¹ Joásmä sietenö a̧'ȩ jo̧mȩnä̧ ku̧nä̧ri̧nö̧ ruhuo kä̧mä̧dö̧ hueinömä, ja̧u̧mä̧ Jerusalénämä cuarentanö a̧'ȩ jo̧mȩnä̧ hue'inö, ja̧u̧ ja̧ju̧mä̧ Beserbattö Sibia ttö̧ja̧saju pinäju. ² Joásmä TÖ̧Ä̧NÄ̧HUA̧ to̧ä̧ro̧mȩttö̧mä̧ adiutä jȩpi̧nö̧ sacerdote Joiada ö̧ji̧nö̧ pä̧nä̧mä̧. ³ Joiada, ja̧u̧ru̧mä̧ irecua̧mö̧ ta̧ju̧ru̧ hueinä̧cu̧ ja̧'hua̧nö̧ jo̧mȩttö̧ ja̧u̧mä̧ ö̧mä̧tö̧'i̧nä̧ nä̧tö̧'i̧nä̧ ttä'o jö̧nä̧ huinö. ⁴ Ja̧u̧ ji̧nö̧ o'ca'a cuäoipina'a, Joásmä TÖ̧Ä̧NÄ̧HUA̧ ojusode jareächi'önä pärotö adita pä'ö a̧mö̧cuädi. ⁵ Ja̧u̧mä̧ sacerdote jö̧nä̧ huotärö'i̧nä̧, Levís ahuaruhuä 'cotörö'i̧nä̧ yo̧mȩtȩ ttö̧ca̧ca̧cui̧'ö̧nä̧ jȩpi̧nö̧, ja̧'hua̧nö̧ ttö̧ca̧ca̧cui̧'ä̧ja̧'a̧ jahuätörö pä'inö: "A̧'ȩ jö̧'a̧cuä̧ Judás tti̧rȩjä̧ra̧'a̧ tätucui, Israel ttö̧ja̧ttö̧ pärätä ca̧ca̧tä̧tu̧cui̧, Dios ojusode jareächi'önä taditätucua. Jitätä ja̧'a̧cu̧ kä̧mä̧dö̧ jȩpä̧tu̧cui̧." Pä'ö huäja'anä̧ Levís ahuaruhuä 'cotömä jȩpo̧co̧tö̧ pinätö̧. ⁶ Ja̧'hua̧nö̧ ji̧yä̧cu̧ ru̧hua̧mä̧ huopinö Joiadarö sacerdote huotö ttu̧ru̧hua̧rö̧, päinäcu̧: "¿Tta̧'a̧nö̧ pä'ö huecoca'ajä̧ttö̧ cumuhuäyotörö Levi ttö̧ja̧rö̧ Judára̧'a̧ttö̧ ja̧'hua̧ta̧'a̧nö̧ jerusalera̧'a̧ttö̧'i̧nä̧ tti'chächa pärätä Moisés TÖ̧Ä̧NÄ̧HUA̧ u̧mu̧huä̧ya̧ hueinöi̧ji̧nö̧ Israél ttö̧ja̧ ji̧nä̧ yo̧mȩtä̧ pä'i'ö ru̧hua̧rö̧ ti̧mi̧ta pä'ö pättinö̧ji̧nö̧mä̧, TÖ̧Ä̧NÄ̧HUA̧ Dios esecuinodenämä?" ⁷ Ja̧'hua̧nö̧ ja̧'a̧nä̧ Atalia ki̧tti̧mö̧mä̧, ja'huäju jarodäcuähuä isaju ji̧na̧'a̧, Dios ö̧jode jacuä ko̧cu̧ surojuo'epinäju̧mä̧, TÖ̧Ä̧NÄ̧HUA̧ iäre ro̧ö̧ juäi yapare ttö̧ä̧nä̧huo̧tö̧ Baalesrö iyä'chö icuinäju̧mä̧. ⁸ Ja̧'hua̧nö̧ ji̧yä̧cu̧ ru̧hua̧mä̧ hue'inö, cofrettö ttadita pä'ö ja̧'hua̧nö̧ aditö ku̧ni̧nä̧tö̧ TÖ̧Ä̧NÄ̧HUA̧ ö̧jode doächäcuähuome'ittö'inä u̧mi̧nä̧. ⁹ Ja̧'hua̧nö̧ jȩpö̧ ku̧nu̧ huopinätö̧ Judá ttö̧ja̧rö̧'i̧nä̧ ja̧'hua̧ta̧'a̧nö̧ Jerusalén ttö̧ja̧rö̧'i̧nä̧ TÖ̧Ä̧NÄ̧HUA̧RÖ̧ ttö̧jö̧ micuä ttiya pä'ö pätecuächinö tti'chächa pä'ö Moisés Dios u̧mu̧huä̧ya̧ päinöji̧nö̧ Israélra̧'a̧ttö̧ de'a jui̧yä̧jä̧ra̧'a̧ ö̧ji̧nö̧. ¹⁰ O'catoi'önä tturuhuotömä ja̧'hua̧ta̧'a̧nö̧ ötahuiyä ttö̧ja̧ o'catoi'önä pärätä ca̧ca̧ti̧nä̧tö̧ i'chächinätö̧ ja̧'hua̧nö̧ i'chächö rötinätö̧ cofrenä juȩnȩ'i̧nä̧ suädi'ome jubu cä'ädö. ¹¹ Pi̧yȩmä̧ pa̧'a̧nö̧ 'cuäopina̧'a̧ Leví ahuaruhuämä̧ ru̧hua̧ u̧mö̧huäyotörö pö̧rö̧'chä̧ca̧ i'cächö iyinä̧tö̧ ja̧'hua̧nö̧ tti̧'cächomenä pärätä juo̧ca̧nä̧ ȩca̧'a̧ topömä 'cuäopönä̧tä̧, ru̧hua̧ tti̧huȩyu̧tu̧nä̧ huȩä̧u̧'i̧nä̧, sacerdotetö̧ ttuhuotö'i̧nä̧ i̧so̧ca̧ ȩcö̧mä̧ ȩmö̧ icui'änätö̧ ja̧'hua̧nö̧ ȩmö̧ icumä ko̧mȩtä̧ röti'änä̧ö̧. Pi̧yȩmä̧ jahuätömä 'cuäopönä̧ mo̧ro̧tä̧ jȩpi̧nä̧tö̧ pärätämä juiyo rö̧ä̧chö̧nä̧tä̧ päi'önä. ¹² Ru̧hua̧'i̧nä̧ ja̧'hua̧ta̧nö̧ sacerdote'i̧nä̧ pärätämä̧ iyinätö jitö TÖ̧Ä̧NÄ̧HUA̧ ö̧jode aditätörö. Pitö u̧mä̧tö̧mä̧ isode adicuä ttö̧ja̧rö̧'i̧nä̧, ja̧'hua̧ta̧nö̧ TÖ̧Ä̧NÄ̧HUA̧ ö̧jo̧de dauttö adicuä ttö̧ja̧rö̧ ttaditö micuämä mitinä̧tö̧ ja̧'hua̧ta̧nö̧ cuoräuttö juhua'atäcu broncettö aditätörö'i̧nä̧. ¹³ Ja̧'hua̧nö̧ ja̧'a̧ttö̧ adicuä ttö̧ja̧mä̧ aditinä̧tö̧ ttaditähuämä, ja̧'hua̧nö̧ jareächi'önä ttaditömä yabonö 'chi̧na̧'a̧; jahuätömä Dios o̧jode äräbe'inä̧tö̧ pa̧'a̧nö̧ jä̧cuode pättinöta'anö ja̧'hua̧ta̧nö̧ 'quiyönä kö̧nä̧. ¹⁴ Juode cättädomenä, o'ca'a ka̧cui̧pä̧ji̧mä̧, ru̧hua̧'i̧nä̧ ja̧'hua̧ta̧nö̧ Joiada ö̧ja̧'a̧cu̧ i'cächinä̧tö̧. Ja̧u̧ pärätänä̧mä̧ TÖ̧Ä̧NÄ̧HUA̧ ö̧jo̧de jacuättö tta̧di̧tä̧cuȩ aditinä̧tö̧, ja̧u̧nä̧mä̧ i̧sa̧rö̧ ttujuhuomenä ja̧'hua̧ta̧nö̧ mippounä̧ ttöäre iyähuä ttiyomenä̧ tta̧di̧tä̧cuȩ ji̧nö̧mä̧ huȩ'chä̧qui̧yä̧ ji̧na̧'a̧ ja̧'hua̧ta̧nö̧ aditinä̧tö̧ orottö juhua'atäcu platattö'i̧nä̧ adicuina'a. Jahuätömä̧ TÖ̧Ä̧NÄ̧HUA̧ ö̧jodettömä̧ mi̧pponä iyähuä ttöäre ku icu iyähuämä mo̧ro̧ji̧nö̧'a̧cuä̧ iyinä̧tö̧, Joiada ö̧ji̧nö̧ pä̧nä̧mä̧. ¹⁵ Joiadamä böecuächinö ja̧'hua̧ta̧nö̧ ö̧ja̧ päinö mo̧ro̧ jo̧mȩnö̧tä̧ päi'önä, ja̧'hua̧nö̧ ö̧ja̧'a̧; ja̧u̧ öcorujuoächinö pä̧nä̧mä̧ 130nö̧ a̧'ȩ jo̧mȩnä̧ ku̧nä̧ri̧nö̧. ¹⁶ Ja̧u̧mä̧ David idepiyöttö ruhuotö ttö̧cä̧tȩ jo̧mȩ 'turu tticuinä̧cu̧, juhua'amä Israel ttö̧ja̧rö̧ adihuomenä Dioscu adiu ttö̧jö̧nä̧ jȩi̧no̧mȩttö̧ ja̧'hua̧ta̧nö̧ Diosrö ucuocuäcuähuodettö'i̧nä̧. ¹⁷ Ja̧'hua̧nö̧ ja̧'a̧ Joiada 'corujuoächinö o'ca'a, Juda ttö̧ja̧ tturuhuotömä ichäjä'cotö ru̧hua̧rö̧ ucuo iyinä̧tö̧. Ja̧'hua̧nö̧ jȩpö̧ jittäumä ä̧ju̧cui̧nä̧u̧. ¹⁸ Jahuätömä ttö̧tä̧mö̧ mi̧nä̧ TÖ̧Ä̧NÄ̧HUA̧ Dios ojusodettömä ucuo juiyönä jȩpi̧nä̧tö̧ ja̧'hua̧nö̧ jȩpö̧ ttö̧ä̧nä̧hua̧ju aserarötä juhua'atäcu tätähuä o'catä ucuo te'ähuinä̧tö̧. Dios ö̧'ä̧i̧mä̧ rȩbȩhui̧na̧'a̧ Juda ttö̧ja̧rö̧'i̧nä̧, Jerusalén ttö̧ja̧rö̧'i̧nä̧ ja̧u̧ surojö jȩtto̧mȩttö̧. ¹⁹ Ja̧'hua̧nö̧ jȩtta̧'a̧nä̧'i̧nä̧ Ja̧u̧mä̧ chutä i̧huȩnȩ jiäcuähuä ttö̧ja̧rö̧ hue'inö Dioscu ppa̧ttä̧chi̧ya̧rö̧ pä'ö; Dios ucuocu jiäcuähuä ttö̧ja̧mä̧ ttö̧ja̧rö̧ 'cuä̧i̧pä̧cuȩmä̧ ji'ähuinä̧tö̧, ja̧hua̧nö̧ jittähua'anä̧ ttä̧ju̧cua̧mä̧ pä'ocotö pinä̧tö̧. ²⁰ Dios a̧'cua̧ru̧hua̧ ichinö Zacaríanä profeta Joiada i̧tti̧rö̧; Zacarías ä̧rä̧mi̧'ö̧ ötahuiyä ttö̧ja̧rö̧ päi'nö: ''Dios pa'anö pä'ö: ¿Tocu pä'ö TTÖ huedinöjinö jȩ'cuä̧tu̧cuo̧ca̧'a̧jä̧ttö̧, ucuturutä pä̧cuä̧rö̧jo̧mȩnä̧tä̧ jȩpä̧tö̧jä̧ surojömä? ja̧'hua̧nö̧ ja̧'a̧ttö̧ ucutumä TTÖRÖMÄ u̧ni̧chi̧'i̧nä̧tö̧jä̧, jitämä TTÖ'INÄ ucuturumä unichi̧ö̧sä̧ ²¹ pä'ö.''Ja̧'hua̧nö̧ pä̧'u̧ jahuätömä suronä pä'ötä ucuocuinä̧tö̧ ru̧hua̧ hueähuänä, ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ öjode kä'co päte'ö isarättö ido'quinä icuäu tticuinä̧cu̧. ²² Pa̧'a̧nö̧ jȩpö̧ ,ru̧hua̧ Joámä unichi̧'i̧nö̧ ucuotäcuähuäji̧nö̧mä̧ Zacarías jä'ö Joiada jȩi̧nö̧ji̧nö̧mä̧. Pi̧yȩ jȩö̧'a̧nö̧ ja̧'a̧nö̧, ja̧u̧mä̧ cuä'ötä icuinö Joida i̧tti̧rö̧mä̧. Zacarías 'corupäiö kä̧nö̧ päinö: ''TÖ̧Ä̧NÄ̧HUA̧TÄ̧ to̧ä̧cua̧ pi̧yȩmä̧ ja̧'hua̧nö̧ ja̧'a̧ttö̧ ja̧u̧tä̧ huo̧ä̧cua̧jä̧ .'' ²³ Duo beipomecu̧ 'cuäopina̧'a̧ Arameo su̧ru̧da̧u̧ chi̧nä̧tö̧ Joas umuhuäyotörö rohuäu icu. Jahuätömä ichinä̧tö̧ Judá'ra'acu'inä ja̧'hua̧ta̧nö̧ Jerusalén'ra̧'i̧nä̧; jahuätömä ötahuiyättö turuhuotö o'catoinärö cuä'ö icuinä̧tö̧ ja̧'hua̧nö̧ cuäö icu jahuätö ttiäre rö̧ä̧ö̧nä̧ micuäu juäimä ȩmi̧pö̧ hueö'icuinä̧tö̧ tu̧ru̧hua̧ ru̧hua̧rö̧ Damascora'acu. ²⁴ Arameos su̧ru̧da̧u̧mä̧ a̧u̧cu̧nä̧tä̧ ichinä̧tö̧ ji̧nä̧'a̧, ja̧hua̧nö̧ ja̧'a̧nä̧ TÖ̧Ä̧NÄ̧HUA̧TÄ̧ recuätörö su̧ru̧da̧u̧rö̧ iso juottepönä̧ ppädinä̧u̧, juä'amä Judá ja̧do̧tö̧ minäTÖ̧Ä̧NÄ̧HUA̧RÖ̧ Diosrö jaroinä'a̧ttö̧ . Pa̧'a̧nö̧ jȩpö̧tä̧ Arameomä Joárö ro̧ȩcuä̧ ȩmu̧nä̧ jȩpi̧nä̧tö̧. ²⁵ Arameos tti̧hui̧nö̧ pä̧nä̧, Joasrö rö̧ä̧nä̧ usurä ȩma̧u̧nä̧ ta'ä icuinä̧tö̧. Chutä a̧mö̧nä̧ pa̧ja̧tö̧ u̧mö̧huäyotö ji̧na̧'a̧ ja̧u̧rö̧ micuä a̧mö̧cuädinä̧tö̧mä̧ sacerdote Joiadas i̧tti̧mö̧rö̧ cuä'ö icuinöta'anö. Ä̧'ä̧ma̧nö̧ ö̧'a̧'a̧ cuä'ö tticuäcu 'coru pä'i'inö; ja̧u̧ru̧mä̧ 'turu icuinä̧tö̧ David idepiyönä,, ja̧'hua̧nö̧ ja̧'a̧nä̧ ruhuotö huattomemäcö̧. ²⁶ Pitö ji̧na̧'a̧ ja̧u̧rö̧ cuä'ö icuinä̧tö̧mä: Amon ttö̧ja̧sa̧ Simeat i̧tti̧ Zabat ja̧'hua̧ta̧nö̧ Moab ttö̧ja̧sa̧ Simrit i̧tti̧ Jozabad jö̧nä̧. ²⁷ Ja̧'hua̧nö̧ ja̧'a̧ ja̧u̧ i̧tti̧mö̧ jȩtti̧nö̧mä̧, ja̧u̧rö̧ 'cuä̧o̧pä̧cuȩ tö'cö rö̧ä̧nä̧ jö̧ ttucuocuinö̧mä̧ ja̧'hua̧ta̧nö̧ Dios ö̧jo̧de adicuäcua'a jittähuinö'i̧nä̧ ruhuotö ttucuocuinö huȩyu̧cuä'tänä huȩyu̧cua̧'a̧ pa̧'a̧. Ruhuo hueinö o'comemä i̧tti̧ Amasíastä pä̧mä̧di̧nö̧.