¹ Roboam 'chi̧nö̧ Siquemra̧'a̧, o'catoi'önä Israél ttö̧ja̧ tti̧'cha̧'a̧ttö̧ Siquemra̧'a̧ ru̧hua̧ päi'önä huettarö pä'ö. ² 'Cuaopina'a Nabat i̧tti̧ Jeroboam, pi̧yȩ huȩnȩ ä̧ju̧cuo̧mȩnä̧( ja̧u̧mä̧ ki̧nö̧ Egiptora̧'a̧, ru̧hua̧ Salomón ä'cajo̧mȩttö̧ ttö'ipächinö'ca̧, ja̧'hua̧nö̧ ja̧'a̧nä̧ Jeroboam-mä ppa̧'a̧chi̧nö̧ Egiptora̧'a̧cu̧). ³ Ja̧'hua̧nö̧ ja̧'a̧ttö̧ jittähua pä'ö huettinätö̧ Jeroboam-rö̧ ja̧'hua̧nö̧ jo̧mȩnä̧ ichinätö o'catoi'önä Israél ttö̧ja̧'inä̧; ucuocuinätö Roboam-rö̧ pä'inätö: Ucu cuä'ominämä ujuturu juiyo pä̧i̧cu̧nä̧ hue'inö. ⁴ "Ja̧'hua̧nö̧ ja̧'a̧ttö̧, jitämä cuä'o aditinömä̧ jeruhuo'cötä ja̧'hua̧ta̧'a̧nö̧ amäco'cotä huä'itö amäcönä ujuturu hueinö ji̧nö̧mä̧ ja̧'hua̧nö̧ jö̧ttö̧tä̧ ucu huecuta'anä aditö tö̧jä̧cuo̧tö̧jä̧." ⁵ Roboam pä'inö jahuätörö: "Pä'äjita'anö cuichätucuajá huäbodäcuä mo̧ro̧ o'ca'a." Ja̧'hua̧nö̧tä̧ ppa̧'a̧chi̧nä̧tö̧ ttö̧ja̧mä̧. ⁶ Ru̧hua̧ Roboam jäepu ä̧ju̧cui̧nö̧ buäcuächätörö jäo Salomón, a̧'cua̧rȩi̧ ka̧cui̧nä̧tö̧rö̧; ¿Jiähuätucuittö chädätä̧cuȩi̧ pitö ttö̧ja̧rö̧? ⁷ Jahuätö ucuocu ttädätinäcu̧ juo̧u̧rö̧: pitörö adihuönä jȩ'cu̧ttö̧mä̧ ja̧'hua̧ta̧'a̧nö̧ päcunä jähuätörö adiuttömä, jähuätömä 'cuäpunä huȩcuä̧u̧tä̧ tti̧jä̧cu̧yo̧tö̧. ⁸ Roboam jerupätö jä̧i̧nö̧'a̧nö̧ jȩpi̧nö̧ buäcuöchätö jitähuäjimä juo̧u̧rö̧ ja̧'hua̧nö̧ ja̧'a̧ttö̧ jäepu ä̧ju̧cui̧nö̧ u̧mä̧tö̧ mu̧ä̧yotörö chutäcu pputächinätö̧rö̧tä̧, chutäcu ka̧cuä̧tö̧rö̧. ⁹ Juo̧u̧ päinö jahuätörö: ¿Jiähuätucuittö ujutu tädätäcua'anö ttörö ucuocunö pä'ätörö: ujuturö cuäo aditinöta̧'a̧nö̧tä̧ aditi? ¹⁰ U̧mä̧tö̧ muäyotö Roboamcu̧ buo juo'inätö̧ ucuocumä̧, pättinäcu̧: "Ja̧'hua̧nö̧tä̧ ttö̧ja̧rö̧mä̧ cucuocua pä'ö ja̧'a̧ cuä'ö salomónmä a̧mä̧cö̧ taditönä huȩi̧nä̧u̧jä̧, ja̧'hua̧nö̧ ja̧'a̧nä̧ ucumä jojeönä jö̧tä̧ taditönä huecuatöjä pättäjimä. Pa̧'a̧nö̧ päcuajä jahuätörömä , chudo'che röji isa'chemä chä'o äcättö'i̧nä̧ yabonänö rö̧ä̧cuache. ¹¹ Ja̧'hua̧nö̧ ja̧'a̧ttö̧ jitämä, Chä'omä rö̧ä̧nä̧ a̧mä̧cö̧ jähuänä hue'ina'anä, ttömä juhua'a yabonänö a̧mä̧cö̧ jähuänä huȩdä̧cua̧sä̧. Chä'omä appiyänä cuä'ö ro̧ȩpi̧na̧'a̧nä̧, ttömä i̧di̧yu̧tö̧nä̧ ro̧dȩpä̧cua̧sä̧." ¹² Ja̧'hua̧nö̧ ja̧'a̧ttö̧ Jeroboam ja̧'hua̧ta̧nö̧ ahuaruhuä o'catoi'önä̧cu̧ huäbodäcuä mo̧ro̧ päi'omenä Roboamä ichinö, ru̧hua̧ päjita'anötä̧: "Huäbodäcuä mo̧ro̧ päi'omenä ttö chö̧ja̧'a̧cu̧ ppa̧cuä̧chä̧tu̧cua̧ja̧ jö̧nä̧." ¹³ Roboamä ujurucu ucuocuinö̧ jahuätörömä̧, ttä̧mö̧ ro̧'ȩpö̧nö̧ jittäjimä jȩo̧ca̧'a̧tä̧. ¹⁴ Ja̧u̧mä̧ ucuocuinö möäyotö ro̧'ȩpö̧nö̧ jittähuäji'a̧cuä̧tä pa̧'a̧nö̧ pä'inö: Chä'omä a̧ma̧cö̧ jähuänä ttaditönä̧ hue'inö, ja̧'hua̧nö̧ ja̧'a̧nä̧ ttömä ja̧u̧ jinömä yabonänö rö̧dä̧dä̧cua̧sä̧. Chä'omä appiyänä cuä'ö ro̧'ȩpi̧nö̧, ja̧'hua̧nö̧ ja̧'a̧nä̧ ttömä ro̧dȩpä̧cua̧sä̧ i̧di̧yu̧tu̧nä̧tä̧." ¹⁵ Ja̧'hua̧nö̧ jo̧mȩnä̧ ru̧hua̧mä̧ ötahuiyä ttö̧ja̧ pättömä ä̧ju̧cuo̧cö̧ pinö, jua'amä TÖ̧Ä̧NÄ̧HUA̧TÄ̧ ja̧'hua̧nä̧ 'cuäopapä'ö jȩi̧na̧'a̧ ji̧na̧'a̧ TÖ̧Ä̧NÄ̧HUA̧ Jeroboanrö̧ päinö'jinö 'cuäopapä'ö, Nabat i̧tti̧rö̧, profeta Ahias Silo ttö̧ja̧sa̧nä̧ ¹⁶ Israél ttö̧ja̧ ö'catoi'önä rru̧hua̧ ä̧ju̧cuo̧ca̧'a̧ tottomenä, ttö̧ja̧mä̧ pa̧'a̧nö̧ pä'ö ädätinätö̧: "¿Däje tu̧ju̧nä̧rä̧'a̧ttö̧ David jähuämä? ¡Ujutu Isaí i̧tti̧ jähuättömä ku̧nä̧ro̧co̧tö̧jä̧! Ya̧cu̧pö̧nä̧ ucutumö ppa̧'a̧chä̧tu̧cui̧ cuiäre co̧cu̧du̧nä̧, Israél. Jitämä cua̧mo̧nä̧ cuojusudetucutä tta̧'a̧rä̧tu̧cui̧, David." Ja̧'hua̧nö̧ ja̧'a̧ttö̧ ö'catoi'önä Israél tö̧jä̧mä̧ ppa'achinätö ttiäre ko̧cua̧'a̧cu̧. ¹⁷ Ja̧'hua̧nö̧ ja̧'a̧nä̧ Israél ttö̧ja̧ Judá ötahuiyänä ko̧cuä̧tö̧mä̧, Ro̧bo̧a̧m huea'anätö̧ ko̧cui̧nä̧tö̧. ¹⁸ Ja̧'hua̧nö̧ jo̧mȩnä̧ ru̧hua̧ Roboam hue'inö Adoramrö̧, pä̧i̧cu̧nä̧ ttaditönä huettome to̧ä̧rä̧cuä̧hua̧ i̧sa̧rö̧, ja̧'hua̧nö̧ ja̧'a̧nä̧ Israél ttö̧ja̧ inädunä icuäu cuä'ö tticuinäcu̧. Ru̧hua̧ Roboam o'capäi'önä carucä ca̧hua̧yu̧tu̧ dottäcänä pä̧mä̧dö̧ Jerusalenra̧'a̧cu̧ tö'ipächinö. ¹⁹ Ja̧'hua̧nö̧ ja̧'a̧ttö̧ Israél ttö̧ja̧mä̧ David ahuaruhuä 'cotöttömä ruhuo huettätö pä'ömä kö'cocotö jitä mo̧ro̧ jubu päi'önä.