¹ Mele te ajwalinel yu'un te chulchane jich yilel te bit'il te tul winik yajwal k'inal te lok'bael ta sab ta sleel yaj'at'ele yu'un tsobel te sts'usube. ² Te k'alal ta xchap sok te at'eletik te ya stoj jun denario-tak'in te jun k'aale, la stikun bael ta at'el ta bay te sk'inal te sts'usubile. ³ Lok'xan bael ta nopol yoxebal ora jich la yil at'eletik te ayik ta ch'iwich te mayuk bi yakalik ta spasele. ⁴ Jich la yich'ik albeyel: "Baanik ta bay sts'usbiltik k'uun, jich ya tojatik te bit'il ay te tojolile." Jich bajt'ik ta at'el. ⁵ Cha'lok' xan bael ta nopol olil k'aal, sok ta oxeb ora smalel k'aal,jich nix la spas. ⁶ Yan buelta lok' xan beel ta nopol jo'eb ora smalel te k'aale sok la to sta xan te mach'a mayuk yat'elike. ⁷ Jich la yalbey: "¿Bistuk te le ayatik to, te ma' yakatik ta at'el xch'ixil k'aale?" ⁸ K'alal ya x-ochix ak'ubala, te yajwal ts'usubiletike la yalbey te wolwanej yaj at'ele: Ik'atel te at'eletike sok ak'beya stojol, ja' me neel ya a toj te mach'a patil ja'ch'ik ta at'ele yan stukel te mach'a neel ochik ta at'ele ja me patil ja toj stukel." ⁹ K'alal talik te at'eletik te ja' ochik ta at'el ta jo'eb ora smalel a te k'aale, la yich'ik ak'bel jun denario tak'in ta jujutul. ¹⁰ K'alal k'otik te mach'atik neel jach'ik ta at'ele, la skuyik te k' axem xan ya yich'ik tojale, ja'uk me to jich nix jun denario-tak'in la yich'ik juju-tul. ¹¹ K'alal la yich'ik te stojoike, kajik ta bi yalel ta stojol te yajwal te kinale. ¹² Jich la yalik: "Te at'eletik te patil talike janax at'ejik junax ora, ja'uk me to pajal la wak'otik sok, te jo'otike kujch' ku'untik te at'ele sok ta kaiybeytik xk'uxul te k'aale." ¹³ Te yajwal te k'inale jich la yalbey te tule: "Amigo, mayuk bi malek la pasbat.¿Ma bal la chaptik te ju denario ya tojate? ¹⁴ Ich'a te atojole sok t'una te ja bee; te jo'one ya smulan kot'an kak'bey-uk te machá patil at éjike te bit'il la kak'bat-uke. ¹⁵ ¿Ma bal yakuk xu' ya jpas te bek ya k'an sok te beluk ay ku'une? ¿ Yu'un bal ma lek ya a wil te bit'il lek ko'tane? ¹⁶ "Jich yu'un te mach'atik patil ayike ja' neel ya xk'otik, yan te mach'atik neel ayike, ja' me patil ya xk'otik stukelik." ¹⁷ K'alal yak ta moel bael ta Jerusalén te Jesuse, k'ejel la yik'bel te lajchaytul nopojetetik yu'une, jich la yalbey yayik te k'alal yakalik ta beela: ¹⁸ "Ilawilik, ya me smootik bael ta Jerusalén, te snich'an te winike ya me chich' ak'el ta k'abal yu'un te wolganej sacerdoteetike sok te ts'ibojometike. Ja me ya yak ík ta milel. ¹⁹ Sok ya yak'ik ta sk'ab te yantik lumetike yu'un ya yak'ik ta k'ex lantesel labanel, ya smajik sok ya yich jip'anel. Ja'uk meto ta yoxebal k'aal ya me cha'kux tel." ²⁰ Jich te sme' te snich'nab Zebedeoe tal ta stojol te Jesuse sok te yaltake. La skejan sba ta stojol sok aybil'a skanbey. ²¹ Te Jesuse la Yalbey: "¿Beluk ya ak'an? La yal te antse: "A la mantal te chebal kaltake yak'uk xnaj k'aj, tuluk ta a swael a k'ab sok tuluk ta a k'exen, ta bay ajwalinel ja wu'un." ²² Te Jesuse la sjak' sok jich la yal: "Te ja'atike ma' ana'ik te bek ya a k'anike. ¿Ya bal xju' awu'unik yuch'el te kopa te le nopolix ya kuch'e?" La yalik: "Ya xju'ku'untik." ²³ Jich la yal te Jesuse: "Melel nix a, ya a wich'ik u-uk te kopae. Ja'uk me to maj'uk ku'un ya kak'batik te yax naklex ta swael k'abe sok ta sk'exen k'abe, ja'nax te mach'atik chapal yu'un te jtate." ²⁴ Te k'alal la yaiy stojol te lajuntul nopojeletike, bayal ilinik yu'un ta stojol te cheb yermano sbaike. ²⁵ Jich yu'un te Jesuse la yik'tileytel ta stojol sok jich la yalbey: "Te ja'exe ja na'ojik te ajwaliletik yu'un te yan lumetike ya yich'ik sujel ta xch'uunel sok te mach'atik winiketik te tulan yat'elike ja me pas bilix mantal yu'un. ²⁶ Manch'uk me jich'uk ta a wolilik u-uk. Ja yu'un, te mach'a ya sk'an te muk' yax k'ot ta a wolilik ja me abat ya xk'ot ta atojolik, ²⁷ Sok te mach'a ya xk'an neel ya xk'ot ta atojolik. ²⁸ Jich te bit'il te snich'an te winike ma me tal yu'un ya yich'ch'uunel, ja' tal yak'sba ta a'batinel, sok tal yak' skuxinel ta swenta bayal ta tul jich' ya staik skolela-a. ²⁹ K'alal yakalik ta lok'el ta Jericó, t'umbilbael sts'aklinotik bael yu'un bayal ants-winiketik. ³⁰ Sok la yilik cha'tul msitetik te nakalik ta be. K'alal la yaiyik stojol te yak ta k'axel te Jesuse, awunik, jich la yalik ta aw: "¡Kawal, sts'umbal David, na'botik kobolilbatik." ³¹ Ja'uk meto te ants-winiketike komotik yu'un, la yalbeyik te yakuk xkomik ta aw. Ja'uk meto, tulan xan awunik, jich la yalik: "Kawal, sts'umbal David, na'botik kobolil batik!" ³² Jich la stek'an sba te Jesuse sok la yik'tileytel, la yal: "¿Bek ya a k'anik te ya jpasbeyexe? ³³ 'Jich la yalbeyik: '"Kawal, te yakuk xjam te sitike." ³⁴ Jich yu'un te Jesuse, la snabey yobolil sbaik, la spikbey te sitike. Ora nax jam te sitike sok la st'unik bael.