¹ Roboam Jerusalén'nä ö̧rä̧bȩcuo̧mȩnä̧, ji̧nä̧ yo̧mȩtȩ pättiönä jȩpi̧nö̧ Judá isotöttö'inä ja̧'hua̧ta̧nö̧ Benjamín sotottö'inä, 180,000tanö huotörö pojopö ȩmi̧nö̧ su̧ru̧da̧u̧ru̧, ttörocuacua pä'ö Israel sotucu, Roboam uruhuo ji̧nö̧ pä'äjitanö ppa̧cuä̧da̧ pä'ö. ² Ja̧'hua̧nö̧ ja̧'a̧nö̧ ichina̧'a̧ TI̧Ä̧NÄ̧HUA̧ i̧huȩnȩ Semaíasnä, Diosrö ucuotö repeömä, päinö: ³ ''Jiähui Roboamrö̧, Salomón i̧tti̧rö̧ Judá ru̧hua̧rö̧ ja̧'hua̧ta̧nö̧ o'catoinä̧ Israelrö'inä Judá sotörö'inä ja̧'hua̧ta̧nö̧ Benjamín sotörö'inä: ⁴ Pi̧yȩ pä'ö TÖ̧Ä̧NÄ̧HUA̧MÄ̧ ''Ucumä curohuähua pä'ömä jȩ'cuä̧ jui̧jä̧cua̧tu̧cu̧mä̧. O'catoinä ppä̧'a̧chä̧tu̧cui̧ cuojusodera'acutä, pi̧yȩ 'cuä'opa pä'ömä TTÖTÄ jȩchä̧ji̧.'' Ja̧'hua̧nö̧ ja̧'a̧tö̧ jahuätömä TÖ̧Ä̧NÄ̧HUA̧ i̧huȩnȩ esetö ppa̧'a̧chä̧chi̧nä̧tö̧ ttörohuähuoca'atä Jeroboamrö̧mä̧. ⁵ Roboamä Jerusalénä ki̧nö̧ juȩnȩ kä̧nö̧mä̧ ötahuiyä bäreö aditinö Judá ttö̧ja̧rö̧ tturohuäu juiyönä ppä'ädönö. ⁶ Ja̧u̧mä̧ aditinö; Belén ötahuiyä'i̧nä̧, Etam ötahuiyä'i̧nä̧, Tecoa ötahuiyä'i̧nä̧, ⁷ Bet Sur ötahuiyä'i̧nä̧, Soco ötahuiyä'i̧nä̧, Adulam ötahuiyä'i̧nä̧, ⁸ Gat ötahuiyä'i̧nä̧, Maresa ötahuiyä'i̧nä̧, Zif ötahuiyä'i̧nä̧, ⁹ Adoraim ötahuiyä'i̧nä̧, Laquis ötahuiyä'i̧nä̧, Azeca ötahuiyä'i̧nä̧, ¹⁰ Zora ötahuiyä'i̧nä̧, Ajalón ötahuiyä'i̧nä̧, Hebrón ötahuiyä'i̧nä̧. Pi̧yȩ ötahuiyätä ja̧'a̧ 'quiyönä kö̧nä̧ Judá ttö̧ja̧'i̧nä̧ Benjamin ahuaruhuä'i̧nä̧rö̧ aditö iyinö̧mä̧. ¹¹ Ja̧u̧mä̧ yabonänö 'quiyönä päi'önä aditö ku̧nu̧mä̧ ja̧u̧ ötahuiyänämä su̧ro̧da̧u̧ tturuhuotörö ku̧nu̧ kö̧nö̧mä̧, cuäcuähuä ku̧nä̧huo̧mȩ'i̧nä̧, a̧dȩ ku̧nä̧huo̧mȩ'i̧nä̧ ja̧'hua̧ta̧nö̧ vino ku̧nä̧huo̧mȩ'i̧nä̧ aditinö. ¹² Ja̧u̧ ötahuiyä o'cajuiyönä ttoecuäcuähuä obi'i̧nä̧, dacuodiyä'i̧nä̧ ku̧nu̧mä̧ yabonö juruhuächönä̧tä̧ jȩpi̧nö̧. Ja̧'hua̧nö̧ ja̧'a̧ttö̧ Judá ttö̧ja̧'i̧nä̧ Benjamin ahuaruhuä'i̧nä̧ ja̧u̧tä̧cu̧ ka̧cui̧nä̧tö̧. ¹³ Sacerdote huotö ja̧'hua̧ta̧'a̧nö̧ Levita'inä Israelnä ko̧cui̧nä̧tö̧mä̧ 'chi̧nä̧tö̧ ja̧u̧ ö̧ja̧'a̧cu̧ tö̧jo̧mȩ bȩi̧pä̧ro̧mȩttö̧. ¹⁴ Levita ttö̧ja̧mä̧ ttö̧ji̧mö̧ ttucuä'cua'inä ja̧'hua̧ta̧'a̧nö̧ koro ttiäre'inä jaropi'inätö̧ Juda rȩjȩcu̧ ja̧'hua̧ta̧'a̧nö̧ Jerusalencu̧, 'chi̧nä̧tö̧, jua'amä Jeroboam ja̧'hua̧ta̧'a̧nö̧ i̧tti̧mu̧cu̧ rä'epö rä'epö icuina'attö̧, ja̧'hua̧nö̧ ja̧'a̧ttö̧ jahuätömä sacerdote huotö TÖ̧Ä̧NÄ̧HUA̧RÖ̧ iyähuä ttiya pä'ö'inä jui'inätö̧. ¹⁵ Jeroboam-mä chutätä amucuädö ku̧ni̧nö̧ sacerdote huotörö ruhuättö ju'töju jo̧mȩ ja̧'hua̧ta̧'a̧nö̧ cabra a̧'u̧cuä̧'inä päcäyä a̧'u̧cuä̧ aditinä'ca tta̧ttä̧ra̧ pä'ö'inä. ¹⁶ O'catoi'önä Israelnä ko̧cuä̧tö̧mä̧ jahuätö tto'ca'anä 'chi̧nä̧tö̧, ja'huätömä ttamiso'qui jacuättö TTÖ̧Ä̧NÄ̧HUA̧RÖ̧ ttusa pä'ö amucuädinätö ji̧na̧'a̧, Israél ttö̧ja̧ TÖ̧Ä̧NÄ̧HUA̧ Diosrö; Ja'huätömä ichinätö Jerusalen-ra̧'a̧cu̧ 'cu'icu iyähuä ttiya pä'ö TÖ̧Ä̧NÄ̧HUA̧RÖ̧, tä'ominä Ö̧Ä̧NÄ̧HUA̧ Dios pinörö. ¹⁷ Ja̧'hua̧nö̧ jȩpö̧tä̧tä̧ Judattö ruhuo hueähuä ucuounä jȩpi̧nä̧tö̧ ja̧'hua̧ta̧'a̧nö̧ Salomón i̧tti̧ Roboam-rö̧'i̧nä̧, huäbodäcuä a̧'ȩ jo̧mȩnä̧ ujurucu hue'inö, ja̧'hua̧nö̧ ja̧'a̧ttö̧ ja'huätömä huäbodäcuä a̧'ȩ jo̧nȩmä̧ cue'ächinätö̧ David-inä Salomón-inä tti̧'chi̧no̧mȩnä̧. ¹⁸ Roboam ȩmi̧nö̧ irecua päi'önä: Mahalatrö, Jerimot ittijuru, Jerimotmä David i̧tti̧pi̧nö̧, ja̧'hua̧ta̧'a̧nö̧ Abigailmä Eliab ittijupinäju, Eliabmä Jesé i̧tti̧pi̧nö̧. ¹⁹ Juajumä kö̧nä̧ri̧nä̧ju̧ ki̧tti̧mu̧rö̧: Jeús, Semarias ja̧'hua̧ta̧'a̧nö̧ Zaham'inä. ²⁰ Mahalat ko'ca'anä, Roboam irecua päi'önä ȩmi̧nö̧ Maacarö, Absalón ittijuru; juajumä ku̧nä̧ri̧nä̧ju̧ ki̧tti̧mu̧rö̧ Abíasrö, Atairö, Zizarö ja̧'hua̧ta̧'a̧nö̧ Selomitrö'inä, ²¹ Roboam repe'inö Maacarö, Absalón ittijurutä, korotö i̧rȩcua̧mu̧ttö̧'i̧nä̧ abonänö repe'inö (18 huotöttömä irecuamuttö̧mä̧ ja̧'hua̧ta̧'a̧nö̧ sesentanö huotöttö korotö i̧rȩcua̧mu̧ttö̧'i̧nä̧ ja̧'hua̧nö̧ ja̧'a̧ttö̧ veinteochonö huotö u̧mä̧tö̧ ja̧'hua̧ta̧'a̧nö̧ sesentanö huotö nätö̧ ttäopinö) ²² Roboamä, Maaca i̧tti̧ Abíasrö pojopö ȩmi̧nö̧, ahuaruhuä ö̧jä̧hua̧tö̧ ttu̧ru̧hua̧ päi'önä̧; ja̧u̧mä̧ ja̧u̧rö̧ ttö̧ja̧ ttu̧ru̧hua̧ päi'önä ö̧jö̧na̧ pä'ö a̧mö̧cuädinö. ²³ Roboamä huo̧juȩcu̧nä̧ hue'inö ruhuomä̧; ja̧u̧ i̧tti̧mö̧rö̧mä̧ Judá'i̧nä̧ ja̧'hua̧ta̧nö̧ Benjamin'i̧nä̧ tti̧rȩji̧yä̧nä̧ pperetö icuinö, ötahuiyä 'quiyönä adicuänä. Ja̧'hua̧ta̧nö̧ ttu̧cuä̧'i̧nä̧ rö̧ä̧nä̧ iyinö juhua'atäcu tti̧rȩcua̧mö̧'i̧nä̧ recuätörö iyinö jahuätörömä.