¹ Josafat, ru̧hua̧ juo'inö jä'o Asa minä ö̧ji̧no̧mȩ. Josafat ujuru ku̧nä̧ri̧nö̧ Israel ttö̧ja̧ cu̧mä̧. ² Ja̧u̧mä̧ Judáttö o'cajuiyönä ötahuiyä bäreumä ujurucu ttoecuäbä ttoepö ku̧ni̧nö̧, ja̧'hua̧nö̧ ja̧'a̧nä̧ Judá rȩjȩnä̧mä̧ ku̧ni̧nö̧ su̧ru̧da̧u̧ru̧ äecu tta̧'tta̧ra̧ pä'ö ja̧'hua̧ta̧nö̧ Efraín ötahuiyänä'inä, jä'o Asa minä 'cho'ipinö pönä. ³ TÖ̧Ä̧NÄ̧HUA̧ Josafat'cu ki̧nö̧ ä̧cuo̧mȩnä̧ jä'o David minä ö̧ji̧nö̧ta̧'a̧nö̧ ö̧ja̧'a̧ttö̧, ja̧'hua̧ta̧nö̧ baalesrömä usocö pinö. ⁴ Ja̧'hua̧nö̧ jo̧mȩmä̧, ja̧u̧mä̧ jä'o Ö̧Ä̧NÄ̧HUA̧ Diosrötä a̧'cua̧ huä̧nä̧ri̧nö̧, ja̧'hua̧ta̧nö̧ hueähuä huȩnȩ pä'öta'anö jȩpö̧ ki̧nö̧ , Israel ttö̧ja̧ jȩttö̧'a̧nö̧mä̧ jȩpo̧cö̧ pinö. ⁵ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧MÄ̧ umönä ruhuo jä̧ji̧mä̧ iyö u̧ju̧ni̧nä̧cu̧; Judá ttö̧ja̧mä̧ o'catoi'önä̧tä̧ pärätä ru̧hua̧ iyähuämä̧ Josofatrö i'cächö iyinä̧tö̧. Ja̧u̧mä̧ ku̧nä̧ri̧nö̧ öäremä̧ rö̧ä̧nä̧ juhuatäcu juiyo röänätä ucuo teäcuähuämä. ⁶ Ja̧u̧ amiso'qui TÖ̧Ä̧NÄ̧HUA̧ päina'acutä̧ jȩa̧ pä'ötä huinö. Ja̧u̧'i̧nä̧ ju'toju ka̧cu̧mä̧ porö icuinö̧ ja̧'hua̧ta̧nö̧ Judá rȩjȩnä̧ ka̧cu̧ Asera o'ca'i̧nä̧. ⁷ Huäbocuä a̧'ȩ päi'önä ruhuo huea'a, umöhuäyotö ruhuotö Ben Hailrö̧'i̧nä̧, Abdíasrö'i̧nä̧, Zacaríasrö'i̧nä̧, Natanaelrö'i̧nä̧ ja̧'hua̧ta̧nö̧ Micaíasrömä̧, judá ttö̧ja̧rö̧'i̧nä̧ u̧huo̧juȩti̧ya̧rö̧ hue'inö. ⁸ Levis ahuaruhuä 'cotö juätucu ka̧cui̧nä̧tö̧mä̧: Semaías'i̧nä̧, Netanías'i̧nä̧ Zebadíasi̧'nä̧, Asael'i̧nä̧, Semiramot'i̧nä̧, Jonatánrö̧'i̧nä̧, Adonías'i̧nä̧, Tobías'i̧nä̧ ja̧'hua̧ta̧nö̧ Tobadonías'i̧nä̧; ja̧'hua̧ta̧nö̧ sacerdotetö̧; Elisamarö'i̧nä̧, Joramrö̧m jȩtto̧tä̧. ⁹ Jahuätömä Judá ttö̧ja̧rö̧ huo̧juȩti̧nä̧tö̧ TÖ̧Ä̧NÄ̧HUA̧ Moisésnä hueähuä huȩnȩ kä'tä ttu̧mö̧nä̧ 'chu̧'ä̧rö̧ kä̧cö̧. Judá rȩjȩmä̧ o'catoi'önä cue'ächö, ttö̧ja̧rö̧ huo̧juȩti̧nätö. ¹⁰ Judá rȩjȩ tö'cönä ruhuo hue'ö ko̧cuä̧tö̧mä̧ rö̧ä̧nä̧ ye'ecue'inätö TÖ̧Ä̧Ö̧NÄ̧HUA̧ ro̧ȩpä̧'a̧nö̧ jö̧ ttamucuädomenä, ja̧'hua̧nö̧ä̧ ja̧'a̧ttö̧ rohuähuocotö pinätö̧ Josafat-römä. ¹¹ Korotö pönä filisteos ttö̧ja̧mä̧ Josafat-rö mippoönä iyähuä ttiya pä'ötä i'chächinätö, pärätä'inä ttö̧jö̧ micuä ttimita pä'ö. Arabe'inä i'chächinätö äjicuäcuähuotörö, 7.700 carnero ja̧'hua̧ta̧'a̧nö̧ 7.700 cabrs. ¹² Josafat juiyo röänä järettö ru̧hua̧ juo'inödo. Ja̧u̧mä̧ aditinö odehuiyä 'quiyö jueittö ja̧'hua̧ta̧'a̧nö̧ ttu̧cuä̧ hua'adö ku̧nä̧huo̧mȩ'i̧nä̧ Judá ötahuiyänä. ¹³ Jaumä rö̧ä̧nä̧ ku̧nä̧ri̧nö̧ öäremä Judá ötahuiyänä, ja̧'hua̧ta̧'a̧nö̧ su̧ro̧do̧u̧rö̧'i̧nä̧ -- curä rohuäu juruhuätörö'inä -- Jerusalen-nä. ¹⁴ Pȩnȩ huȩyu̧cua̧'a̧ pa̧'a̧ juätö, ttä'o̧tö̧ tti̧mi̧ huȩyu̧tu̧ rötähuina'acutä: Judá ttö̧ja̧ttö̧ su̧ro̧do̧u̧ tturuhuotö recuinä̧tö̧ttö̧ ttu̧ru̧hua̧mä̧ Adnas su̧ro̧do̧u̧ ttu̧ru̧hua̧mä̧ 300.000nö̧ huotö curä rohuähuätörö hue'inö; ¹⁵ ja̧u̧cu̧mä̧ Jonahán Su̧ro̧do̧u̧ ttu̧ru̧hua̧mä̧, 280,000 jo̧mȩnä̧ huotörö hue'inö; ¹⁶ ja̧u̧cu̧mä̧, Zicri i̧tti̧ Amasías a̧mö̧nä̧ pa̧ja̧tö̧ TÖ̧Ä̧NÄ̧HUA̧ aditähuä adita pä'inömä; 200,000 jo̧mȩnä̧ huotörö hue'inö curä rohuähuätörömä. ¹⁷ Benjamincu̧mä̧: ki̧nö̧mä̧ Eliada'inä̧ ji̧na̧'a̧ ya̧tȩ ju̧ru̧hua̧cu̧ ka̧cui̧nä̧tö̧mä̧ 200.000nö̧ jo̧mȩnä̧ ji̧na'a̧ 'po'obu'i̧nä̧ ttoecuäcuähuäbi ku̧nä̧rä̧tömä̧, ¹⁸ ja̧u̧cu̧mä̧ Jozabad huȩä̧u̧mä̧, 180,000nö̧ jo̧mȩnä̧ ji̧na'a̧ curä ttu̧rohuähua pä'ö jo̧mȩnö̧ huotömä̧. ¹⁹ pitö ji̧na̧'a̧ ru̧hua̧rö̧ ppä̧'ä̧dä̧ri̧tö̧mä̧ korotö ötahuiyä 'quiyönä adicuome tta̧ttä̧rö̧nä̧ u̧ju̧ni̧nä̧u̧ttö̧'i̧nä̧ Judá rȩjȩttö̧mä̧.