¹ Ja̧'hua̧nö̧ ja̧'a̧, Josafatmä rö̧ä̧nä̧ ru̧hua̧ ja̧'a̧nä̧ ucuo'i̧nä̧ ku̧nä̧ri̧nö̧; ja̧u̧tä̧ ji̧na̧'a̧ Acabcu esecu irecua päi'önä i̧tti̧mö̧ttö̧ yajuterö hue'inö. ² Ja̧u̧nu̧ o'ca recuonä̧nö̧ a̧'ȩ 'cuäopäji o'ca'a, Samariara̧'a̧ Acab ö̧ja̧'a̧cu̧ mȩyȩhui̧nö̧. Acabmä ja̧u̧ icha'a ovejastö̧rö̧'i̧nä̧, pä̧cä̧rö̧'i̧nä̧ cuä'ähuinö ja̧'hua̧ta̧nö̧ ja̧u̧tä̧cu̧ ka̧cuä̧tu̧cu̧. Ja̧'hua̧ta̧nö̧ Acabmä ja̧u̧tä̧cu̧ ru'inä̧tö̧ Ramot Galaadra̧'a̧ rohuäu 'chä̧nö̧. ³ Acab Israel ttö̧ja̧ ttu̧ru̧hua̧mä̧, Josafat Judá ttö̧ja̧ ttu̧ru̧hua̧rö̧ pä'inö: ¿Ttöcu Ramot Galaadra̧'a̧ cui̧chä̧cua̧jä̧? Josafatmä ädätinö̧: Ttömä ucu jö̧ta̧'a̧nö̧ hua̧sä̧ ja̧'hua̧ta̧nö̧ chahuaruhuämä cuahuaruhuä jö̧ta̧'a̧nö̧ huotö; ujutumä ucutäcu tö̧jä̧cuo̧tö̧jä̧ curänä̧mä̧." ⁴ Josafatmä Israel ttö̧ja̧ ttu̧ru̧hua̧rö̧ pä'inö: Ä̧cuo̧mȩnä̧mä̧ TÖ̧Ä̧NÄ̧HUA̧ i̧huȩnȩnä̧ jȩ'cuä̧cuȩ jiähuacu pä'ö cusu'anö ja̧'a̧." ⁵ Ja̧'hua̧nö̧ päcu Israel ttö̧ja̧ ttu̧ru̧hua̧mä̧ Dios päö huȩnȩ ji'ähuätörö ca̧ca̧ti̧pi̧nö̧ cuatrocientonö jo̧mȩnä̧ huotörö ja̧'hua̧nö̧ ja̧'a̧ pä'inö: ¿Ramot Galaad ttö̧ja̧cu̧ rohuäu tti̧'chö̧'a̧ ja̧'a̧ ja̧'hua̧nö̧ jo̧ca̧'a̧ttö̧mä̧ ti̧'chö̧ juiyö'anö ja̧'a̧? Jahuätömä pä'inätö̧: "Rohuähuäjätucui, Diostä jä̧cua̧'a̧ ru̧hua̧ u̧mö̧nä̧ i̧yä̧cua̧mä̧." ⁶ Ja̧'hua̧nö̧ ja̧'a̧nä̧ Josafat pa'inö: "¿Pȩnȩmä̧ ja̧tȩ'i̧nä̧ toa'a TÖ̧Ä̧NÄ̧HUA̧ u̧mu̧hä̧ya̧ täbotö jiähuatö jäteparö pä'ömä̧?" ⁷ Israél ru̧hua̧mä̧ pä'inö Josafat-rö: "Ji̧nä̧ ya̧tȩ kö̧ TÖ̧Ä̧NÄ̧HUA̧ u̧mu̧hä̧ya̧ täbotö jiähuatö pä̧'ö̧ jätepö'anö hua̧, Imla i̧tti̧ Micaías, ja̧'hua̧nö̧ ja̧'a̧nä̧ ja̧'u̧ru̧mä̧ köjö'cö juiyönä jä̧cu̧sä̧ adiumä ji'ähuo'cö pä'inö, suronä jä̧cuä̧tä̧ ji'ähuä'inö." Ja̧'hua̧nö̧ päiyäcu Josafat pä'inö: "Ruhuo hue'ömä ja̧'hua̧nö̧ päömä juiyö'anö ja̧'a̧." ⁸ Ja̧'hua̧nö̧ jo̧mȩnä̧ Israélttö ruhuo hue'ö huopinö su̧ro̧do̧u̧ ttu̧ru̧hua̧rö̧, pä'inö: "O'capäi'önä, i'chächipätucui Imla i̧tti̧ Micaiarö." ⁹ Jitämä Israélnä ruhuo hue'ö Acab ja̧'hua̧ta̧'a̧nö̧ Judánä ruhuo hue'ö Josafat'inä ji̧nä̧ yo̧mȩtȩ pä̧jä̧mi̧nä̧tö̧ ruhuo deäcänä, túniocas o̧ta̧ 'ca̧tä̧huä̧tö̧, huäjuome Samariara̧'a̧ 'chä̧nö̧ doächäcuähuome ja̧'hua̧nö̧ ja̧'a̧ o'catoi'önä profetä huotömä 'cuäopä̧cuä̧ ucuocuinätö̧ jahuätö ttä'cajome. ¹⁰ Quenaana i̧tti̧ Sedequías cuoräuttu i̧sä̧na̧ aditäji̧ca̧ pa̧'a̧nö̧ pä'inö: "TÖ̧Ä̧NÄ̧HUA̧ pa̧'a̧nö̧ pä'äji: Ponä kicuopäcuotöjä̧ aram ttö̧ja̧ totte'ächönä." ¹¹ O'catoi'önä profeta huotömä ji̧yȩtȩ 'cuäopä̧cuä̧tä̧ pä'inätö, pa̧'a̧nö̧: "Rohuäu icuäjätucui Ramot Galaad-rö iso juocuepätucunä, TÖ̧Ä̧NÄ̧HUA̧TÄ̧ iyäji ja̧u̧ru̧ ruhuo hue'ö u̧mu̧nä̧." ¹² Micaías'rö huȩnȩ jiähuö chä̧ji̧mä̧ ucuocu päinö: ''Jitämä ä̧ju̧cui̧, profetas huotömä adiunä jö̧tä̧ pä̧'ö̧ ucuohuätö ru̧hua̧rö̧mä̧. Ucu'inä retopö adihua'anö jö̧tä̧ ucuocui jahuätö jö̧ta̧'a̧nö̧.'' ¹³ Micaías ädätinö: ''TÖ̧Ä̧NÄ̧HUA̧ Dios ä̧'cua̧rö̧ ö̧jä̧i̧mä̧, ja̧u̧ pä'ötä pä̧dä̧cua̧sä̧.'' ¹⁴ Ru̧hua̧ ö̧jo̧mȩcu̧ ichi'omenä, ru̧hua̧ ja̧u̧ru̧ päinö: ''Micaías, ¿ujutumä ti̧'chö̧'a̧nö̧ ja̧'a̧ tä̧ji̧ ti̧'chö̧ juiyö'anö cö̧ curä rohuäjuömä Ramot Galaad'ra'acumä? ''Micaías ädätinä̧u̧: ''!Rohuähuäjätucuí ja̧'hua̧ta̧nö̧ iso juohuepäcuotöjä! jahua'amä juiyo rö̧ä̧ö̧nä̧ iso juoehuä jä̧hua̧'a̧.'' ¹⁵ Ja̧hua̧nö̧ ja̧'a̧ ru̧hua̧ ja̧u̧ru̧ päinö: '' ¿Ttömä ta̧'a̧nö̧ rö̧ä̧ö̧nä̧ jo̧mȩnä̧ jädepu'anö ja̧'a̧tö̧ TÖ̧Ä̧NÄ̧HUA̧ i̧mi̧nä̧ jueönä̧ jihuähuatö pä'ömä? ¹⁶ ''Ja̧'hua̧nö̧ päcu Micaías päinö: ''Topäjisä Israel ttö̧ja̧ mu̧ä̧'qui̧yu̧nä̧ ppere'cuanö ttö̧jo̧cua̧'a̧, oveja̧ttö̧ ttu̧ru̧hua̧ toätö ttö̧jo̧cua̧'a̧ 'cua̧rö̧nä̧ ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ päinö:' Pitömä ttu̧ru̧hua̧ toätö. Huȩnȩ juiyönä ya̧cu̧ pö̧nä̧ ttojusodera'a ppa̧ta̧cha̧'a̧nä̧ ja̧'a̧tä̧ topitö.'' ¹⁷ Ja̧'hua̧nö̧ ji̧yä̧cu̧ Israel ttö̧ja̧ ttu̧ru̧hua̧mä̧ Josafatrö pä'inö: ¿Jidähuococu päjijä Ja̧u̧mä̧ ttörö adiu ppädö jitähuajueimä, surojötä ji'äu pä'ö?" ¹⁸ Ja̧'hua̧nö̧ päiyäcu Micaíasmä pä'inö: ja̧'hua̧nö̧ jö̧ttö̧mä̧ ucutu o'catoi'önä̧tä̧ TÖ̧Ä̧NÄ̧HUA̧ päömä ä̧ju̧cuä̧tu̧cui̧: Ttömä TÖ̧Ä̧NÄ̧HUA̧ ideäcänä ö̧'a̧'a̧ topäjisä ja̧'hua̧ta̧nö̧ u̧mö̧huäyotö o'catoi'önä mo̧ro̧jä̧ttö̧ su̧ro̧da̧u̧mä̧ u̧huo̧jua̧'a̧cu̧nä̧'i̧nä̧, u'ohuecunä'inä ka̧cuä̧jä̧tö̧. ¹⁹ TÖ̧Ä̧NÄ̧HUA̧MÄ̧ pä'inö: ¿Di jä̧cua̧'a̧ttö̧ Israel ttö̧ja̧ ttu̧ru̧hua̧ Acabrö esetipönä̧ jȩö̧'a̧nö̧ hua̧mä̧, 'cha'achö'ca̧ Ramot Galaadnä mau̧nä̧mä̧? ya̧tȩmä̧ pä'inö, chujua ja̧'hua̧ta̧nö̧ ka̧ra̧mä̧ jitö. ²⁰ Ja̧'hua̧nä̧ ja̧'a̧ ya̧tȩ isoppa hua̧ TÖ̧Ä̧NÄ̧HUA̧ ä'cajo̧mȩ kä̧mä̧dö̧ päinäcu̧: ttötä jäyä pättönä jȩchä̧cuo̧tö̧. TÖ̧Ä̧NÄ̧HUA̧ pä'inö ja̧u̧ru̧: ¿tta̧'a̧nö̧ jȩcu̧'ä̧cua̧'a̧jä̧tö̧? ²¹ Isoppa hua̧ adätinö: Ttötä 'chä̧nö̧ isoppa hua̧ ya̧pa̧rȩhua̧nä̧tä̧ chö̧'ä̧ro̧huä̧chä̧cua̧sä̧ o'catoi'önä profeta huotö ttättö yaparetä ttucuocunä. TÖ̧Ä̧NÄ̧HUA̧ ädätinö: Ucumä jäyapättönä jȩcua̧'a̧ttö̧ ja̧'hua̧nö̧tä̧ iso juo̧cuȩpä̧cua̧jä̧. Jitätä 'chä̧nä̧ jȩpä̧ji̧tö̧. ²² Jitämä, TÖ̧Ä̧NÄ̧HUA̧TÄ̧ ja̧'a̧ isoppa hua̧ ya̧pa̧rȩhua̧nä̧ profetä huotö yaparetä ttucuocunä jȩpö̧mä̧ ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧TÄ̧ ucuru suronä ja̧ pä'ö pä'äjimä. ²³ Ja̧hua̧nö̧ ja̧'a̧ Quenaana i̧tti̧ Sedequiasmä̧, Ichi'ö Micaias i'ebabanä̧ ppe'opunö̧ pä'inö: ''¿Tocu jö̧nä̧ Ttöttömä̧ TÖ̧Ä̧NÄ̧HUA̧ a̧'cua̧ru̧ i̧sa̧mä̧ rä'opächäji'ca̧ ucunä̧mä̧ ucuocua'attö?'' ²⁴ Micaiasmä pä'inö: ''Topi, ucumä̧ ja̧u̧ tö'cömä jö̧ mo̧ro̧tä̧ cu̧huo̧juä̧cua̧sä̧, cuojusodettö jacuojunä i̧so̧ca̧nä̧ cudajuächa pä'ö jopötä.'' ²⁵ Israel ttö̧ja̧ ttu̧ru̧hua̧mä̧ ttu̧mö̧huä̧ya̧ttö̧ ya̧tȩrö̧ pä'inö: "Ucutumä Micaíasrö 'chu'ädi'ö ttö̧ja̧ ttu̧ru̧hua̧ Amón ö̧ja̧'a̧cö̧ ȩpä̧tu̧cui̧rö̧ ja̧'hua̧ta̧nö̧ chi̧tti̧ Joás ö̧ja̧'a̧cu̧'i̧nä̧. ²⁶ Ucutumä ja̧u̧ru̧ päcuäcuotöjä: Ru̧hua̧mä̧ pä'inö: Piderö cärenä rötätucui ja̧'hua̧ta̧nö̧ u̧cuä̧mä̧ a̧'u̧cu̧nä̧tä̧ cuiyätucuaröjä juhua'atäcu ajiya'i̧nä̧ a̧'u̧cu̧nä̧tä̧, ttö huȩnȩ juiyönä ppa̧dä̧cho̧mȩ jubö. ²⁷ Ja̧'hua̧nö̧ päiyäcu Micaíasrö ädätinö: "Huȩnȩ juiyönä ppa̧cuä̧chö̧ttö̧mä̧, TÖ̧Ä̧NÄ̧HUA̧ ttönämä ucuocuocuoca'a jä̧ja̧'a̧tä̧ jä̧cua̧'a̧." Ja̧'hua̧nö̧ pä'ökänö juhua'a yabonö pä'inö: Pi̧yȩ o'catoi'önä ä̧ju̧cuä̧tu̧cui̧." ²⁸ Ja̧'hua̧nö̧ ja̧'a̧ttö̧ Israel ttö̧ja̧ ttu̧ru̧hua̧ Acab'i̧nä̧ ja̧'hua̧ta̧nö̧ Judá ttö̧ja̧ ttu̧ru̧hua̧ Josofat'i̧nä̧ Ramot Galaadcu rohuäu 'chi̧nä̧tö̧. ²⁹ Israel ttö̧ja̧ ttu̧ru̧hua̧ Josafatrö pä'inö: Ttömä jeruhuönä pärotäcuähui'ö curära̧'a̧ chi̧'chä̧cua̧sä̧, ja̧'hua̧nö̧ ja̧'a̧nä̧ ucumä ruhuo pänö cu̧'ca̧tä̧huä̧ta̧ 'ca̧tä̧hui̧. Ja̧'hua̧nö̧ pä'äji'ca̧ Israel ttö̧ja̧ ttu̧ru̧hua̧mä̧ a̧mö̧nä̧ pa̧ja̧tö̧ jeruhuönä pärotäcuähuinö ja̧'hua̧nö̧ ja̧'a̧ juätö curära̧'a̧ 'chi̧nä̧tö̧. ³⁰ Ja̧'hua̧nö̧ ja̧'a̧ Aram ttö̧ja̧ ttu̧ru̧hua̧mä̧ su̧ro̧da̧u̧ ttuhuotö caruquiyä 'chä̧tö̧rö̧ hue'ömä pä'inö: Su̧ro̧da̧u̧ ucuo isotö huocotucumä curähuähuätucuä. Jahuätöcu tturohuöhua jueimä Israel ttö̧ja̧ ttu̧ru̧hua̧cu̧tä̧ curohuähuätucuaja." ³¹ Ja̧'hua̧nö̧ ja̧'a̧ 'cuäopina'a, su̧ro̧da̧u̧ tturuhuotö carucättanä 'chä̧tö̧mä̧ Josafatrö topömä pä'inä̧tö̧: Chujuatä ja̧'a̧ Israel ttö̧ja̧ ttu̧ru̧hua̧mä̧." tturohuähua pä'ö kärächi'inä̧tö̧, ja̧'hua̧nö̧ päi'omenä JOsafatmä CHUÄ̧NÄ̧HUA̧ ppä'ädittö pä'ö huopinö. Diosmä ja̧u̧ttö̧ 'cä̧tti̧pä̧chö̧nä̧ jȩpi̧nö̧. ³² Ja̧'hua̧nö̧ 'cuäopinö su̧ro̧da̧u̧ tturuhuotö carucättanä 'chä̧tö̧mä tottomenä Israel ttö̧ja̧ ttu̧hua̧ ji̧yo̧co̧u̧ yabonömä ru'ocotö pinätö. ³³ ya̧tȩ siro ttö̧ja̧sa̧ uppopobö cä'epö ppo'ö icuomenä Israélttö ruhuo hue'ärö tto̧ȩpä̧rö̧ obi 'cä̧tȩnä̧ döina'a. ja̧'hua̧nö̧ ji̧yä̧cu̧, Acab pä'inö carucä juȩ'ȩpä̧rö̧rö̧: "kärächi'ö pä̧mä̧dö̧ ȩpä̧ttö̧ ttörohuähuocomecu̧, täcö chijiyuhuächi'önä po̧'a̧ri̧ döäcusä." ³⁴ Ja̧u̧nu̧ mo̧ro̧ rö̧ä̧nä̧ rohuähuinätö̧ ja̧'hua̧nö̧ jo̧mȩnä̧ Israélnä ruhuo hue'ömä öcarucänätä kä̧nö̧ umuhuäyuotö ttörohuähua'anä aram ttä̧ja̧cu̧ ni̧pä̧ro̧mȩ jubu päi'önä. Ni̧pä̧ro̧mȩcu̧ kä̧hua̧ mo̧ä̧cha̧'a̧, 'corupä'i'inö.