¹ Josias-mä cu̧nä̧ri̧nö̧ ocho-nö duo jo̧mȩnȩ ji̧yȩnö̧ ru̧huo huȩ'i̧nö̧ pä̧nä̧mä̧; ja̧u̧mä̧ huȩi̧nö̧ treinta-nö̧ ja̧'a̧nä̧ yaute duo jo̧mȩnä̧ Jerusalen-nämä. ² Ja̧'hua̧'a̧nö̧ ja̧'a̧ttö̧ adiutä jȩpi̧nö̧ TÖ̧Ä̧NÄ̧HUA̧ i̧'ä̧ ä'ca jo̧mȩttö̧, ja̧'hua̧ta̧'a̧nö̧ ki̧nö̧ David ö̧ji̧nö̧ta̧'a̧nö̧ jä̧do̧mi̧nä̧, ja̧'hua̧ta̧'a̧nö̧ ppa̧'a̧cho̧cö̧ pi̧nö̧ ö̧huo̧ju'a̧cu̧'i̧nä̧ ja̧'hua̧ta̧'a̧nö i'äruhua̧cu̧'i̧nä̧. ³ Ja̧'hua̧'a̧nö̧ ja̧'a̧ ji̧mu̧tȩnö̧ ja̧'a̧nä̧ huä̧bo̧dä̧cuä̧nö̧ duo jo̧mȩnä̧ huȩ'i̧nö̧, ji̧nä̧ mu̧ä̧ya̧ hua̧, usinö ja̧u̧mä̧ David, U̧RU̧HUA̧ Dios-rö, chutä ja̧do̧tö̧mi̧nä̧-rö̧. Ja̧u̧nö̧ ji̧mu̧tȩ to̧dä̧rȩ duo, ja̧u̧mä̧ kä̧mä̧di̧nö̧ aditö Juda ja̧'hua̧ta̧'a̧nö̧ Jerusalen yapare ttö̧ä̧nä̧huo̧tö̧ tä̧tä̧huä̧'ca̧ ca̧cu̧ pu̧nä̧, da̧u̧hui̧yä̧ mä̧nä̧ jä̧ya̧ ca̧cu̧, i̧sotö jö a̧cuä̧ ko̧'ö̧ cu̧nä̧huä̧ ja̧'hua̧ta̧'a̧nö̧i̧so̧ttö̧ ta̧u̧cuä̧ corä'uttö tä̧tä̧huä. ⁴ Ö̧tahuiyä̧ ttö̧ja̧mä̧ jȩpu̧ i̧cui̧nä̧tö̧ yapare kuicu iyähuome tätähuä o'ca Baales ttä̧'ca jo̧mȩtö̧; ja̧u̧mä̧ ko̧rä̧'u̧ i̧cui̧nö̧ kuicu iyähuoda̧ ppo̧'ö̧cu̧ jö̧nä̧tä̧ ca̧cu̧ juä̧tö̧tä̧cu̧. Ja̧u̧mä̧ ppo̧u̧cu̧ jö̧nä̧tä̧ 'tȩ'chö̧ i̧cui̧nö̧ dauhuiya̧ mä̧nä̧ jä̧yä̧nä̧ ca̧cu̧ ja̧'hua̧ta̧'a̧nö̧ a̧'cua̧ju̧'ä̧ ko̧ä̧huä̧'i̧nä̧, ja̧'hua̧'a̧nö̧ ja̧'a̧nä̧ coräutö adicuätö'inä i̧sä̧ppȩ jö̧nä̧ kö̧ i̧cui̧nä̧. Ja̧u̧mä̧ i̧sä̧ppȩ 'cuä̧'ȩpi̧nö̧ hua'arebiyö jitörutä suronä jȩpi̧nä̧tö̧ tö̧huä̧mä̧. ⁵ Ja̧u̧mä̧ kö̧ i̧cui̧nö̧ sacerdotes yapare ttö̧ä̧nä̧hua̧ tä̧tä̧huä̧'ca ku̧i̧cu̧ iyähuomä tti̧huä̧'qui̧yö̧mä̧. Pa̧'a̧nö̧ jȩpu̧tä̧, si̧ä̧pu̧ i̧cui̧nö̧ ja̧u̧mä̧ Juda ja̧'hua̧ta̧'a̧nö̧ Jerusalen-i̧nä̧. ⁶ Juo̧u̧ yoräteunä jȩpi̧cui̧nö̧ Manasés ötahuiyä jö̧ta̧'a̧nö̧, Efraín ötahuiyä'inä, Simeón ötahuiyä'inä ja̧'hua̧ta̧'a̧nö̧ Neftalí ötahuiyä'inä ttoepu surojo'epinö̧. ⁷ Kuhuicu iyähuä'inä surojo'epinö̧, ȩttä̧huo̧mȩ ka̧cu̧ o'ca'inä pparö icuinö̧ ja̧'hua̧ta̧'a̧nö̧ tta̧'cua̧juȩ 'co̧'ö̧ adicuä'inä i̧sa̧ppȩ joepinö̧, ja̧'hua̧ta̧'a̧nö̧ jȩpu̧ i̧cu̧i̧nö̧ o'ca juiyönä a̧dö̧nä̧ ku̧nä̧huä̧ o'ca'inä ja̧'hua̧nö̧ jȩpi̧nö̧ o'cajuiyönä Israel ttö̧ja̧ tti̧rȩjä̧nä̧; ja̧'hua̧nö̧ jȩpä̧ji̧'ca̧ ppa̧'a̧chi̧nö̧ Jerusalén ötahuiyara̧a̧. ⁸ Ja̧'hua̧nö̧ ja̧'a̧ ruhuo hueomettö̧ dieciocho a̧'ȩ päi'omenä, Josías jo̧mȩnö̧ pparö icuä̧ji̧'ca̧ tti̧rȩjä̧nä̧ ka̧cui̧nö̧'i̧nä̧ ja̧'hua̧ta̧'a̧nö̧ DIOS ö̧jodenä ka̧cui̧nö̧'i̧nä̧, juo̧u̧ hueinö Azalía i̧tti̧rö̧ Safánrö̧, ja̧'hua̧ta̧'a̧nö̧ Maasíasrö ötahuiyä ru̧hua̧rö̧, ja̧'hua̧ta̧'a̧nö̧ Joacaz i̧tti̧rö̧ Joarö'inä huȩyu̧tä̧rö̧ ppä̧ä̧dä̧rö̧'i̧nä̧, TTI̧Ä̧NÄHUA̧ DIOS ojusode ttädita pe'ö. ⁹ Jähuätö 'chi̧nä̧tö̧ sacerdote ttu̧ru̧hua̧ Hilcías ö̧ja̧a̧ pärätä iyö DIOS ö̧jodera̧a̧ tti'cächäji, ja̧'hua̧ta̧'a̧nö̧ levi ttö̧ja̧ apate ä'ca tta̧a̧rä̧tu̧cu̧ Manasésrö ja̧'hua̧ta̧'a̧nö̧ Efraíncu̧ tti'cachäji ȩmi̧nä̧tö̧, o'cajuiyönä Israej ttö̧ja̧tö̧ ka̧cui̧ pi̧nö̧ Judá ttö̧ja̧ tti̧rȩjä̧ttö̧'i̧nä̧ ja̧'hua̧ta̧'a̧nö̧ Benjanmín ahuaruhuättö'inä ja̧'hua̧ta̧'a̧nö̧ Jerusalén ötahuiyänä kä̧tö̧ttö̧'i̧nä̧. ¹⁰ Jahuätömä Dios ojusodenä to̧pä̧rö̧ tta̧'ä̧rä̧tö̧rö̧ pärätämä iyinä̧tö̧. Juätö tti̧yä̧jä̧u̧mä̧ Dios ojusode jaretö icu aditätörö mitinä̧tö̧. ¹¹ Jahuätömä dauhuiyättö adicuä ttö̧ja̧rö̧'i̧nä̧, inädö ttö'toromettö̧ ȩmi̧pö̧ adicuä ttö̧ja̧rö̧'i̧nä̧ juhua'atäcu 'chu̧huä̧rö̧ dauhuiyä aditätörö'i̧nä̧ ja̧'hua̧ta̧nö̧ isode 'chu̧huä̧rö̧ o'ca yottöte Judáttö ruhuotö kä'ö tticuinö adicuä ttö̧ja̧rö̧'i̧nä̧ mitinä̧tö̧. ¹² Jahuätö ttö̧ja̧mä̧ jäyä päi'oca'a aditinä̧tö̧. To̧ä̧rä̧cuä̧huä̧ ttö̧ja̧ Ja̧ahat'i̧nä̧ ja̧'hua̧ta̧nö̧ Abdias'i̧nä̧ Leví ahuaruhuä Merari i̧tti̧mö̧mä̧ ja̧'hua̧ta̧nö̧ Coat i̧tti̧mö̧; Zacarías'i̧nä̧, Mesulam'i̧nä̧. Korotö Leví ahuaruhuämä o'catoi'önä̧tä̧ adiu 'porö ra̧'ä̧tö̧ ji̧na̧'a̧, ttoecuäbä aditätörö o'ipönö. ¹³ Pitö Leví ahuaruhuämä isode adicuä to̧pä̧rö̧ tta̧'ä̧rä̧tö̧ ji̧na̧'a̧ ja̧'hua̧ta̧nö̧ korotö u̧mä̧tö̧ korojuei aditätörö'i̧nä̧. Ja̧'hua̧ta̧nö̧ Leví ahuaruhuämä cuyärö huȩyu̧tä̧tö̧'i̧nä̧, adihuomenä̧ topö ruhuonä̧ aditätö'i̧nä̧ ja̧'hua̧ta̧nö̧ äpate tta̧'ä̧rä̧tö̧'i̧nä̧ ji̧na̧'a̧. ¹⁴ TÖ̧Ä̧NÄ̧HUA̧ ö̧jo̧dȩra̧'a̧ ttȩpi̧nä̧ pärätä rättepomenä, sacerdote hua̧ Hilcías po̧cui̧pi̧nö̧ hueähuä huȩnȩ kä'tä TÖ̧Ä̧NÄ̧HUA̧ iyitä'tä ji̧nä̧'tä̧ Moisenä. ¹⁵ Hilcías pä'inö huȩyu̧cuä̧'i̧sa̧ Safánrö̧: "Po̧cui̧pä̧ji̧sä̧ hueähuä huȩnȩ kä'tä TÖ̧Ä̧NÄ̧HUA̧ ö̧jodettö." Hilcías i'chächö iyinö juä'tä cuyäru'tä Safánrö̧. ¹⁶ Safán ȩpö̧ iyinö ruhuo hue'örö, ja̧'hua̧ta̧'a̧nö̧ 'cuäopäji ji'ähuinö, pä'inö: "Cu̧mu̧huäyotömä päcu'ijö̧ta̧'a̧nö̧tä̧ jȩpä̧tö̧." ¹⁷ TÖ̧Ä̧NÄ̧HUA̧ ö̧jodenä ko̧cu̧ pärätä o'cajuiyönä rä'epö icuätö, ja̧'hua̧nö̧ jȩpö̧ to̧pä̧rä̧tö̧ ttu̧mu̧nä̧ ja̧'hua̧ta̧'a̧nö̧ aditätö ttu̧mu̧nä̧tä̧ iyätö." ¹⁸ Huȩyu̧cuä̧'i̧sa̧ Safán ji'ähuinö ruhuo hue'örö: "Sacerdote Hilcías ji'täte cuyäru'tä iyäjäcusä." Ja̧'hua̧nö̧ ja̧'a̧ ruhuo hue'ö ä̧ju̧cua̧'a̧nä̧ ucuocuinö. ¹⁹ Ja̧'hua̧nö̧ ja̧'a̧ ruhuo hue'ö hueähuä huȩnȩ ucuocua'a ä̧ju̧cuä̧ji̧ o'ca'a, ö'catähuätä sȩro̧ci̧ icuinö. ²⁰ Ru̧hua̧mä̧ huȩ'i̧nö̧ Hilcia-rö, Safan i̧tti̧ Ahicam, Micaias i̧tti̧ Abdon, Safan huȩyu̧cuä̧ i̧sa̧ ja'huata'anö ASaias, CHuttä u̧mu̧huä̧ya̧, pä'inö: ²¹ "Tätucui ja̧'hua̧ta̧'a̧nö̧ jä'epäjätucui DIOS-RÖ ttörö jȩcha̧ hue'a pä'ö, ja̧'hua̧ta̧'a̧nö̧ Juättö Israel-nä ttöjipäco̧tö̧ ja̧'hua̧ta̧'a̧nö̧ Judanä'inä, ja̧'hua̧'a̧nö̧tä̧ huȩyu̧cua̧'a̧ cu̧yä̧ru̧ ttu̧'o̧cui̧ä̧ji̧nä̧mä̧. Ju̧hua̧'a̧mä̧ ru̧a̧'a̧ TTÖ̧Ä̧NÄ̧HUA̧ DIOS ö'äi̧mä̧ ujutu tuhuämenä jömä tta'anöttä ttöcä'u ticu'anö ja̧'a̧ttö̧. Ru̧a̧'a̧, ju̧hua̧'a̧mä̧ ujutu ttä̧do̧tö̧mi̧nä̧ ttä̧ju̧cuo̧cö̧mȩnä̧ cu̧yä̧ru̧ huȩyu̧cuä̧ huȩnȩ ttȩseta pä'ö o'cajuiyönä huȩyö̧cui̧nö̧ ja̧u̧nä̧" ²² Ja̧'hua̧'a̧nö̧ ja̧'a̧, Hi̧lci̧a̧s ja̧'hua̧ta̧'a̧nö̧ ko̧ro̧tö̧ ru̧hua̧ huȩi̧nä̧u̧mä̧, to̧pu̧ 'chi̧nä̧tö̧ Hulda-rö DIOS pä'ö huȩnȩ jiäcuähuä isaju, Ticva i̧tti̧ irecua Harhas i̧tti̧, pu̧jä̧ti̧yö̧ hua̧'a̧dö̧ cu̧nö̧ (Juäjumä kinäjumä Jerusalen-nä todäre huämä) ja̧'hua̧ta̧'a̧nö̧ juä̧tö̧mä̧ u̧cuo̧cui̧nä̧tö̧ juäjucu jäu̧ ö̧ttöcö. ²³ Juajumä jahuätörö pä'inäju: "Israel ttö̧ja̧ TÖ̧Ä̧NÄ̧HUA̧ Diosmä pa̧'a̧nö̧ pä'ö: Piderö hue'äjätörömä ji'ähui, ²⁴ Pi̧yȩ ja̧'a̧ TÖ̧Ä̧NÄ̧HUA̧ päömä: Topittö, Ttömä pȩnȩ surojö chi'cächometä päia'a ja̧'hua̧ta̧nö̧ ja̧huä̧jä̧nä̧ ka̧cuä̧tö̧rö̧'i̧nä̧, surojuottächönä pähuä o'cajuiyönä cuyärö'tänä huȩyu̧cui̧'i̧na̧'a̧ Judáttö ru̧hua̧ ä'ca jo̧mȩtö̧ ttucuocuinö jinömä. ²⁵ Isopäi'önätä̧ ja̧huä̧tö̧mä̧ Ttörö icuipinä̧tö̧ ja̧'hua̧nö̧ icuipö a̧mȩu̧nä̧ 'chopönä korotö ttö̧ä̧nä̧huo̧tö̧rö̧tä̧ ku iyinä̧tö̧, ja̧'hua̧nö̧ iyö o'cajuiyötä cuettächome pö̧nä̧ttö̧mä̧ chu̧ro̧huä̧rö̧nä̧ jȩpö̧mä̧ jahuätömä surojötä jȩpi̧nä̧tö̧, ja̧'hua̧nö̧ jo̧mȩttö̧ chu̧'ä̧i̧mä̧ pȩnȩtä̧ dahuipäcua'a ja̧u̧ dahuipö ya̧tȩ'i̧nä̧ jȩpö̧ icuocö jä̧cua̧. ²⁶ Ja̧'hua̧nö̧ ja̧'a̧nä̧ Judá ttö̧ja̧ ttu̧ru̧hua̧ ucuturu TÖ̧Ä̧NÄ̧HUA̧ jȩä̧cuȩ tö'cö jäcuepätucua pä'ö hue'äjirömä, pa̧'a̧nö̧ pä'ö TÖ̧Ä̧NÄ̧HUA̧MÄ̧ pä'ö ji'ähuätucuirö, TÖ̧Ä̧NÄ̧HUA̧ Israel ttö̧ja̧ ttu̧ru̧hua̧ Diosmä pa̧'a̧nö̧ pä'ö: ucu cuä̧ju̧cuä̧ji̧ tö'cömä, ²⁷ ucu cuamiso'quinä ucuo te'ähuocömä ja̧'hua̧ta̧nö̧ cua̧mö̧nä̧ ucuo tecuähuoca'a Dios ä'ca jo̧mȩttö̧ pi̧jä̧ rȩjȩnä̧ jȩä̧cuȩ'i̧nä̧ ja̧huä̧jä̧nä̧tä̧ kä̧tö̧rö̧ jȩä̧cuȩ'i̧nä̧ päö huȩnȩ ä̧ju̧cu̧mä̧ cua̧mö̧nä̧ pa̧ja̧tö̧tä̧ chä'ca jo̧mȩttö̧ hui̧'ä̧chi̧'ö̧ cui̧ä̧rȩta̧'i̧nä̧ sȩro̧cu̧ i̧ku, cuajahuattö̧, Ttö'i̧nä̧ ä̧ju̧cuä̧ji̧sä̧, pä'ö TÖ̧Ä̧NÄ̧HUA̧MÄ̧. ²⁸ Topittö, cu̧tä̧mö̧ mi̧nä̧cu̧ ji̧nä̧ yo̧mȩtȩ päcui'önä jȩchä̧cua̧jä̧. Ucumä huȩnȩ juiyönätä 'coru juo̧cuä̧chä̧cua̧jä̧ ja̧'ha̧nö̧ ja̧'a̧ttö̧ pi̧jä̧'i̧nä̧ ja̧huä̧jä̧ ka̧cuä̧tö̧rö̧'i̧nä̧ pätetö surojö chi'cächömä topocö cuä̧cua̧jä̧. Huȩä̧jä̧u̧ päjätömä pi̧yȩ huȩnȩ ȩpö̧ 'chä̧nö̧ ru̧hua̧ ö̧ja̧'a̧cu̧ ppa̧'a̧chi̧nä̧tö̧. ²⁹ Ja̧u̧nö̧ o'ca ru̧hua̧mä̧ huȩnȩ ttö̧ja̧rö̧ hue'inö ja̧'hua̧nö̧ hueäja'a Judá ttö̧ja̧ttö̧'i̧nä̧ ja̧'hua̧ta̧nö̧ Jerusalén ttö̧ja̧ttö̧'i̧nö̧ tä̧mö̧rö̧ ji̧nä̧ yo̧mȩtȩ ca̧ca̧ti̧pi̧nä̧tö̧. ³⁰ Ja̧'hua̧nö̧ ja̧'a̧ ru̧hua̧mä̧ Dios ö̧jo̧dera̧'a̧cu̧ 'cha'achinö, ja̧'hua̧ta̧nö̧ Judá ttö̧ja̧'i̧nä̧ juhua'atäcu Jerusalénä̧mä̧ ka̧cuä̧tö̧'i̧nä̧ ja̧'hua̧ta̧nö̧ sacerdotetö̧'i̧nä̧ Leví ahuaruhuä'i̧nä̧ juhua'atäcu ttö̧ja̧mä̧ o'catoi'önä̧tä̧ ucuo ttö̧ja̧'i̧nä̧, ucuo ttö̧ja̧ pocotö'i̧nä̧. Ja̧u̧nö̧ o'ca'a ttö̧ja̧ ttä'ca jo̧mȩttö̧ Dios esecu ucuocuinä̧ huȩcuä̧'tä TÖ̧Ä̧NÄ̧HUA̧ ö̧jo̧dettö ttö̧'o̧cui̧'ä̧jä̧'tä ucuocuinö̧. ³¹ Ru̧hua̧mä̧ churutä pätecuächinomettö̧ ä̧rä̧mi̧'ö̧ kä̧mä̧dö̧, TÖ̧Ä̧NÄ̧HUA̧ ä'ca jo̧mȩttö̧ esecu ucuocuinö̧, TÖ̧Ä̧NÄ̧HUA̧ o'ca'anä i̧'cha̧ pä'ö ja̧'hua̧ta̧nö̧ Ja̧u̧tä̧ hueähuä huȩnȩ'i̧nä̧, ötö'cö jiäu huȩnȩ''i̧nä̧ jȩtta̧ pä'ö hueähui'inö huȩnȩ'i̧nä̧ a̧mi̧so'quimä̧ o'cajuiyötä juhua'atäcu a̧'cua̧rö̧'i̧nä̧ o'cajuiyönä̧, esecu ucuocuinö cuyäru'tänä huȩyu̧cua̧'a̧ pȩjö̧ ucuota pä'ömä̧. ³² Ja̧u̧mä̧ jȩpi̧nö̧ Jerusalénä ka̧cuä̧tö̧'i̧nä̧ Benjamin ahuaruhuä'i̧nä̧ esecu ucocuäcuähuänä ppättächi'a pä'ö. Jerusalénä ka̧cuä̧tö̧mä̧ ttö̧tä̧mö̧ mi̧nä̧ ttu̧ru̧hua̧ Dios esecu ucuocuinö päö'a̧cuä̧tä̧ ucuotinä̧tö̧. ³³ Josías o'cajuiyönä surojömä jȩpu̧ icuinö Israel ttö̧ja̧ tti̧rȩjä̧ttö̧mä̧. Juo̧u̧ hueinö o'cato'inä Israel ttö̧ja̧ ttucuota pe'ö TTI̧Ä̧NÄHUA̧ DIOSRÖTÄ. Hue'ö ö̧ji̧nö̧ moro̧bu̧, jähuätömä 'chi̧nä̧tö̧ TÖ̧Ä̧NÄHUA̧CU̧, 'quȩi̧cho̧co̧tö̧ pinätö̧ ttä̧do̧tö̧ mi̧nä̧ TTI̧Ä̧NÄHUA̧ DIOSTÖMÄ.