¹ Salomón TÖ̧Ä̧NÄ̧HUA̧ ojusode jo̧mȩnö̧ aditö cädomenä̧, Salomómä i'cächinä jä'ominä David, hua'adö pä̧tȩtö̧ u̧ju̧ni̧nö̧ jua̧'a̧nö̧ päi'omenä, juȩnȩmä̧ ki̧na̧'a̧ pärätä'inä, oro'inä ja̧'hua̧ta̧'a̧nö̧ isode jacuä ko̧cu̧'i̧nä̧ --ja̧u̧mä̧ do'ädö ku̧ni̧nö̧ micuäujuäi ko̧cuo̧mȩ TÖ̧Ä̧NÄ̧HUA̧ ojusodenä. ² ja̧'hua̧nö̧ ja̧'a̧ Salomón ä̧tȩpi̧nö̧ Israél otahuiyättö tä̧mö̧rö̧, ö'catoi'önä ttahuaruhuä pö̧nä̧rö̧ o'ipätörö ja̧'hua̧ta̧'a̧nö̧ israélttö tturuhuotö jö̧nä̧ ko̧cuä̧tö̧rö̧, Jerusalénttö̧'i̧nä̧, dodetta pä'ö TÖ̧Ä̧NÄ̧HUA̧ ttö̧ja̧cu̧ esecuinoca̧ jacua, David ötahuiyänä, juȩnȩtä̧ ja̧'a̧ Sion-mä. ³ O'catoi'önä Israél ttö̧ja̧ ji̧nä̧ yo̧mȩtȩ pä'i'inätö̧ ru̧hua̧ ä'cajome pä'cäri pä̧nä̧, kä̧hua̧ttö̧mä̧ ji̧mu̧tȩ ta'arenö jo̧mȩ ji̧na̧'a̧. ⁴ Israel-ttö buo'isotö o'cato'iönä ichinätö̧, ja̧'hua̧ta̧'a̧nö̧ levitas 'chöädinätö̧ huȩä̧huä̧ huȩnȩ ȩjo̧ca̧. ⁵ Juä̧tö̧mä̧ hueähuä ȩjo̧ca̧ ȩpi̧nä̧tö̧, isode cuȩdäcuähuode ca̧ca̧cu̧ pä̧cuä̧huo̧de, ja̧'hua̧ta̧'a̧nö̧ o'cajuiyönä ro̧'ö̧ o̧'ta̧ jua'a ca̧cui̧nö̧mä̧ isode cue'ädäcuähuodenä. Sacerdotes-mä Levi öttämutö̧ ahuaruhuä ji̧na̧'a̧ jua'a epätö̧mä. ⁶ Ru̧hua̧ Salomon ja̧'hua̧ta̧'a̧nö̧ o'cato'iönä ötahuiyä ttö̧ja̧ I̧sra̧ȩl-tö̧ ca̧ca̧cui̧nä̧tö̧ Huȩ'ä̧huä̧ huȩnȩ ä̧co̧ca̧ ä̧'ca, kö icu iyinätö ohuejarö ja̧'hua̧ta̧'a̧nö̧ pä̧'cä̧yö̧ pa̧ja̧cuä̧ jui̧yö̧nä̧. ⁷ Sacerdotes ȩpi̧nä̧tö̧ huȩ'ä̧huä̧ huȩnȩ ä̧co̧ca̧ TTO̧Ä̧NÄ̧HUA̧ ȩsȩcui̧nö̧ pä̧cuo̧mä̧, isode i̧so̧ca̧nä̧, ro̧ca̧ surojö juiyö̧ca̧, querubines ttu̧jua̧biyä kada'ca. ⁸ Jua'amä querubines ttu̧jua̧biyä ttö̧todeta pä'ö ju'o̧ca̧nä̧mä̧, juättömä 'to̧epi̧nä̧tö̧ huȩ'ä̧huä̧ huȩnȩ ä̧co̧ca̧ ja̧'hua̧ta̧-a̧nö̧ jä̧yä̧nä̧ o̧'kä̧ jau̧mä̧ huȩnä̧ ä̧jo̧ca̧ tu̧huä̧do̧hui̧nö̧. ⁹ O̧'qui̧yä̧mä̧ otoinö ja̧u̧ beipomemä tottönä̧ ki̧na̧'a̧ rö̧ä̧nä̧ ro̧o̧mȩ kä̧nö̧'i̧nä̧, jacuänä i̧so̧ca̧ ä'cacumä, ja̧'hua̧nö̧ ja̧'a̧nä̧ u̧mi̧cu̧nä̧mä̧ huähuoca'a ji̧na̧'a̧, juȩnȩ ji̧no̧mȩmä̧ jitä mo̧ro̧ jubö päi'önä ka̧'a̧. ¹⁰ Esecuinö ȩco̧ca̧mä̧ ji̧nä̧ juiyina'a, ja̧'hua̧ta̧nö̧ Moisés Horebttö ȩni̧nö̧ odä'i̧nä̧, TÖ̧Ä̧NÄ̧HUA̧ Israel ttö̧ja̧cu̧ esecuinö̧ pä̧nä̧, Egipto rȩjȩttö̧ rättopächinö̧. ¹¹ Ja̧'hua̧nö̧ ja̧'a̧ sacerdotetö̧ surojö juiyomȩttö̧ rättopächomenä ji̧yȩtȩ 'cuäopina'a. Sacerdotetö̧mä̧ o'catoi'önä̧ juȩnȩ ka̧cuä̧tö̧mä̧ jitötätä surojö jui'ätötä jö̧nä̧ pä'i'inä̧tö̧ TÖ̧Ä̧NÄ̧HUA̧Nä̧mä̧, tta̧mö̧nä̧ pa̧ja̧tö̧ ttaditähuättömä̧ ttö̧'cä̧'chä̧huo̧ca̧'a̧nä̧. ¹² Ja̧'hua̧ta̧nö̧ Levis ahuaruhuä 'cotö ra̧huä̧huä̧ ttö̧ja̧'i̧nä̧, juätö o'catoi'önä̧tä̧, Asaf umöhuäyotö'i̧nä̧, Hemán umöhuäyotö'i̧nä̧, Jedutún umöhuäyotö'i̧nä̧, juhua'atäcu tti̧tti̧mö̧'i̧nä̧, ttö̧jä̧hua̧tö̧'i̧nä̧, lino adihuäjuei o̧ta̧ 'ca̧tä̧huä̧tö̧mä̧ címbalo pä'ö micunä cuä'ätömä̧, arpanä̧ 'porätö'i̧nä̧, Lirasnä 'porätö'i̧nä̧ i̧sa̧rö̧ ku icu iyähuome ppeyänä̧ ka̧cui̧nä̧tö̧. Jahuätucumä sacerdotes päi'önä̧ huotö trompeta ppu'ätömä 120nö jo̧mȩnä̧ huinätö. ¹³ Ja̧'hua̧nö̧ ja̧'a̧ 'cuäopina'a trompeta ppu'ätömä ja̧'hua̧ta̧nö̧ ra̧huä̧huä̧ ttö̧ja̧'i̧nä̧ yo̧mȩtȩnä̧ rä̧mi̧pö̧nä̧ ra̧'i̧nä̧tö̧, TÖ̧Ä̧NÄ̧HUA̧RÖ̧ eseu ra̧ttö̧ rä̧mi̧pa̧'a̧ ä̧ju̧cui̧ya̧tö̧ pä'ömä. Jahuätömä pä̧i̧cu̧nä̧ ra̧'i̧nä̧tö̧ trompeta ppu'u kä̧nö̧ ja̧'hua̧ta̧nö̧ címbalo obinä cuä'ö kä̧nö̧, koronä̧'i̧nä̧ 'porö kä̧nö̧, ja̧'hua̧nö̧ jȩpö̧ jahuätömä TTÖ̧Ä̧NÄ̧HUA̧RÖ̧ eseu ra̧'i̧nä̧tö̧. Jahuätömä pa̧'a̧nö̧ pä'ö ra̧'i̧nä̧tö̧: "Ja̧u̧mä̧ isopäi'önä̧tä̧ adihuä i̧sa̧, isopäi'önä̧tä̧ esecuinömä päinö̧'a̧cuä̧tä̧ 'cuäopönä̧tä̧ kä̧cuȩ." Ja̧'hua̧nö̧ ja̧'a̧ isodemä; TÖ̧Ä̧NÄ̧HUA̧ ojusodemä, isoppatä a̧ttä̧di̧'i̧na̧'a̧. ¹⁴ Sacerdotetö̧mä̧ kä̧mä̧dö̧mä̧ ttaditö juiyönä̧ ji̧na̧'a̧ isappa ra̧'a̧ttö̧, juhua'amä TÖ̧Ä̧NÄ̧HUA̧ usärötä ojusodenä̧mä̧ a̧ttä̧di̧'a̧'a̧ttö̧.