¹ Ja̧hua̧nö̧ ja̧'a̧ pi̧yȩ cuäopäji'Oca'amä̧, Moab ttö̧ja̧mä̧ Amón'i̧nä̧, yotucunä̧tä̧ meunitas'inä̧ chi̧nä̧tö̧ Josafatrö rocuäömä̧. ² Ja̧hua̧nö̧ ja̧'a̧ yotucunä̧ Josafatcu chi̧nä̧tö̧, juätömä̧ päinä̧tö̧: ''tto̧ja̧ recuätö ichätö ucuru rohuäu 'caruhuäbu aje yabonä̧bu̧ päi'önä̧, Edom'i̧nä̧. topi, juätömä̧ ka̧cuä̧tö̧ Hazezon Tamar'rö'' pi̧yȩmä̧, Gadirä̧tö̧ ji̧na'a̧. ³ Josafatmä̧ yeecueömä̧ TÖ̧Ä̧NÄ̧HUA̧RÖ̧ tösa pä'ö hueinö̧. Ja̧u̧mä̧ jaepinö̧ Judá ttö̧ja̧ o'catoiönä̧ tu̧huȩ'inä̧ a̧do̧chiö̧ jȩ'ta̧ pä'ö jȩpi̧nö̧. Judá ⁴ ttö̧ja̧ O'ca toi'önä̧ ka̧'ca̧cu̧ pä̧mä̧di̧nä̧tö̧ TÖ̧Ä̧NÄ̧HUA̧RÖ̧ tösa pä'ö, Juätömä̧ ichinä̧tö̧ TÖ̧Ä̧NÄ̧HUA̧RÖ̧ usu O'catoiönä̧ Judá Ötahuiyätto̧ Ca̧mä̧dö̧. ⁵ Josafatmä Judá ttö̧ja̧'i̧nä̧ Jerusalén ttö̧ja̧'i̧nä̧ ttä'ca jo̧mȩ ä̧rä̧mi̧'ä̧ji̧'ca̧ ki̧nö̧, TÖ̧Ä̧NÄ̧HUA̧ ojusodettömä pä̧tȩcuä̧nö̧ isarä jarearänä̧. ⁶ Ja̧u̧mä̧ pä'inö: TÖ̧Ä̧NÄ̧HUA̧ tö̧tä̧mö̧ mi̧nä̧ ttö̧ä̧nä̧hua̧mä̧, ¿Ja̧u̧mä̧ mo̧ro̧jä̧'i̧nä̧ ö̧ä̧nä̧hua̧ Diosmä̧cö̧? ¿Ja̧u̧mä̧ pi̧jä̧nä̧ ruhuo hue'ätö o'catoi'önä ttu̧ru̧hua̧mä̧cö̧? Ttujuru'i̧nä̧ ttö̧rö̧ä̧'i̧nä̧ ucu cu̧mö̧nä̧nä̧tä̧ ka̧'a̧, ja̧'hua̧nö̧ jo̧mȩttö̧ ya̧tȩ ucurumä ami'qui'ö juiyönä jä̧cua̧jä̧. ⁷ Ttu̧ru̧hua̧ Dios, ¿ucumä pi̧jä̧ rȩjȩnä̧ ka̧cuä̧tö̧rö̧mä̧ Israel ttö̧ja̧ ttä'ca jo̧mȩttö̧ rä'epö icuocö pinö̧jä̧, ja̧'hua̧ta̧nö̧ Abraham i̧tti̧mö̧rö̧ 'cuäopönä̧tä̧ ttö̧jö̧nä̧mä̧ iyocö pinöjä̧? ⁸ Juätömä ja̧huä̧jä̧nä̧ ka̧cui̧nä̧tö̧ ja̧'hua̧ta̧nö̧ juä̧nȩtä̧ cui̧mi̧ kä̧cuo̧mȩ'i̧nä̧ aditinä̧tö̧ pa̧'a̧nö̧ pä'önö: ⁹ Surojö'i̧nä̧, curä'i̧nä̧ ro̧ȩcuä̧'i̧nä̧, märicheicö̧, ppäicö̧ ujuturu rȩbȩö̧ttö̧mä̧, ujutumä pode ä'ca jo̧mȩ ä̧rä̧mi̧'ö̧ tö̧ja̧cuä̧mä̧cuo̧tö̧jä̧ ja̧'hua̧ta̧nö̧ Ucu cuä'ca jo̧mȩ'i̧nä̧ (Cui̧mi̧mä̧ podenä̧tä̧ ka̧'a̧ttö̧) ja̧'hua̧nö̧ ja̧'a̧ttö̧ tta̧'cua̧ ttä̧tȩcu̧nä̧mä̧ ucuru ajaunö huotäcuotöjä ja̧'hua̧nö̧ huotomenä Ucumä ä̧ju̧cu̧ rä̧huä̧pi̧jö̧ttö̧mä̧ tö̧ji̧pö̧nä̧ ppä̧cuä̧dä̧cua̧jä̧. ¹⁰ Jitämä topi, pi̧yȩ ja̧'a̧ Amón'inä, Moab'inä ja̧'hua̧ta̧'a̧nö̧ de'a Seir'inä ötahuiyämä, ucutä ji̧na̧'a̧ Israél ttä̧ja̧ tti̧rȩja̧ 'chottipöjuiyönä ppä'ädinömä Egiptora̧'a̧ttö̧ ttichomenä; ja̧'hua̧nö̧ jo̧ca̧'a̧, Isráel ttö̧ja̧mä̧ jahuätörömä cuä'ö tticuoca'a ja̧'a̧tä̧ topinätö. ¹¹ Topi ja'huätö jitämä i̧mi̧cu̧nä̧tä̧ jȩtta̧'a̧; Ja'huätömä ujuturu cui̧rȩjä̧ttö̧ rä'epö tticua pä'ö pocutä ichätö, cu̧jä̧cu̧cua̧ja̧ pä'ö cuiyinäjänä. ¹² TÖ̧Ä̧NÄ̧HUA̧MÄ, ¿ro̧ȩpö̧ juiyö'anö ja̧'a̧? ujutumä jȩtö̧ jui̧yö̧'a̧nö̧ huotöjä pitö su̧ro̧do̧u̧ juiyo recuätö ja̧'a̧ ujturu ichätömä. Ujutumä jerupätöjä jȩta̧ pä̧'ö̧mä̧, ja̧'hu̧a̧nö̧ ja̧'a̧nö̧ ujutumä ucurutä to̧pä̧rä̧tö̧jä̧." ¹³ O'catoi'önä Judá tö̧ja̧mä̧ TÖ̧Ä̧NÄ̧HUA̧ ä'cajome ko̧cui̧nä̧tö̧, ppo̧'ä̧tö̧'i̧nä̧, ttä̧mö̧'i̧nä̧ tti̧tti̧mu̧cu̧. ¹⁴ Ttö̧ja̧ ttö̧'cä̧tȩ jo̧mȩttö̧, TÖ̧Ä̧NÄ̧HUA̧ a̧'cua̧ru̧hua̧ ichi'ö kä̧mä̧di̧nö̧, Zacarías i̧tti̧ Jahazielrö, Jeiel i̧tti̧ Benaíatä ö̧do̧rö̧, ttä̧do̧ mi̧nä̧mä̧ Leví a̧hua̧ru̧hua̧ Matanías ji̧na̧'a̧, Asaf i̧tti̧mö̧ 'cotöttö ya̧tȩ ji̧na̧'a̧ ja̧u̧mä̧. ¹⁵ Jehazielmä̧ pä'inö: Ä̧ju̧cuä̧tu̧cui̧, Judá ttö̧ja̧ o'catoi'önä̧ ja̧'hua̧ta̧nö̧ Jerusalén ttö̧ja̧'i̧nä̧ juhua'atäcu ru̧hua̧ Josafat'i̧nä̧. Pi̧yȩ ja̧'a̧ TÖ̧Ä̧NÄ̧HUA̧ ucuturu pä'ömä: Yecuecuätucuä; cuijiyuhuä chi'ätucuä su̧ro̧da̧u̧ rö̧ä̧nä̧ recuätörömä, pi̧yȩ curä rohuäcuähuämä ucutunä̧tä̧ ko̧ca̧'a̧, ja̧u̧ ja̧ jueimä Diosnä̧tä̧ ka̧'a̧. ¹⁶ Ucutumä yo̧ȩi̧ mo̧ro̧ jahuätucu curohuähuäcuotöjä. Topätucui, jahuätömä Sisnä 'chä̧cuä̧huo̧mȩnä̧ 'cha'achätö. Ucutumä cu̧'o̧cui̧'ä̧cuo̧tö̧ pämproppä päi'ome beipomettö̧ de'a jui̧yä̧jä̧ Jeruel ä'canänöttö̧. ¹⁷ Ucutu curä curohuähuätucua pä'ömä recuä rö̧jo̧ca̧'a̧ jä̧cua̧'a̧. Cu̧ja̧cuä̧tu̧cuä̧ päi'önä jo̧mȩtä̧ tto̧ȩcuä̧nä̧ cu̧ja̧cuä̧tu̧cua̧ja̧ ja̧'hua̧nö̧ jo̧mȩnä̧ TÖ̧Ä̧NÄ̧HUA̧ ucuturu'i̧nä̧, Judá ttö̧ja̧rö̧'i̧nä̧, Jerusalén ttö̧ja̧rö̧ ppädömä to'cuäcuotöjä. Yecuecuätucuä, cuijiyuhuächi'ätucuä. Jahuätucu rohuäu cui̧chä̧tu̧cua̧ja̧, juhua'amä TÖ̧Ä̧NÄ̧HUA̧TÄ̧ ucutucumä ö̧ja̧'a̧ttö̧. ¹⁸ Josafatmä̧ U rȩjȩcu̧ ja̧rȩyu̧nu̧ pä'i'inö. Judá ttö̧ja̧'i̧nä̧ o'catoi'önä ja̧'hua̧ta̧nö̧ Jerusalénä ka̧cuä̧tö̧'i̧nä̧ TÖ̧Ä̧NÄ̧HUA̧RÖ̧ ja̧rȩyu̧ pä'i'ö ucuo te'ähuinätö Ja̧u̧ru̧tä̧. ¹⁹ Leví ahuaruhuä 'cotö Coat'i̧nä̧, Coret'i̧nä̧ i̧tti̧mö̧mä̧ TÖ̧Ä̧NÄ̧HUA̧ Israel ttö̧ja̧ ttu̧ru̧hua̧ Diosrö ucuo tettähua pä'ö ka̧cuä̧mi̧nä̧tö̧, pä̧i̧cu̧nä̧ huopönö. ²⁰ Ji̧nä̧ yo̧ȩi̧ mo̧ro̧ päia'a juätömä porachi'inä̧tö̧ ja̧'hua̧nö̧ porächi'ö de'a jui̧yä̧jä̧ Tecoara̧'a̧cu̧ 'chi̧nä̧tö̧. Jahuätö rättopa'anä Josafatmä ä̧rä̧mi̧'ö̧ pä'inö: ¡Ä̧ju̧cuä̧tu̧cui̧ttö̧, Judá ttö̧ja̧ ja̧'hua̧ta̧nö̧ ucutu Jerusalénä ka̧cuä̧tö̧'i̧nä̧! Cu̧ru̧hua̧tu̧cu̧ Diosrö cua̧'cua̧ huȩnä̧ȩä̧tu̧cui̧ ja̧'hua̧ta̧nö̧ ucutumä ppä̧ttä̧cuä̧u̧jä̧. Dios päö huȩnȩ ji'äurö'i̧nä̧ cua̧'cua̧ cu̧huȩnä̧tu̧cu̧ttö̧mä̧, ucutu adiu jȩ'cuä̧tu̧cu̧nä̧ räopäcua'a." ²¹ Ja̧u̧ ttö̧ja̧rö̧ jä'epö ä̧ju̧cu̧mä̧, ja̧u̧mä̧ TÖ̧Ä̧NÄ̧HUA̧RÖ̧ ra̧ttä̧cuo̧tö̧rö̧'i̧nä̧ ja̧u̧mä̧ hue'ö ku̧ni̧nö̧ ja̧'hua̧nö̧ jȩo̧mȩnä̧ Ja̧u̧mä̧ usärö'i̧nä̧ ucuo te'ähuinö jahuätö su̧ro̧da̧u̧ huȩä̧u̧ rä'opa'anä̧ pä'inö̧: TÖ̧Ä̧NÄ̧HUA̧RÖ̧ esehuätucui, isopäi'önä a̧'cua̧ huȩnȩrö̧ esecuinömä 'cuäopönä̧tä̧ recuo kä̧cuȩ." ²² Ra̧'ö̧nä̧ ucuo tettähuomenä, TÖ̧Ä̧NÄ̧HUA̧ jeruhua'ara̧'a̧tä̧ ttörohuäunä jȩpi̧nö̧ Amón ttö̧ja̧rö̧'i̧nä̧, Moab ttä̧ja̧rö̧'i̧nä̧ ja̧'hua̧ta̧'a̧nö̧ Seir muä'quiyunä ko̧cuä̧tö̧rö̧'i̧nä̧, Judárö ttörohuähua pä'ö ichäjätörö. Ja'huätömä juȩnȩbu̧tä̧ rä̧bȩhui̧nä̧tö̧. ²³ Ja̧'hua̧nö̧ jo̧mȩnä̧ Amón ttö̧ja̧ ja̧'hua̧ta̧'a̧nö̧ Moab ttö̧ja̧'i̧nä̧ rohuäu 'chi̧nä̧tö̧ Seir muä'quiyunä ko̧cuä̧tö̧rö̧, ya̧tȩ'i̧nä̧ ö̧ji̧pö̧ juiyönä cuä'ö tticua pä'ö. Seir muä'quiyunä ko̧cuä̧tö̧rö̧ cuä'äu tticuäji o'ca'a, Ja̧'hua̧nö̧ ja̧'a̧ jähuätö o'catoi'önä tta̧mo̧nä̧tä̧ ppä'ädäcuäu rohuäu to'ädäcuäu icuinätö̧. ²⁴ Judá de'a jui̧yä̧jä̧nä̧ 'chä̧hui̧'ö̧ to'omenä, ttabo iyotö su̧ro̧do̧u̧ru̧ topinätö̧. 'Coruhuo'ächäjätö rȩjȩtä̧ ttö̧'ö̧ja̧'a̧; ya̧tȩ'i̧nä̧ tö'ipächömä ki̧'i̧po̧cö̧ pinö. ²⁵ Josafat acuäruhuäcumä̧ chi̧nö̧ botín yaopu'icu juätörö, po̧cui̧pi̧nä̧tö̧ jitötä ttö̧ju̧nä̧rö̧ jähuä ro̧ȩnä̧tä̧ pu̧jä̧ti̧yu̧tö̧'i̧nä̧, 'coröjuei rö̧ȩi̧nä̧ mihuä'u jähuätö'inä, ja̧u̧mä̧ ȩminä̧tö̧ jitötä jähuätä päi'önä̧tä̧,ro̧ȩi̧nä̧ tȩpu̧nä̧tä̧ pä'iönä. huäbodäcuä mö̧rö̧ jo̧mȩnä̧ ji̧na'a̧ botte ppä'amä̧ O'cajuiyunä̧mä̧. rö̧ȩi̧nä̧ ka̧cui̧nä̧'a̧ juo̧ju̧mä̧. ²⁶ ppa̧ja̧cuä̧ mo̧ro̧ päiomenä̧ 'ca̧'ca̧cu̧ pejäminä̧tö̧ Beraca ppämä̧röppätö. Juorutä TÖ̧Ä̧NÄ̧HUA̧RÖ̧ uhuo teäcuinä̧tö̧, Jua̧'a̧nö̧tä̧ micuinö̧ i̧mi̧ juȩnȩmä̧ ''Beraca rȩjȩ ppäroppä'' jitä mo̧ro̧ jubo päi'önä̧tä̧. ²⁷ Ja̧'hua̧nö̧ jä̧ji̧ o'ca'a pä'äji̧ta̧'a̧nö̧ ppa̧'ä̧chi̧nä̧tö̧, o'catoi'önä̧ Judá ttö̧ja̧'i̧nä̧ Jerusalén ttö̧ja̧'i̧nä̧, Ja̧'hua̧ta̧nö̧ Josafatmä̧ juätö ttä'ca jo̧mȩ kä̧mä̧di̧nö̧, pä'äjita̧'a̧nö̧ eseunö̧ Jerusalénra̧'a̧cu̧ i̧'cha̧ pä'ö, ja̧'hua̧nö̧ ja̧'a̧ TÖ̧Ä̧NÄ̧HUA̧TÄ̧ ji̧na̧'a̧ ttabojiyotörö ya̧'a̧huȩ'ö̧ ttötönä jȩpi̧nö̧mä̧. ²⁸ Juätömä̧ Jerusalénra̧'a̧cu̧ 'chi̧nä̧tö̧ ja̧'hua̧nö̧ TÖ̧Ä̧NÄ̧HUA̧ ojudecu 'chä̧nö̧mä̧ appiyä'i̧nä̧, arpanä̧'i̧nä̧ ja̧'hua̧ta̧nö̧ trompetanä̧ ppu'äyotötä. ²⁹ Diosttö yepä'chömä ja̧huä̧jä̧nä̧ ka̧cuä̧tö̧ ruhuo huettomemä o'cajuiyönä̧tä̧ ki̧na̧'a̧ TÖ̧Ä̧NÄ̧HUA̧MÄ̧ Israel ttö̧ja̧ ttaboiyotöcu rohuähuäji pätta'a ttä̧ju̧cuo̧mȩnä̧mä̧. ³⁰ Ja̧'hua̧nö̧ ja̧'a̧ttö̧ Josafat ruhuo hueömä jä̧rö̧ jö̧nä̧tä̧ ji̧na̧'a̧, juhua'amä ö̧ä̧nä̧hua̧ Dios jäyänä ka̧cuä̧tö̧rö̧'i̧nä̧ huȩnȩ juiyönätä jȩa̧'a̧ttö̧. ³¹ Josafatmä ruhuo Judá ttö̧ja̧rö̧ hueinömä; treinta cinconö a̧'ȩ jo̧mȩnä̧ ku̧nä̧ri̧nö̧ ruhuo kä̧mä̧dö̧ hueinömä, ja̧'hua̧ta̧nö̧ Jerusalénnämä veinticinco a̧'ȩ jo̧mȩtä̧ hue'inö. Ja̧u̧ ki̧mi̧mä̧ Azuba pä'ö micuinäju juajumä Silhi pä'ö micua̧ ittiju ji̧na̧'a̧. ³² Ja̧u̧mä̧ jä'o Asa jȩi̧na̧'a̧cu̧tä̧ jȩpi̧nö̧, ja̧u̧mä̧ jahuätöttömä yorö'iso 'cä̧'i̧pä̧cho̧cö̧ pinö; Dios to̧ä̧ro̧mȩttö̧mä̧ jueö huȩnȩtä̧ jȩpi̧nö̧. ³³ Ja̧'hua̧nö̧ jȩa̧'a̧nä̧, ju'toju ttujuhuä'chinomemä jȩpö̧ icuähuoca'a ji̧na̧'a̧. Ttö̧ja̧mä̧ ji̧nä̧ tta̧mi̧so'quinämä jue'ecuächocotö pinä̧tö̧ ttö̧tä̧mö̧ mi̧nä̧ ttö̧ä̧nä̧hua̧ Dioscumä. ³⁴ Ru̧hua̧ Josafat hueinö pänä ä̧cuo̧mȩnä̧ kä̧mä̧dö̧ beipome jubu päi'önä 'cuäopinömä, ja̧u̧mä̧ huȩyu̧cu̧i̧na̧'a̧ Jehúnä̧ Hananí i̧tti̧nä̧, ja̧'hua̧nö̧ ja̧'a̧nä̧'i̧nä̧ huȩyu̧cua̧'a̧ ka̧'a̧ reyes Israel ttö̧ja̧ ttiärettänä. ³⁵ Pi̧yȩ 'cuä'opinö'o'ca Judá ru̧hua̧ Josafatmä, esecuinö Ocozías'cu, Israel ru̧hua̧, juiyó suronä jȩpi̧nu̧cu̧. ³⁶ Ja̧u̧mä̧ esecuinö ja̧u̧cu̧mä̧ huoi'quiyu bäreu adita pä'ö Tarsis'ra'acu 'cha̧ja̧ pä'ö. Jahuatömä aditinätö̧ huoi'quiyu bäreumä Ezión Geberttö. ³⁷ Ja̧'hua̧nö̧ ja̧'a̧ , Meresa ttö̧ja̧sa̧ i̧tti̧ Eliezer jiähuinö 'cuäopä̧cuä̧ Josafat'rö; ja̧u̧ päi'nö: ''Ucumä Ocozíacu esehuäjijä, ja̧'hua̧nö̧ ja̧'a̧ttö̧ cuadita pä'ö cuamucuädäjimä TÖ̧Ä̧NÄ̧HUA̧TÄ̧ siepö icuiyäcujä.''huoi'quiyumä surojuoächinö ja̧'hua̧nö̧ ja̧'a̧ttö̧ jahuätömä 'cho̧co̧tö̧ pinätö̧ Tarsira'amä.