¹ O'cato'inä päinätö̧ Judá ttö̧ja̧mä̧ Uzíasrötä, dieciséis a̧'ȩ ku̧nä̧rö̧rö̧, ja̧'hua̧nö̧ ja̧'a̧ttö̧ huettinäcu̧ ru̧hua̧ huea pe'ö chutä jä'o Amasías hue'ino'come. ² Juo̧u̧tä̧ ji̧na̧a̧ Elot ötahuiya aditinömä ja̧'hua̧ta̧'a̧nö̧ päita'anö aditinö Judá ötahuiya'inä. Ja̧'hua̧nö̧ ja̧'a̧ ru̧hua̧ jä'o minämä ttu'turinäcu̧ jä̧do̧tö̧mi̧nä̧ huattometä̧. ³ Ruhuo hue'ö i̧jä̧mä̧di̧nö̧mä̧ Uzías ku̧nä̧ri̧nö̧ dieciséis a̧'ȩ hua̧. Juo̧'ö̧ ruhuo hue'inö cincuenta y dos a̧'ȩ jo̧mȩnä̧ Jerusalén ötahuiyanä. A̧ju̧ ki̧mi̧mä̧ micuinäju̧ Jecolías; juajumä Jerusalén ttö̧ja̧sa̧ju̧ ji̧na̧a̧. ⁴ Juo̧'u̧mä̧ adiunätä̧ jȩpi̧nö̧ TÖ̧Ä̧NÄHUA ä'ca jo̧mȩttö̧, jä'o Amasías jȩ'ö̧nö̧ta̧'a̧nö̧ jȩpi̧nö̧, o'cajuiyönä. ⁵ Ji̧nä̧ Zacarías ö̧ja̧i̧ Juo̧'u̧mä̧ DIOSRÖTÄ usinö, juo̧'u̧tä̧ u̧huo̧juȩti̧nä̧cu̧ DIOSRÖ hue'ö jȩä̧cuä̧huä̧. Ja̧'hua̧nö̧ ja̧'a̧ttö̧ TÖ̧Ä̧NÄHUA̧CU̧ ö̧jo̧mȩnä̧mä̧, DIOSTÄ jȩi̧nä̧cu̧ ro̧ȩnä̧ rö̧ä̧chö̧nä̧. ⁶ Uzíasmä rä'opächö Filisteas ttö̧ja̧cu̧ rohuähuinö. Ja̧u̧mä̧ Gat ötahuiyä'i̧nä̧, Jabnia ötahuiyä'i̧nä̧ ja̧'hua̧ta̧nö̧ Asdod ötahuiyä'i̧nä̧ ttoecuä obä kä'ö icuäji'ca̧ Asdod rȩjȩnä̧ ötahuiyä aditinö̧ ja̧'hua̧ta̧nö̧ Filisteas ttö̧ja̧ ttö̧'cä̧tȩ jo̧mȩ. ⁷ Dios ppä'ädinö Filisteas ttö̧ja̧rö̧, Arabe Gurbaalnä̧ ka̧cuä̧tö̧rö̧'i̧nä̧ ja̧'hua̧ta̧nö̧ Meunitas pä̧ttä̧u̧rö̧'i̧nä̧ uhrohuähua'ánä. ⁸ Amón ttö̧ja̧mä̧ Uzíasrö mitähuä pärätä iyinä̧tö̧ ja̧'hua̧nö̧ jo̧mȩnä̧ Uzías ucuomä o'cajuiyötä ucuohuina'a, Egipto ötahuiyära̧'a̧ doöchäcuähuome jubö päi'önä̧, juhua'amä uruhuo rö̧ä̧nä̧ rö̧ä̧cho̧mȩttö̧. ⁹ Koromä̧, Uzíasmä̧ Jerusalén ötahuiyänä ju'toju to̧pä̧rö̧ pä̧cuä̧huä̧cä aditinö, Ángulo äpatenä'i̧nä̧, pämäroppä äpatenä'i̧nä̧ ja̧'hua̧ta̧nö̧ ttoecuäbä u̧yu̧'ca̧ri̧nä̧'i̧nä̧, 'quiyönä aditö ku̧ni̧nö̧. ¹⁰ Ja̧u̧mä̧ de'a jui̧yä̧jä̧nä̧'i̧nä̧ ju'tonä to̧pä̧rö̧ pä̧cuä̧huäcä aditö kä̧nö̧mä̧ ajiya rejuhuiyä'i̧nä̧ sa'inö, juhua'a a̧ji̧mö̧rö̧ rö̧ä̧nä̧ u̧ju̧nä̧ra̧'a̧ttö̧, rȩjȩ juiächi'ome'i̧nä̧ ja̧'hua̧ta̧nö̧ meje'quiyönä̧'i̧nä̧. Ja̧u̧mä̧ ku̧nä̧ri̧nö̧ cuähuä ku̧nä̧huä̧ ttö̧ja̧rö̧'i̧nä̧, mö̧ä̧'quiyö päi'ome uva ku̧nö̧ aditätörö'i̧nä̧ ja̧'hua̧ta̧nö̧ cuähuä rö̧ä̧nä̧ ppuruhuome'i̧nä̧, isopäi'önätä̧ ja̧u̧mä̧ cuähuä u̧ju̧na̧ pä'ötä pä̧huä̧rö̧ji̧nä̧cu̧. ¹¹ Ja̧'hua̧nö̧ ja̧'a̧nä̧'i̧nä̧, Uzíasmä su̧ru̧da̧u̧ curä rohuähuätörö ku̧nä̧ri̧nö̧ jo̧mȩnö̧ huo̧jȩcuo̧tö̧rö̧, ji̧nä̧ yo̧mȩtȩ chä̧nö̧ ttörocuähuä pä'ö, ttiäre numero jö̧ta̧'a̧nö̧ pojopö ku̧nä̧cuo̧tö̧ huinätö̧ huȩyu̧huä̧ i̧sa̧ jȩa̧'a̧ Jeiel, ja̧hua̧ta̧nö̧ Maasías su̧ru̧da̧u̧ ttu̧ru̧hua̧'i̧nä̧, ru̧hua̧ u̧mu̧huä̧ya̧ Hananías ttu̧ru̧hua̧ pä'inä huea'anä. ¹² Tä̧do̧tö̧ minä̧ttö̧ curä ruhuä turuhuotömä ji̧na̧'a̧, 2,600nö̧ huotö. ¹³ Su̧ru̧da̧u̧ huettäu̧mä̧, ki̧nä̧tö̧ 307.500nö̧ huotö curä rohuäu juruhuätö ru̧hua̧ abo iyotörö rohuäu icu ppä̧'a̧dä̧ri̧nä̧tö̧. ¹⁴ Uzías su̧ru̧da̧u̧ ttiäre jä̧cuä̧ jo̧mȩnö̧ adittinö..rohuäu ttoecuäbi,dacuodä, ttunä 'ca̧tä̧dä̧cuä̧cuä̧ba, 'ca̧tä̧dä̧cuä̧cuä̧sa̧, ppo'obu, ja̧hua̧ta̧nö̧ inä o'qui icuähuäcuä'inä. ¹⁵ Jerusalén'nämä, ja̧u̧mä̧ aditinö máquinä ocä, huo̧juȩcu̧nä̧ huotö ttaditinö, juttojunä'inä ja̧'hua̧ta̧nö̧ ttoecuäbänä'inä ttö̧jo̧cuä̧cua̧'a̧ pä'ö, ppo'obunä ppottomenä'inä ja̧hua̧ta̧nö̧ ido'quinä tticuähuomenä'inä . Ja̧u̧ jȩö̧mä̧ otó rä̧mi̧pi̧nä̧'a̧ TÖ̧Ä̧NÄ̧HUA̧TÄ̧ ppäda'attö juiyo ju̧ru̧hua̧ ki̧nö̧. ¹⁶ Ja̧'hua̧nö̧ ja̧'a̧nä̧ Uzías ucuo i̧sa̧ juoächomenämä amiso'quinä ucuo teäcuähuätä amucuäda'attö suronotä̧ jȩpi̧nö̧; Ö̧Ä̧NÄ̧HUA̧ Dios öjö'cocomenätä̧ jȩpi̧nö̧, TÖ̧Ä̧NÄ̧HUA̧ ö̧jode jacuä do'ächinö a̧mȩu̧nä̧ 'chopönä ku iyähuä ku iyähuä kä'ca ko̧mȩcu̧. ¹⁷ Sacerdote hua̧ Azarías, ja̧u̧ o'ca'anä 'chinö, ja̧'hua̧ta̧'a̧nö̧ ja̧u̧cu̧mä̧ 'chi̧nä̧tö̧ TÖ̧Ä̧NÄ̧HUA̧ u̧mu̧hu̧äyotö sacerdote juotö'inä, päcuotö u̧mä̧tö̧ juruhuätötä. ¹⁸ Ja'huätömä ruhua Uzías pä'ö kö'cocotö pänätö, ja̧'hua̧nö̧ ja̧'a̧ttö̧ pä̧tti̧nä̧cu̧: "Ucuru mäcö̧ ja̧'a̧, Uzías, TÖ̧Ä̧NÄ̧HUA̧RO̧ a̧mȩu̧ cujuhua pä'ö pätecuächinäcu̧mä̧, Arón i̧tti̧mö̧ sacerdote huotötä ja̧'a̧, a̧mȩu̧ ttujuhua pä'ö pätecuächinätö̧mä̧. Porö ro̧mȩttö̧mä̧ rä'opächi, ucumä jarodocuähuä i̧sa̧jä̧ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ Dios ä'ca jo̧mȩttö̧mä̧ micuähuocöjä. ¹⁹ Ja̧'hua̧nö̧ ja̧'a̧ Uzíasmä ra̧huä̧ri̧pi̧nö̧. Ja̧u̧mä̧ a̧mȩu̧nö̧ 'chopö ujuhua pä'ö ja̧u̧tä̧ jähuä ȩjä̧ba chu̧'ä̧ri̧nö̧, ja̧u̧mä̧ sacerdote päi'önä huotörö amisura'a ja̧'a̧mä̧, TÖ̧Ä̧NÄ̧HUA̧ ö̧jo̧dettö sacerdotetö̧'i̧nä̧ ttä'ca jo̧mȩttö̧ öocuoränä lepra märichei uhuähuächi'inä̧cu̧. ²⁰ Sacerdotetö̧ ttu̧ru̧hua̧ Azarías'i̧nä̧ ja̧'hua̧ta̧nö̧ sacerdotetö̧mä̧ o'catoi'önä topinä̧tö̧, ja̧'hua̧nö̧ tottomenä öocuyoränämä lepra märichei räo'äja'atä ji̧na̧'a̧. Jahuätömä yotäcu juorömä rä'epo'ö tticuinä̧cu̧. Jhua̧nö̧ jȩtti̧pä̧cu̧, chutä'i̧nä̧ jurunä rä'opächinä, juhua'amä TÖ̧Ä̧NÄ̧HUA̧TÄ̧ ja̧u̧rö̧ cuäopo'ächa'attö. ²¹ Ru̧hua̧ Uzíasmä lepra pättö märichei ku̧nä̧ri̧nö̧ 'coru juoächome jubö päi'önä ja̧'hua̧nö̧ jo̧mȩttö̧ otonänö huodenä̧ ki̧nö̧ lepra u̧ju̧nä̧ro̧mȩttö̧, TÖ̧Ä̧NÄ̧HUA̧ ojusodera̧'a̧'i̧nä̧ i̧'chö̧ juiyönä̧tä̧ ji̧nä̧cu̧, i̧tti̧ Jotamtä̧ ji̧na̧'a̧ ruhuo 'chu̧'ä̧ri̧nö̧ ja̧a̧'hua̧nö̧ ja̧'a̧ttö̧ a̧mö̧nä̧ i̧rȩjä̧nä̧ ka̧cuä̧tö̧rö̧tä̧ ruhuonä̧mä̧ hue'inö. ²² Uzías koro jȩi̧nö̧ tö'cömä, ä̧cuo̧mȩnä̧ttö̧ kä̧mä̧dö̧ röji jubö, jȩi̧nö̧mä̧, Amos i̧tti̧ Dios päö huȩnȩ ji'äu Isaías i̧hu̧ȩyu̧ti̧nö̧'tänä huȩyu̧cua̧'a̧ pa̧'a̧. ²³ Ja̧'hua̧nö̧ ja̧'a̧ttö̧ ö̧tä̧mö̧ mi̧nä̧ 'coru juottächinä̧ta'anötä̧ 'corujuo'ächinö; jahuätö 'turu tticuinä̧cu̧ ö̧tä̧mö̧ mi̧nä̧ huattometä̧, ruhuotö huattomettö̧mä̧ tö'cönä̧nö̧, juhua'amä pa̧'a̧nö̧ pätta'attö̧: Ja̧u̧mä̧ lepra märichei ku̧nä̧ri̧nö̧." I̧tti̧ Jotamä jä'o ruhuo hueä'ijome ruhuonä̧ hue'inö.