilal, sok te ya yich' kajintayele." ¹³ La jkay stojol spisil te beluk chiknajem ta ch'ulchan, ta balumilal, ta yet'al te balumilale, sok ta bay te muk'ul ja'etike yakalik ta yalel: "Te mach'a ya xnajk'aj ta bay te muk'ul naktijibale, sok te alal chije, jauk me kak'betik k'ayojetik,yakuk kich'tik ta muk,ak'a yich' albeyel yutsilal, sok te jauk ay yu'el te ya x-ajwalinaj ta sbajt'el k'inal." ¹⁴ Te chaneb te beluk kuxatike la yalik, "¡Jichuk!" jich yu'un te chaneb xcha'winik (24) mamaletike la skejan sbaik koel ta lum sok la yich'ik ta muk'.