Capítulo 30

1 Ezequias hue'inö huȩnȩ jittähua pä'ö o'cajuiyönä Israél ttö̧ja̧rö̧'i̧nä̧ ja̧'hua̧ta̧'a̧nö̧ Juda ttö̧ja̧rö̧'i̧nä̧, ja̧'hua̧ta̧'a̧nö̧ i̧huȩnȩ isojä huȩyu̧tu̧ hue'inö Efrainrö̧'i̧nä̧ manasésrö'inä, ja'huätö'inä tticha pä'ö TÖ̧Ä̧NÄ̧HUA̧ ö̧jode Jerusalénra̧'a̧cu̧, ttesehua pä'ö TÖ̧Ä̧NÄ̧HUA̧ ju'tojunä cuäopinö pä'cäri, Israél ttö̧ja̧'i̧nä̧ TÖ̧Ä̧NÄ̧HUA̧. 2 Jua'amä ru̧hua̧ u̧mu̧huäyotö'inä Jerusalennttö ji̧nä̧ yo̧mȩtȩ pä'i'ö ttucuocuomentä pätecuächina'a, pa̧'a̧nö̧ Pascua pä'cäri jȩcu̧'ä̧tu̧cua̧ja̧ kä̧hua̧ttö̧ to̧dä̧rȩnä̧ päi'omenä. 3 Ja'huätö yotäcumä pä'cari jȩta̧ pä'ömä juiyina'a̧, sacerdote isopäi'önä tta̧'u̧ huä̧nä̧rä̧tö̧ recuätö toa'attö, ja̧'hua̧ta̧'a̧nö̧ ji̧nä̧ yo̧mȩtȩ pätti'oca'attö Jerusalén ttö̧ja̧'i̧nä̧. 4 Pa̧'a̧nö̧ pättömä adihua'a 'cua̧rö̧nä̧ ji̧na̧'a̧ ru̧hua̧ to'omenä ja̧'hua̧ta̧'a̧nö̧ öcatoi'önä ji̧nä̧ yo̧mȩtȩ pä'i'ätö'inä. 5 Ja̧'hua̧nö̧ ja̧'a̧ttö̧, ja'huätömä amucuädinätö jittähuä'cha pä'ö Israél rȩjȩ o'cajuiyönä, Beersebattö kä̧mä̧dö̧ Dan jubu cä'ädö, o'catoi'önä ötahuiyä ttö̧ja̧ tticha pä'ö TÖ̧Ä̧NÄ̧HUA̧ öäre pä'carira̧'a̧, Israél ttö̧ja̧'i̧nä̧ TÖ̧Ä̧NÄ̧HUA̧ Dios, Jersalenra̧'a̧. Tottomenä recuätö ttö̧ja̧ ttesehua'a tottoca'attö, huähuä huȩnȩ huȩyu̧cuä̧ päö'anö. 6 Ja̧'hua̧nö̧ ja̧'a̧, ru̧hua̧ i̧huȩtä̧ji̧ ojiyä ȩpu̧ räopinätö̧ ja̧'hua̧ta̧'a̧nö̧ Israel ttö̧ja̧ ttöruhuotöcu o'cajuiyönä Judá rȩjȩnä̧, ru̧hua̧ hue'äi ta'anö. Jähuätö pättinäu̧: ucutu Israel ttö̧ja̧, TÖ̧Ä̧NÄHUA̧RÖ̧ ppa̧a̧chä̧tu̧cui̧, Abraham minä, Isaac minä ja̧'hua̧ta̧'a̧nö̧ Israel ttö̧ja̧ TTI̧Ä̧HUA̧ DIOSRÖ, juo̧u̧ ppa̧huä̧chä̧cua̧'a̧nö̧ ucutu ki̧i̧pi̧nä̧tö̧rö̧, Asiria ruhuotö ttömuttö̧ tiipächinätö̧rö̧. 7 Cuädo̧tö̧ mi̧nä̧'a̧nö̧mä̧ cuahuaruhuä minanömä̧, TÖ̧Ä̧NÄHUA̧RÖ̧ suronä jȩ'cuä̧tu̧cuä̧, cu̧tä̧mu̧tu̧cu̧ tti̧nä̧hua̧ DIOSRÖ, ucutu to'cuätucua'anö iyö icuinä'u̧jä̧ surojucutä. 8 Jitämä cuarodä'chätucuä, cui̧tä̧mu̧ mi̧nä̧ ttinänö̧mä̧; ja̧'hua̧nö̧ ja̧'a̧ttö̧, TÖ̧Ä̧NÄHUA̧RÖ̧ iyähuätucui ro̧o̧mȩcu̧ cuichätucua, juo̧u̧tä̧ 'cuäpunä ro̧ö̧nä̧ jȩi̧no̧mȩ CUIÄNÄHUA̧TU̧CU̧ DIOSRÖ ucuotunö jȩ'cuä̧tu̧cua̧ pe'ö, ucuturu öjö'quiyönä jä̧ji̧ unuchiapeö. 9 Ucutu ppa̧cuä̧chä̧tu̧cu̧ttö̧mä̧ TÖ̧Ä̧NÄHUA̧RÖ̧, cuahuaruhuätucu'inä tti̧tti̧mu̧'i̧nä̧ rȩrö̧jö̧nä̧ tottäcuotö jitö oto ttȩmi̧pi̧nä̧u̧rö̧mä̧, ja̧'hua̧nö̧ ja̧'a̧ttö̧ jähuätörö ppa̧ttä̧dä̧cuo̧tö̧ tti̧rȩjä̧ra̧a̧. TTÖ̧Ä̧NÄHUA̧ DIOSMÄ jo̧mȩnö̧ rȩrö̧jö̧nä̧ toäcuähuä i̧sa̧ja̧'a̧ttö̧, ja̧'hua̧nö̧ ja̧'a̧ttö̧ ucuturumä ja̧ro̧i̧yä̧cua̧ juo̧u̧rö̧ ppa̧cuä̧chä̧tu̧cu̧ttö̧mä̧. 10 Ja̧'hua̧nö̧ ja̧'a̧, huȩnȩ jiäcuähuä ttö̧ja̧mä̧ ötahuiyä 'cuä'opö 'chi̧nä̧tö̧ Efraín ahuaruhuä'i̧nä̧, Manasés ahuaruhuä'i̧nä̧ tti̧rȩjä̧mä̧ o'cajuiyötä, Zabulón ahuaruhuä ttö̧ja̧cuo̧mȩcu̧ mä̧nä̧ra̧'a̧cu̧'i̧nä̧ o'cajuiyötä, ja̧'hua̧nö̧ cuȩttä̧chi̧yä̧u̧ ttö̧ja̧mä̧ jahuätörö ya̧'a̧huä̧'chi̧nä̧tö̧. 11 Ja̧'hua̧nö̧ ja̧'a̧nä̧'i̧nä̧ Aser ahuaruhuättö'i̧nä̧, Manasés ahuaruhuättö'i̧nä̧ ja̧'hua̧ta̧nö̧ Zabulón ahuaruhuättö'i̧nä̧ yotutemä ucuomä tettähuoca'a Jerusalén ötahuiyära̧'a̧ ichinä̧tö̧. 12 Dios ujurumä Judá ttö̧ja̧nä̧ ka̧'a̧ttö̧, tta̧mi̧so'quinä tta̧mö̧cuädönä jȩpi̧nö̧, ru̧hua̧'i̧nä̧ ttö̧ja̧ tturuhuotö'i̧nä̧ huettinö jȩtta̧ pä'ömä, TÖ̧Ä̧NÄ̧HUA̧ päina'acu̧tä̧. 13 Ttö̧ja̧ recuätö Jerusalén ötahuiyänä̧ ca̧ca̧cu̧ pȩjä̧mi̧nä̧tö̧ kä̧hua̧tö̧ ta̧ju̧ päi'omenä pan ppö̧ä̧mö̧ juiyö pä'cäri jȩtta̧ pä'ö. 14 Jahuätömä̧ ä̧rä̧mi̧'ö̧ i̧sa̧rö̧ ku icuähuä o'ca Jerusalénä ka̧cu̧ pparö icuinä̧tö̧ ja̧'hua̧ta̧nö̧ a̧mȩu̧nä̧ 'chopö kuhuähuä o'ca'i̧nä̧; 15 Ja̧u̧nu̧ o'ca'a, juätömä pascua pä'cäri jȩpö̧ mo̧ro̧tä̧ 14nö mo̧ro̧ päi'omenä kä̧hua̧tö̧tä̧ ta̧ju̧ päi'omenä ovejastö̧rö̧ cuä'inä̧tö̧. Sacerdotet'i̧nä̧ ja̧'hua̧ta̧nö̧ Leví ahuaruhuä'i̧nä̧ dä'ä ttuttunä ji̧nä̧u̧, ja̧'hua̧nö̧ jä̧u̧ surojö töcäu icuinä̧tö̧ ja̧'hua̧nö̧ jȩpö̧ ku icuähuä mippounä iyähuä i'cächinä̧tö̧ TÖ̧Ä̧NÄ̧HUA̧ ojusodera̧'a̧cu̧. 16 Jahuätömä täcö ttö̧jo̧mȩ pö̧nä̧ kȩ'ȩcu̧ kä̧mä̧di̧nä̧ttö̧, Dios esecuinä̧cu̧ Moíses hueähuä huȩnȩ jȩpö̧ u̧ju̧ni̧nö̧ta'anö. 17 Sacerdotes huotömä Levitas ttö̧ja̧ ttiyäji i̧sa̧ ucuoja riripinä̧tö̧. Recuätö ttö̧ja̧ ka̧cui̧nä̧tö̧ surojö ttu̧ju̧nä̧rö̧ ttöcäu icuähuocotö. Ja̧'hua̧nö̧ ja̧'a̧ttö̧,Levitas huotömä ohueja i̧tti̧rö̧ cuä'ö icuinä̧tö̧ Pascua pänä ttucuäcua'a pä'ö surojö ttöcäcuocottö päjätö'inä o'catoinä ja̧'hua̧nö̧ cuätö ku'icu ttiyömä TÖ̧Ä̧NÄ̧HUA̧ ä'cattömä micuähuoca'attö. 18 Ttö̧ja̧ recuätö ichäjätömä, pitö jina'a̧ Efraínsotö'inä ja̧'hua̧ta̧nö̧ Manasés'sotö'inä, Isacarsotö'inä ja̧'hua̧ta̧nö̧ Zabulóns'sotö'inä, surojö tticäu tticuähuoca'aja̧nä̧ cuinä̧tö̧ Pascua päcärimä jȩtä̧ pä'ö huȩyu̧tu̧ rutäcuä jarodö. Ezequíatä ucuocuinö jahuätönämä pa'anö pä'ö: ''TÖ̧Ä̧NÄ̧HUA̧ adihuä i̧sa̧ ja̧'a̧tä̧ topi pitö o'catoinä̧rö̧mä̧ 19 ttamiso'quitö UCU DIOS hua̧rö̧ ttusäcua'anö ttä̧do̧tö̧ minä TÖ̧Ä̧NÄ̧HUA̧RÖ̧, surojö ttöcäu tticuoca'anä ucu ku̧jo̧mȩ ro̧mȩ ä'cattö. Ezequías ucuocuäjimä . 20 TÖ̧Ä̧NÄ̧HUA̧ äjucuinö ja̧'hua̧nö̧ ja̧'a̧ttö̧ jahuätömä surojö juiätötä päi'inä̧tö̧. 21 Israél ttö̧ja̧ Jerusalennä ko̧cuä̧tö̧mä̧ pa̧n ppö̧ä̧mocö̧ pä'cäri ko̧mȩ ju̧bu̧ ko̧cui̧nä̧tö̧ ji̧mu̧tȩ ta'arenö mo̧ro̧jo̧mȩ eseäcuähuänätä̧ ko̧cui̧nä̧tö̧. Levi ahuaruhuä 'cotö'inä ja̧'hua̧ta̧'a̧nö̧ profetahuotö'inä TTÖ̧Ä̧NÄ̧HUA̧RÖ̧ esehuinätö̧ koro mo̧ro̧ koro mo̧ro̧ jö̧ta̧'a̧nö̧, 'porö ra̧huä̧huä̧ pä̧i̧cu̧nä̧ ucuocunä TTÖ̧Ä̧NÄ̧HUA̧ ä'cajo̧mȩ. 22 Ezequías ȩsȩhui̧nö̧ ucuocuinö Levi ahuaruhuä 'cotörö TÖ̧Ä̧NÄ̧HUA̧ öäre ppä̧'ä̧dä̧rä̧jä̧tö̧rö̧. Ja̧'hua̧nö̧ ja̧'a̧ttö̧ jahuätömä pä'cärinämä tu̧cuä̧ cuinätö̧ ji̧mu̧tȩ ta'arenö mo̧ro̧ jo̧mȩnä̧, huȩnȩ juiyönä ttö̧ja̧ pä'ö ttiäre ku iyähuä iyö, ja̧'hua̧ta̧'a̧nö̧ suronä jȩttä̧'i̧jö̧ TTÖ̧Ä̧NÄ̧HUA̧RÖ̧ ji'äu, ttä̧do̧tö̧ minä'i̧nä̧ TTÖ̧Ä̧NÄ̧HUA̧RÖ̧. 23 O'catoi'önä ji̧nä̧ yo̧mȩtȩ pä'i'ö pä'inätö yabocu ji̧mu̧tȩ ta'arenö̧ mo̧ro̧ jo̧mȩ ttesehua pä'ö, ja̧'hua̧nö̧ ja̧'a̧ttö̧ yabucutä esehuinätö. 24 Isopäi'önä, Juda ru̧hua̧ Ezequíasmä jahuätörö iyinö Milnö pä̧ca̧yö̧ jo̧mȩ ja̧'hua̧ta̧'a̧nö̧ siete milnö jo̧mȩ o̧huȩja̧tö̧rö̧ mippoönä iyähuä päi'önä; ja̧'hua̧ta̧'a̧nö̧ ötahuiyänä ruhuo jö̧nä̧ ko̧cuä̧tö̧'i̧nä̧ iyinätö̧ milnö jo̧mȩ pä̧cä̧yö̧rö̧ ja̧'hua̧ta̧'a̧nö̧ diez milnö jo̧mȩ o̧huä̧ja̧tö̧rö̧'i̧nä̧ ja̧'hua̧ta̧'a̧nä̧ cabratö̧rö̧'i̧nä̧. Recuätö sacerdote huotö suronä jȩttö̧ ji'äu ko̧cui̧nä̧tö̧. 25 Judá ttö̧ja̧mä̧ o'catoi'önä, sacerdote huotucu'i̧nä̧, Leví ahuaruhuäcu'i̧nä̧ yoräteunä, Israel o'catoi'önä ca̧ca̧cui̧pä̧tu̧cu̧, ja̧'hua̧ta̧nö̧ ko̧ro̧jä̧ ttö̧ja̧ Israel ttö̧ja̧ tti̧rȩjä̧ttö̧ ichätömä juhua'atäcu jitö Judá ttö̧ja̧ tti̧rȩjä̧nä̧ ka̧cuä̧tö̧'i̧nä̧, o'catoi'önä̧tä̧ esehuinä̧tö̧. 26 Ja̧'hua̧nö̧ jo̧mȩttö̧, Jerusalénnämä rö̧ä̧nä̧ eseäcuähuä ki̧na̧'a̧, isopäi'önä Israel ttö̧ja̧ ttu̧ru̧jua̧ David i̧tti̧ Salomón ö̧ji̧nä̧ pä̧nä̧ttö̧ kä̧mä̧dö̧ Jerusalénämä ja̧'hua̧nö̧ eseäcuähuämä juiyina'a. 27 Ja̧'hua̧nö̧ jä̧ji̧ o'ca'a Sacerdote huotömä ja̧'hua̧ta̧nö̧ Levís ahuaruhuä'i̧nä̧ ä̧rä̧mi̧'ö̧, juiyo adiunä̧tä̧ jä̧cua̧'a̧ pä'inä̧tö̧ ttö̧ja̧rö̧mä̧. Jahuätö huottö rä̧mi̧pi̧na̧'a̧ ja̧'hua̧ta̧nö̧ Dios ttucuocu'i̧nä̧ mo̧ro̧jä̧ra̧'a̧ rȩbȩhui̧na̧'a̧, Dios ö̧jo̧mȩ surojö juiyomwttö̧.