¹ Pó eso, si habé agguna konsalasió endi Cristo; si aggú má kosita ri gongoroko; si agguna komunió ri epiritu; si agguna kusa ké i kelé i má suplika, ² antose kumplí jarócheria mí; ké sindí lo memo, ké tén gongoroko memo, totá, sindiendo nmemo kusa. ³ Nú asé ná pó kuenda sí o kú buya basío. Pó lo oppueto, kú umida pensá ké má uto sendá mejó ké enú. ⁴ Kara lingó ri enú a tén ké tené kuilao ná má nú ri neseserirá ri suto memo. sino tambié pó má nesesirá ri uto. ⁵ Pensá ri manela ké tambié a pensá Kristo Jesús. ⁶ Ele a esití endi foma ri Rioso, poro a tá pensá nú endi igualá kú Rioso kumo kusa a ké polé tá akalaó. ⁷ Pó lo oppueto, Élle a basía a ele memo. Éle a tomá foma ri nmoso. Éle tén palesiro a má ombe, i tándo endi kondisió ri ombe. ⁸ Éle a umiyá a éle memo i éle asé oberiente ata parage ri muette, ¡toabia endi muette! ⁹ Pó eso, Rioso ensasá a ele tambié endi kopito. Éle ndá nombe ké tá pó ensima ri tó nombe. ¹⁰ Éle asé eto pá ké endi nombe ri Jesús tó rodía tá doblá, má rodía ri ané endi nsulú, pó ensima ri tiela i rebajo ri tiela. ¹¹ Éle asé eto pá ké tó lengua konfesá ké Jesukristo sendá Ño, pá gloria ri Rioso pae. ¹² Asina antose, má gende ké i kelé, asina kumo enú endi tó tiempo tá oberesé, ná má nú kuandi i tá aí, tambié kuandí nú i tá, makanen pó salbasió ri suto memo pó temó o pó teteblá. ¹³ Pué sendá Rioso kie tá makaneá endi enú kumo pá ké resé kumo pá ké makanen pó nguena boluntá sí. ¹⁴ Asé tó má kusa sin kejá i sin epepitá. ¹⁵ Attuá ri eta manela pá ké nú tén pekaro i sendá retto, moná ri Rioso ké tén mancha. Attuá ri eta manela pá briyá kumo lú endi mundo, endi merio ri tosiá i mala genelasió. ¹⁶ Akalá ndulo a palabra ri mbila, pá ké i tén lasó pá tén gloria endi ría ri Kristo. Pué antose sabeba ké nú kolé pó ná, ni pó ná sendá labó mí. ¹⁷ Poro toabiá si i fuela reramaro kumo oflenda pó ensima ri sakrifisio i sirbisió ri fe ri enú, i tá jarócho i jarocho kú tó enú. ¹⁸ Ri memo manela, enú tambié sendí jarócheria i jarócheria kuyo. ¹⁹ I a epera endi ÑO Jesús mandá lapido a Timoteo, pa ké tambié i polé sé adelantaó kuandi i a konosé má kusa ri enú, ²⁰ Pué nú tén narie kú ese memo ngana, kié ri belá belá tén pa nú, ²¹ Pokke tó ané a buká nkaná pá ané memo, nú má kusa ri Jesukristo. ²² Poro enú konosé baló sí, pokké, asina kumo nmoná sirbí a pae ri ele, asina éle a sirbí kuyo endi ebangelio. ²³ Pó eso, i a pensá mandá kuandi a guatiá kumo bae má kusa kuyo. ²⁴ Poro i tá konfiaó endi Ño ké tambié i memo bae lapiro. ²⁵ Poro i pensá ké sendá nesesario mandá ri buetta a Epafrodito. Éle sendá numano mí i birikueta ri makaneo ri kusa malo, i chakero ri enú i moso pa má nesesirá mí. ²⁶ Pokke éle taba akonjogao i reseaba tá kú tó enú, pué enú a kuchá ké éle taba chakoso. ²⁷ Pué sin dekonfiá éle taba chakoso ké taba seka ri lungá. Poro Rioso tén suplika ri él, i nú má ri éle nú, sino tambié ri mí, pa ké i tá akonjogao nú, pó ensima. ²⁸ Asina ké sendá kú pasió ké tá mandalo, pa ké kuandi enú minalo uto bé, sendí jarócheria i tá fuela ri ansierá. ²⁹ Resibí a Epafrodito endi Ño kú tó jarócheria. Repetá a má gende kumo éle. ³⁰ Pue güe pó makaneo ri Kristo ké éle taba seka ri muette. Éle a apotá mbila sí pa sirbí mí i kompletá lo ké enú nú poleba asé endi sirbisio pa mí.