¹ Abíasmä ö̧tä̧mö̧ mi̧nä̧cu̧ ä'i'inö, ja̧'hua̧nö̧ ä'i'äja'amä David idepiyunä 'turu tticuinä̧cu̧. Ja̧u̧ ruhuo hueä'ijo'comemä i̧tti̧ Asatä ruhuome hue'inö. Ja̧u̧ ö̧ji̧nö̧ pä̧nä̧ ja̧huä̧jä̧ rȩjȩmä̧ dieznö a̧'ȩ jo̧mȩnä̧ huȩnȩ juiyönä ki̧nä̧tö̧. ² Asamä adiutä jȩpi̧nö̧ jueö huȩnȩtä̧ TÖ̧Ä̧NÄ̧HUA̧ Dios to̧ä̧ro̧mȩttö̧mä̧, ³ ja̧u̧mä̧ korojä̧ttö̧ ichäcuähuotö isotö ku icu ttiyä'ijomenä si'epö icuinö̧ ja̧'hua̧ta̧nö̧ ju'tojö jo̧mȩpö̧nä̧ ka̧cuä̧'i̧nä̧. Inähuiyättö o'ca ttaditinö̧'i̧nä̧ ja̧'hua̧ta̧nö̧ tätähuä'ca Asera'carö'i̧nä̧ si'epö icuinö. ⁴ Ja̧u̧mä̧ Judá ttö̧ja̧rö̧'i̧nä̧ ttä̧do̧tö̧ mi̧nä̧ TÖ̧Ä̧NÄ̧HUA̧RÖ̧ Diosrö ttusunä hue'inö̧ juhua'atäcu hueinö huȩnȩ'i̧nä̧ jȩttö̧nä̧. ⁵ Ja̧'hua̧ta̧nö̧, ja̧u̧mä̧ ju'toju jo̧mȩ ka̧cu̧'i̧nä̧ jȩpö̧ icuinö juhua'atäcu a̧mȩu̧ 'chopönä ttujuhuä'ijome'i̧nä̧ si'epö icuinö̧ Judá ttidepiyuttömä̧ o'cajuiyötä. Ruhuo hueähuämä ja̧u̧nä̧tä̧ huȩnȩ ki̧na̧'a̧. ⁶ Ja̧u̧mä̧ Judá ttö̧ja̧ ttidepiyömä 'quiyönä jö̧nä̧ aditinö, Judá ttö̧ja̧ ttidepiyunä̧mä̧ huȩnȩ juiyönä ji̧na̧'a̧, Ja̧u̧mä̧ ja̧u̧nu̧ mo̧ro̧mä̧ curämä juiyina̧'a̧, juhua'amä̧ TÖ̧Ä̧NÄ̧HUA̧NÄ̧TÖ̧ u̧ni̧chä̧rö̧ kä̧cuä̧huä̧tä̧ iya'attö. ⁷ Asa pä'inö Judárö: "Pi̧yȩ ötahuiyä kä̧mä̧dö̧ aditö ticua ja̧u̧ ötähuiyä ttö̧ȩpä̧rä̧bä pärotö ttotepätucua, ja̧'hua̧ta̧'a̧nö̧ ju'tojunä isä'ca'inä, apatiyä'inä, ja̧'hua̧ta̧'a̧nö̧ ppe'tädäcuähuä o'ca'inä; Jahuäjä rȩjȩmä̧ ji̧nä̧ ka̧'a̧ topätöjä TÖ̧Ä̧NÄ̧HUA̧ Diosrö tusa'attö, ja̧'hua̧nö̧ ja̧'a̧ttö̧ ja̧u̧tä̧ ja̧'a̧ ti̧'cho̧mȩ'i̧nä̧ pä'ädömä suronö jö̧ juiyönä." Pätäjita'anö ttaditaöattö adiunätä̧ 'chi̧nä̧u̧. ⁸ Asamä ku̧nä̧ri̧nö̧ u̧mu̧huäyotö su̧ro̧du̧o̧ ttoecuäbi ja̧'hua̧ta̧'a̧nä̧ curä osu'inä ȩpä̧tö̧rö̧; Judámä ku̧nä̧ri̧nö̧ 3milnö jo̧mȩ u̧mu̧huäyotörömä, ja̧'hua̧ta̧'a̧nö̧ Benjamin-mä ku̧nä̧ri̧nö̧ 280mi̧lnö̧ jo̧mȩ u̧mu̧huäyotörö cue'adinätö ttoecuä obi'inä ja̧'hua̧ta̧'a̧nö̧ ttuppopö'inä jo̧mȩnä̧ pä̧'ȩpö̧ ku̧nä̧hua̧'a̧ cue'adinätö. O'catoi'önä jahuätö u̧mä̧tö̧mä̧ rohuäu juruhuätö ji̧na̧'a̧. ⁹ Etiope ttö̧ja̧sa̧ Zera ichi ja'huätö ttö̧ja̧'a̧cu̧ un millón jo̧mȩnä̧ su̧ro̧do̧u̧cu̧ ja̧'hua̧ta̧'a̧nö̧ 300nö̧ cu̧ru̧qui̧yä̧ ca̧hua̧yu̧tu̧ dottö ocäcu; ja̧u̧mä̧ ichinö Maresa jubutä. ¹⁰ Ja̧'hua̧nö̧ jo̧mȩnä̧, Asa rä'opö 'chinö ja̧u̧ru̧ ö̧'o̧cui̧'a̧ pä'ö, Sefata de'a pämäroppä Meresa ötahuiyä sobucuächönä ko̧cuä̧mi̧nä̧tö̧ ttörohuähua pä'ö. ¹¹ Asa huopinö Ö̧Ä̧NÄ̧HUA̧ Diosrö pa̧'a̧nö̧ pä'ö: "CHÖ̧Ä̧NÄ̧HUA̧ ka̧ra̧mä̧ toa'a, UCUTÄ ja̧'a̧ ppäcuädö'anö hua̧mä̧ ujuru jui̧'a̧rö̧ recuätucu örohuähua pä'ö. TÖ̧Ä̧NÄ̧HUA̧ Dios ppä'äditö, ujutumä UCURUTÄ ta̧u̧ huä̧nä̧rä̧tö̧jä̧, ja̧'hua̧nö̧ ja̧'a̧ttö̧ UCU cui̧mi̧nä̧tä̧ ichätöjä ja'huätö recuätörömä. CHÖ̧Ä̧NÄ̧HUA̧, UCUTÄ ja̧'a̧ ujutu tu̧ru̧hua̧ Diosma; pi̧jä̧ ttö̧ja̧sa̧ iso juoepönämä jȩcu̧'a̧." ¹² Ja̧'hua̧nö̧ ja̧'a̧ TÖ̧Ä̧NÄ̧HUA̧TÄ̧ ji̧na̧'a̧ Etíopes ttö̧ja̧rö̧ si'epö icuinömä ¹³ Asa ja̧'hua̧ta̧'a̧nö̧ Judá'inä ttä'cajo̧mȩttö̧; Etiope ttö̧ja̧ dö'ecuächinätö. Asa su̧ro̧do̧u̧cu̧ tto'ca'anä ruhui'inätö̧ Gerar jubu. Ja̧'hua̧nö̧ ja̧'a̧ttö̧ recuätö etíope ttö̧ja̧mä̧ ye'ecui'inätö pä'äjita'anömä ppa̧tä̧chö̧ juiyö'anä ja'a, TÖ̧Ä̧NÄ̧HUA̧ ä'cajo̧mȩttö̧mä̧ jȩtö̧ juiyönä huotöjä. ¹⁴ Su̧ro̧do̧mä̧ ȩpi̧nä̧tö̧ rö̧ä̧nä̧ ja'huätö ttiäre micuäu juäi. Su̧ro̧do̧u̧mä̧ Gerar ötahuiyä ppeyänä ko̧cuä̧tö̧rö̧mä̧ si'epö icuinätö, jua'amä TÖ̧Ä̧NÄ̧HUA̧ ro̧ȩpö̧ rö̧ä̧nä̧ icha'attö juȩnȩ ko̧cuä̧tö̧rö̧. Su̧ro̧do̧u̧mä̧ juȩnȩ ötahuiyänätä̧ ko̧cuä̧mi̧nä̧tö̧, rö̧ä̧nä̧ micuäu juäi ko̧cui̧nä̧mȩ. ¹⁵ Su̧ro̧do̧u̧'i̧nä̧ juȩnȩtä̧ ttö̧ja̧ pä'ö aditinätä äjicuäcuähuotörö tta̧'a̧rä̧tö̧ ttoju'ode; ja'huätömä o̧huȩja̧tö̧rö̧ rö̧ä̧nä̧ bo'epinätö, ja̧'huä̧ta̧'a̧nö̧ ca̧mȩju̧tu̧ru̧'i̧nä̧ ja̧u̧nu̧i̧ o'ca'a ppa̧'a̧chi̧nä̧tö̧ Jerusalenra̧'a̧.