¹ Titaxhtulh kilhtamaku, wa puxku xlhal nak kachikin Amón tinílh, chu Hanún, xkgawasa, puxku tiwa xlakgxokgo, ² David chiwinálh: “Nak masiyuniy talakgalaman Hanún, xkgawasa Nahas, xpalakgata wa xtlat na kimasiyunilh talakgalhaman.” Chuna nchu David kamalakgachalh kskujnin namakgoxumixikgoy Hanún xlakata xtlat. Wa kskujnin tanukgolh nak xa tiyat xa kachikin Amón. ³ Ampi wa nchu xpulalinanín kachikin xla Amón wanikgolh Hanún, wa xmalaná:” ¿Aluxalikana wixa pastakga piwa David kaknima mimtlat xpalakata kamalakgachanincha lak chixkuwin tiku makgoxumiximakgon? ¿Niwakawa kalimalakgachanincha David kskujnin pi na ukxilhkgoy kachikin na naskgalawilikgoy, chu alistalh namalakhsputukgoy? ⁴ "Chunanchu Hanún kachipalh kskujnin David, kakilhmaktilh itat xkgalhchixitkan, kalakchukuminilh xtalakgankan, na makgat kamalakgachalh. ⁵ Akxni xlakán makgatajsnikgolh uma David, wa xla malakgachanalh laku natatanokglhkgoy, wa xlakán lu magchiya xmaxanamakgolh. Wa puxku chiwinalh, “Katamakgaxtagtit nak Jericó, akanku nastatpalay minkgalhchixitkan nataspitpalayatit.” ⁶ Akxni xkachikin Amón ukxilhli pi xtachuna puksna xlitaxtumakgolh nak xlakatin David, wa xkachikin Amón kamalakgachalh makatsinanin, chu kakisakuaka Arameos xalak Bet Rehob chu xalak Arameos chu xalak Soba, akgpuxammilh maktakgalhnanin tixkatsikgoy xtalatlawanankgoy a tuwen, chu puxku xal nak Maaca xkalimin akgtumilh chixkuwin chu chixkuwin xalak Tob akgkutuymilh makgtakgalhnanin ti xkatsikgoy xtalatlawanankgo. ⁷ Akan wa David kgaxmatli xpalakata uma, wa xla malakgachalh Joab chu putum makgtakgalhnanin tiku xkatsikgoy xtalatlawanankgoy. ⁸ Wa Amonitas taxtukgolh chu titum takaxtayakgolh laku natalatlawanankgo nak xa kilhtin xa malakcha kachikin. Xlimakgwa wa arameos xala nak Soba chu Rehob chu xlak chixkuwin Tob chu Maaca, wa xlakán xakstukan xtatakgskoy katuwan xa kalakgtlanka. ⁹ Akan wa Joab ukxilhli pi titum xtakaxtayakgonit laku natalatlawanankgo nak xlakatin, laku nak xlakatin chu nak xchekgan, wa xla kalaksakli tiku tlaj tlan xtalatlawanankgoy xalak Israel, chu anta kawalilh niku natalatlawakgo arameos. ¹⁰ chu putum ti xakgataxtuma makgtakgalhnanin, anta walhilh ni xmapakgsinan Abisai, chu xtalá, na anta kawalilh kalak kaxyawalh la nakatalatlawakgo makgtakgalhnanin xla Amón. ¹¹ Joab tiwa, pala piwa arameos lu lakgtliwakgan kimpalakata, chu wix, Abisai, nakilakgmaxtuya. Palapi wa makgtakgalhnanin xla Amón lu tliwakga mimpalakata, chu kit nakminan lakgamaxtuyan. ¹² Tliwakga kawanti, kamasiyuw kilitliwakgakan xpalakata kinkachikinkan chu xkachikinin ki PUCHINAKAN Dios, wa PUCHINÁ wa natlaway tuku xatlan namakgantaxti. “ ¹³ Chuna nchu Joab chu tiku xkgatsikgo xtalatlawanankgo chu makgtakgalhnanin lakapala xamakgolh katalatlawakgoy arameos, tiku tikakgtlakgatsalika xlakatinkan makgtakgalhnanin xalak Israel. ¹⁴ Akxni wa makgtakgalhnanin xala nak Amón ukxilhkgolh pi wa arameos aya xtsalakgonint, wa xlakán na tsalanikgolh Abisai, chu titaspitpalakgolh kachikin. Alistalh wa Joab kitaspitli xa kackikin Amón, anta chimpa nak Jerusalén. ¹⁵ Chu akan wa arameos ukxhilhkgolh pi xkatlajamakgolh Israel, wa xlakán tamakxtumipalakgolh. ¹⁶ Alistalh chu Hadad Ezer kamalakgachalh tropas arameas pakganacha nak xakgalhtuchokgo Éufrates. Wa xlakán taspipalakgolh nak Helam chu Sobac, wa xa puxku makgtakgalhna xala nak Hadad Ezer xa akxekga. ¹⁷ Axni wa David wanika uma, wa xla kamakgastogli putum xala nak Israel, titaxtukgolh nak Jordán, chu tichinkohl nak Helam. ¹⁸ Wa arameos takaxtayakgolh titum lantla natalatlawakgo David chu tilakgatawakakgolh. Wa arameos katsalanikgolh Israel. Wa David kamakgnilh akgtujun ciento tiku tlan xtalatlawankgo arameos tixlinkgo putlaw tu klhtanka kawayu chu tipuxám milh tiku xkatsinikgo xtalatlawanakgo ka kawayu xpulamakgo. Sobac, wa tiku xapuxku xmakgtakgalhná ti tasipanilh na antiya tinílh. ¹⁹ Akxni putum napuxkun tiku kskujnin xwankgo Hadad Ezer ukxilhkgolh pi kamakgatlajalh Israel, wa xlakán tatlawakgolh pi ka analh takgtsiyajni nak Israel chu kalaktaspitpalakgolh. Chuna nchu arameos ka xtapekuakan yalh makgtum kamakgtayakgolh xkachikin Amón.