¹ Jich yu'un te k'alal sakub te k'inale, spisil te wolwanej yu'un sacerdoteetik sok te principaletik yu'un te lume kajik ta xchapeyel sk'oplal te Jesuse yu'un jich yak'ik ta milela. ² Jaik nix la xchukik, la yik'ibael sok ba yak'ik ta stojol te ajwalil pilatoe. ³ Jauk me to te Judas, ja' te mach'a la swaipatey te Jesuse, la yil te la yich'ix ta ak'el bael ta milela ba sujt'es sk'op sok la xcha sujt'es te lajuneb scha'winik ta jsejp sakil tak'in ta stojol te wolwanej sacerdoteetik sok te principaletike, ⁴ sok jich la yal:"La jta jmul-a te k'alal la jwaipatey te mach'a mayuk smulej."Jauk me to jich la sutik:"¿Bi jwentatika? Ja ayix ta awenta a tukel." ⁵ Jich la xch'oj koel te jayeb ta wel sakil tak'in yich'oj ta bay te temploe, lok'bael sok ba sjip'ansba. ⁶ Te wolwanej yu'un te sacerdoteetike la stamik te jayeb ta wel te sakil tak'ine sok jich la yalik into:"Ma ba toj ta pasel teme ba jkak'tik ta ba ay yawil smajt'an Dios, yu'un ja stojol ch'ich'el tul winik." ⁷ Jich komon kajik ta snopel, ja jich la smanik sok te tak'ine jun pam lum te sk'inal jpak'jome yu'un jich le ya xba yich'ik mukel-a te mach'atik yan lumetik talemike. ⁸ Ja swentail jich k'ot sbiil te lume:"Te sk'inal ch'ich' "ja nix jich ay ta ora to. ⁹ Jich yu'un k'ot ta pasel te beluk la yal jilel te chol k'op Jeremíase, k'alal la yal:"JAIK LA STSAKIK TE LAJUNEB XCHA'WINIK TA JSEJP' TE SAKIKAL TAK'INEJ, TE JICH K'OT TA NOPEL YU'UN TE ISRAELITAETIKE ¹⁰ SOK JA BA SMANBEYIK-A TE SK'INAL TE JPAK'JOME, JICH NIX TE BIT'IL LA SPASON TA MANTAL TE KAJWALTIKE." ¹¹ Te Jesuse la yich tejk'anel ta stojol te ajwalile sok jich la yich' jojk'ibeyel yu'un:"¿Ja'at bal muk' ajwalilat yu'un te Judioetike?" la yal te Jesuse:"Ja'at te jich la awale"-xi' . ¹² Jauk me to te k'alal la yich' albeyel smul ta stojol te wolwanej sacerdoteetike sok nix te principaletike, xujt' mayuk bek la yal te Jesuse. ¹³ Jich yu'un te pilatoe la yalbey:"¿Ma ba yakat ta yayel stojol spisil te jayeb ta chajb' muliletik te yak ta skujch'inbelatikaa?." ¹⁴ Ja'uk me to te Jesuse jp'al ma la sjak', jich chamnax la yaiy te ajwalile. ¹⁵ Ta yorail k'in k'ayema te ajwalil te ya skoltay bael tul chukel te janix ya stsaj te lume. ¹⁶ Ja yorail a bi , ay yik'ojik tul chukel te mero nabilsbae Barrabás sbiil. ¹⁷ Jich yu'un te k'alal stsoboj sbaikixa, te Pilatoe la sjok'ibey "¿ mach'a ya a k'anik te ya jkoltay baele ? ¿ja bal te Barrabase o ja te Jesuse, ja te Cristo xi sk'oplale? ¹⁸ Yu'un snaojikixaa te skaj sla' yot'anik te ya yak'ik ta k'abal te Jesuse. ¹⁹ Te k'alal nakal ta bay chajbajibal te Pilatoe, te yiname la stikuntel sk'op, jich ya yal: "Manchuk me a wak' ja k'ab ta stojol jai winik into melel mayuk smul stukel; yu'un k'ax jwokol ta swaichinel te k'ax ajk'ubal into ta swenta jai winik into" ²⁰ Jauk me to te wolwanej sacerdoteetik sok te principaletik la yak'beyik k'otuk ta yot'anik te lume te jauk yakuk skoltayik bael te Barrabase sok te yakuk xbajt' ta ak'el ta milel te Jesuse. ²¹ Te ajwalile jich la sjok'ibey te lume: ¿mach'a ta xchebal ya a k'anik te ya jkoltaybaele? jich la sutik: " ja te Barrabase. " ²² Jich la yal te Pilatoe: ¿Bek ya jpasbey jiche te Jesús te Cristo xi' sk'oplale? " spisilik la sjak'ik: "jijp'ana ta cruz." ²³ La sut te pilatoe:"¿Bistuuk, beluk amen spasoj? Jauk me to kajik xan ta tulan aw:"Jijp'ana ta cruz." ²⁴ K'alal la yilix-a te pilato te mayuk bek ya stak' xan spase, sok te bit'il bayal ta tul te yakik ta awe la stsak te ja'e, la spok te sk'ab ta stojol te lume sok jich la yal:"Te jo'one mayuk me jmul ya xk'ot ta stojol xch'ich'el jai winik to te mayuk smule; jaex me ya a taik a mulik-a." ²⁵ Spisilik la yalik ta aw:"Te xch'ich'ele jauk me ta jtojoltik sok nix ta stojol te jkal-nich'antik xiik." ²⁶ Jich yu'un te pilatoe la skoltay-bael te Barrabáse, yan te Jesuse ba yich' ak'el ta majel sok jich la yak' jilel yu'un jich ya x-ba yich jijp'anel ta cruz. ²⁷ Jich te soldadoetik yu'un te ajwalile la yik'ikbael te Jesús ta bay yutil te muk'ul na yu'un ajwalil sok la stsobiktel spisil ta tsobj te soldadoetike. ²⁸ Jaik la st'ananik sok la yak'beyik slap tsajal pak'. ²⁹ Ja yu'un la spasik jun korona te pasbil ta ch'ix, la yak'beyik ta sjol, sok la yak'ik jun najp'teal ta bay swael sk'ab, la skejansbaik ta stojol sok kajik ta yalel:"¡Binax yutsil, te muk' ajwalil yu'un te judioetike!" xi'ik ta slabanel ³⁰ Sok la stujbtayik, la stsakiktel te najp'teal la smajbeyik ta sjol. ³¹ k'alal laj yot'anik ta slabanel, la sk'ejbeyik bael te tsajal pak' sok la slap'eyik te sk'u' nixe sok la yik'ibael yu'un xba sjip'anik ta cruz. ³² K'alal lok'iktel, la staik tul winik te sbiile ja Simón te jach'emtel ta lum Cirene, ja la sujik te yakuk xjoinotik bael yu'un jich ya skuch baeluka te cruce. ³³ Jich k'otik ta jun k'inal te sbiilinoj Gólgota, "yawil bakel jolol" xi k'oem. ³⁴ La yak'beyik yuch' vino te kapbil sok yalel jch'atik , k'alal la sts'ub yaiy te Jesuse ma ba sk'an yuch'. ³⁵ K'alal laj yot'anik ta sjip'anel ta cruz, kajik ta spukbelsbaik te sk'ue sok kajik ta tajimal sok; ³⁶ la snajk'an sbaik ta skanantayel. ³⁷ La slejch'anbeyik ta bay sjol te cruz jun te beluk smulinoje "INTO JA TE JESÚS, TE MUK' AJWALIL YU'UN TE JUDIOETIKE " xi' te tsibubil le'a. ³⁸ Ja nix jich cha'tul elek'etik la yich' jip'anel sok, tul ta bay swael sk'ab sok tul ta bay sk'exen. ³⁹ Spisil te mach'atik ya xk'axik le'a sjimuleyik nax te sjolike ⁴⁰ sok jich ya yalik: "Ja'at te la wal te ya ajin te snaj te Dios sok te oxeb nax k'aal te ya acha'pase, koltay-aba a tukel. Te me jaat-nixa te xnich'anat te Diose, koan tel ta bay cruz." ⁴¹ Ja nix jich te wolwanej yu'un sacerdoteetik yakalik ta slabanel,sok te jts'ibojometike sok te principaletik yakalik ta yalel: ⁴² "Ja la skoltay te yantike, jauk me to ma xju yu'un skoltay sba stukel. Ja me muk' ajwalil yu'un Israel; ak'aikme te yakuk skoltay sba tel koel ta bay cruz jich me ya jch'uuntikuk. ⁴³ Ja te smuk'ulinej yot'an ta Dios.Aka me koltayotok yu'un ta ora, yu'un jich la yal: "Jo'on me te snich'anon te Diose" xi. ⁴⁴ Janix jich yakalik ta yalel ta labanwanej te cha'tul elek'etik te jipatik soke. ⁴⁵ Ta olil k'aal ijk'ub te k'inale ta spamal te balumilale ja to ta yoxebalan ora smalel k'aal. ⁴⁶ Nopol staixa te oxeb ora smalel k'aal, tulan awun te Jesuse: " ELI, ELI, ¿LAMA SABACTANI?" xi' ya sk'an yal "Dios ku'un, Dios ku'un, ¿BISTUK TE APIJT'ESON ?" ⁴⁷ Te cha'oxtul mach'a tek'atik le'a la yayik stojol, jich la yalik: "Ja yak ta yik'el tel te Elíase" xi'ik. ⁴⁸ Jich ora nax tal te mach'a le'a alimal bajt' yich' tel jun esponja, la smultel ta ch'aal vino sok la skajtsan ta sni' jalal la yak'bey snuk' te Jesuse. ⁴⁹ Te jayeb tul xan te le'ayikae jich la yalik:"Aka jkik'taytik stukel; ya jkiltik te me ya xtal koltayotok yu'un te Elíase" xiik. ⁵⁰ Tulan awun ta yan buelta te Jesuse jich la yak' lok'uk te xch'ulele. ⁵¹ Jich yu'un, te lich'bil pak' te ay ta snaj te Diose jats ta olil, k'alal ta sni'il kalal ta ya'nil. Te balumilale nijk' sok te chenetik jatik ta olil. ⁵² Te mukenaletike la yich'ik jamel, sok kuxtel sbak'etalik bayal ta tsojb te mach'atik ch'ultesbilike. ⁵³ Lok'ik tel ta smukenalik te k'alal cha-kuxtel te Jesuse, ochik bael ta bay ch'ul lum, la yak' sbaik ta ilel ta stojol tsobolik. ⁵⁴ Jich yu'un te wolwanej yu'un te soldadoetik sok nix te jayeb ta tul te yakik ta skanantayela te Jesuse la yilik te nijk'ele sok spisil ta chajb te beluk k'ot ta pasele, bayal a xiw yot'anik yu'un sok jich la yalik: " Ta mero melel ja' snich'an te Diose." ⁵⁵ Bayal ta tul antsetik k'ejel to yakalik ta yilel, ja te mach'atik la st'unik te Jesus k'alal to ta Galilea. ⁵⁶ Le ayika te Maria Magdalena, Maria te sme' te jacoboe sok José sok nix te sme' te snixnab te Zebedeoe. ⁵⁷ K'alal ijk'ub te k'inale, tal tul k'ulej winik te jach'em tel ta lum Arimatea, José sbiil, te janix nopojel yu'un-a te Jesuse. ⁵⁸ Bajt' ta stojol te Pilatoe, la sk'anbey te sbak'etal te Jesuse. Jich te Pilatoe la yal mantal te yakuk yak'beyik bael te sbak'etale. ⁵⁹ Te José la yich bael te sbak'etal te Jesuse, la spojts bael ta lekil najt'il pak' te mayuk xch'alele ⁶⁰ la xchawan ta ach' mukenal yu'un, te ja'nix sjutoj ochel ta bay ch'entikal. Jich la sbalch'un jilel jun muk'ul ch'en ta bay sti'il te mukenale, jich bajt'. ⁶¹ Te Maria Magdalena sok te yan Maria nakatik ta bay sti'il te mukenale. ⁶² Ta yan k'aal, ja te k'axemixa te xchapjibal k'in, te principal sacerdoteetik sok te Fariseoetike la stsob sbaik sok te Pilatoe. ⁶³ Jich la yalbeyik: "kawal, te jo'otike ya to jnatik te k'alal kuxul jai lolewanej into jich la yal: "Ta yoxebalan k'aal ya xkuxon" xi. ⁶⁴ Jich yu'un ak'a mantal te yakuk yich kanantayel ta lek ja to ta yoxebalan k'aal; yu'un te me ma jich k'ot ta pasele te nopojeletike ya me stak' xk'ot yelk'anbeyik te sbak'etale sok jich ya me stak' yalbeyik te ants-winiketike te "cha kuxixtel ta bay lajele" k'ax muk' me ya xk'ot-xana te lolayel to bit'il ne'elal-toe. ⁶⁵ Te Pilatoe jich la yal: " ik'aik bael jun kanan. Baanik sok kanantayaik ta mero lek." ⁶⁶ Jich a bajt'ik sok la smakik ta lek te mukenale, sok la spak'ik la lek te ch'ene sok la yak'ik jilel tul kanan le'a.