¹ Salomón jȩö̧ ucuohua'a ä̧ju̧cu̧, Sabáttö ruhuajumä̧ jeruhuächi'ö jäecuä huȩnȩnä̧ ka̧cuä̧mö̧ toja pä'ö Jerusalénra̧'a̧cu̧ ichinäju. Korojuei i'cächö ji̧nä̧ yo̧mȩtȩnä̧ ichömä, a̧mȩu̧'i̧nä̧, oroí̧nä̧ rö̧ä̧nä̧ camellonä i'cächinä̧ju̧ ja̧'hua̧ta̧nö̧ koro inä o'qui rö̧ä̧nä̧ micuäu jähuä'i̧nä̧. Salomón ö̧jo̧mȩ rȩbȩhui̧pä̧'cojumä̧, o'cajuiyönä ka̧mö̧cuädönä ka̧cu̧mä̧ ji'ähuinä̧ju̧. ² Jä'epö kä̧ju̧cuä̧ji̧mä̧ Salomónmä̧ o'cajuiyötä ädätinä̧cua̧; Ja̧u̧ Salomónrömä o'cajuiyönä jeruhuocötä ji̧na̧'a̧; jä'epö kä̧ju̧cuä̧ji̧ttö̧mä̧ o'cajuiyötä ädätinö. ³ Sabáttö ruhuajumä Salomón u̧huo̧jö̧ huȩnȩ'i̧nä̧ topinä̧ju̧ ja̧'hua̧ta̧nö̧ ruhuode aditina'a'i̧nä̧, ⁴ cuäcuähuä mesanä̧ ka̧'a̧'i̧nä̧, umöhuäyotö adiu jȩpö̧ ku̧nu̧ ttadita'a'i̧nä̧, umöhuäyotö ttaditö'i̧nä̧ ja̧'hua̧ta̧nö̧ ttö̧'ca̧tä̧huä̧ti̧yu̧'i̧nä̧, juhua'atäcu ahuähuä iyätö'i̧nä̧ ja̧'hua̧ta̧nö̧ juätö ttö̧'ca̧tä̧huö̧ti̧yu̧'i̧nä̧ ja̧'hua̧ta̧nö̧ TÖ̧Ä̧NÄ̧HUA̧RÖ̧ ttöäre iyähuä ku icu ttiyu'i̧nä̧, ucuo tejähuä'ijömä juiyächi'önä̧tä̧ päi'önä. ⁵ Jahuäju pä'inäju̧ ru̧hua̧rö̧: "Iso päi'önä ja̧'a̧, huȩnȩ huecuäjä'a chä̧ju̧cuä̧ji̧mä̧ cha̧mo̧nä̧ chi̧rȩjä̧ jacuättö huo̧juȩcu̧nä̧tä̧ päcumä. ⁶ Ttö chä̧ju̧cua̧ji̧mä̧ esetocoju päjäjusä potä ichö chä̧jui̧cuo̧mȩ jubu päi'önä, ja̧'hua̧nö̧ ja̧'a̧ttö̧ jitämä jitämä topäjusä. ¡Ji̧nä̧ kä'co jo̧mȩtä̧ jittähuä'ijäcuasä ja̧'a̧ ucu cu̧huo̧ju̧mä̧ ja̧'hua̧ta̧'a̧nö̧ järettö ru̧hua̧ cu̧ju̧'i̧nä̧! Ucu rö̧ä̧nä̧ ucuounä kö̧jä̧ ttö chä̧ju̧cuo̧mȩnä̧mä̧. ⁷ Juiyo adihuä ppädäcuähuänä ko̧cuä̧tö̧ cu̧mu̧huäyotömä, Ja̧'hua̧ta̧'a̧nö̧ Juiyo adihuä ppädäcuähuänä ttö̧jo̧cua̧'a̧ttö̧ 'cuäopönä cuä'ca jo̧mȩttö̧ päcuta'anö jȩpä̧tö̧, jua'amä ucu juo̧juȩcu̧nä̧ huecua'attö. ⁸ Ucuo tetähuätucua TÖ̧Ä̧NÄ̧HUA̧ ucu cu̧ru̧hua̧ Diosrötä. TÖ̧Ä̧NÄ̧HUA̧MÄ̧ repe'inö Israél ttö̧ja̧rö̧, jahuätucu 'cuäopönä ö̧ja̧ pä̧'ö̧, JA̧U̧TÄ̧ ji̧na̧'a̧ jähuätöttö ru̧hua̧ cu̧ju̧nä̧ hue'inömä, jȩcu̧'a̧ pä'ö adiunä jueönä jo̧mȩnä̧". ⁹ Juaju ru̧hua̧rö̧ iyinäju̧ 120 kilo jo̧mȩnä̧ (4,080 kilogramo jo̧mȩnä̧) oro ja̧'hua̧ta̧'a̧nö̧ rö̧ȩnä̧ iyinäju̧ a̧dö̧nä̧ a̧mȩu̧ttö̧'i̧nä̧ ja̧'hua̧ta̧'a̧nö̧ inä o'qui adihuäjueittö. Adihuö a̧mȩu̧mä̧ ȩmo̧cö̧ pi̧nö̧ Sabá ruhuaju kiyinö'a̧nö̧mä̧ ru̧hua̧ Salomónmä mipponä iyähuä kiyinö'a̧nö̧mä̧ päita'anömä ttiyococu pinö. ¹⁰ Hiram umuhuäyotö su̧ro̧da̧u̧ i'cächinätö̧ oro Ofirtara̧'a̧ttö̧ ja̧'hua̧ta̧'a̧nö̧ Salomón umuhuäyotö su̧ro̧da̧u̧ mitähuä'cotö i'cächinätö̧ sándalo dahuiyä ja̧'hua̧ta̧'a̧nö̧ adihuäjuei inä o'quittö'inä. ¹¹ Sándalo dahuiyättömä ru̧hua̧mä̧ aditinö TÖ̧Ä̧NÄHUA̧ ö̧jode 'cahuächä̧cuä̧huä̧cä̧ ja̧'hua̧ta̧'a̧nö̧ juo̧u̧ttö̧tä̧ aditinö chutä ojusode'inä ja̧'hua̧a̧ta̧'a̧nö̧ aditinö arpa'inä lira'inä 'porö ra̧huä̧huä̧ oba. A'quejimä pi̧yȩ dahuiyämä judá rȩjȩttö̧mä̧ tottocö̧jä̧'i̧ji̧nö̧. ¹² Ru̧hua̧ Salomónmä Sabá ruhuaju o'cajuiyönä köjö'cömä iyinö, juaju o'cajuiyönä, ru̧hua̧rö̧ ki'cächinö̧cö̧ ppachi'önä jäjepinäcö̧. Ja̧'hua̧nö̧ ja̧'a̧ juaju yajutä ki̧rȩjä̧ra̧a̧ ppa̧a̧chi̧nä̧ju̧ huejö adicuä ttö̧ja̧cu̧. ¹³ Jitämä Salomónrö̧ ya'ate a̧'ȩmä̧ ichina'a 666 talentos jo̧mȩ( 23,000 kkilogramos) oromä, orottö'inä ¹⁴ i̧mi̧cu̧nä̧ järe iyätö'inä ja̧'hua̧ta̧'a̧nö̧ cuähuä iyätö'inä ttiya'anä. O'catoi'önä Arabiattö ruhuotö'inä ja̧'hua̧ta̧nö̧ tti̧rȩjä̧ jacuättö ttötahuiyänä ruhuo huä'ätömä ttiyinäcu̧ oro'inä pärätä'inä Salomón-mä. ¹⁵ Ru̧hua̧ Salomón aditinä 200nö rohuäu ttoecuäcuähuä bäreu obi orottö huihuatö. 600 siclos oro jo̧mȩ ji̧na̧'a̧ jibicunämä. ¹⁶ Ja̧'hua̧ta̧'a̧nö̧ aditinö 300nö rohuäu ttoecuäcuähuä ppo̧ö̧ obi orottö huihuatö. 3 siclos oro jo̧mȩ ji̧na̧'a̧ jibicunämä; Ru̧hua̧mä̧ ojusode Bosque del Libanonä ku̧ni̧nö̧ ja̧u̧ obimä. ¹⁷ Ja̧'hua̧nö̧ ja̧'a̧ ru̧hua̧ aditinö ruhuo deäcä 'quiyö juäi márfilttö, mu̧'ȩpö̧ tuhuepinö orottö'inä adihuä jueittö. ¹⁸ Ji̧mu̧tȩ ta'arenö kä̧dö̧ 'chahuächäcuähuome ji̧na̧'a̧ ruhuo deäcära̧'a̧ pätti'a pä'ömä, ja̧'hua̧ta̧'a̧nö̧ ruhuo deäcä aboja̧'a̧nä̧mä̧ järobunö beipina̧'a̧. Deäcä jäyänä ttöjo huä̧nä̧huo̧mȩ'i̧nä̧ ki̧na̧'a̧ ja̧'hi̧u̧a̧ta̧'a̧nö̧ ttöjo huä̧nä̧huo̧mȩ ppeyanämä mö yä̧hui̧ttä̧ ttö̧jö̧nä̧ adicuiona'a. ¹⁹ Mö yä̧hui̧ttö̧ to̧mu̧rȩ ta'arenö huotö 'chahuächäcuähuome ko̧cui̧nä̧tö̧, ji̧mu̧tȩ ya'atenö 'chahuächäcuähuome ppeyänämä ya̧cu̧nä̧ ko̧cui̧nä̧tö̧. Koromettö̧'inä pa̧'a̧nö̧ jäcä ruhuo deäcämä juiya'a. ²⁰ O'cajuiyönä ru̧hua̧ salomón a̧huä̧ o̧tta̧mä̧ orottötä adicua ji̧na̧'a̧ ja̧'hua̧ta̧'a̧nö̧ o'cajuiyönä chutä ojusode de'a Libanottö a̧huo̧'ti̧yu̧'i̧nä̧ päcuäi orottö adicuä ji̧na̧'a̧. Platattö adicuämä juiyina'a ji̧yȩnö̧ pä̧nä̧ Salomón hueinö pä̧nä̧mä̧ platamä micuähuocö jö̧nä̧tä̧ tittinö. ²¹ Ja̧u̧mä̧ ku̧nä̧ri̧nä̧ bäreu huoi'quiyu dä'ähuotonä, Hiram uhuoi'quiyu bäreu'inä juȩnȩtä̧ rö̧ji̧na̧'a̧. Ya'ate a̧'ȩttö̧mä̧ huäbodäcuänä jo̧mȩnä̧ bäreu hui'quiyunä i'chächinätö̧ oro'inä, pärätä'inä ja̧'hua̧ta̧'a̧nä̧ marfil'inä, ji̧chu̧tu̧ru̧'i̧nä̧, ja̧'hua̧ta̧'a̧nä̧ pavottörö'inä. ²² Ja̧'hua̧'a̧nö̧ ja̧'a̧ttö̧, ru̧hua̧ Salomon-mä iyä'chinö ru̧huo̧tö̧ o'cato'iönä-rö pärätä järe ja̧'hua̧ta̧'nö̧ huo̧juä̧'i̧nä̧. ²³ O'cato'iönä pi̧jä̧nä̧ kä̧tö̧mä̧ usinätö̧ ö̧jö̧ jä̧huä̧ Sa̧lo̧mo̧n ja̧'hua̧'a̧nö̧ ja̧'a̧ ttäjö̧cuä̧ pä'ö chutä uhuojö̧ ja̧u̧mä̧ Dios-tä iyö u̧ju̧ni̧nö̧ ami'iso'quinä. ²⁴ Juättö topätömä iyinä'u̧, ö'ta pärätättö adicuä ja̧'hua̧ta̧'a̧nö̧ orottö adicuä, pu̧jä̧ti̧yu̧, curä jähuä, ja̧'hua̧ta̧'a̧nö̧ a̧mȩ'u̧, ja̧'hua̧'a̧nö̧ ja̧'a̧nä̧ ca̧hua̧yu̧tu̧ ja̧'hua̧ta̧'a̧nö̧ mula-i̧nä̧, duo jinöta'anö. ²⁵ Salomon-mä ku̧nä̧ri̧nö̧ cuatro mil-nö o̧'ca̧ ca̧hua̧yö̧tu̧ ttö̧jo̧ca̧ ja̧hua̧ta̧'a̧nö̧ doce mil-nö ca̧hua̧yö̧tu̧nä̧ huä̧tö̧, juä̧ttö̧mä̧ chutä u̧ju̧ni̧nä̧'u̧ ö̧tahuiyänä caruquiyä cue'ädätö chutäcu Jerusalen-nä, ²⁶ Ja̧u̧mä̧ huȩ'i̧nö̧ o'cato'iönä ruhuottörö Eufrate ajettö kä̧mä̧du̧ filisteos ttirejäbu ja̧'hua̧ta̧'a̧nö̧ Egipto rȩjȩ bȩ'ipomäbu. ²⁷ Ru̧hua̧mä̧ plata pättöjuei ku̧nä̧ri̧nä̧ Jerusalénnämä, inähuiyä'i̧nä̧ kȩdä̧huä̧jä̧nä̧ rutähuämä. Cedro dau odiyä'i̧nä̧ rö̧ä̧nä̧ aditinö, sicómoro meje'canä ka̧cu̧ ja̧'i̧a̧'a̧nö̧ jö̧nä̧. ²⁸ Jahuätömä Egiptora̧'a̧ttö̧ Salomón ä̧ji̧mö̧ päi'önä pä̧cä̧yu̧rö̧ i'cächö iyinä̧tö̧ ja̧'hua̧ta̧nö̧ koromepönä̧ttö̧'i̧nä̧. ²⁹ Salomón koro ä̧cuo̧mȩnä̧ttö̧ kä̧mä̧dö̧ röji jubö jȩi̧nö̧mä̧, Dios päö jiäcuähuä i̧sa̧ Natán i̧huȩyu̧ti̧nö̧ huȩnȩnä̧ huȩyu̧cua̧'a̧mä̧ po̧ca̧'a̧, Dios päö ji'äu Silo ttö̧ja̧sa̧ Ahías i̧huȩyu̧ti̧nö̧nä̧'i̧nä̧, ja̧'hua̧ta̧nö̧ Dios i̧jȩpö̧ topö Iddo toinönä'i̧nä̧, Nabat i̧tti̧ Jeroboam ötö'cö'i̧nä̧? ³⁰ Jerusalénttö Israel ttö̧ja̧ o'catoi'önä̧rö̧ Salomónmä̧ ruhuomä cuarentanö̧ a̧'ȩ jo̧mȩnä̧ hue'inö. ³¹ Ja̧u̧mä̧ ö̧ta̧mö̧ mi̧nä̧tu̧cu̧tä̧ ä'i'inö ja̧'hua̧nö̧ ä'i'äja'amä jä'o David minä i̧rȩjä̧nä̧ ttö̧ja̧mä̧ 'turu tticuinä̧cu̧. Ruhuo hueä'ijö o'comemä i̧tti̧ Roboamtä̧ hue'inö.