¹ Ay jun k'a-al te Herodes te ajwalil yu'un ch'in lumla yaybey stojol sk'oplal te Jesus. ² La yalbey te abatetik yu'une: "Ja'ito ja te Juane te ak' ich ja'e; te cha kuxtel ta ba aelmeletike. Jich yu'un ta yu'el ya spas spisil in to". ³ Melel te Herodes ja la stsak te Juane; la xchuk ochel ta chukjibal, ta skaj te Herodías, yinam te sbankil Felipe. ⁴ Melel te Juane jich la yalbey: "Ma lekuk te awik'oj awinamin te antse". ⁵ Jich te Herodes yot'an la sk'an smil, ja'uk me to la xi te lume, melel xchu'unejik te ja' alwanej yu'un te kajwaltike. ⁶ Te k'alal la sta sk'alel lok jawil yawilal te Herodes, te yantsil al te Herodías la yay ajk'ot ta yolilik te mach'atik k'o-emike sok la smulan te Herodes. ⁷ Jich yu'un la yalbey ta jamal te ya yak'bey spisil te bina xk'ambot yu'une. ⁸ Albilix yu'un-a te sme-e, te ach'ixe jich la yal: "Ak'bon ta pajch we sets, te sjol te Juan te ak' ich ja." ⁹ Te ajwalile ma la smulan te beluk k'ambot, ja'uk me to skaj te yalojix ta jamal, sok ta skaj te mach'atik sjo-inej ta we-el, jich la yal mantal te jich ya xk'ot ta pasele. ¹⁰ Jich ay mach'a la stikunba'el ba sk'okbey sjol te Juan te banti chukule. ¹¹ Jich te sjol la yich' beyik tel ta pajch we sets sok la sk'ases beyik te ach'ixe, ja nix jich u-uk la yich'bey ba-el te sme'e. ¹² Jich talik te nopojeletik, la jach beyik ba-el te sbak'etale ba smukik. Ta patil, ba yalbeyik ya-iy te Jesuse. ¹³ K'alal la ya-i stojol Jesus te bina k'ot ta pasele, lok ba-el stukel ta ba k'inal te namal aye. Jich te ants-winik la yayik stojol, la st'unik ba-el ta yakanik. ¹⁴ Jich te Jesus tal ta stojolik, jich la yil te bayalix te ants-winik. La snabey yobolil sba, jichla skoltey te chameletike. ¹⁵ K'alal ijk'ubix-a te k'inale, te nopojeletike oxtajik tel ta stojol sok jich la yalbeyik: "Ja-i k'inal to takin jochol k'inal, sok malix te k'a-ale. Tikunaix ba-el te ants-winike, bajt'ukik ta ba ch'in lum te ay na-etik le-a sok aka sman sme-elik." ¹⁶ Ja'uk me to te Jesus la sut' bey: " Ma yejt'aluk ya xbat'ik. Te ja'exe ak'beya-ik swe-elik." ¹⁷ Jich la sutbeyik: " Te jo'otik janax ay ku'untik jo' pech' kaxan waj sok cha kojt chay." ¹⁸ Jesus la yal: "Ich'bonik tel ta jtojol." ¹⁹ Jich yu'un te Jesuse la yalbey mantal te ants-winike ta yakuk snak'an sba'ik ta akiltik. La stsak te jo' pech kaxlan waj sok te cha' kojt' chaye. La yil moel te ch'ulchane, la xch'ultes sok la xet' te kaxlan waje jich la yak'bey te nopojeletike. jich u-uk te nopojeletike la yak'beyik te ants-winike. ²⁰ Spisilik we-ik, sok noj te xch'ujtike. Jich jach stsobik te banti xet'atik jilel te welil, jich noj xan lajcheyeb ta pajch' moch. ²¹ Ta spisil te mach'atik we-ike ja niwam jo' mil ta tul winiketik (5,000 cinco mil), ja'uk me to ma la yich' ajteyel-a te antsetike sok te alaletike. ²² La jnax yot'anik la stikun ochel ta barka te nopojeletik yu'une sok jich neel ya xk'otik lok'el-a ta banti jech ja', yan stukel jil xan ta stikunel ba-el k'ejel te ants-winike. ²³ K'alal baj'tx-a te ants-winik, stukel mo bael ta wits ta sk'oponel te state. K'alal och te ajk'ubale, ch'i stukel le-a. ²⁴ Ja'uk me to te barka ay ta yolil te muk'ul ja'-e,yak ta yuk'ilayel yu'un te yip sbul te ja'-e, melel yak ta tenel sujt'el yu'un te tulan ik'e. ²⁵ Te k'alal nopol sakubix-a te k'inale te Jesús noptsaj bael ta banti ayike, yak ta beel ta sba te muk'ul ja'-e. ²⁶ K'alal te nopojeletik la yilik te yak ta beel ta sba te muk'ul ja'-e, bayal xiwik yu'un te jich jach yalik: "Ja jun ch'ulelal me to", sok awunik yu'un te xiwele. ²⁷ Ja'uk me to te Jesús la sk'opon ta ora jich la yalbey: "¡Ayuk yip awot'anik! ¡Jo'on! ¡ma xiwex!" ²⁸ Jich yu'un te Pedro la stbey: " Kajwal te me ja'ate albon mantal te ya xbenon bael ta sba te ja' te banti ayate." ²⁹ Jesús la yal: "la." Jich te Pedro lok bael ta barka sok be-en bael ta sba te ja'-e jich ya xu xk0ot ya banti ay te Jesuse. ³⁰ Ja'uk me to te Pedro la yil te tulan te ik'e, la xi'. Jach ta t'umajel koel, jich jach ta aw: ¡kajwal koltayawon!" ³¹ Te Jesús ora nax la yak' te sk'abe, jich la stsak lok'eltel te Pedro sok la yalbey: "Te ja'ate mayuk lek xch'unjel awot'an, ¿bistu-uk te aan awot'ane?" ³² Jich te k'alal mo'ik bael ta barka te Jesús sok te Pedro te ik'e k'ax bael te yipe. ³³ Jich te nopojeletike te ayik ta barka la yich'ik ta muk' te Jesús sok la yalik: "Melel nix-a te ja'at snich'anat te Diose." ³⁴ Te k'alal jelawikix k'axel-a, k'otik ta lok'el ta ba sk'inal Genesaret. ³⁵ Te ants-winik te le nainemik-a la snabeyik sba te Jesús, jich yu'un chikan banti la stikunik sk'op yayejik, in bit'il la yik' beyik tel ta stojol spisil te mach'atik ayik ta chamele. ³⁶ Jich k'axem to xan la sk'ambeyik te ja'uk-nax te sti'il sk'u ya stsakbeyik, jich te mach'atik la spikbeyik te sti'il sk'u-e kolik ta chamel.