¹ Dios a̧cua̧ru̧ i̧sa̧mä̧ Obed i̧tti̧ Asaríasrö ichö kä̧mä̧di̧nö̧. ² Ja̧u̧mä̧ rä'opäji'ca̧ Asacu pätecuäcuäumä ja̧u̧rö̧ pä'inö: "Ttö pädö ä̧ju̧cu̧yi̧, Asa'i̧nä̧, Judá ttö̧ja̧'i̧nä̧ o'catoi'önä ja̧'hua̧ta̧nö̧ Benjamin ahuaruhuä'i̧nä̧: TÖ̧Ä̧NÄ̧HUA̧MÄ̧ ucutäcu kö̧, ji̧nä̧ Ja̧u̧cu̧ ku̧jä̧i̧mä̧. Ja̧u̧ru̧ cusuttömä̧, ucumä̧ Ja̧u̧ru̧ cu̧'o̧cui̧'ä̧cua̧jä̧; ja̧'hua̧nö̧ ja̧'a̧nä̧ Ja̧u̧ttö̧ 'cä̧cui̧pä̧chö̧ttö̧mä̧, chutä'i̧nä̧ ucuttömä 'cä̧i̧pä̧chä̧cua̧. ³ Ja̧'hua̧nö̧ ja̧'a̧ recuo mo̧ro̧, Israel ttö̧ja̧mä̧ isopäi'önä Dios'i̧nä̧, sacerdote'i̧nä̧ huo̧juȩcuä̧ ttö̧ja̧sa̧'i̧nä̧ ja̧'hua̧ta̧nö̧ hueähuä huȩnȩ'i̧nä̧ juiyönä̧tä̧ ka̧cui̧nä̧tö̧. ⁴ Ja̧'hua̧nö̧ ja̧'a̧nä̧ usurä ttȩmä̧huo̧mȩnä̧mä̧, TÖ̧Ä̧NÄ̧HUA̧RÖ̧ Israel ttö̧ja̧ TTÖ̧Ä̧NÄ̧HUA̧ Diosrö ppa̧'ä̧chi̧nä̧tö̧, ja̧'hua̧ta̧nö̧ ttusomenämä, Ja̧u̧ru̧mä̧ po̧cui̧pi̧nä̧tö̧. ⁵ Ja̧u̧nö̧ pä̧nä̧ ya̧tȩ juȩnȩnä̧ cue'ächömä huȩnȩ juiyönä cueächö juiyönä ji̧na̧'a̧, ja̧'hua̧ta̧nö̧ juätö ttö̧jo̧mȩttö̧ pocu ichomenämä, ju̧huȩnȩ rȩjȩ ka̧cuä̧tö̧mä̧ huȩnȩ huiyönämä ko̧co̧tö̧ pinätö̧. ⁶ Jȩttö̧ juiyönä ppo̧ö̧cu̧nä̧ juo'ächö̧, tti̧rȩji̧yä̧ tti̧rȩji̧yä̧ pö̧nä̧tä̧ rohuähuinätö, ja̧'hua̧ta̧'a̧nö̧ ttötahuiyä ttötahuiyä pönätä rohuähuinätö, TÖ̧Ä̧NÄ̧HUA̧ tta̧'cua̧ ro̧ä̧u̧ ttusuräunä jȩa̧'a̧ttö̧. ⁷ Ja̧'hua̧nö̧ ja̧'a̧nä̧ juruhuätucui, cu̧mu̧tu̧cu̧ 'cuächia'anämä cuiyähuätucuä, ja̧'hua̧nä̧ cuaditömä micuä cuȩmä̧cua̧jä̧. ⁸ Asa pi̧yȩ huȩnȩ ä̧ju̧cuo̧mȩnä̧, 'cuä̧o̧pä̧cuä̧ profeta Obed päa'a, ja̧u̧mä̧ amucuädönä juruhuächi'inö ja̧'hua̧nö̧ ja̧'a̧ttö̧ suronä ko̧cu̧ tätähuä o'camä̧ rä'epö icuinö Judá rȩjȩtö̧mä̧ ja̧'hua̧ta̧'a̧nö̧ Benjamin rȩjȩttö̧'i̧nä̧, ja̧'hua̧ta̧'a̧nö̧ chutä rohuäu 'choipinö ji̧nö̧'i̧nö̧ Efraim de'a jo̧mȩttö̧, ja̧'hua̧nö̧ jȩpö̧ aditinö TÖ̧Ä̧NÄ̧HUA̧RÖ̧ ku iyähuome. ⁹ Ja̧u̧mä̧ ji̧nä̧ yo̧mȩtȩ pätti'önä ca̧ca̧ti̧nö̧ o'catoi'önä Judá ttö̧ja̧rö̧'i̧nä̧ ja̧'hua̧ta̧'a̧nö̧ Benjamin ttö̧ja̧rö̧'i̧nä̧, ja̧'hua̧ta̧'a̧nö̧ jitucutä ko̧cuä̧tö̧rö̧'i̧nä̧ -- Efraín ahuaruhuä'inä, Manases ahuaruhuä'inä ja̧'hua̧ta̧'a̧nö̧ Simeón ahuaruhuä'inä. Ja'huätömä Israélttö recuätö ttichina'attö̧ chutä ö̧jo̧mȩcu̧, TÖ̧Ä̧NÄ̧HUA̧ chutucu öja̧'a̧ to'tomenä. ¹⁰ Ja̧'hua̧nö̧ ja̧'a̧ttö̧, Jerusalén'nä jinä yo̧mȩtȩ ca̧ca̧cui̧nä̧tö̧ kä̧cua̧ cuäbodäcuä päiomenä, Asa ruhuo hueö pänä décimo quinto a̧'ȩ päiomenä. ¹¹ Ja̧u̧nu̧ mo̧ro̧ ku'icu iyähuä jȩpi̧nä̧tö̧ TÖ̧Ä̧NÄ̧HUA̧RÖ̧ 'cho'ipö tticächinö ji̧nö̧ttö̧: setecientö päcäyö̧ jo̧mȩnä̧ ja̧'hu̧a̧ta̧nö̧ siete milnö ovejattö̧ jo̧mȩnö̧ ja̧'hua̧ta̧nö̧ ca̧bra̧tö̧'i̧nä̧ ¹² Jahuätö jacuojucu doächinä̧tö̧ TÖ̧Ä̧NÄ̧HUA̧ Dioscu esecu ku̧nu̧ jettinome ttä̧do̧tö̧ mi̧nä̧, tta̧'cua̧rö̧ ttamiso'qui o'cajuiyönä̧tä̧. ¹³ Jahuätö ji̧nä̧ yo̧mȩtȩ amucuädö ku̧ni̧nä̧tö̧ Israelttö TÖ̧Ä̧NÄ̧HUA̧RÖ̧ Diosrö usocömä, cuä'ö tticua päötä hua̧, ji̧'qui̧chä̧cua̧ jö̧tö̧'i̧nä̧ buo'inä jö̧ttö̧'inä, huä̧'i̧nä̧ ubo'inä isaju'inä. ¹⁴ Juätö TÖ̧Ä̧NÄ̧HUA̧ i̧mi̧nä̧ huȩnȩtö̧ pä̧i̧cu̧nä̧, huopinä̧tö̧ ja̧'hua̧ta̧nö̧ trompeta'i̧nä̧, i̧sa̧ a̧ja̧ i̧sä̧na̧nä̧'i̧nä̧ ppu'inä̧tö̧. ¹⁵ Judá rȩjȩnä̧ ka̧cuä̧tö̧ o'catoi'önä̧ esehuinä̧tö̧ päcumä jȩtä̧cuo̧tö̧jä̧ pä'ö, juhua'amä ttamiso'qui o'cajuiyönä jȩttä̧cuo̧tö̧jä̧ pätta'attö̧, ja̧'hua̧nö̧ pä'ömä rö̧ä̧nä̧ eseunu usinä̧tö̧ Diosrömä, ja̧'hua̧nö̧ ttusomenä Ja̧u̧mä̧ ttö̧'o̧cui̧'ö̧nä̧ iyäcuähuinä juätörömä. TÖ̧Ä̧NÄ̧HUA̧MÄ̧ o'catoi'önä̧rö̧, ttippeyänä ka̧cuä̧tö̧rö̧ huȩnȩ juiyönä ttö̧ja̧cu̧nä̧ ppä'ädinö. ¹⁶ Ja̧'hua̧ta̧nö̧ jä̧da̧ ruhuaju Maacarö'i̧nä̧ pporädö icuinö̧, Asera a̧'cua̧juȩ isä'ca kaditäjomettö̧. Asamä a̧'cua̧juä̧ isä'ca pparopö icu, i̧sa̧ppȩ päi'önä jȩpö̧ Cedrónttö aje joomȩttö̧ ku icuinö. ¹⁷ Ja̧'ha̧nö̧ ja̧'a̧nä̧ Israel ttö̧ja̧ ttö̧ja̧cuo̧mȩttö̧ ju'toju ka̧cu̧mä̧ jȩpö̧ icuähuocö ji̧nö̧. Ja̧'hua̧nö̧ ja̧'a̧nä̧ Asa ö̧ji̧nö̧ pä̧nä̧mä̧ amiso'quimä Ö̧Ä̧NÄ̧HUA̧RÖ̧MÄ̧ ucuotäcuähuätä ku̧nä̧ri̧nö̧. ¹⁸ Ja̧u̧mä̧ Jä'o iäre Dios iäre jö̧nä̧ jȩi̧nö̧mä̧ Dios ojusodera̧'a̧cu̧ i'cächö ku̧ni̧nö̧, TÖ̧Ä̧NÄ̧HUA̧ iäre päi'önä pätecuächinö jinömä: Oro'i̧nä̧, plata'i̧nä̧. ¹⁹ Ru̧hua̧ Asa ruhuo hueinö pä̧nä̧mä̧ 35nö̧ a̧'ȩ jo̧mȩnä̧ curä rohuähuäcuähuämä juiyina'a.