¹ Ta patil te Jesus ik´otbael yu´un te Espiritu ta bay takin jochol k´inal swenta yu´un jich ya yich´ ilbel yot´an yu´un te pukuje. ² K´alal la skom swe´el chawinik (40) k´aal sok ajk´ubal, la yaiy winal. ³ Te lolewanej tal sok jich la yalbey: ¨teme ja snich´anat te Dios, albeya mantal jai ch´enetik into te yakuk xk´atbu ta kaxlan waj¨. ⁴ Te Jesus la sut sok jich la yalbey: jich ts´ibubil jilel, MA JAUK NAX TA KAXLAN WAJ YA XKUXIN TE ANTS-WINIKE, JA YA XKUXIN YU´UN SPISIL TE SK´OP YA XLOKTEL TA YEJ TE DIOSE. ⁵ Ta patil te pucuj la yik´bael ta ch´ul muk´ul lum sok ba yak´ ta k´alal sni´il te muk´ul sna te Diose. ⁶ Sok la yalbey: ¨teme ja snich´anat te Diose, ch´ojaba koel, melel jich ts´ibubil: JAME YA SPAS TA MANTAL TE CH´UL ABATETIK YU´UN TE YA ME SKANTEYAT; SOK JA YA STSAKAT TA SK´ABIK, JICH MA ALAJIN AWAKAN TA CH´EN¨. ⁷ Jesus la yalbey:¨janix jich ts´ibubil jilel: MA AWILBEY YOT´AN TE KAJWALTIK DIOS AWU´UNE. ⁸ Ta yan buelta te pukuj la yik´ba-el ta bay toyol wits, la yak´bey yil spisil te ajwaliletik ta spamal balumilal sok te yutsilal. ⁹ Jich la yalbey: ¨spisil ya jkak´bat, teme akejanaba ta jtojole sok teme ya awich´on ta muk´e¨. ¹⁰ Jich yu´un te Jesus la yalbey: ¡ba-an k´ejaba pukuj! yu´un jich ts´ibubil: ¨ICH´A TA MUK´ TE KAJWALTIK DIOS AWU´UNE, SOK JANAX ME AWAK´ABA TA ABATINEL YU´UN¨. ¹¹ Jich tu´un te pukuj la yijtey, sok jich talik ch´ul abatetik ja la yak´sbaik ta abatinel yu´un. ¹² K´alal ya yaiy stojol Jesus te Juan la yich´ chukele, sujt' ba-el ta Galilea. ¹³ Lok´tel ta Nazaret bajt' ta kuxinel ta ba Capernaúm, te nopol ay ta muk'ul ja' yu'un Galilea, ta ba sk'inal Zabulón sok Neftalí. ¹⁴ Jich k'ot ta pasel te bina la yal jilel te alwanej Isaías: ¹⁵ "¡TE SK'INAL TE ZABULON SOK TE SK'INAL TE NEFTALÍ, TA SBELAL MUK'UL JA', TA JECH' JORDAN, GALILEA YU'UN TE YAN LUMITEK! ¹⁶ TE ANTS-WINIK TE AYIK TA IJK'INAL LA YILIK MUK'UL XOJOBIL K'INAL, SOK TE MACH'ATIK AYIK TA YAXINAL LAJEL, SAKUB K'INAL TA STOJOLIK." ¹⁷ Jich sk´alelal te Jesus jach ta xcholel sk´op Dios sok jich la yal: ¨ sujt´esa awot´anik, te ajwalinel yu´un ch´ulchan nopol ayix.¨ ¹⁸ K´alal yaktel be-el ta bay muk´ul ja´ yu´un Galilea, la yil cha jtul winiketik, te sbankil sbaik, te Simón janix te Pedro sbi´ilineje, sok Andres sbiil te yijts´ine, yakalik xch´ojel ochel ta muk´ul ja´ te stsakibal chaye, melel ja yat´elik te tsak chaye. ¹⁹ Jesús la yalbey: ¨ Laik t´unawonik, jo´on ya kak´beyex awat´elinik te ya atsobiktel te ants-winiketik¨. ²⁰ Ora nax la yijtayik jilel te tsakibal xchayike, jich la st´unik bael. ²¹ K´alal lok´bael le-a te Jesús la sta ilel cha jtul winiketik te sbankil sbaik, te Jacobo ja snich´an te Zebedeo, sok Juan, te sbankile. Ayik ta barka sok te stat Zebedeo sbiile. Ja´ yakalik ta sts´akel te stsakjibal chayetike. La yik bael. ²² Janix jichiku-uk la yijtayik jilel ta ora te barka sok te statike, jich la st´unik bael. ²³ Jesús bajt´ yoklin spisil Galilea, la yk´bey snop te sinagogaetik, la xchol te lekil yach´il k´op yu´un te ajwalinele, la xch´abtes spisil bintik chamel sok spisil bintik k´ux ya yayik te ants-winiketike. ²⁴ Pujk´ sk´oplal ta spisil sk´inal Siria, te ants- winiketik la yik´beiktel ta stojol spisil te mach´atik ayik ta chamel, sok te mach´atik bayal xk´uxul te swokole, janix jich te mach´atik uinbilik yu´un te pucuje sok te tubulik´etike janix jich te mach´atik lajem yip chial te yakanike. Te Jesús spisil la slektes. ²⁵ Tsobol ants-winiketik te t´unbiltel yu´un ta k´alal Galilea, Decápolis, Jerusalén, Judea, sok ta jejch yu´un Jordán