¹ Ezequíamä ruhuo hueö ö̧jä̧bä̧di̧nä̧mä̧ ku̧nä̧ri̧nö̧ veinticinco a̧'ȩ jo̧mȩ; ja̧u̧ ruhuo hueinö Jerusalén'nämä veintinueve a̧'ȩ jo̧mȩ jobutä. A̧ju̧ ki̧mi̧mä̧ ji̧na̧'a̧ Abías; juajumä ji̧na̧'a̧ Zacarías ittiju. ² Ja̧u̧ TÖ̧Ä̧NÄ̧HUA̧ a'cattömä adiutä jȩpi̧nö̧; jäo David minä jȩi̧nö̧ ta'anö jȩpi̧nö̧. ³ A̧cuo̧mȩn a̧'ȩ ruhuo huei̧nö̧ pänä, Ezequiamä a̧cuo̧mȩnä̧ kä̧cua̧nä̧mä̧ TÖ̧Ä̧NÄ̧HUA̧ ojusode apate baepinö ja̧'hua̧nö̧ jȩpö̧ aditö icuinö. ⁴ Ja̧u̧ 'cächinö sacerdotes huotörö'inä ja̧'hua̧ta̧nö̧ levitas huotörö'inä ja̧'hua̧nö̧ jȩpö̧ ji̧nä̧ yo̧mȩtȩ pättiönä ca̧ca̧ti̧nö̧ juode cä'co isaränä kä̧cua̧ räopa'acu päteö. ⁵ ja̧u̧ juätörö päinö:''¡Ucutu levitas ä̧ju̧cuä̧tu̧cu̧í̧! ucututä surojö töcäu icuätucui ja'hua̧ta̧nö̧ tä̧do̧tö̧ minä TÖ̧Ä̧NÄ̧HUA̧ Dios ojusode'inä töcö icuätucui, ja̧'hua̧nö̧ jȩpö̧ surojömä oto ȩmi̧pö̧ do'opö icuätucui porö ro̧mȩttö̧mä̧. ⁶ Jua'amä tä̧do̧tö̧ mi̧nä̧ TÖ̧Ä̧NÄ̧HUA̧ Dios ä'cajo̧mȩttö̧ suronä jȩtti̧na̧'a̧ttö̧; ja'huätömä JA̧U̧RU̧ jaropi'inätö, kara'acutä kärächi'ö ko̧cui̧nä̧tö̧ TÖ̧Ä̧NÄ̧HUA̧ ö̧jo̧mȩttö̧mä̧, ja̧'hua̧nö̧ jȩpö̧ ttaboja̧'a̧cu̧tä̧ ko̧cui̧nä̧tö̧. ⁷ Ja̧'hua̧ta̧'a̧nö̧ doächäcuähuome apate'inä mu̧'ȩpi̧nä̧tö̧ ra̧pa̧ri̧yu̧'i̧nä̧ na̧'ȩpä̧ icuinätö; Ja'huätömä a̧mȩu̧ 'chöpönä 'cuähuä'inä 'cuocotö pinätö̧ ttiäre ku iyähuä'inä iyocotö pinätö Israél ttä̧ja̧ TÖ̧Ä̧NÄ̧HUA̧ ö̧jo̧mȩ ro̧mȩ'i̧nä̧. ⁸ Ja̧'hu̧nö̧ jo̧mȩnä̧ TÖ̧Ä̧NÄ̧HUA̧TTÖ rö̧'ȩcuä̧ pätecuächina'a Judanä ja̧'hua̧ta̧'a̧nö̧ Jerusalénnä'inä, ja'huätönä i̧jȩcuä̧chi̧na̧'a̧ suronä jömä ja̧'hua̧ta̧'a̧nö̧ kö'cähuo'cömä, ucututä cua̧mo̧nä̧ cui'äretucunä topätöjä. ⁹ Pa̧'a̧nö̧ ja̧'a̧ttö̧ tä̧'o̧tö̧ mi̧nä̧mä̧ curä'chunä to'epinätö̧, ja̧'hua̧ta̧'a̧nö̧ ti̧tti̧mö̧ u̧mä̧tö̧ nä̧tö̧'i̧nä̧ ja̧'hua̧nö̧ jo̧mȩnä̧ ti̧rȩcua̧mö̧'i̧nä̧ korometä̧ cärenä rötähuotö ko̧cuä̧tö̧. ¹⁰ Ja̧'ha̧nö̧ ja̧'a̧, chamiso'quinämä ka̧'a̧ TÖ̧Ä̧NÄ̧HUA̧ Israel ttö̧ja̧ ttu̧ru̧hua̧ Dioscu chesecua pädömä, rö̧ä̧nä̧ amisuru ujututttö ojo töipächäcua'anö̧. ¹¹ Chi̧tti̧, jitämä ö̧tä̧hua̧ jö̧nä̧mä̧ cu̧jä̧, isopäi'önä̧ ucutumä TÖ̧Ä̧NÄ̧HUA̧ ȩmi̧nä̧u̧jä̧ chutä 'äca jo̧mȩ cu̧ja̧cuä̧tu̧cua̧ pä'ö, Ja̧u̧rö̧ ucuo tedähua pä'ö, ucutu chu̧mö̧huäyotö cuätucuäcua'anö ja̧'hua̧ta̧nö̧ incienso'i̧nä̧. ¹² Ja̧'hua̧nö̧ ja̧'a̧, Levís ahuaruhuämä ä̧rä̧mi̧'i̧nä̧tö̧: Amasai i̧tti̧ Mahatmä' ja̧'hua̧ta̧nö̧ Azarías i̧tti̧ Joel'i̧nä̧, Coat ttä̧ja̧'i̧nä̧, Abdi i̧tti̧ Cis'i̧nä̧, juhua'atäcu Jehalelel i̧tti̧ Azarías'i̧nä̧; ja̧hua̧ta̧'a̧nö̧ Gerson i̧tti̧mö̧ttö̧mä̧: Zima i̧tti̧ Joa'i̧nä̧, Joa i̧tti̧ Edén'inä, ¹³ juhua'atäcu Elizafán i̧tti̧mö̧ttö̧mä̧: Simri'i̧nä̧, Jeiel'i̧nä̧, ja̧'hua̧ta̧nö̧ Asa i̧tti̧mö̧ttö̧mä̧ Zacarías'i̧nä̧, Matanías'i̧nä̧ jö̧nä̧, ¹⁴ Hemán i̧tti̧mö̧ttö̧mä̧; Jehiel'i̧nä̧, Simei'i̧nä̧ juhua'atäcu Jedurún i̧tti̧mö̧ttö̧mä̧ Semaías'inä, ja̧'hua̧ta̧nö̧ Uziel'i̧nä̧. ¹⁵ Ja'huätömä ttahuaruhuäcu ji̧nä̧ yo̧mȩtȩ pä'i'ö, jitötä tta̧mo̧nä̧tä̧ suronä jȩttö̧ jarotti'a pä'ö amucuädinätö, ja̧'hua̧nö̧ ja̧'a̧ttö̧ dodepinätö̧, ru̧hua̧ päjita'anö jȩtta̧'a̧ttö̧, TÖ̧Ä̧NÄ̧HUA̧ päöta'anötä 'chä̧nö̧, TÖ̧Ä̧NÄ̧HUA̧ ö̧jode töcö tticua pä'ö. ¹⁶ Sacerdote huyotömä dodepinätö̧ TÖ̧Ä̧NÄ̧HUA̧ ö̧jode yacuä jubu juatö tticua pä'ö; ja'huätömä ö'cajuiyönä rä'epö icuinätö isode u̧mi isaräcu suronä jö̧ TÖ̧Ä̧NÄ̧HUA̧ ö̧jode jäcuättö ttö̧'o̧cui̧'ö̧mä̧. Levis tö̧ja̧mä̧ ȩmi̧nä̧tö̧ surojö rä'epö tticuäji ttȩpa̧ pä'ö Cedrónra̧'a̧cu̧ aje pö̧o̧mȩ do'opö tticua pä'ö. ¹⁷ Jitämä, ja'huätömä suronä jȩttö̧ jarotti'a pä'ö pätecuächina'a ä̧cuo̧mȩnä̧ kä̧hua̧ttö̧ ä'canä mo̧ro̧, kä̧cuä̧ttö̧mä̧ ji̧mu̧tȩ huäba'acuänö mo̧ro̧ päi'omenä. Ja'huätömä rä̧bȩhui̧nä̧tö̧ TÖ̧Ä̧NÄ̧HUA̧ ö̧jode doächäcuähuome ö'ca jubu. Ja̧'hua̧nö̧ ja̧'a̧ttö̧ ji̧mu̧tȩ huäba'acuänö mo̧ro̧ o'ca'a, TÖ̧Ä̧NÄ̧HUA̧ ö̧jodesuronä jö̧ juiyöna jȩpi̧nä̧tö̧. to̧mu̧rȩ ji̧mu̧tȩ ya'atenö mo̧ro̧ päi'ome ä̧cuo̧mȩnä̧ kä̧hua̧ttö̧, kä'ädinätö̧. ¹⁸ Ja̧u̧nu̧ o'ca'a, "chi̧nä̧tö̧ ru̧hua̧ Ezequis ö̧ja̧'a̧, ru̧hua̧ ojusode jäcuattö pa̧'a̧nö̧ pä'inätö: "Ujutumä TÖ̧Ä̧NÄ̧HUA̧ ö̧jode ttöcö icuäjätöjä, ttiäre ku'icu iyähuome'inä juȩnȩ ku adicuä'inä, ja̧'hua̧ta̧'a̧nö̧ pa̧ppä̧ ö̧jo̧mȩ huä̧nä̧huodä'inä, o'cajuiyönä juȩnȩ adicua'inä. ¹⁹ Ja̧'hua̧nö̧tä̧ jo̧mȩnä̧ adittö ku̧nä̧jä̧tö̧jä̧ ja̧'hua̧ta̧'a̧nö̧ o'cajuiyönä ru̧hua̧ Acaz upporädinö'inä surojö juiyönätä̧ jȩpä̧tö̧jä̧ ruhuo jue'inö pä̧nä̧ jarodö jȩi̧nö̧mä̧. Jitämä, ja'huätötä ja̧'a̧ TÖ̧Ä̧NÄ̧HUA̧ ö̧jode ä'ca ko̧cuä̧tö̧mä̧." ²⁰ Ja̧'hua̧nö̧ ja̧'a̧, ru̧hua̧ Ezequías, moro̧ pä'ia porächi'inö ja̧'hua̧nö̧ ja̧'a̧ttö̧ ö'cato'inärö̧ ötahuiyättö ttöruhuotöcu ca̧ca̧cu̧ pä̧huä̧di̧nö̧; juo̧nö̧ o'caa TÖ̧Ä̧NÄHUA̧ ö̧jodera̧a̧ 'chi̧nö̧. ²¹ Jähuätö ȩpi̧nätö̧ sietenö toro̧tö̧rö̧, sietenö carnero̧tö̧rö̧, sietenö oveja̧tö̧rö̧, ja̧'hua̧ta̧'a̧nö̧ sietenö u̧mä̧tö̧ cabriotö̧rö̧ kuicu ttiya pe'ö surojö juiyomettö̧ Judá rȩjȩ́ ru̧hua̧ suronä jȩ'i̧na̧'a̧ttö̧. Juo̧u̧ hueinö sacerdotetö̧rö̧, Aarón i̧tti̧mu̧rö̧, ttiya pe'ö kuicu iyahuome TÖ̧Ä̧NÄHUA̧RÖ̧. ²² Ja̧'hua̧nö̧ ja̧'a̧ttö̧, jähuätö cuhuä'ö icuinätö̧ toro̧tö̧rö̧ ja̧'hua̧ta̧'a̧nö̧ sacerdotȩtö̧mä̧ ttöcuoja ȩmú̧ riripinätö̧ kuhuicu iyähuome. Cuhuä'ö icuinätö̧ carnerotö̧rö̧'i̧nä̧ ttöcuoja ȩmú̧ riripinätö̧ kuhuicu iyähuome; ja̧'hua̧ta̧'a̧nö̧ cuhuä'ö icuinätö̧ oveja̧tö̧rö̧ ttöcuoja ȩmú̧ riripinätö̧ kuhui'icu iyähuome. ²³ Jähuätö ȩpi̧nä̧tö̧ chutäcu ji̧nä̧ yo̧mȩtȩ ucuocuätö ru̧hua̧ ä'ca jo̧mȩ u̧mä̧tö̧ cabriotö̧rö̧ ttiya pe'ö suronä jȩi̧nö̧ micuä päi'önä ja̧'hua̧nö̧ ja̧'a̧ttö̧ jättepinäcu̧ kuhuicu ttiyäcuotörö ttönä mȩa̧ pe'ö. ²⁴ Cuhuä'ö icuinätö̧ sacerdotetö̧mä̧ ja̧'hua̧nö̧ ja̧'a̧ jähuätö iyinätö̧ cabriotö̧ u̧mä̧tö̧ ttöcuoja suronä jȩtti̧nö̧ amucuädö kuhuicu iyähuome Israel ttö̧ja̧rö̧ o'cato'inärö̧ to̧'a̧ra̧ pe'ö, ja̧'hu̧nö̧ hueattö̧ ru̧hua̧ kuhuicu ttiya pe'ö ja̧'hua̧ta̧'a̧nö̧ koro suronä jȩtti̧nö̧ o'cato'inä Israel ttö̧ja̧. ²⁵ Ezequíasmä Leví ahuaruhuä 'cotörö ku̧ni̧nö̧ TÖ̧Ä̧NÄ̧HUA̧ ojusodenä, obinä rä̧mi̧pö̧nä̧ cuä'ätörö'o̧i̧nä̧, arpanä̧ 'porätörö'i̧nä̧, appiyänä 'porätörö'i̧nä̧ adihuomenä hue'ö ku̧ni̧nö̧ David hueinöta'anö, Gadmä ru̧hua̧ päö huȩnȩ jiäcuähuä ttö̧ja̧sa̧ jö̧nä̧, ja̧'hua̧ta̧nö̧ Natán Dios päö jiäcuähuä ttö̧ja̧sa̧, juhua'amä TÖ̧Ä̧NÄ̧HUA̧ hueina'attö̧ chutä ucuocu jiäcuähuä ttö̧ja̧nä̧ hueinöta'anötä̧. ²⁶ Leví ahuaruhuämä̧ David 'porö ra̧huä̧huä̧ aditinö̧cu̧ ka̧cuä̧mi̧nä̧tö̧ ja̧'hua̧ta̧nö̧ Sacerdotetömä̧ trompetascu̧ ka̧cuä̧mi̧nä̧tö̧. ²⁷ Ezequíasmä jahuätörö hue'inö mippounä iyähuä ku icu iyähuomettö ttiya pä'ö. Mippounä iyähuä cuo'i'ö rȩdȩcuä̧cho̧mȩnä̧, TÖ̧Ä̧NÄ̧HUA̧ i̧mi̧nä̧ ra̧'ä̧tö̧'i̧nä̧ kä̧mä̧dö̧ ra̧'i̧nä̧tö̧, trompetasnä̧ ppo'u'i̧nä̧, Israel ttö̧ja̧ ttu̧ru̧hua̧ David 'porö ra̧huä̧huä̧ aditinö̧cu̧. ²⁸ Ttö̧ja̧ o'catoi'önä ucuo tettäcua'anä, ra̧huä̧huä̧ ttö̧ja̧'i̧nä̧ rä̧'i̧nä̧tö̧ ja̧'hua̧ta̧nö̧ trompetas'i̧nä̧ ppo'inätö̧; pi̧yȩ kä̧mä̧do̧ca̧'a̧ ji̧na̧'a̧ mippounä iyähuä cuo'ö beipächome jubö päi'önä. ²⁹ Jahuätö tiäre ku'icu iyähuä cättädomenä, ru̧hua̧cu̧ kä̧tö̧ o'catoinämä ttihue'quiyucu pä̧cuä̧dö̧ ucuotö jȩpi̧nä̧tö̧. ³⁰ Jua'a yabocu, jȩi̧pnö̧ ru̧hua̧ Ezequíamä, ja̧'hua̧ta̧nö̧ ruhuotömä hueinä̧tö̧ levitarö TÖ̧Ä̧NÄ̧HUA̧RÖ̧ eseu ra̧tta̧ pä'ö David ucuocuinönä ja̧'hua̧ta̧nö̧ Asaf'inä, Dios pä'ö jiähuäcuähuä i̧sa̧. Jahuatö eseunu rä̧huä̧huä̧ rä̧i̧nä̧tö̧, ja̧'hua̧nö̧ ja̧'a̧nä̧'i̧nä̧ ttihue'quiyucu pä̧cuä̧dö̧ ucuo teähuinä̧tö̧. ³¹ Ja̧'hua̧nö̧ ja̧'a̧, Ezequías päinö:'' Jitämä, ucutumä cuamo̧nä̧tu̧cu̧tä̧ täcö surojömä töcähuätöjä TTÖ̧Ä̧NÄ̧HUA̧CU̧MÄ̧. TÖ̧Ä̧NÄ̧HUA̧ ojusodera'a cächö ichätucui ku'icu iyäcuä jȩ'cuä̧tu̧cua̧ eseu.'' Recuätö ttö̧ja̧'i̧nä̧ ttiäre ku'icu iyäcuä 'cächö ichinä̧tö̧ esehuächi'ö, ja̧'hua̧ta̧nö̧ korotö'inä ttamiso'quittö esecuächiö ttiya pä'ätömä iyinä̧ttö̧. ³² Mippounä̧ ttöäre ku icu iyähuä ttö̧ja̧ tti'cächinömä pä̧cä̧yu̧ u̧mä̧tö̧mä̧ setentanö, ovejastö̧ ppo̧'ä̧tö̧mä̧ cienö ja̧'hua̧ta̧nö̧ ovejastö̧ u̧mä̧tö̧mä̧ doscientosnö ji̧na̧'a̧. Pitö o'catoi'önä̧rö̧mä̧ ku icu TÖ̧Ä̧NÄ̧HUA̧RÖ̧ ttuya pä'ö ji̧na̧'a̧. ³³ Ttöäre iyähuä 'cä̧'ȩpö̧ ku̧nä̧huä̧mä̧ pä̧cä̧yu̧mä̧ seiscientonö ji̧na̧'a̧ ja̧'hua̧ta̧nö̧ ovejastä tres milnö̧. ³⁴ Ja̧'hua̧nö̧ ja̧'a̧nä̧ Sacerdotetö̧mä̧ a̧'u̧cu̧nä̧tä̧ ji̧na̧'a̧ o'cajuiyönä ttöäre ku icu iyähuotö tti̧jȩti̧yö̧ 'pa̧'ö̧ tticua pä'ömä ja̧'hua̧nö̧ ji̧yä̧u̧ ttahuaruhuä ttö̧jä̧hua̧tö̧ Leví ahuaruhuä ppättädinäu jo̧mȩnö̧ cättädome jubö, ja̧'hua̧ta̧nö̧ sacerdotetö̧'i̧nä̧ tta̧mö̧ pa̧ja̧tö̧ töqui icuähuotötä pätti'önä̧, isopäi'önä̧ Leví ahuaruhuätä ji̧na̧'a̧ sacerdotettö̧ yabonä̧nö̧ tta̧mö̧nä̧ pa̧ja̧tö̧ tö̧cä̧huä̧rä̧tö̧mä̧. ³⁵ Koromä, ttöäre ku icu iyähuämä juiyo rö̧i̧na̧'a̧; ja̧u̧mä̧ ttöare i̧sa̧ ö̧a̧dȩ ku icu iyähuä jö̧nä̧ ji̧na̧'a̧ ja̧'hua̧ta̧nö̧ vino'i̧nä̧ ki̧na̧'a̧ ttöäre ji̧yȩcu̧nä̧ ku icu iyähuä jö̧mä̧. Ja̧'hua̧nö̧ ja̧'a̧ttö̧, TÖ̧Ä̧NÄ̧HUA̧ ojusodettö adicuämä adihuomenä adicuä jö̧nä̧ jȩpö̧ ku̧nä̧hui̧na̧'a̧. ³⁶ Ezequíasmä esehuinö, ja̧'hua̧ta̧nö̧ ttö̧ja̧'i̧nä̧ o'catoi'önä̧tä̧, Dios jȩtta̧ pä'ö jo̧mȩnö̧ jȩpö̧ u̧ju̧nä̧ji̧mä̧, isopäi'önä ja̧u̧mä̧ jurunä adicui'ina'a.