¹ Jitä ja̧'u̧nö̧mä̧ o'cajuiyönä kä'ädu icuähuina̧'a̧, o̧'cato'iönä ötahuiyä Israel ttöja̧ juȩnȩ ca̧hui̧nä̧tö̧mä̧, räopinätö̧ Juda ötahuiyära̧'a̧ ja̧'hua̧ta̧'a̧nö̧ i̧nä̧hui̧yä̧tö̧ tä̧ttö̧ cu̧nä̧huä̧ o'ca cuäcuäpu icuinä̧tö̧ ppo̧'ö̧nä̧tä̧ ja̧'hua̧ta̧'a̧nö̧ 'cui̧'ö̧ i̧cui̧nä̧tö̧ mä̧nä̧ jäyänä ca̧cu̧ o̧'ca̧ ja̧'hua̧'a̧nö̧ ja̧'a̧nä̧'i̧nä̧ dö̧rö̧ i̧cui̧nä̧tö̧ ju'toju ca̧cu̧'i̧nä̧ ja̧'hua̧ta̧'a̧nö̧ ya̧pa̧rȩ ttö̧ä̧nä̧hua̧ tä̧tä̧huä̧ o'ca o'cajuiyönä ca̧cu̧ Juda ja̧'hua̧ta̧'a̧nö̧ Benjamin, ja̧'hua̧ta̧'a̧nö̧ Efrain ja̧'hua̧ta̧'a̧nö̧ Ma̧na̧sȩs, ja̧'hua̧'a̧nö̧ ja̧'a̧ttö̧ o'ca juiyönä dörö icuinä̧tö̧. Ja̧'hua̧'a̧nö̧ ja̧'a̧ttö̧ o'cato'iönä Israel ttö̧jä̧mä̧ ppa̧'a̧chi̧nä̧tö̧ ya̧cu̧pu̧nä̧ 'to̧ju̧ odehuiyä punä ja̧'hua̧ta̧'a̧nö̧ ya̧cu̧ tti̧dȩpi̧yu̧ bä̧reu ötahuiyä jo̧mȩ. ² Juȩnȩ o'ca'a EZEQUIAS iyächinö sacerdotes-rö ja̧'hua̧ta̧'a̧nö̧ Levita-rö'i̧nä̧ ta̧ditähuä pö̧nä̧, ja̧'hua̧ta̧'a̧nö̧ ya̧tȩ pu̧nä̧ ja̧'hua̧ta̧'a̧nö̧ ca̧ra̧ pu̧nä̧,ya̧cu̧ pu̧nä̧ ta̧di̧tä̧huä̧ jö̧ta̧'a̧nö̧,i̧yä̧ttö̧ i̧yä̧huä̧'i̧nä̧ ja̧'hua̧ta̧'a̧nö̧ usurä ȩmä̧'u̧ esecu'ähuä, öadihuä säru-u ja̧'hua̧ta̧'a̧nö̧ esecuähuä TÖ̧Ä̧NÄ̧HUA̧-RÖ̧, ja̧'hua̧ta̧'a̧nö̧ ta̧'a̧rö̧ DIOS öjode ä̧pa̧te ä'ca. ³ Ja̧'hua̧'a̧nö̧ ja̧'a̧nä̧ ru̧hua̧'i̧nä̧ ppä̧'ä̧di̧nö̧ chutä iärettö pä'ö mo̧ro̧ ju̧huo̧'a̧'a̧ i̧yä̧huä̧ ja̧'hua̧ta̧'a̧nö̧ ni̧pä̧ro̧mä̧ ja̧huä̧'i̧nä̧, sabado mo̧ro̧ iyähuä'inä, yodo kähua ja̧rȩpa̧ päkäri ja̧'hua̧ta̧'a̧nö̧ ucuotähuä päkäri, ja̧'hua̧'a̧nö̧ TÖ̧Ä̧NÄ̧HUA̧ huȩä̧huä̧ huȩnȩ huȩyö̧cu̧ta̧'a̧nö̧. ⁴ Ji̧nä̧, juo̧u̧ hue'inö sacerdotȩtö̧rö̧ jerusalén ötahuiyänä ka̧cuä̧tö̧rö̧ 'quȩ'ȩpu̧ ttiya pe'ö Levittö̧ja̧rö̧, jähuätö ucutunö jȩttä̧cua̧'a̧nö̧ TÖ̧Ä̧NÄHUA̧ hue'ö. ⁵ juo̧nö̧ o'ca̧ hueäjita'anö jȩpi̧nä̧tö̧, Israel ttö̧ja̧ iyinätö̧ eseunö ä̧cuo̧mȩnä̧ ttö̧jö̧nä̧huä̧ u̧huä̧ju̧ttö̧, jarenä adicuä vino isoyattö'inä, a̧dȩjattö'inä, ma̧yattö'inä o'cajuiyönä ttö̧cuȩ cuähuä ttö̧ju̧ni̧nö̧ttö̧mä̧. Jähuätö iyinätö̧ diezmo o'cato'inätä̧, rö̧ȩnä̧ ttö̧ju̧nä̧rö̧ttö̧ topu. ⁶ Israel ttö̧ja̧, Judá rȩjȩnä̧ ka̧cui̧nä̧tö̧'i̧nä̧, i'cächinätö̧ diezmo päi'önä päcäyö̧rö̧ ovejatö̧rö̧ ja̧'hua̧ta̧'a̧nö̧ ro̧'ö̧ jähuä'inä 'quȩ'ȩpu̧ ku̧nä̧huä̧ TTÖ̧Ä̧NÄHUA̧ DIOSRÖ, ja̧'hua̧nö̧ ja̧'a̧ttö̧ ca̧ca̧tö̧ rutinätö̧ dea jo̧mȩ. ⁷ Kä̧hua̧tö̧ huämetucuä ja̧a̧ jähuätö tti̧jä̧mä̧di̧na̧'a̧mä̧ ca̧ca̧tö̧ deajo̧mȩ tti̧yä̧cuȩi̧ ja̧'hua̧nö̧ ja̧'a̧ttö̧ cäädö kö̧ni̧nä̧tö̧ kä̧hua̧tö̧ ji̧mu̧tȩ ta'chere ja̧'a̧. ⁸ Ja̧'hua̧nö̧ ja̧'a̧ Ezequías ja̧'hua̧ta̧'a̧nö̧ ttöruhuotö'inä dea 'chänö topinätö̧, jähuätö adiunä pä'ö kö̧ni̧nä̧tö̧ TÖ̧Ä̧NÄHUA̧RÖ̧ ja̧'hua̧ta̧'a̧nö̧ ahuaruhuä Israelrö'inä. ⁹ Ja̧'hua̧nö̧ ja̧'a̧ Ezequíasmä ca̧ca̧tö̧ rötähuä ötö'cö sacerdotetö̧rö̧ ja̧'hua̧ta̧nö̧ Leví ahuaruhuärö'i̧nä̧ jä'epö ä̧ju̧cui̧nö̧. ¹⁰ Sadoc ahuaruhuä tta̧hua̧ru̧hua̧ Azarías sacerdotettö̧ ttu̧ru̧hua̧mä̧ ädätömä pä'inö: Ttö̧ja̧ ttöäre mippounä iyähuä TÖ̧Ä̧NÄ̧HUA̧ ojudera̧'a̧ tti'cächinomettö̧ kä̧mä̧dö̧ cuinä̧tö̧jä̧ ja̧'hua̧ta̧nö̧ rö̧ä̧nä̧ ku̧nä̧ri̧nä̧tö̧jä̧ juhua'atäcu rö̧ä̧nä̧ ka̧cui̧pä̧'chi̧na̧'a̧, TÖ̧Ä̧NÄ̧HUA̧MÄ̧ u̧mö̧huäyotörö adihuomenä ppäda'attö. Pi̧yȩ o'cajuiyönä pȩju̧mä̧ ttucua'anä̧ ka̧cui̧pä̧ji̧ ja̧'a̧. ¹¹ Ja̧'hua̧nö̧ ji̧yä̧cu̧ Ezequíasmä TÖ̧Ä̧NÄ̧HUA̧ ojudenä cuähuä ca̧ca̧tö̧ rötähuome jo̧mȩnö̧ jȩpö̧ ttu̧ju̧na̧ pä'ö hue'inö ja̧'hua̧nö̧ hueäjita'anö jȩpi̧nä̧tö̧. ¹² Ja̧'hua̧nö̧ ja̧'a̧ jahuätömä hueyecyoca'atä ttöäre mippounä iyähuä'i̧nä̧ ttömöre jähuä iyähuä'i̧nä̧, i'cächinä̧tö̧, TÖ̧Ä̧NÄ̧HUA̧ öäre päi'önä jö̧mä̧. Leví ahuaruhuättä Conaníasmä ja̧u̧ 'chuä̧rä̧cuä̧huä̧ ttö̧ja̧sa̧ ji̧na̧'a̧ ja̧'hua̧ta̧nö̧ ö̧jä̧hua̧ Simeimä ja̧u̧ o'comenä adicuä i̧sa̧ ji̧na̧'a̧ ¹³ Jehiel'i̧nä̧, Azarías'i̧nä̧, Nahat'i̧nä̧, Asael'i̧nä̧, Jerimot'i̧nä̧, Jozabad'i̧nä̧, Eliel'i̧nä̧, Ismaquías'i̧nä̧, Mahat'i̧nä̧ ja̧'hua̧ta̧nö̧ Benaía'i̧nä̧mä̧ aditinä̧tö̧ Conanías'i̧nä̧ ja̧u̧tä̧ ö̧jä̧hua̧ Simei'i̧nä̧ juȩ'ȩpä̧rö̧ huetta'anä̧, ru̧hua̧ Ezequías'i̧nä̧ ja̧'hua̧ta̧nö̧ Dios ojusodenä̧ tta̧'a̧rö̧ Azarías'i̧nä̧ hueinöta'anötä. ¹⁴ Leví ahuaruhuättö Imna i̧tti̧ Coré, kä̧hua̧ räopa'acunä̧ äpatenä tta̧'a̧rö̧mä̧, Diosrö jitörötä pä̧huä̧rö̧jo̧mȩnä̧ mippounä iyähuä 'chu̧'ä̧ri̧nö̧, TÖ̧Ä̧NÄ̧HUA̧ÖRÖ̧ mippounä iyähuä 'cä̧'ȩpä̧'chö̧ iyähuä ttö̧ja̧sa̧ ji̧na̧'a̧ ja̧'hua̧ta̧nö̧ ja̧u̧ mippounä iyähuämä juiyo ro̧ö̧ ji̧na̧'a̧. ¹⁵ Ja̧u̧ huea'anä adinätö̧mä̧ Edén'i̧nä̧, Miniamín'i̧nä̧, Jesúa'i̧nä̧, Semaías'i̧nä̧, Amarías'i̧nä̧, ja̧'hua̧ta̧nö̧ Secanías'i̧nä̧, ji̧na̧'a̧, jahuätömä sacerdotetö̧ ttidepiyunä ka̧cui̧nä̧tö̧. Jahuätömä tta̧'cua̧ ttu̧huȩnä̧rö̧u̧ ji̧na̧'a̧, ja̧'hua̧nö̧ jo̧mȩttö̧ mippounä̧ iyähuämä ö̧jä̧hua̧tö̧rö̧ 'cä̧'ȩpö̧ o'catoi'önä̧rö̧tä̧ iyä'chinö. ¹⁶ Jahuätö iyinä̧tö̧ u̧mä̧tö̧ ppo̧'ä̧tö̧rö̧ huäbodäcuä a̧'ȩ yabocu huotörö, TÖ̧Ä̧NÄ̧HUA̧ ö̧jode jacuä dottächomenä̧ ttä̧do̧tö̧ minättö̧ jo̧mȩnö̧ jȩpö̧ ttu̧ju̧ni̧na̧ ki̧na̧'a̧, mo̧ro̧ a̧u̧cuä̧ ttadita pä'ö ttiärome pö̧nä̧ kä̧chö̧. ¹⁷ Jahuätö iyächinä̧tö̧ ttä̧do̧ttö̧ mi̧nä̧ jȩpö̧ ttu̧ju̧ni̧nö̧ttö̧ topö sacerdotes huotörömä ja̧'hua̧ta̧nö̧ Levitas'römä veinte a̧'ȩ yabocu huotörö, ttö̧jo̧cua̧'anö jo̧mȩ 'cä̧chö̧ ku̧nu̧. ¹⁸ Jahuätömä tti̧tti̧mö̧ ppo̧ä̧tö̧rö̧'inä, tti̧recuamurö'inä, tti̧mu̧rö̧'inä, ja̧'hua̧ta̧nö̧ tti̧tti̧mö̧ nä̧tö̧rö̧'inä o'catoinä ttö̧ja̧rä̧mä̧ iyä'chinä̧tö̧ , täcö kiyönä chuä̧rä̧cuä̧u̧ tta̧'cua̧ ttu̧huä̧nä̧ra̧'a̧ttö̧ surojö'inä juiyönä. ¹⁹ Aarón ahuäruhä 'cotötö sacerdotes huotömä ka̧cui̧nätö ötahuiyä ttoecuäbä abo isarä jo̧mȩ, yaute ötahuiyättömä ki̧nö̧ ya̧tȩ hueö ku̧nä̧cua̧ ji̧'qui̧cha̧nö̧ po̧nö̧ iya pä'ö u̧mä̧tö̧rö̧'inä sacerdotes huotörö'inä, ja̧hua̧ta̧nö̧ tä̧do̧tö̧ minätö̧ huȩyu̧tu̧ rötähuotömä o'catoinä Levitas huotucu ttö̧ja̧'a̧ttö̧. ²⁰ Ezequias-mä pi̧yȩ jȩpi̧nö̧ Juda o'cajuiyönä. Ja̧u̧mä̧ jȩpi̧nö̧ adiu jö'anö jömä, jue'ö huȩnȩ ja̧'hua̧ta̧'a̧nö̧ pä̧ttö̧ta̧'a̧nö̧ jȩpu̧ U̧RU̧HUA̧, Dios ä'ca jo̧mȩtö̧. ²¹ Ja̧'hua̧'a̧nö̧ kä̧mä̧di̧nö̧ a̧mu̧cuä̧di̧nö̧ ja̧u̧mä̧ adittö Dios oju''isodettömä, huȩnȩ, ja̧'hua̧ta̧'a̧nö̧ huȩ'ä̧huä̧, tu̧sa̧ pä'ö TTU̧RU̧HUA̧ DI̧O̧S-RÖ̧, a̧mi̧'i̧so̧'qui̧ o'ca juiyönä a̧mu̧cuä̧du̧ jȩpi̧nö̧, ja̧'hua̧ta̧'a̧nö̧ juȩ'ö̧tä̧ jȩpi̧nö̧.