¹ Ja̧'hua̧nö̧ ji̧yä̧cu̧ Salomón pä'inö: "CHÖ̧Ä̧NÄ̧HUA̧MÄ̧ pä'äji ttömä chö̧jä̧cua̧sä̧ isoppa rö̧oppa jacuä yo̧mȩtä̧, ² ja̧'hua̧nö̧ ja̧'a̧nä̧ ttömä aditö chiyäjäcujä cuojusode adihuode, cu̧jo̧mȩju̧bu̧ juȩnȩtä̧ cu̧ja̧ pä'ö." ³ Ja̧'hua̧nö̧ päji o'ca'a ru̧hua̧ kärächi'ö topö Israel ttö̧ja̧ ttö̧jo̧cua̧'a̧cu̧ adihuatä pä'inö, o'catoi'önä a̧ra̧mi̧'ä̧jä̧tö̧tä̧ ko̧cui̧nä̧tö̧. ⁴ Ja̧u̧ pä'inö: "TÖ̧Ä̧NÄ̧HUA̧RÖ̧TÄ̧, Israél ttö̧ja̧'i̧nä̧ TTÖ̧Ä̧NÄ̧HUA̧RÖ̧TÄ̧, ucuo tetähuätucua, chä'ö David-rö chutä ättö ucuocuinö ji̧nö̧mä, päinöta'anö chutä u̧mu̧nä̧tä̧ iso jo̧nä̧ jȩpö̧, pa̧'a̧nö̧ pä'ö: ⁵ Ji̧yȩnö̧ mo̧ro̧ TTÖ chumuhuäyotörö Egipto rȩjȩttö̧ koromecu̧ 'chi'chächinötä̧, TTÖMÄ Israél ttö̧ja̧ ttö̧jo̧mȩtö̧ korome ötahuiyättömä ȩmo̧cö̧ pinösä juȩnȩtä̧ aditinösä̧ isodemä, TTÖ chi̧mi̧ juȩnȩtä̧ ka̧ pä'ö. TTÖMÄ päte'öra̧'a̧tä̧mä̧ ȩmo̧cö̧ pinösä̧ chumuhuäyotö Israél ttö̧ja̧rö̧ ya̧tȩ ruhuo juea pä'ömä. ⁶ Ja̧'hua̧nö̧ ja̧'a̧nä̧'i̧nä̧, TTÖTÄ pojopö ȩmi̧nö̧sä̧ Jerusalén jä̧cua̧'a̧ pä'ö, ttö chi̧mi̧ juȩnȩ pä̧cua̧'a̧nö̧ pä'ö, ja̧'hua̧nö̧ ja̧'a̧ttö̧ TTÖ ȩmi̧nö̧sä̧ David-rö chumuhuäyotö Israél ttö̧ja̧ tturuhua päi'önä ö̧ja̧ pä'ö. ⁷ Ja̧'hua̧nö̧ ja̧'a̧, chäo David amiso'quinä ki̧na̧a̧, adita pe'ö isode Israel ttö̧ja̧ TÖ̧Ä̧NÄHUA̧ DIOS ö̧jode, ⁸ Ja̧'hua̧nö̧ ja̧'a̧nä̧ TÖ̧Ä̧NÄHUA̧ päinäcu̧ chäo Davidrö: cuamiso'quinä ka̧a̧nä̧ ttö chiminä isode cuadita peömä, cuamiso'quittö adiunä ku̧nä̧ri̧nö̧jä̧. ⁹ Ja̧'hua̧nö̧ ja̧'a̧nä̧, ucumä cuaditiyä̧cua̧jä̧ isodemä; juo̧u̧'i̧nä̧ cu̧ju̧nä̧ra̧a̧nä̧, ucu cui̧tti̧tä̧, ucu cuhuämenä i̧chä̧cua̧tä̧, a̧di̧tä̧cua̧ isodemä ttö chiminä. ¹⁰ TÖ̧Ä̧NÄ̧HUA̧ päinömä juo̧u̧mä̧ pätecuächönä jȩpi̧nö̧, ja̧'hua̧nö̧ ja̧'a̧ttö̧ ttömä pätecuächinösä̧ chäo David ö̧ji̧no̧mȩ, ja̧'hua̧nö̧ ja̧'a̧ttö̧ Israel ttö̧ja̧ ttö̧ru̧hua̧ kö̧sä̧, TÖ̧Ä̧NÄ̧HUA̧ päinöta'anö. ttö aditinösä̧ isode Israel ttö̧ja̧ TÖ̧Ä̧NÄ̧HUA̧ DIOS i̧mi̧nä̧. ¹¹ Ttö juȩnȩtä̧ rutinösä̧ hueähuä huȩnȩ ȩco̧ca̧'i̧nä̧, TÖ̧Ä̧NÄ̧HUA̧ adiunä ucuocu u̧ju̧ni̧nö̧, juo̧u̧tä̧ iyinö Israel ttö̧ja̧rö̧. ¹² Ja̧u̧nu̧ o'ca'a Salomón TÖ̧Ä̧NÄ̧HUA̧RÖ̧ jä'ecuome ä̧rä̧mi̧'i̧nö̧ Israel ttö̧ja̧ ttä'ca jo̧mȩ u̧mi̧pi̧yä̧ cäepö ucuocuinö. ¹³ Chutä aditinome ji̧nä̧'a̧ broncettö̧ ju'tojunä̧nö̧ 'chacuächäcuäcuome, ju̧ä̧nȩmä̧ jina'a jimutenö ttö̧yö̧ca̧ri̧ pa̧ja̧cuo̧mȩ öto'öcumä, ji̧mu̧tȩ ttö̧yö̧ca̧ri̧ pa̧ja̧cuo̧mȩ ji̧na̧'a̧ öcähuecumä ja̧'hua̧ta̧nö̧ huäboäcuänö ttö̧yö̧ca̧ri̧ pa̧ja̧cuo̧mȩ ji̧na̧'a̧ ju'tojucumä. Ja̧u̧mä̧ jua'amä ku̧ni̧nö̧ Dios ö̧jode isarä ka'co päteö. Ja̧u̧mä̧ ju̧cuä̧nȩ ä̧rä̧mi̧'i̧nö̧ ja̧'hua̧nö̧ jȩpö̧ ihue'quiyucu pä̧cuä̧di̧nö̧ Israel ttö̧ja̧ o'catoinä ttä'ca jo̧mȩ ja̧u̧nu̧ o'ca'a u̧mu̧pi̧yä̧ mo̧ro̧jä̧ra̧'a̧cu̧ cäepö ucuocuinö. ¹⁴ Ja̧u̧ päinö: Israel ttö̧ja̧ TÖ̧Ä̧NÄ̧HUA̧ Dios, toa'a ka̧ra̧ Diosmä mo̧ro̧jä̧nä̧'i̧nä̧ pi̧jä̧nä̧'i̧nä̧mä̧ ucu'anö cua̧mä̧, cuesecuinö ji̧nö̧ iso jö̧nä̧ jȩpö̧jä̧ ja̧'hua̧ta̧nö̧ 'quiyönä repeöjä ttämiso'quittö o'cajuiyönä ucu cuä'ca jo̧mȩ 'chä̧tö̧rö̧mä̧; ¹⁵ UCU cu̧mu̧huä̧ya̧ chäo David'römä tta̧'a̧ri̧nö̧jä̧, jȩchä̧cua̧sä̧ päcuinöta'anö. A̧, UCU cuänä cucuocuinömä iso jö̧nä̧ jȩpö̧jä̧ cu̧mu̧nä̧, jitä jö̧ ta'anö. ¹⁶ Ja̧'hua̧nö̧ ja̧'a̧ttö̧ jitämä, TÖ̧Ä̧NÄ̧HUA̧ Israél ttö̧ja̧'i̧nä̧ TÖ̧Ä̧NÄ̧HUA̧, cu̧mu̧huä̧ya̧ chö'o David-rö jȩchä̧cua̧sä̧ päcuinö ji̧nö̧ta̧'a̧nö̧tä̧ jȩpi̧, ucumä pä'inöjä̧: Ucumä tocu'ä̧cua̧jä̧ ya̧tȩ ucututtu Israél ru̧hua̧ päi'önä ö̧ja̧'a̧, jua'amä ucu cuahuaruhuä 'cotöttö ttö hueähuä huȩnȩ pädinomenätä̧ tti̧'chö̧ttö̧mä̧, ucu ttö chä'ca jo̧mȩttö̧ adiunä cui'chä'ijö'anö. ¹⁷ Ja̧'hua̧nö̧ ja̧'a̧ttö̧ ji̧tä̧mä̧, Israél ttö̧ja̧'i̧nä̧ TÖ̧Ä̧NÄ̧HUA̧, ttömä ucuocu jä'epösä ucu cu̧mu̧huä̧ya̧ David-rö päcuinö ji̧nö̧ iso päi'önätä̧ jȩcu̧'a̧ pä'ö. ¹⁸ Ja̧hua̧nö̧ ja̧'a̧nä̧ ¿Iso päi'önä TÖ̧Ä̧NÄ̧HUA̧MÄ̧ pi̧jä̧ra̧ ttö̧jä̧cu̧ ö̧jö̧'a̧nö̧ ja̧'a̧ tä̧ji̧? Topi, pi̧jä̧ o'cajuiyönä ja̧'hua̧ta̧'a̧nö̧ mo̧ro̧jä̧'i̧nä̧ ucurumä micuähuoca'a-- ¹⁹ ¡Yabonä pode isode ttö chaditäjodemä! Ja̧'hua̧nö̧ ja̧'a̧nä̧'i̧nä̧ rȩrö̧jö̧nä̧ topittö ucu cu̧mu̧huä̧ya̧ jä̧dȩpö̧mä̧, CHU̧RU̧HUA̧ CHÖ̧Ä̧NÄ̧HUA̧; ä̧ju̧cui̧ttö̧ cu̧mu̧hu̧äyotö ucu cuä'cajo̧mȩ a̧juä̧u̧nu̧ jättepömä. Topö ppä'äditö ucu cuojusodera̧'a̧ mo̧ro̧ ja̧'hua̧ta̧'a̧nö̧ yodo'inä ichätörömä, juȩnȩtä̧ ja̧'a̧ ttö chi̧mi̧ chö̧tä̧cu̧ya̧sä̧ päcuinomemä. ²⁰ Ä̧ju̧cui̧, cu̧mu̧huä̧ya̧ jedepömä jude isode. ²¹ Ja̧'hua̧'a̧nö̧ ja̧'a̧ttö̧, ä̧ju̧cui̧ jä̧epu cu̧mu̧huä̧ya̧ ja̧'hua̧ta̧'a̧nö̧ cuahuaruhuä I̧srael ttö̧ja̧ ja̧'hua̧'a̧mä̧ ujutu ta̧'cua̧ tu̧huä̧nä̧ro̧mȩnä̧ juȩnȩcu̧. a̧, ä̧ju̧cui̧ mo̧ro̧ji̧yä̧tö̧ juȩnȩ ja̧'a̧ ucu cu̧jo̧mȩmä̧; ja̧'hua̧ta̧'a̧nö̧ ucu cuäjucomenämä, ucuotittö. ²² Isopä'i̧ö̧nä̧ ya̧tȩ ubo suronä jȩö̧tö ahuaru̧hua̧ jä̧ya̧nä̧ kö̧rö̧ ja̧'hua̧ta̧'a̧nö̧ jȩta̧ pä'ö ja̧'a̧ ucuotähuä pätö jäyä pä'iöjuiyönä jȩä̧cuä̧huä̧, ja̧'hua̧ta̧'a̧nö̧ jä̧u̧ ichö ji̧yȩtȩ ucuotähuä jäyä pä'iöjuiyönä jeäcuähuä ucutä cuä'ca jo̧mȩtö̧ kuicu iyähuome TTÖ̧Ä̧NÄ̧HUA̧ DIOS-RÖ pode cojuisodetö, ²³ ja̧'hua̧'a̧nö̧ ja̧'a̧ttö̧ ä̧ju̧cui̧ jua'a mo̧ro̧jä̧tö̧ ja̧'hua̧ta̧'a̧nö̧ jȩpi̧ ja̧'hua̧ta̧'a̧nö̧ ro̧ȩpi̧ cu̧mu̧huä̧ya̧ru̧mä̧, mi̧tä̧huä̧'u suronä jȩpu̧ru̧mä̧, i̧kä̧chö̧ suronä ö̧jö̧ chu̧tä̧ u huä̧mȩtä̧. Adiutä jȩpi̧ adiu jepuru̧mä̧ suro̧jö̧'i̧nä̧ jȩpo̧cö̧ adiu jȩpu̧mä̧, ja̧u̧ru̧ tiya pä'ö ppädäcuähuä adiu jȩ'ä̧i̧ya̧'a̧ttö̧. ²⁴ Ucu cumöhuäyotö Israel ttö̧ja̧ ttaboiyotö jitörötä rohuäu tticuttömä, ucuru ttucuotoca'a jä̧ja̧'a̧ttö̧ jä̧cua̧'a̧, jahuätö ucucu ppa̧'a̧chö̧ cui̧mi̧nä̧ suronä̧ jȩttä̧ji̧ ji'äu tticuttömä ja̧'hua̧ta̧nö̧ ucucu ucuocu podettö esecu cuicuattö pä'ö jättepöttömä-- ²⁵ ppäcuäda'anö huotö jö̧ttö̧mä̧, mo̧ro̧jä̧nä̧ kä̧nö̧ ä̧ju̧cui̧tö̧ ja̧'hua̧nö̧ ä̧ju̧cu̧ suronä̧ jȩttä̧ji̧mä̧ jȩpo̧co̧tö̧ päjätö jö̧nä̧tä̧ topitö cumöhuäyotö Israel ttä̧ja̧rä̧mä̧; tti̧rȩjä̧ ttä̧do̧tö̧ mi̧nä̧rö̧ cui̧yi̧nä̧jä̧ra̧'a̧cu̧ ppa̧'a̧di̧pö̧ i'cächitö. ²⁶ Mo̧ro̧jä̧ mö̧ȩcuä̧rö̧ttö̧mä̧ ja̧'hua̧nö̧ jo̧mȩnä̧ ajiya ichoca'a jö̧ttö̧mä̧, ucu päcuinö jäyä jȩtti̧no̧mȩnä̧ jä̧cua̧'a̧, jahuätö porötä ucuru jä̧ttȩpä̧rö̧ cui̧mi̧nä̧ suronä jȩttä̧ji̧ ji'äu tticuttömä, ja̧'hua̧nö̧ jȩpö̧ suronä jȩttä̧ja̧'a̧ usurä ttȩmä̧u̧nä̧ jȩ'cuä̧u̧ ja̧u̧ cättädi'öttömä-- ²⁷ mo̧ro̧jä̧ttö̧mä̧ cuä̧ju̧cua̧tö̧jä̧ ja̧'hua̧nö̧ ä̧ju̧cu̧ cu̧mö̧huäyotö suronä jȩttä̧ji̧mä̧ jȩpö̧ cuicuatöjä̧ ja̧'hua̧ta̧nö̧ Israel ttö̧ja̧rö̧mä̧ o'catoi'önä̧rö̧tä̧, ucu jahuätörö ocuipomeä̧mä̧ jueö jähuänä tti̧'chä̧cua̧'a̧nö̧ cui̧jȩpa̧tö̧jä̧. Tti̧rȩjä̧nä̧ ajiya hue'iyitö, juätö cumöhuäyotörö tti̧rȩjä̧ päi'önä cui̧yi̧nä̧jä̧nä̧. ²⁸ Cui̧rȩjä̧nä̧ ppäi rä̧bȩu̧ttu̧mä̧ ko̧ro̧nö̧mä̧ märichi'inä kö̧ttö̧mä̧, cu̧ju̧nä̧huä̧nä̧'i̧nä̧ märichei tizon koromä hongo pättö rä̧bȩu̧ttu̧mä̧, mä̧rä̧cä̧ju̧ ja̧'hua̧ta̧'a̧nö̧ ä̧ca̧u̧'i̧nä̧ ttucui'öttömä; ko̧ro̧nö̧mä̧ cuabo'iyotö cu̧jä̧tu̧cuo̧mȩ apate ä'cattö ttörohuäuttumä ja̧'hua̧nä̧ ttörohuähuome isotö'inä märichei'inä ko̧tto̧mä̧-- ²⁹ ja̧'hua̧nö̧ ji̧yä̧u̧ Diorö ucuocu ya̧tȩ pätetö jaepöttömä ja̧'hua̧nö̧ jo̧ca̧'a̧ ocatoi'önä Israél ttö̧ja̧ jättepöttö-- ya̧cu̧pö̧nä̧ isotörö'inä ja̧'hua̧ta̧'a̧nö̧ jitörötä ttamiso'qui jacuänä suronä jä̧u̧ Dios ö̧jodecu ttu̧mu̧ cättepötömä. ³⁰ Äjucuitö mo̧ro̧jä̧tö̧, UCU cu̧jo̧mȩttö̧mä̧; rȩrö̧jö̧nä̧ topö ppä'ädittö jȩtto̧mȩtö̧ topö ro̧cuȩpä̧tö̧; UCUTÄ ja̧'a̧ ttamiso'qui huo̧jua̧mä̧, UCUTÄ ja̧'a̧ ka̧ra̧mä̧ toa'a UCU'anö ttö̧ja̧ ttamiso'qui huo̧jua̧mä̧. ³¹ Ja̧'hua̧nö̧tä̧ jȩpi̧tö̧ ucuru yettecuäcua'anö, tti̧'chä̧cua̧'a̧nö̧ ucu cu̧mä̧nä̧nä̧tä̧ 'cuäopönä mo̧ro̧ pi̧jä̧ rȩjȩ ujutu tä̧do̧tö̧ mi̧nä̧rö̧ cui̧yi̧nä̧jä̧nä̧ ttö̧jä̧cua̧'a̧nö̧. ³² Jitö ichäcuähuotö cuidepiyu Israélnä ko̧co̧tö̧mä̧, ja̧'hua̧nö̧ jo̧mȩnä̧ dijä̧ttö̧-- cui̧mi̧ rä̧mi̧pa̧'a̧ ä̧ju̧cu̧, recuärö̧jä̧u̧ru̧ ppä̧cuä̧da̧'a̧ ä̧ju̧cu̧, ja̧'hua̧ta̧'a̧nö̧ cujuru ä̧ju̧cu̧-- ichätucui podettö Diosrä ucuocu, ³³ ja̧'hua̧nö̧ jȩttö̧mȩnä̧ rȩrö̧jö̧nä̧ to̧pö̧ ä̧ju̧cui̧ttö̧, ucu cu̧jo̧mȩttö̧, ja̧'hua̧nö̧ jȩpö̧tä̧ o'catoi'önä ichäcuähuotömä ucurutä jättepa, ja̧'hua̧nö̧tä̧ o'catoi'önä pi̧jä̧ ötahuiyänä ko̧cuä̧tö̧mä̧ ttu̧huo̧juä̧cuo̧tö̧ ucu cui̧mi̧ ja̧u̧nu̧tu̧ yettecuäcuotö, cumuhuäyotö Israél ttö̧ja̧rö̧ jȩcu̧'i̧nö̧ta̧'a̧nö̧tä̧ ja̧'hua̧nö̧ ttu̧huo̧juä̧cua̧'a̧nö̧ pode isode ttö chaditinodemä micuäcuode ucu cui̧mi̧tä̧. ³⁴ Ucu cuahuaruhuä'inä rohuähuö tti̧'chö̧ttö̧mä̧ ttaboyotöcu, ucu huecuomenä esetö tti̧'chö̧ttö̧mä̧ jähuätömä ucurö DIOSRÖ jättepa'anö ja̧'a̧ ucutä ȩmu̧ cu̧jö̧ni̧nä̧ttö̧ ötahuiyä ja̧'hua̧ta̧'a̧nö̧ ucu cuojusode chaditinome ucu cuiminä. ³⁵ Ja̧'hua̧nö̧ ja̧'a̧ttö̧ ä̧ju̧cui̧ moro̧ja̧ra̧'a̧ttö̧ ucucu tucuocumä, jättepu'inä ppäädittö juo̧u̧ttö̧mä̧. ³⁶ Ja̧'hua̧nö̧ ja̧'a̧ jähuätömä ucuru suronä jȩttä̧ pe'ötä kä̧tö̧ toa'a ya̧tȩ'i̧nä̧ suronä jȩpo̧cö̧mä̧ ja̧'hua̧nö̧ ja̧'a̧ttö̧ cujö'quiyönä ja̧cu̧ korotö cuaboyotö ttömunätä̧ iyinöjä̧ jähuätörömä, oto ttȩpi̧ya̧cu̧ pe'ö cuabuyotö jitötä tti̧rȩjä̧ra̧a̧ tti̧ji̧ya̧tö̧ pe'ö, ttö'cö jö̧ttö̧'i̧nä̧ oto jö̧ttö̧'i̧nä̧. ³⁷ Ja̧'hua̧nö̧ ja̧'a̧ jahuätö ttö̧ttȩpä̧ri̧'ö̧ttö̧mä̧ korotö tti̧rȩjä̧nä̧ ka̧nö̧ jahuätö pärohuicu amucuädö ucuru ttusuttömä ttö̧ja̧ pä̧tto̧co̧jä̧nä̧ kä̧nö̧. ³⁸ Ja̧'hua̧nö̧ ja̧'a̧ jahuätö pätöttömä: ujutu ucuru jäyä jȩpä̧tö̧jä̧ surojötä. Ujutu jarodötä kä̧cuinätöjä. Ja̧'hua̧nö̧ ja̧'a̧nä̧ ucuru ppä̧a̧dö̧ ttämucuädöttömä o'cajuiyönä ttämiso'qui jacuättö'inä ja̧'hua̧ta̧'a̧nö̧ o'cajuiyönä a̧'cua̧rö̧ ttö̧jö̧mȩttö̧ korotö tti̧rȩjä̧nä̧, jahuätörö ttöjö'coca'anä ttȩpi̧nä̧jä̧nä̧ kä̧nö̧, jahuätö ttämucuädöttömä tti̧rȩjä̧, ucu cuiyi̧nä̧jä̧ ttä̧do̧tö̧mi̧nä̧rö̧ ja̧'hua̧ta̧'a̧nö̧ ttötahuiyä'inä ucutä ȩmi̧nö̧jä̧ ja̧'hua̧nö̧ ja̧'a̧ttö̧ ucu cuiminä aditinösä̧ isodemä. ³⁹ Ja̧'hua̧nö̧ ja̧'a̧ttö̧ ucu moro̧ji̧yä̧nä cu̧jo̧mȩttö̧ ä̧ju̧cui̧, ucuocunö̧ jȩpu̧ jättepumä ppäädittö. Ucu cuahuaruhuärömä ja̧a̧tä̧ topitö, ucurö suronä jȩttä̧ja̧'a̧nä̧. ⁴⁰ Ja̧'hua̧nö̧ ja̧'a̧ttö̧ jädepäcujä CHI̧Ä̧NÄHUA̧ DIOS, juorö jättepumä ucutä cuiärenä topitö ja̧'hua̧ta̧'a̧nö̧ adihuönätä̧ ucutä cuä̧ja̧nä̧ ä̧ju̧cui̧tö̧. ⁴¹ Ja̧'hua̧nö̧ ja̧'a̧ttö̧ jitämä, TÖ̧Ä̧NÄHUA̧ DIOS, ja̧'hua̧ta̧'a̧nö̧ curuhuonä esecu ucuocu cu̧ju̧ni̧no̧ca̧ttö̧, ä̧ra̧mi̧i̧, ucutä cuä'ächiö cuo̧mȩttö̧. Ja̧a̧tä̧ topi ucutö kä'copäteö huecu adicuä ttö̧ja̧rö̧tä̧, TÖ̧Ä̧NÄHUA̧ DIOS, tti̧ji̧pä̧cuȩtä̧ tti̧'ca̧tä̧hua̧'a̧nä̧ ja̧'hua̧ta̧'a̧nö̧ topi ucuttö adihuäsä̧nä̧tä̧ ttesehua'anä ucu ppäcuächia. ⁴² TÖ̧Ä̧NÄHUA̧ DIOS, ucuttö'inä otottö 'catä̧di̧cuä̧huo̧tö̧rö̧mä̧ ja̧'a̧tä̧ to'cuä cuiättömä. Cumuhuä̧ya̧ Davidttö, amucuädö 'chö̧ä̧rä̧cuä̧hui̧ ucutä esecu ucuocu huȩnȩ juiyönä cu̧ju̧ni̧nö̧nä̧tä̧.