1 Manasés doces a̧'ȩ hua̧ kä̧mä̧dö̧ hueinö ruhuo, cicuenta y cinco jo̧mȩnä̧ hueinö ruhuomä Jerusalén ötahuiyanä. 2 TÖ̧Ä̧NÄHUA̧ ä'cajo̧mettö̧ suronä jȩpi̧nö̧, korotö ttö̧ja̧ jȩtti̧nö̧ta̧'a̧nö̧ TÖ̧Ä̧NÄHUA̧ Israel ttö̧ja̧ ttä'ca jo̧mȩttö̧ räepu icu'inäu̧ta̧'a̧nö̧. 3 Jä'o Ezequías ucuo tettäu pparicuinömä̧ pääjita'anö aditinö, ja̧'hua̧ta̧'a̧nö̧ aditinö Baaletö̧rö̧ kuhuicu iyähuome'inä, ȩttä̧huo̧mȩ'i̧nä̧ o'ca ku̧nö̧, ja̧'hua̧nö̧ ja̧'a̧ jȩpi̧nö̧ rö̧ȩnä̧ ucuotönö o'cato'inä moro̧ jä̧nä̧ kä̧tö̧rö̧ si̧ri̧'co̧rö̧. 4 TÖ̧Ä̧NÄHUA̧ ojusodenä Manasés aditinö yapare tti̧ä̧nä̧huo̧tö̧rö̧ kuicu iyähuä, TÖ̧Ä̧NÄHUA̧ jiähuö u̧ju̧ni̧no̧mettö̧: ttö chimi 'cuäopunä cu̧huo̧juä̧cuo̧tö̧jä̧ Jerusalén ttö̧ja̧ pä'ö. 5 Juo̧u̧ aditinö o'cato'inä moro̧ jä̧nä̧ kä̧tö̧ si̧ri̧'co̧rö̧ ucuo teäu kuhuicu iyähuä TÖ̧Ä̧NÄHUA̧ ojusode ä'ca ta'arecueö. 6 Ben Hinom pämäroppätö i̧tti̧rö̧ ucuränä kiopu icuinö. Huo̧jui̧pi̧nö̧ tottocaa pähuä ja̧'hua̧ta̧'a̧nö̧ mä̧ripäjähuä'inä; koronä topu huo̧juä̧huä̧'i̧nä̧ ja̧'hua̧ta̧'a̧nö̧ huo̧jui̧ pi̧nö̧ jä̧ȩpä̧rö̧ huainätö̧cu̧ ucuocuätörö'inä ja̧'hua̧ta̧'a̧nö̧ ya̧nä̧ jähuä huo̧juä̧tu̧cu̧'i̧nä̧. Huo̧jui̧ pi̧nö̧ surojötä TÖ̧Ä̧NÄHUA̧ ä'ca jo̧mȩttö̧ ja̧'hua̧nö̧ ja̧'a̧ttö̧ DIOS öjö'quiyönä päinäcu̧. 7 Asera ka̧'cua̧juä̧ 'co̧'ö̧ aditinö'ca̧, Dios ojusodenä ku̧ni̧nö̧. Diosmä̧ Davidrö'i̧nä̧ ja̧'hua̧rta̧nö̧ ja̧u̧tä̧ i̧tti̧ Salomónrö̧'i̧nä̧ juode ötö'cömä pa̧'a̧nö̧ päina'a ji̧na̧'a̧: Pode isode'i̧nä̧ ja̧'hua̧ta̧nö̧ Jerusalén'i̧nä̧, pojopö ȩmi̧nö̧sä̧ Israel ttö̧ja̧ o'catoi'önä ttahuaruhuättömä̧ 'cuäopönä̧tä̧ ju̧huȩnȩ Ttö chimi ka̧ pä'ö. 8 Ttömä ttä̧do̧tö̧ mi̧nä̧rö̧ cui̧rȩjä̧tu̧cu̧ päi'önä chi̧yä̧u̧jä̧ pädinä̧jä̧ttö̧mä̧ rä'epö chicuoco̧u̧ ttäcuotö, jahuätö Ttö huedinö o'cajuiyönä ucuotö jȩttö̧ttö̧mä̧, Ttö Moisésnä̧ juätörö iyö hueähuä huȩnȩ'i̧nä̧, jȩtta̧ pä'ö pähui'inö̧nä'i̧nä̧ ja̧'hua̧ta̧nö̧ jȩpä̧tu̧cui̧ päinönä'i̧nä̧ jȩpö̧ ttö̧ja̧cu̧ttö̧mä̧." 9 Manasés ahuaruhuämä̧ Judá ttö̧ja̧ jȩttö̧'a̧cuä̧ surojötä jȩpi̧nä̧tö̧ Israel ttö̧ja̧ ttä'ca jo̧mȩttö̧ ko̧ro̧jä̧ ttö̧ja̧ si'epö icuinä̧u̧ jȩtti̧no̧mȩttö̧'i̧nä̧ yabonänö. 10 TÖ̧Ä̧NÄ̧HUA̧MÄ̧ Manasésrö'i̧nä̧ ja̧'hua̧ta̧nö̧ ahuaruhuärö'i̧nä̧ ucuocuinö, ja̧'hua̧nö̧ ucuocua'anä̧ ja̧u̧ ucuocumä̧ ttä̧ju̧cua̧mä̧ pä'ocotö pinä̧tö̧. 11 Ja̧'ha̧nö̧ ji̧yä̧cu̧ TÖ̧Ä̧NÄ̧HUA̧MÄ̧ Asiriattö su̧ro̧da̧u̧ ttu̧ru̧hua̧rö̧ i'cächinö, ja̧u̧mä̧ Manasésrö cärenä̧ rötö cuoräu isobönä̧ nö'cö Babiloniara̧'a̧ ȩpi̧nä̧cu̧. 12 Manasés rö̧ä̧nä̧ a̧'cua̧ tta̧'ȩcu̧, Ö̧Ä̧NÄ̧HUA̧ Diosrä ajuäunu jä'epinö, ja̧'hua̧ta̧'a̧nö̧ chutä a̧mo̧nä̧ ja̧rȩyu̧nu̧ pä'i'inö jä̧do̧tö̧ mi̧nä̧ TÖ̧Ä̧NÄ̧HUA̧ Dios ä'cajome. 13 Ö̧Ä̧NÄ̧HUA̧RÖ̧ ucuocuinö; ja̧'hua̧nö̧ jo̧mȩnä̧ Dios rȩrö̧jo̧nä̧ topinö ja̧u̧ru̧, ja'huanö ja'attö Dios ä̧ju̧cui̧nö̧ jäepömä ja̧'hua̧nö̧ ja̧'a̧ttö̧ pä'äjita'anö i'chächinäcu̧ Jerusalenra̧'a̧cu̧, hue'ö ö̧ja̧ pä̧'ö̧. Ja̧u̧nu̧tä̧ huo̧juä̧chi̧'i̧nö̧ Manasemä iso päi'önä TÖ̧Ä̧NÄ̧HUA̧MÄ Dios ja̧'a̧ pä'ö. 14 Pi̧yȩ 'cuäopinö ö'ca'a, Manasés aditinä David ötahuiyä u̧mi̧nä̧ räbä ötahuiyä ttoecuächönä, Gihóntömä kä̧hua̧ ma̧ä̧cha̧'a̧cu̧ttu̧, rȩjȩ pämäroppänä, po̧i̧ ttahuarä doächäcuähuome. Ja̧'hua̧nö̧ jȩpö̧ tto'epinö räbä ju'toju jäbä Ofel de'a'inä. Su̧ro̧do̧u̧ tturuhuotörö ku̧ni̧nö̧ Judáttö ötahuiyä ucuohuome. 15 Si'epö icuinö ichäcuähuotä yapare ttö̧ä̧nä̧huo̧tö̧rö̧, yapare tö̧ä̧nä̧huo̧tö̧mä̧ TÖ̧Ä̧NÄ̧HUA̧ ö̧jodettömä u̧micu̧tä̧ rä'epö icuinö, o'cajuiyönä chutä aditinö tti'äre ku icu iyähuä o'ca ji̧nö̧'i̧nä̧ TÖ̧Ä̧NÄ̧HUA̧ ö̧jode Jerusalén de'attö, o'cajuiyönä ötahuiyättö u̧mi̧cu̧tä̧ rä'epö icuinö. 16 Ja̧u̧mä̧ pä̧'äta'anö aditinö TTÖ̧Ä̧NÄ̧HUA̧ DI̧O̧S-RÖ̧ kuicu iyöhuome ja̧'hua̧ta̧'a̧nö̧ i̧yi̧nö̧ tta̧cua̧ adiunä kä̧cuä̧huä̧ curä juiyönä ö̧ja̧ pä'ö ja̧'hua̧ta̧'a̧nö̧ ttiäre ese'u iyähuä; ja̧u̧mä̧ Juda ttö̧ja̧rö̧ huȩ'i̧nö̧ ttu̧cuo̧ta pä'ö Israel ttö̧ja̧ TTÖ̧Ä̧NÄ̧HUA̧ DIOS-RÖ. 17 Ja̧'hua̧'a̧nö̧ ja̧'a̧nä̧, ttö̧ja̧mä̧ ji̧nä̧ yapare tti̧ä̧nä̧hua̧-rö̧ ku ttiyi'änöme iyinä̧tö̧, ju̧hua̧'a̧mä̧ TTÖ̧Ä̧NÄ̧HUA̧, DIOS-RUTTÄ. 18 Koro huȩnȩ Manases jähuämä, ja̧hua̧ta̧'a̧nö̧ DIOS-RÖ jäepinömä, ja̧'hua̧ta̧'a̧nö̧ DIOS pä'ö huȩnȩ jiäcuähuä ttö̧ja̧mä̧ ttu̧cuo̧cui̧nä̧cu̧ TTÖ̧Ä̧NÄ̧HUA̧ i̧mi̧nä̧, Israel ttö̧ja̧ TTÖ̧Ä̧NÄ̧HUA̧ DIOS, juhua'amä huȩyu̧cua̧'a̧ Israel ruhuotö jȩti̧nö̧nä̧ 19 Ja̧u̧ ttä̧bo huenenä ji̧ä̧hua̧'a̧ ucuocuinömä, ja̧'hua̧ta̧'a̧nö̧ DIOS-MÄ ese'unä ji̧na̧'a̧ ja̧u̧nä̧mä̧. Jahua'amä ja̧'a̧ yaute ucuocuähuä surojönä jȩ'i̧nö̧ o'juiyönä ja̧'hua̧ta̧'a̧nö̧ ucuotoquinö, ja̧'hua̧ta̧'a̧nö̧ kuicu iyähuome aditinome yapare ttö̧ä̧nä̧hua̧-rö̧ ja̧'hua̧ta̧'a̧nö̧ dauhuiyä käepinome cue'ächäcuähuome ja̧'hua̧ta̧'a̧nö̧ 'co̧i̧no̧mȩ i̧so̧tö̧ ta̧u̧cuä̧, uruhuo jaro'iäcua ä'caji chutä, huȩyu̧cua̧'a̧ ca̧'a̧ DIOS pä'ö huȩnȩ jiäcuöhuä tti̧huȩyu̧ti̧na̧'a̧. 20 Manases-mä 'corö ju'ächinö jä̧do̧ttö̧mi̧nä̧cu̧, ja̧'hua̧ta̧á̧nö̧ juä̧ttö̧mä̧ ttu̧ri̧nä̧ttö̧ chuttä ojusodenä. Amon, chuttä i̧tti̧, ru̧hua̧ pä'iönä ki̧nö̧ jä'o öjinö o'come. 21 Amón ruhuo kä̧mä̧dö̧ hueinömä veintidos a̧'ȩ jo̧mȩnä̧ ku̧nä̧ri̧nö̧, Jerusalénämä todare a̧'ȩ jo̧mȩtä̧ hue'inö. 22 TÖ̧Ä̧NÄ̧HUA̧ to̧ä̧ro̧mȩttö̧mä̧ ja̧u̧mä̧ surojötä jȩpi̧nö̧, jä'o Manasés ji̧nö̧ta̧'a̧nö̧tä̧. Jä'o Manasés o'catoi'önä isotö tta̧u̧cuä̧ 'co̧'ö̧ aditö u̧ju̧ni̧no̧mȩ pö̧nä̧mä̧ i̧sa̧rö̧ ku icu iyömä ucuo te'ähuä'chinö̧. 23 Ja̧u̧mä̧ TÖ̧Ä̧NÄ̧HUA̧ ä'ca jo̧mȩttö̧mä̧ ucuo kädi'a pä'ocö pinö, jä'o Manasés ji̧nö̧ta'anö̧tä̧. Jä'o jȩi̧no̧mȩttö̧'inä, pide Amónmä rö̧ä̧nä̧ surojötä jȩpi̧nö̧. 24 U̧mö̧huäyotömä ttu̧ru̧hua̧ ieruhuönä a̧mö̧cuädö ku̧nä̧'cotö, chutä ojusodettö cuä'ö tticuinä̧cu̧. 25 Ja̧'hua̧nö̧ yo̧ä̧huä̧i̧nä̧ a̧mö̧cuädö cuä'ö icuäjätörömä ja̧huä̧jä̧nä̧ ka̧cuä̧tö̧ ttö̧ja̧mä̧ cuä'äu tti̧cui̧nä̧u̧, ja̧'hua̧nö̧ cuä'ö icumä ruhuo hueäji o'comemä i̧tti̧ Josíasrötä ruhuo hueönä ku̧ni̧nä̧tö̧.