¹ Ts'ibubeya te ch'ul abat yu'un te chajb' ch'uunjeletik ta Sardis: "Jich me ya yalbat te mach'a yich'oj jukeb Espirituetik yu'un te Dios sok te yich'oj jukeb ek'etik. "Ya jna' te bek apasoje. Kuxul xi ak'oplal, jauk me to lajemat. ² Jajch'an me sok ak'beya yich' yip te bek xan kuxul-awu'un, melel le nopolix ya xlaj-a, melel jkiloj te ma ts'akaluk pasbil te awat'el ta stojol Diose. ³ Jich yu'un na'ame, te bek awich'oj sok te bek awayoj stojole. ch'uuname sok sujt'esame awot'an yu'un. Teme ma ba la awik' asit, ya me xtalon jich te bit'il te elek', jich me ma a na' te bi ora ya xtalon ta a tojol. ⁴ Jauk me to ay nax cha-oxtulik ta Sardis te ma la spasik te muliletike te jich k'oem te bit'il ch'altesbil te sk'u'-spak'ike. Jaik me te ya sjuinonik ta beel,te slapojik sakil sk'u'-spak'ike, melel lek ayik te bit'il kuxulike. ⁵ Te mach'a ya xju'yun tsalaw ya me yich' lapel sakil sk'u'-spak', ma me ya jtubey sbiil ta sjunal te kuxinel sbajt'el k'inale, sok ya me jkalbey ta jamal te sbiil ta stojol te jtat sok ta stojol ta ch'ul-abatetik. ⁶ Te mach'a ay xchikine, aka me yaiy stojol te bek ya yal te Espiritu ta stojol te ch'uunjeletike." ⁷ Ts'ibubeya te ch'ul abat yu'un te chajb' chu'unjeletik ta Filadelfia: "Ja me sk'op te mach'a toj stukele sok te ja smelelil k'op yich'oje te ja stsakoj te llave yu'un David, te ya sjam sok mayuk mach'a ya stak' smak sok mayuk mach'a ya stak' sjam. ⁸ Ya jna te beluk apasoje. Ilawil, la jambat ti'nail ta atojol te mayuk mach'a ya stak' ya smake. ya jna' te mayuk lek ja wip, jauk me to ja ch'uunoj-bon mantal sok ma a muko ta awot'an te jbiile. ⁹ ¡Ilawilik! Te mach'atik ayik ta sinagoga yu'un te satanás, te mach'a ya yal sbaik te ja judíoetik jauk meto ma jaukik, melel yakalik ta lot. ya me xtalik skejan sbaik ta awakanik, sok ya me snaik te ja jk'anojatik. ¹⁰ Ta skaj te ja k'ejobon te mantaliletik te ja ts'ikoj awokol yu'une, janix jichon-uk ya me jk'ejex ta yorail te wokolile te ya xtal ta spamal balumilal, yu'un jich me ya kilbey yot'an te mach'atik kuxulik ta balumilal. ¹¹ Nopol ya xtalon. Ma me xa wijk'itey xch'uunjel awot'anik yu'un jich me ma ya awich'ik pojbeyel te akoronaike. ¹² Te mach'a ya yaiy tsalaw ja me yuyal ya xk'ot yu'un te templo yu'un te Dios ku'une, ma xlok'ik tel ta sbajt'el k'inal. sok ya me ts'ibubey sbiil te Dios ku'un ta stojol, sok te sbiil te muk'uk lum yu'un te Dios ku'un (te ja te yach'il Jerusalén, te ya xkotel ta ch'ulchan ta stojol te Dios ku'une), sok ya me ts'ibubey jbiil ta stojol. ¹³ Te mach'a ay xchikine, aka me yaiy stojol te bek ya yal te Espiritu ta stojol te ch'uunjeletike." ¹⁴ Ts'ibubeya te ch'ul abat yu'un te chajb' ch'uunjeletik ta aodicea: "Ja sk'op to te jichuk xie, ja te mach'a ya stak' kak'tik smuk'ul kot'antik ta stojol sok te ja smelelik te bek ya yal, ja ajwalik yu'un spisil te bek laj spas te Diose. ¹⁵ Ya jna' te bek apasoje, te ma ba sikukate sok te ma ba k'ixinate. ¡ kot'anuk te sikukate o te k'ixinukate! ¹⁶ Jauk me to, samalat, ma sikukat sok ma k'ixinat, ya me xeteyat lok'el ta jke. ¹⁷ Melel jich ya awal:"Jo'on k'ulejon, bayal beluk ay ku'un, sok mayuk bi ya spas falta." Jauk me to ma ana'oj te mayuk bi aya wu'une, te k'exlaltik ayate, me'baat, ma'sitat, sok t'axalat. ¹⁸ Aybon stojol te bek ya kalbat: manbon te oro te lekubtesbil ta k'ajk' yu'un jich ya xk'atbujat ta k'ulej, sok manbon-uk te sakil ak'u'-apak' yu'un jich ma t'axalat-a jich me ma awak' ta ilel te ak'exlale, sok manbon spoxil-a sit jich me ya xpoxteybat te asit yu'un jich ya stak' awil k'inal-a. ¹⁹ Spisil te mach'a jk'anoj ya jk'abey snop sok ya jk'abey yil te bit'il ya sk'an xkuxinike. Jich yu'un junax me awot'anik sok sujt'esame awot'anik. ²⁰ Ilawilik, tek'elon me ta ti'nael sok yakon ta stijel. Teme ay mach'a ya yaiy bon stojol te jk'ope sok teme ya sjam te ti'naele, ya me x-ochon bael ta sna, ya me join ba sok ta we'el. ²¹ Te mach'atik ya yayik tsalawe, ya me jkak' sjuinon ta naklej te banti te muk'ul naktijibale, jich te bit'il la jkaiy tsalawe sok te joinejix ta naklej ta muk'ul naktijibal te jtate. ²² Teme ay a chikine, ayame awaiy stojol te bek ya yal te ch'ul Espiritu ta stojol te ch'uunjeletike."