¹ Judá ru̧hua̧ Josafat huȩnȩ juiyönä ppa̧'a̧chi̧nö̧ ojusode Jerusalén'ra̧'a̧cu̧. ² Ja̧hua̧nö̧ ja̧'a̧ Jehú Hananí i̧tti̧, 'cuä'opäcuä̧ jiäcuähuä i̧sa̧, topö 'chi̧nö̧ ja̧'hua̧nö̧ ja̧'a̧ttö̧ ru̧hua̧ Josafat'rö päinö: '' ¿Suronä jȩpö̧rö̧ ppäcuäda'a tä̧ji̧? ¿TÖ̧Ä̧NÄ̧HUA̧RÖ̧ ä̧u̧tä̧tö̧rö̧ repecua'atä̧ji̧? . ³ Ja̧'hua̧nö̧ jȩ'cua̧'a̧ttö̧, TÖ̧Ä̧NÄ̧HUA̧ amisunä toäcujä. Ja̧'hua̧nö̧ ja̧'a̧nä̧, ucunämä adiunä jö̧ ka̧'a̧,ja̧huä̧jä̧ rȩjȩnä̧ ko̧mȩttö̧ Asera isä'ca jȩpö̧ icuinö̧jä̧, ucutä cuamiso'qui jahuätö Diosrö cusapä'ö. ⁴ Josafatmä Jerusalénä ki̧nö̧; ja̧'hua̧nö̧ kä̧nö̧ ja̧u̧mä̧ pä'äjita'anö juorötä ötahuiyättö rä'opinö Beersebattö Efraín mö̧ä̧quiyura̧'a̧cu̧ 'chä̧nö̧ ja̧'hua̧nö̧ ja̧'a̧ juorötä TÖ̧Ä̧NÄ̧HUA̧ ttä̧'o̧tö̧ mi̧nä̧ ttu̧ru̧hua̧ pi̧nä̧cu̧ ppa̧'ä̧chi̧nä̧tö̧. ⁵ Ja̧u̧mä̧ röji pähuä ttö̧ja̧rö̧ ku̧ni̧nö̧ Judá rȩjȩttö̧ ötahuiyä 'quiyönä adicuomepönämä o'cajuiyötä. ⁶ Ja̧u̧mä̧ röji pähuä ttö̧ja̧rö̧ pä'inö: "Jȩttö̧'a̧nö̧ jö̧tä̧ hue'ätucuitö, ttö̧ja̧sa̧rö̧ adihuomenämä jȩpo̧cö̧, TÖ̧Ä̧NÄ̧HUA̧RÖ̧ adihuomen jȩpö̧; Ja̧u̧mä̧ adiunä jȩ'cuä̧tu̧cuo̧mȩnä̧mä̧ ucututäcu ö̧jä̧cua̧. ⁷ Ja̧'hua̧nö̧ ja̧'a̧ jitämä, yecuecuätucumä TÖ̧Ä̧NÄ̧HUA̧RÖ̧TÄ̧ ye'ecuätucui. Ro̧cuȩpä̧tu̧cuo̧mȩnä̧mä̧ ttu̧'ȩpä̧rö̧nä̧ jȩpä̧tu̧cui̧jó, TÖ̧Ä̧NÄ̧HUA̧NÄ̧MÄ̧ surojö jȩä̧cuä̧huä̧mä̧ juiya'attö, ttesehuipönä jȩä̧cuä̧huä̧'i̧nä̧ juiya'attö ja̧'hua̧nö̧ jo̧ca̧'a̧ttö̧'i̧nä̧ esecu ttimitö'i̧nä̧ juiya'attö. ⁸ Koromä̧, Jerusalénttömä yotucupönä Levi ahuaruhuä 'cotörö'inä, Sacerdotetö̧rö̧'i̧nä̧ ttaditähuä iyinö, ja̧'hua̧ta̧nö̧ Israel ttö̧ja̧ ttö̧tä̧mö̧ mi̧nä̧ttö̧ tturuhuotörö'i̧nä̧, TÖ̧Ä̧NÄ̧HUA̧ iminä ro̧ttȩpa̧ pä'ömä, ja̧'hua̧ta̧nö̧ tturohuäu'i̧nä̧ adiu ppättäda pä''ömä. Jahuätömä Jerusalén ötahuiyänä ka̧cui̧nä̧tö̧. ⁹ Ja̧u̧mä̧ huo̧juȩti̧ pi̧nö̧ pa̧'a̧nö̧ pä'önö: Ucutumä TÖ̧Ä̧NÄ̧HUA̧RÖ̧ ucuotönö ppä̧cuä̧dä̧rä̧tu̧cua̧ja̧, cu̧a̧'cua̧ huȩnä̧rö̧nö̧ ja̧'hua̧ta̧nö̧ cua̧mi̧so'qui'inä o'cajuiyönä. ¹⁰ Ucututä cuahuaruhä korome ötahuiyänä ko̧cuä̧tö̧ huȩnȩ jä̧u̧ ttichömenämä, ko̧ro̧nö̧mä̧ ttucuoja cuocua'a ttichomenä, hueähuä huȩnȩ jȩtta̧ pä'ö hue'ö ku̧nä̧huä̧ jäyä jȩpä̧tö̧rö̧ tti'chächomenä, ucutumä ji'äutä cu̧ju̧nä̧cuo̧tö̧jä̧, jahuätö TÖ̧Ä̧NÄ̧HUA̧ ä'ca jo̧mȩttö̧ suronä jȩtta̧'a̧cu̧, ko̧ro̧nö̧mä̧ ö̧'ä̧i̧ ucuturu'inä ja̧'hua̧ta̧'a̧nö̧ cuahuaruhuärö'inä icha'acu. ucuto ja̧'hua̧nö̧ jȩcu̧'ä̧tu̧cu̧ttu̧mä̧ huȩnȩ juiyönä cujäcuotöjä. ¹¹ Topätucui, Amarias sacerdote huotö ttu̧ru̧hua̧tä̧ jä̧cua̧'a̧ ucuturu TÖ̧Ä̧NÄ̧HUA̧CU̧ cu̧jä̧tu̧cu̧ to̧ä̧cua̧mä̧. Zacarias Ismaél i̧tti̧, Judá ahuaruhuä o'cotö ttu̧ru̧hua̧, ja̧u̧ ja̧'a̧ hueähuä huȩnȩ to̧a̧ra̧ pä̧'ö̧ hue'ö ku̧nä̧hua̧mä̧. ja̧'hua̧nö̧ ja̧'a̧nä̧'i̧nä̧, Levi ttö̧ja̧'i̧nä̧ ucuturu recuä rö̧jö̧ ppä̧ttä̧dä̧rä̧cuo̧tö̧. Juruhuätucui ja̧'hua̧ta̧'a̧nö̧ huettöta'anö jȩpä̧tu̧cui̧, ja̧'hua̧nö̧ jo̧mȩnä̧tä̧ TÖ̧Ä̧NÄ̧HUA̧MÄ̧ adiunä jȩpä̧tu̧cu̧tä̧ kö̧.