¹ Ji̧mu̧tȩ huäba'acuä a̧'ȩ päi'omenä, Joiada ujuru i̧jȩpi̧nö̧ ja̧'hua̧nö̧ jȩpö̧ esecuinö tturuhuotö juȩnȩ ko̧cuä̧tö̧rö̧: Jeroham i̧tti̧ Azaríasrö'inä, Johanán i̧tti̧ Ismaélrö'inä, Obed i̧tti̧ Azariarö'inä, Adia i̧tti̧ Maasíasrö'inä ja̧'hua̧ta̧'a̧nö̧ Zicri i̧tti̧ Eliasafat-rö'inä. ² Ja'huätömä dodepinätö̧ Juda rȩjȩra̧'a̧ ja̧'hua̧nö̧ dodepö ji̧nä̧ yo̧mȩtȩ pä'i'ö ucuocuinätö̧ Levi ttö̧ja̧cu̧ o'catoi'önä Judá rȩjȩ ötahuiyänä ko̧cuä̧tu̧cu̧, ja̧'hua̧ta̧'a̧nö̧ Israélttö ruhuo hue'inätö̧ ttahuaruhuä 'cotörö'inä, ja̧'hua̧nö̧tä̧ ichinätö̧ Jerusalenra̧'a̧cu̧. ³ O'catoi'önä ji̧nä̧ yo̧mȩtȩ pä'i'ätömä esecuinätö̧ Dios ö̧jo̧dȩ ru̧hua̧cu̧. Joiada pä̧i̧nä̧u̧: "topätucui, ru̧hua̧ i̧tti̧mä̧ ruhuo hue'ö ö̧jä̧cua̧, TÖ̧Ä̧NA̧HUA̧ päinöta'anö David ahuaruhuättötä jä̧cua̧'a̧. ⁴ Pa̧'a̧nö̧ jȩcu̧'ä̧tu̧cua̧ja̧: huäba'acuä jo̧mȩnö̧ kä̧'chȩcui̧nä̧tö̧ sacerdote huotömä ja̧'hua̧ta̧'a̧nö̧ Levi ttö̧ja̧ sabado mo̧ro̧ ttö̧ä̧nä̧hui̧a̧rö̧ ucuo te'öu ichätö'inä, ja'huätömä apatä ä'ca tta̧ttä̧rä̧cuo̧tö̧. ⁵ Korotö 'cä̧'ȩcuo̧tö̧mä̧ ru̧hua̧ ojusode tta̧ttä̧rä̧cuo̧tö̧, ja̧'hua̧ta̧'a̧nö̧ korotö 'cä̧'ȩcuo̧tö̧mä̧ yodetä ucuo isode kada'ca tta̧ttä̧rä̧cuo̧tö̧. O'catoi'önä ötahuiyä ttö̧ja̧mä̧ ttö̧jä̧cuo̧tö̧ TÖ̧Ä̧NÄ̧HUA̧ ojusode u̧mu̧ isaränä. ⁶ TÖ̧Ä̧NÄ̧HUA̧ ojusodenä̧mä̧ ya̧tȩ'i̧nä̧ doächa pä'ömä̧ huecuä, Sacedotestö̧tä̧ ja̧'hua̧ta̧nö̧ leví ahuaruhuä ppä̧'ä̧dä̧rö̧ aditätötä jä̧cua̧'a̧ dottächäcuotömä. Juätömä dodettäcuotömä̧ jua'amä̧ 'cä̧'ȩpu̧ ku̧nä̧huo̧tö̧ tta'attö̧, Ja̧'hua̧nö̧ ja̧'a̧nä̧ o'catoi'önä̧tä̧ korotömä ttöcuota pä'ötä jaä̧cua̧'a̧ TÖ̧Ä̧NÄ̧HUA̧TTÖ̧ hueähuä huȩnȩmä̧. ⁷ Leví ahuaruhuämä̧ ru̧hua̧ ö̧jo̧mȩ jäyänä̧ ttoecuächunä̧ o'cajuiyötä ttö̧jä̧cuo̧tö̧, ya̧u̧cu̧ pu̧nä̧ ttu̧mö̧nä̧mä̧ curä rohuähuäcuähuä 'chu̧huä̧rä̧nö̧tä̧. Ya̧tȩ juodenä̧ do'ächörömä̧, cuä'ö tticua'anä̧ ja̧'a̧tä̧ topirö. Juȩnȩtä̧ ka̧cuä̧tu̧cui̧ ru̧hua̧ doächa'anä̧'i̧nä̧ ja̧'hua̧ta̧nö̧ räopomenä̧'i̧nä̧.'' ⁸ Ja̧'hua̧nö̧ ja̧'a̧ Leví ahuaruhuä'i̧nä̧ Judás ahuaruhuä'i̧nä̧ o'catoi'önä̧ ppä̧'ä̧dä̧rö̧ adinätö̧ sacerdote Joiada hueina'a̧cuä̧tä̧. U̧mä̧tö̧ ya̧cu̧ pu̧nä̧rö̧ o'ipächö, 'chi̧nö̧ jitö Sábado mo̧ro̧ do'ächi'ö ttaditäcuotörö, juhua'amä sacerdote Joiadasmä ucutumä̧ 'cä̧'ȩcuä̧chä̧jä̧tö̧jä̧ päoca'attö. ⁹ Ja̧u̧nö̧ o'ca'a sacerdote Joiadamä̧ su̧ro̧do̧u̧ tturuhuotö o'ipinö dacuodä'i̧nä̧ ttoecuäcuähuäbi ppo̧u̧'inä̧ ja̧'hua̧ta̧nö̧ bäreö'inä ru̧hua̧ David ö̧ji̧nö̧ pä̧nä̧ Dios ojusode ka̧cui̧nö̧mä̧. ¹⁰ Joiadamä su̧ro̧da̧u̧rö̧mä̧ o'catoi'önä̧rö̧tä̧ ku̧ni̧nö̧, yotucunä̧rö̧mä̧ ttucupä ttu̧mö̧nä̧ 'chu̧'ä̧ri̧nä̧tö̧, ttu̧huo̧jua̧'a̧cu̧nä̧ i̧sä̧mö̧mä̧, i̧sa̧rö̧ ku icu Dios ojusodettömä ttö'ohuecu'i̧nä̧ ttu̧huo̧jua̧'a̧cu̧nä̧'i̧nä̧ ku̧u icu iyähuome'i̧nä̧, ja̧'hua̧ta̧nö̧ Diosrö ucuocuäcuähuode'i̧nä̧, ru̧hua̧ ippeyänä o'cajuiyötä. ¹¹ Ja̧'hua̧nö̧ ja̧'a̧ jahuätömä ru̧hua̧ i̧tti̧rö̧ i'cächö̧mä̧ ja̧u̧ pöttähuä huȩni̧nä̧tö̧ ja̧'hua̧ta̧nö̧ esecu ttucuocuäji'i̧nä̧ ttiyinä̧cu̧, Ja̧'hua̧nö̧ ja̧'a̧ jahuätömä ru̧hua̧ jö̧nä̧ huȩni̧nä̧tö̧ ja̧u̧ jȩpä̧tö̧mä̧ Joiadas'i̧nä̧ jihua'atäcu i̧tti̧mö̧rö̧'i̧nä̧ pojopö tti̧ju̧ni̧nä̧u̧. Ja̧'hua̧nö̧ ja̧'a̧ jahuätömä pä'inä̧tö̧: "Ru̧hua̧mä̧ recuo mo̧ro̧ ö̧ja̧jä̧." ¹² Atalia ttö̧ja̧ jopö kä̧nö̧ ru̧hua̧rö̧ ttesehua'a rä̧mi̧pa̧'a̧ ä̧ju̧cu̧mä̧, ötahuiyänä huode TÖ̧Ä̧NÄ̧HUA̧ ojudecu ichinä̧ju̧. ¹³ Ja̧'hua̧nö̧ ja̧'a̧ juajumä topinä̧ju̧ ja̧'hua̧nö̧ topö, ru̧hua̧mä̧ doächi'äcuähuome ka̧cu̧ o'ca ppeyä ö̧ja̧'a̧ adiunä̧nö̧ topinäju, ja̧'hua̧ta̧nö̧ su̧ro̧da̧u̧ tturuhuotö'i̧nä̧ trompeta ppu'ätö'i̧nä̧ ru̧hua̧ i̧ppȩyä̧nä̧ ka̧cui̧nä̧tö̧ . Ttö̧ja̧ ja̧huä̧jä̧nä̧ ka̧cuä̧tö̧ o'catoi'önä̧ esehuätömä ja̧'hua̧ta̧nö̧ trompeta ppu'ätö'i̧nä̧ juhua'atäcu 'porö ra̧huä̧huä̧ ttö̧ja̧'i̧nä̧ ja̧'hua̧ta̧nö̧ rä̧'ö̧ o'ipätö'i̧nä̧. Ja̧hua̧nö̧ ja̧'a̧ Ataliamä ki̧ä̧rȩta̧ sȩro̧cu̧nö̧ huopi'inäju: ¡Suronä jȩpä̧jä̧tö̧jä̧! ¡Suronä jȩpä̧jä̧tö̧jä̧! ¹⁴ Ja̧'hua̧nö̧ ja̧'a̧ sacerdote hua̧ Joiadamä hueinö su̧ru̧da̧u̧ tturuhotö huotö cien abonä̧nö̧ hueö kä̧tö̧rö̧ päi'nö: ''I'cächätujuiju i̧sä̧mä̧nä̧ kä̧ttö̧ttö̧ jahuäjuru ru̧ä̧rä̧tö̧rö̧'i̧nä̧, curächunä cuä'ö cuihuätucua. ''ja̧'hua̧nö̧ ja̧'a̧nä̧ sacerdote päi'nö: ''TÖ̧Ä̧NÄ̧HUA̧ ojusodetömä cuä'ö cuihuätucuä.'' ¹⁵ Ja̧'hua̧nö̧ ja̧'a̧ttö̧ jahuätö jahuäju ku̧mä̧nä̧ ja̧ pä'ö jȩpi̧nä̧tö̧ Cabayutu ttapatenä räopö ki̧cha̧ pä̧'ö̧ ru̧hua̧ ojusodera'acu, ja̧'hua̧nö̧ ja̧'a̧ttö̧ juorötä cuä'ö tticuinä̧cua̧. ¹⁶ Ja̧'hua̧nö̧ ja̧'a̧ Joiada esecuinö ja̧u̧cu̧'i̧nä̧ ja̧'a̧nä ötahuiyä ttö̧ja̧ o'catoinäcu̧ ru̧hua̧cu̧mä̧, jahuätömä TÖ̧Ä̧NÄ̧HUA̧ umuhuäyotö ttäcuotö pinätö̧. ¹⁷ Ja̧'hua̧nö̧ jȩpö̧ o'toinä 'chi̧nä̧tö̧ Baal kojusodera'a pparö icuinä̧tö̧. Jahuätömä Baalrö ucuo tettähuäiyä'ca'inä ja̧'hua̧ta̧nö̧ ttä̧u̧cuä̧ o'ca'inä pparö icuinä̧tö̧ ja̧'hua̧ta̧nö̧ jahuätömä cuä'ö icuinä̧tö̧ Matán'rö̧'i̧nä̧ Baalttö sacerdote cua̧rö̧, ucuo tteu jȩttä̧'i̧jo̧mȩ ä'cattö. ¹⁸ Joiada su̧ro̧do̧u̧ tturuhuotörö hue'ö ku̧ni̧nö̧ TÖ̧Ä̧NÄ̧HUA̧ ö̧jodenä sacerdote huotö to̧ttä̧ra̧'a̧nä̧, jahuätömä Levi ahuaruhuä o'cotötä ji̧na̧'a̧, David huȩi̧nä̧u̧tä̧ TÖ̧Ä̧NÄ̧HUA̧ ö̧jode tta̧ttä̧rä̧ pä'ö, TÖ̧Ä̧NÄ̧HUA̧RÖ̧ ttiäre ku iyähuä ttiya pä'ö, Moisés ö̧ji̧nö̧ pä̧nä̧ hueähuä huȩnȩ pä'öta'anö, ja̧'hua̧nö̧ jö̧ ta̧'a̧nö̧ eseu ra̧'ö̧nö̧, David hueipinöta'anö. ¹⁹ Joiada hue'inö su̧ro̧do̧u̧ru̧ TÖ̧Ä̧NÄ̧HUA̧ ö̧jode apate ä'ca tta̧ttä̧ra̧ pä'ö, ya̧tȩ'i̧nä̧ surojö surujö ku̧nä̧rö̧mä̧ 'cuäopö juiya pä'ö. ²⁰ Joiadae ȩpi̧nö̧ 'chi̧nö̧ su̧o̧ro̧do̧u̧ tturuhuotörö'inä, Ucuounä ko̧cuä̧tö̧rö̧'i̧nä̧, ötahuiyänä hue'ätörö'inä ja̧'hua̧ta̧'a̧nö̧ o'catoi'önärö ja̧'huä̧jä̧ rȩjȩnä̧ ko̧cuä̧tö̧rö̧'i̧nä̧. Ru̧hua̧rö̧'i̧nä̧ mȩyȩdi̧nö̧ TÖ̧Ä̧NÄ̧HUA̧ öjodecu; ötahuiyä ttö̧ja̧mä̧ ichinätö̧ ru̧hua̧ apate ju'toju isatenä pä'i'ö ja̧'hua̧nö̧ jȩpö̧ ruhuo deäcänä cä'epö ttu̧huä̧ni̧nä̧cu̧. ²¹ Ja̧'hua̧nö̧ ja̧'a̧ttö̧ o'catoi'önä huä̧jä̧ rȩjȩnä̧ ko̧cuä̧tö̧mä̧ esehuinätö, ja̧'hua̧nö̧ jȩtto̧mȩnä̧ ötahuiyä o'cajuiyönä jä̧rö̧nä̧ kä̧mä̧di̧na̧'a̧. Ja̧'hua̧nö̧ ja̧'a̧nä̧ Ataliamä, jitötä curä'chunä cua'ö tticuä'atä ji̧na̧'a̧.