Capítulo 28

1 Acaz veinte a̧'ȩtä̧ ku̧nä̧ri̧nö̧ ruhuo hue'ö ö̧jä̧bȩdi̧nö̧mä̧, Jerusalén'nä hue'inö diciséis a̧'ȩ jo̧mȩ jobutä. Ja̧u̧mä̧ Ö̧Ä̧NÄ̧HUA̧ ä'cattömä adiumä jȩpo̧cö̧ pinö, jä̧do̧ Davidmi̧nä̧ ȩ'i̧nä̧'a̧nö̧mä̧ jȩpo̧cö̧ pinö. 2 Israelttö ruhuotö jȩttö̧'anötä̧ jȩpö̧ ki̧nö̧; ja̧u̧mä̧ adittinö kiyö juäitö ku'icu yapare tti̧ä̧nä̧huo̧tö̧ ta̧u̧cuä̧ (Baales(. 3 Ja̧'hua̧nö̧ ja̧'a̧nä̧ 'inä, jaumä de'a pämäroppättö Ben Hinomttö̧mä̧ adiu a̧mȩu̧ juäi kuinö ja̧'hua̧nö̧ jȩpö̧ i̧tti̧mu̧rö̧ ocurä huä̧mȩ rutinö,yapare tti̧ä̧nä̧huo̧tö̧rö̧ ucuo teäu ku'icu ttiyö'anö jȩpi̧nö̧ ja̧'hua̧nö̧ jȩtti̧yä̧cu̧ TÖ̧Ä̧NÄ̧HUA̧MÄ̧ Israel ttö̧ja̧ tti̧rȩjä̧nä̧ ttö̧jo̧cuo̧mȩttö̧mä̧ räepö icuinä̧u̧. 4 Ja̧u̧mä̧ adiu a̧mȩu̧ juäi ku'icu iyähuä jȩpi̧nö̧ juttoju jo̧mȩ o̧du̧nä̧'i̧nä̧ ja'hua̧ta̧nö̧ de'a'inä ja̧'hua̧ta̧nö̧ dauhuiyä ja̧ttu̧huö̧ dea'a'inä. 5 Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧, Acaz'inä Ö̧Ä̧NÄ̧HUA̧, ru̧hua̧ Aram u̧mu̧nä̧ iyinäcu. Aram ttö̧ja̧ rohuäu tti̧cui̧nä̧u̧ ja̧'hua̧nö̧ jȩpö̧ recuätörö kärenä ȩpi̧nä̧tö, Damascocu tti̧'chä̧chi̧nä̧u̧. Acazrö'inä Isra'el ru̧hua̧ i̧mi̧nä̧ ttiyinäcu̧ ja̧'hua̧nö̧ jo̧mȩnä̧ recuätö ttö̧ja̧ to'e'inätö̧. 6 Remalías i̧tti̧ Peka, Judáttömä cuä'äu icuinö 120,000nö su̧ro̧do̧u̧ jo̧mȩnä̧ ya'ute mo̧ro̧mä̧, o'catoi'önä ja'huätömä curä rohuäu juruhuätö ji̧na̧'a̧, jua'amä TÖ̧Ä̧NÄ̧HUA̧RÖ̧ jarotti'ina'a̧ttö̧ 'cuäopina'a̧, ttö̧do̧tö̧ mi̧nä̧'i̧nä̧ TÖ̧Ä̧NÄ̧HUA̧ pi̧nö̧ärö̧. 7 Efraín u̧mu̧huäyotöttö rohuäu ju̧ru̧hua̧ ZIcri, cuä'ö icuinö ru̧hua̧ Azricam i̧tti̧ Maasíasrö, ruhuode tta̧'a̧rä̧tö̧ ttu̧ru̧hua̧rö̧ ja̧'hua̧ta̧'a̧nö̧ Elcana-rö̧'i̧nä̧, ru̧hua̧ o'ca'anä ocuo jö̧nä̧ hue'örö. 8 Israélttö su̧ro̧do̧u̧mä̧ kärenä ȩpi̧nä̧tö̧ ja'huätö ttahuaruhuärö 200,000nö jo̧mȩnä̧ tti̧rȩcua̧mu̧rö̧'i̧nä̧, tti̧tti̧mu̧ u̧mä̧tö̧ nä̧tö̧rö̧'i̧nä̧. Jahuätömä ttiäre micuäu juäi rö̧ä̧nä̧ ȩmi̧nä̧tö̧, ȩpi̧nä̧tö̧ pä'äjita'anö Samariacu. 9 Ja̧'hua̧nö̧ ja̧'a̧ ya̧tȩ Dios päö huȩnȩ ji'äu ju̧huȩnȩtä̧ ki̧nö̧, Ja̧u̧ i̧mi̧mä̧ Obed pä'ö micuinö̧. Ja̧u̧ su̧ro̧da̧u̧ Samaríara̧'a̧ttö̧ tticha'a tehua pä'ö rä'o'inö. Ja̧u̧mä̧ jahuätörö pä'inö: Tocu pä'ö ttö̧tä̧mö̧ mi̧nä̧ TTÖ̧Ä̧NÄ̧HUA̧MÄ̧ Judá ttö̧ja̧rö̧mä̧ a̧mi̧suro toa'attö̧, Ja̧u̧mä̧ jahuätö ttu̧mö̧nä̧tä̧ iyipä̧jä̧u̧. Ja'huanö iyipäjäumä suronä jȩpö̧ cuä'ö icuinä̧tö̧jä̧ mo̧ro̧jä̧ra̧'a̧ jubö rä̧mi̧pö̧nä̧. 10 Ja̧'hua̧nö̧ jȩpi̧no̧'cotömä Judá ttö̧ja̧ttö̧ u̧mä̧tu̧cu̧'i̧nä̧ nä̧tu̧cu̧'i̧nä̧ cu̧ja̧cui̧'ä̧tu̧cua̧ pä'ö jȩpä̧tö̧jä̧ ja̧'hua̧ta̧nö̧ ttö̧ja̧rö̧mä̧ cu̧mö̧huäyotö jö̧nä̧tä̧. Ja̧'hua̧nö̧ ja̧'a̧nä̧ ¿ucumä jo̧ca̧'a̧ suronä jȩ'cui̧nö̧tä̧ huȩnȩcuä̧chä̧cu̧mä̧ TÖ̧Ä̧NÄ̧HUA̧CU̧ surojönä cu̧ju̧nä̧. 11 Ja̧'hua̧nö̧ ja̧'a̧ jitämä, Ttörö ä̧ju̧cuä̧tu̧cui̧: Cärenä pȩjä̧tö̧rö̧ ttichina'acu hue'ätucui, jitö cuahuaruhuätucu ja̧'a̧nä̧ cuȩmi̧ pi̧nä̧tu̧cuä̧ö̧rö̧mä̧, isopäi'önä̧tä̧ TÖ̧Ä̧NÄ̧HUA̧MÄ̧ ucuturu amisurö topö. 12 Ja̧'hua̧nö̧ ja̧'a̧ jitötä Efraín ttö̧ja̧ ttu̧ru̧hua̧ Azarías, Johanán i̧tti̧'i̧nä̧, Mesilemot i̧tti̧ Berequías'i̧nä̧, Salum i̧tti̧ Ezequías'inä juhua'atäcu Hadlai i̧tti̧ Amasa, to'ija̧'a̧cu̧ a̧mö̧cuädinä̧tö̧ jitö curä rohuäu i̧huä̧jä̧'cotö ppa̧'ä̧chä̧tu̧cu̧mä̧. 13 Jahuätömä juätörö pä'inä̧tö̧: "Ucutumä carenä pȩjä̧tö̧rö̧mä̧ pȩnȩmä̧ cui'cächätucua pä'ömä juiya'a, isopäi'önä ucutu ujuturu i'cächö cuiyätucumä TÖ̧Ä̧NÄ̧HUA̧RÖ̧MÄ̧ surojötä jä̧cua̧'a̧, ujutu suronä jȩtö̧ yabonä̧nö̧ jö̧nä̧ päi'äcua'a, juhua'amä ujutu ttucuotoca'a jȩtä̧ji̧mä̧ ucuotäcuähuocö ja̧'a̧ ja̧'hua̧ta̧nö̧ pä̧i̧tä̧tä̧ kä̧cua̧'a̧. 14 Ja̧'hua̧nö̧ ja̧'a̧ttö̧, Su̧ro̧do̧u̧mä̧ cä'ädö icuinätö̧ chu̧ttä̧dä̧jä̧u̧ru̧mä̧ ja̧'hua̧ta̧'a̧nö̧ ttiäre micuäu juäi ttȩmä̧ji̧mä̧ iyinätö̧ tturuhuotörö ji̧nä̧ yo̧mȩtȩ pä'i'äjätö ttä'ca jo̧mȩttö̧. 15 Ttö̧ja̧tä̧ pä̧tȩtö̧ huȩttä̧u̧ ä̧rä̧mi̧'i̧nä̧tö̧ ja̧'hua̧nö̧ ä̧rä̧mi̧'ö̧ ttabo'iyotöttö 'chu̧ttä̧dä̧jä̧u̧ru̧mä̧ ttö̧'ca̧tä̧huä̧ti̧yu̧ jui'ötörö 'ca̧ti̧nä̧ttö̧ ttiäre micuäujuäi ttȩma̧ji̧'i̧nä̧ ppa̧ttä̧di̧nä̧u̧. Tö̧'ca̧ti̧nä̧u̧ ja̧'hua̧ta̧'a̧nö̧ ttö̧jä̧pö̧ oya'inä tti̧yi̧nä̧u̧. Ttucua pä'ö'inä ja̧'hua̧ta̧'a̧nö̧ ttahua pä'ö'inä tti̧yi̧nä̧u̧. Ttöttahuiyä'inä jahuapönä aditö ä̧ppö̧dö̧ tti̧cui̧nä̧u̧ ja̧'hua̧nö̧ ja̧'a̧nä̧'i̧nä̧ juiyo juiyupächätörömä asnonä̧ huä̧ni̧pö̧ ttȩpi̧nä̧u̧. Pä'äjita'anö Jerico ötahuiyäcu ttȩpi̧nä̧u̧ ttahuaruhuä ttö̧jo̧mȩcu̧, (micuinome Palmeras ötahuiyä). Ja̧'hua̧nö̧ iyipö ppa'achinätö Samariacu. 16 Ji̧nö̧ pä̧nä̧ Acaz ru̧hua̧ hue'inö huȩnȩ jittähuajá pä'ö Asiria Ruhuotö recuä rö̧jö̧ ppättädarö pä'ö. 17 Pä'äjita'anö edon ttö̧ja̧ icho ttörohuähua'attö Judá ttö̧ja̧rö̧, ttabo'iyotö jö̧nä̧ 'chu'ädö ttȩmi̧pä̧'cha̧'a̧ttö̧. 18 Ja̧'hua̧ta̧'a̧nö̧ filisteas ttö̧ja̧'i̧nä̧ 'cho̧tti̧pä'attö ötahuiyä rȩjȩ mȩyȩdo̧mȩ ko̧cu̧ ja̧'hua̧ta̧'a̧nö̧ Neguev de judá'inä. Ja'huätömä ȩmä̧jä̧tö̧ Bet Senes ötahuiyä'inä, Ajalón ötahuiyä'inä, Gederot-inä ja̧'hua̧ta̧'a̧nö̧ Gimzo ötahuiyä ppeyänä ko̧cu̧ä̧tö̧ ttidepiyu'inä. Ja'huätömä ja̧u̧du̧nä̧ ko̧cuä̧'chö̧ 'chä̧tö̧. 19 TÖ̧Ä̧NÄHUA̧ , Acaz Israel ttö̧ru̧hua̧rö̧ Judá rȩjȩ́ hueö kö̧rö̧ ucuo juiyönä jȩ'i̧nä̧cu̧. TÖ̧Ä̧NÄHUA̧RÖ̧ juo̧u̧ judánä kä̧nö̧ rö̧ȩnä̧ ucuotäcuähuä juiyönä jȩpi̧nö̧. 20 Ja̧'hua̧nö̧ ja̧'a̧ ru̧hua̧ AsiriaTilgar Pilneser, ppättadajuimä toicutä toinäcu̧ juo̧u̧ra̧a̧ 'chä̧nö̧. 21 Ja̧'hua̧nö̧ ja̧'a̧ttö̧ Acazmä TÖ̧Ä̧NÄHUA̧ ojusodenä ka̧cu̧ iyicuinö ja̧'hua̧ta̧'a̧nö̧ ru̧hua̧ ojusodenä ka̧cu̧ttö̧'i̧nä̧ chutäcu aditättö ttö̧ju̧nä̧rö̧'i̧nä̧ rö̧ȩnä̧ mi̧cuähuä juä'ittö iyinö Asiria ruhuottörö. ja̧'hua̧nö̧ ja̧'a̧nä̧ adiumä jo̧ca̧'a̧na̧a̧ juo̧'u̧ru̧mä̧ ja̧'hua̧nö̧ jȩa̧'a̧nä̧. 22 Ö̧jo̧mȩnä̧ rö̧ȩnä̧ usurähuaanä pide ru̧hua̧ Acazmä ji̧nä̧ rö̧ȩnä̧ suronä jȩpi̧nö̧. 23 Ja̧'hua̧nö̧ ja̧'a̧, juo̧u̧mä̧ kuhuicu iyinö Damasco ttö̧ja̧ yapare tti̧ä̧nä̧hua̧tö̧rö̧, chutä ttimicuähuiyönä jȩ'i̧nä̧u̧rö̧tä̧. Päinö̧ juo̧'u̧: dä̧bu̧ Aram ruhuotörömä tti̧ä̧nä̧huo̧tö̧mä̧ ppattädina'a̧ttö̧, ja̧'hua̧nö̧ ja̧'a̧ttö̧ ttö kuicu chiyä̧cua̧sä̧ jähuätörö, juätötä ppätädäcua'anö. Ja̧'hua̧nö̧ ja̧'a̧nä̧ juätömä u̧su̧rä̧sä̧tä̧ jottepinäcu̧ o'catoinä Israel ttö̧ja̧rö̧'i̧nä̧. 24 Acazmä Dios ojusodenä̧ ka̧cu̧ o'cajuiyönä ca̧ca̧ti̧nö̧ ja̧'hua̧nö̧ ca̧ca̧tö̧ ppo̧u̧cu̧tä̧ päi'önä jȩpö̧ icuinö. Ja̧u̧mä̧ TÖ̧Ä̧NÄ̧HUA̧ ojusode'i̧nä̧ mö̧'ȩpö̧ icumä chutä a̧mö̧nä̧ pa̧ja̧tö̧ isotörö ujuhuome Jerusalénttömä̧ u̧yu̧'ca̧ri̧ pö̧nä̧ aditö ku̧ni̧nö̧. 25 Judá ötahuiyättö ji̧yȩcu̧ pö̧nä̧ korotö ttö̧ä̧nä̧huo̧tö̧rö̧ i̧sa̧rö̧ ku iyähuome ju'toju jo̧mȩ aditinö. Ja̧u̧mä̧ ja̧'hua̧nö̧ jȩpö̧ TÖ̧Ä̧NÄ̧HUA̧ ö̧ta̧mö̧ mi̧nä̧ ttu̧ru̧hua̧ Dios ö̧ra̧huä̧rö̧nä̧ jȩpi̧nö̧. 26 Ja̧'hua̧nö̧ ja̧'a̧ koro jȩi̧nö̧mä̧, ja̧'hua̧ta̧nö̧ o'cajuiyönä jȩpö̧ u̧ju̧ni̧nö̧mä̧, ä̧cuo̧mȩnä̧ttö̧ kä̧mä̧dö̧ röji jubö, topittö, Judá ttö̧ja̧ttö̧ ruhuo'i̧nä̧, Israel ttö̧ja̧ttö̧ ruhuotö'i̧nä̧ ttöäre cuyärö'tänä̧ huȩyu̧cua̧'a̧ pa̧'a̧. 27 A̧ca̧zmä̧ ö̧tä̧mö̧ mi̧nä̧ ji̧nö̧ta'anö 'corujuo'ächinö ja̧'hua̧nö̧ 'corujuo'ächaja'a Jerusalén ötahuiyänä 'turu tticuinä̧cu̧, ja̧'hua̧nö̧ ja̧'a̧nä̧ Israelttö ruhuotö huattomecu̧mä̧ tti'cächococu pinö. Ja̧u̧ hueä'ijö o'comemä i̧tti̧ Ezequíastä ruhuomä hue'inö.