¹ Afí i akabo, má numano mí, sendí jarócheria endi Ño. Pa mí kribí má memo kusa uto bé nú sendá injuria. Tó e má kusa a mantené segulo. ² Kuilao kú má pelo. Kuilao kú má moso malo. Kuilao kú lesió. ³ Pué suto sendá sirkunsisió. Sendá suto ké aroramo pó Epitu ri Rioso. Sendá suto lo a sendí okkuloso endi Kristo Jesús, i kié nú tén niggú konfiansa endi kanné. ⁴ Ri tó moro, i memo polé tené konfiansa endi kanné. Si agguno pensá ké a tén konfiansa endi kanné, i poleba tené nchochá. ⁵ i bae sirkunsidado (pito ri peyejo lo ké a se kitá a puntika ri pipí) endi ría olingó ri mé, ri pueblo ri Israel, ri tribu ri Benjamín, ebreo ri ebreos; kú relasió a ley, nfariseo. ⁶ Asina ké, a selo, i a pesiguí ilesia;kú relasió a justisia bajo ley, taba sin mancha. ⁷ Poro kuakiera kusa ké gúe nkanansia pá mí, má konsiderá kumo perdira pó kausa ri Kristo. ⁸ Ri echo, i kondá tó má kusa kumo perira pó kausa ri eselensia ri kunosimiento ri Cristo Jesús Ño mí, Pó Éle e resechá tó má kusa. I konsiderá biruta pa ké i poleba nganá a Kristo ⁹ i sé enkontrao endi Éle. I a tén njustisia nú memo ri mí pó ley. Endi parage ri eto, i a tén justisia ké sendá meriante fe endi Kristo, justisia ké sendá ri Rioso basara endi fe. ¹⁰ Asina ké aora i kelé kunosé a Éle, kutú ri buetta ri muette sí i akompañá endi sufrímiento sí. I kelé sé kambiaro endi palesiro ri muette sí, ¹¹ pa ké ri aggú moro i polé probá buetta ri má muette. ¹² Nú sendá belá ké i a resibí é kusa, o ké aya yegaro a tá kompleto. Poro siguí luchando, ri manela ké poleba akansá akeyo pó lo kuá güi akansaro pó Kristo Jesús. ¹³ Numano, nú pensá ké i memo lo aya akansaro toabia. Poro abé nkusa: I akolá nú lo ké tá trá i tá luchá pó lo ké tá lande. ¹⁴ I siguí asia meta pa ganá lekompensa ri yamamiento ri riba ri patte ri Rioso endi Kristo Jesús. ¹⁵ Tó suto ké sendá marulo, pensá ri eta manela: i si enú pensá ri uto foma sobre kuakie kusa, Rioso tambié a tá rebelá eso a enú. ¹⁶ Aunke, lo ké sendá ké suto aya akansaro, kalá ri eso. ¹⁷ Sé imitaró ri mí, numano. Guatiá ri seka akeyo ké tá jarreando seggú morelo ké enú a tén endi suto. ¹⁸ Chocha ri gende tá jarreando, akeyo ri kiene i chitiá pó tiembo, i ké aora a chitía kú lagrima, kumo enemio ri krú ri Kristo. ¹⁹ Lumbo sí ele senda retrusió. Pué Rioso sí sendá etomago sí, i okkuyo tá endi pondono sí. Ané a pensá pó ensima ri kusa ri tiela. ²⁰ Poro gende suto tá endi nsulu, ri ronde tambié a epera pó salbasió ri suto, Ño Jesucristo. ²¹ Éle a kambiá kueppo suto endi kueppto fomaro kumo kueppo ri Éle, fomaro pó kutú ri fuesa pa kalá tó má kusa asina memo.