¹ Koromä, Ja̧u̧mä̧ broncettö i̧sa̧rö̧ ku icu iyähuome aditinö̧; öotomä veintenö ttu̧yu̧'ca̧ri̧ jometä̧. Ju'tojucu'i̧nä̧ veintenö ttu̧yu̧'ca̧ri̧ jometä̧. ² Ja̧'hua̧ta̧nö̧ ja̧u̧mä̧ ajiya acuose rö̧o̧se'i̧nä̧ cuoräuttö ku icu aditinö̧ ä'cosemä dieznö̧ ttu̧yu̧'ca̧ri̧ jo̧mȩtä̧. Ju'tojucumä cinconö̧ ttu̧yu̧'ca̧ri̧ jo̧mȩtä̧ ja̧'hua̧ta̧nö̧ jättäjose soböcuächönä̧mä̧ treintanö ttu̧yu̧'ca̧ri̧ jo̧mȩtä̧. ³ Jäyosettö rȩjȩcu̧mä̧ päcäyä a̧'cua̧juä̧ ki̧na̧'a̧, dieznö ttu̧yu̧'ca̧ri̧ jo̧mȩtä̧, ku icu ajiya acuosecu todeunä adicuina'a. ⁴ Jȩpö̧ ku̧nä̧hua̧'a̧ ki̧na̧'a̧ päcäyu docenö̧ huotörö, tresnö huotömä ttu̧huo̧jua̧'a̧cu̧ to̧pä̧tö̧ ttö̧'ö̧nö̧ jȩpö̧ ku̧nä̧hui̧na̧'a̧, kä̧hua̧ ma̧ä̧cha̧'a̧cu̧mä̧ huämetucuärö, ttöóhuecumä huämetucuä, ja̧'hua̧ta̧nö̧ kä̧hua̧ räopa'acumä huämetucuä. aje de'ähuotomä juätö ttu̧huä̧mȩnä̧ rö̧nä̧ri̧na̧'a̧ ja̧'hua̧ta̧nö̧ ttubu'ca ja̧'a̧cu̧nä̧mä̧ jacuäcu jö̧nä̧ ka̧cui̧nä̧tö̧. ⁵ Aje de'ähuoto upoämä ttumö jä̧'i̧no̧mȩnä̧ ji̧na̧'a̧ ja̧'hua̧ta̧nö̧ ä'camä i̧so̧'ta̧ jä̧'i̧nö̧'a̧nö̧ ji̧na̧'a̧, lirio ȩ'u̧cua̧'a̧ jä̧'i̧nö̧'a̧nö̧ Ajiya acuo'tämä tres milnö̧ jo̧mȩnä̧ acuina'a. ⁶ Ja̧u̧mä̧ ja̧'hua̧ta̧nö̧ dieznö̧ o̧'ta̧ korojuei tö'cäcuä̧huo̧'ta̧ aditinö, ja̧u̧mä̧ ofrenda ku icu ttiyomenämä juorötä ttöcähuinä̧tö̧. Aje deä́huotömä ja̧'hua̧nö̧ ja̧'a̧nä̧ juȩnȩmä̧ sacerdote päi'önä huotötä juhuorömä ttutucähua pä'ötä̧ jina'a. ⁷ Ja̧u̧mä̧ aditinö orottö to̧mu̧rȩnö̧ jome ra̧pa̧ra̧ kunähuä̧ ocä pa̧'a̧nö̧ jȩcu̧'a̧ja̧ pättäjita'anö; Ja̧'hua̧nö̧ aditö ku̧ni̧nö̧ TÖ̧Ä̧NÄ̧HUA̧RÖ̧ ucuocuäcuähudenä, ji̧mu̧tȩnö̧ ttu̧huo̧jua̧'a̧nä̧ ja̧'hua̧ta̧'a̧nö̧ ji̧mu̧tȩnö̧ ttö'ohue ja̧'a̧nä̧. ⁸ Aditinö to̧mu̧rȩnö̧ jome mesa-odiyä ja̧u̧ odä'inä TÖ̧Ä̧NÄ̧HUA̧RÖ̧ ucuocuäcuähuodenä ku̧ni̧nö̧ ji̧mu̧tȩnö̧ ttu̧huo̧jua̧'a̧nä̧ ja̧'hua̧ta̧'a̧nö̧ ji̧mu̧tȩnö̧ ttö'ohue ja̧'a̧nä̧. Ja̧u̧mä̧ aditinö o̧'ta̧hui̧yä̧ täcunänö jö̧ orottö ciennö jjo̧mȩnä̧. ⁹ Ja̧hua̧nö̧ ja̧'a̧nä̧'i̧nä̧, ja̧u̧mä̧ aditinö räbiyatä ttö̧ȩpä̧ro̧nä sacerdote huotötä do'ächö ttucuocuome ja̧'hua̧ta̧'a̧nö̧ rö̧ä̧nä̧ huȩnȩ jo̧mȩnä̧ ttu̧cuo̧cuo̧mȩ'i̧nä̧, juȩnȩ doächäcuähuä atemä; attopinä Broncettö adicuä odä. ¹⁰ I̧so̧'ta̧ rö̧o̧'ta̧ broncetö a̧di̧cuo̧'ta̧ mar pä'ö mi̧cuo̧'ta̧mä̧ ku̧ni̧nö̧ isodettömä ttu̧huo̧jua̧'a̧nä̧cu̧, kä̧hua̧ räopa'acu, kä̧hua̧ ma̧ä̧cha̧'a̧cu̧ i'ä jö̧nä̧. ¹¹ Hiram aditinö urioyu, pariyu ja̧'hua̧ta̧'a̧nö̧ röröäcuähuä o̧'ta̧. Ja̧'hua̧nö̧ Hiram juo̧u̧mä̧ aditö iyö cäädinö ru̧hua̧ Salomónrö̧ DIOS ö̧jode jähuä: ¹² taare 'quiädäcuöhuä'ca päjäre'cacu huä̧mȩnä̧ taarepunä a̧'cua̧ti̧nö̧ 'co̧'ö̧ kö̧nö̧ 'quiädäcuähuä'ca a̧tto̧cuä̧chö̧nä̧. ¹³ Juo̧u̧mö̧ a̧'cua̧ti̧nö̧ cuatrocientonö granadattö u̧huä̧ju̧ obattö 'co̧'ö̧ aditäjomemä: to̧mä̧rȩnä̧ a̧'cua̧ti̧nö̧ granadattötä to'carecueö 'co̧a̧i̧ta̧'a̧nö̧tä̧ jutänämä 'quiädäcuöhuä'canä. ¹⁴ Juo̧u̧mä̧ aditinö huȩnä̧huä̧ cuo̧mȩ'i̧nä̧ o̧'ta̧hui̧yä̧ huȩnä̧hu̧äcä; ¹⁵ rö̧o̧'ta̧ a̧'cua̧tö̧ a̧di̧cuo̧'ta̧'i̧nä̧ ja̧'hua̧ta̧'a̧nö̧ docenö o'ca 'chu̧huä̧rö̧nä̧, ¹⁶ ja̧'hua̧ta̧'a̧nö̧ uri oyu'inä, pariyu'inä deä juäocuä ocä'inä ja̧'hua̧ta̧'a̧nö̧ o'cajuiyönä koro urubijähuä'inä. Hirammä huo̧ju̧nä̧ aditöja̧'a̧ttö̧ ru̧hua̧ salomónrö̧ aditö iyinö, broncettö'inä adiunä sayutö DIOS ö̧jode jähuämä. ¹⁷ Ru̧hua̧ hueinö jordán mej'cattö kutticua pä'ö rȩjȩ redä'ca̧ isöhua jua'amä ji̧nä̧'a̧ Sucot'ttö ja̧'hua̧ta̧nö̧ Seredata ttö'inä. ¹⁸ Ja̧'hua̧nö̧ ja̧'a̧ttö̧ Salomónmä ttadita pä'ö hueinö rö̧ä̧ö̧nä̧ kä̧nä̧ri̧ o̧yu̧; ja̧hua̧ta̧nö̧ , broncemä ämä'cö huo̧jä̧huä̧ juiyönä̧tä̧. ¹⁹ Salomón TÖ̧Ä̧NÄ̧HUA̧ ojusode jäcuä ko̧cu̧mä̧ o'cajuiyönä aditinö, ²⁰ ja'hua̧ta̧nö̧ ku'icu iyäcuome säruhuome'inä, pa̧ppä̧ rutäcuodä'inä ju̧ä̧nȩtä̧ ki̧na'a̧; tejädönä cuo'önä ku̧nä̧cuä'cä'inä ja̧'a̧nä̧ , jacuoju doächacuäcuome i̧so̧ca̧ ä'ca ku tticua pä'ö jȩä̧cuo̧mȩ'i̧nä̧ päcuäi orottö adihuina̧'a̧; ²¹ ja̧'hua̧ta̧nö̧ a̧'cua̧tä̧cuä̧cuä̧'i̧nä̧ ȩ'u̧'i̧nä̧, lá̧mpa̧ra̧'i̧nä̧, 'cui'ocuä'ocä'inämä adicuina'a̧ päcuäi orottö. ²² Ja̧'hua̧ta̧nö lámpara o'pa 'cui'ocuä'inä, 'cä̧nä̧ri̧'o̧yu̧'i̧nä̧, cuȩ'chä̧cä̧'o̧cä̧'i̧nä̧ ja̧hua̧ta̧nö̧ a̧mȩu̧ ku'icuähuä'inä o'cajuiyönämä adicuinä'a̧ päcuäi orottö. Ja̧'hua̧ta̧nö̧ isode doächäcuäcuome'inä, jacuodecu ucuo ro̧mȩ apatiyä'inä ja̧'hua̧ta̧nö̧ Dios ö̧jode apatiyämä adicuina̧'a̧ päcuäi orottö.