¹ 18nö a̧'ȩ jo̧mȩnä̧ Jeroboam ruhuo hueomenä, Abías kä̧mä̧di̧nä̧ Judánä ruhuo huea pä'ö. ² Ja̧u̧mä̧ hue'inö huäbodäcuä a̧'ȩ jo̧mȩ Jerusalénnä; Ja̧ju̧ ki̧mi̧mä̧ micuinäju̧ Micaias, Guibeá ttö̧ja̧sa̧ Uriel ittiju. Ja̧'hua̧nö̧ jo̧mȩnä̧ rohuähuinätö̧ Abías ja̧'hua̧ta̧'a̧nö̧ Jeroboamcu. ³ Abíamä rohuäu 'chi̧nö̧ su̧ro̧do̧u̧ tta̧mi̧'qui'achi'ö ujuhuätucu, 400,000nö jä̧mȩnä̧ pojopö ku̧nä̧huo̧tu̧cu̧. Jeroboam-mä esecuinö 800,000nö huotö pöjopö ku̧nä̧huo̧tu̧cu̧, su̧ro̧do̧u̧ tta̧mi̧'qui'achi'ö ujuhuätucu. ⁴ Abíasmä kä̧mä̧di̧nö̧ Zemaraim muä'ca ju'toju jo̧mȩ, juȩnȩmä̧ ja̧'a̧ Efraín i̧rȩjä̧tö̧ muä'quiyu päi'ome, kä̧mä̧dö̧ huopinö: "¡Ä̧ju̧cuä̧tu̧cui̧ttö̧, Jeroboam ja̧'hua̧ta̧'a̧nö̧ o'catoi'önä Israél ttö̧ja̧, ⁵ ¿Ucutumä jerupätöjä tä̧ji̧ TÖ̧Ä̧NÄ̧HUA̧, Israél ttö̧ja̧'i̧nä̧ TÖ̧Ä̧NÄ̧HUA̧MÄ̧, David-rö hue'inö 'cuäopönätä̧ hue'ö ö̧ja̧ pä̧'ö̧ Israélnä, ja̧u̧ru̧tä̧ ja̧'hua̧ta̧'a̧nö̧ i̧tti̧mö̧rö̧'i̧nä̧ chutä esecuinö ji̧nö̧? ⁶ Ja̧'hua̧nö̧tä̧ ja̧'a̧nä̧, Nabat i̧tti̧ Jeroboam, David i̧tti̧ Salomón u̧mö̧huä̧ya̧mä̧ ä̧mä̧mi̧'ö̧ u̧ru̧hua̧rö̧ rohuähuipö pä'inö. ⁷ Ucutu micuähuocotömä, chahuaruhuä suropätö ttö̧ja̧mä̧, ja̧u̧cu̧ ji̧nä̧ yo̧mȩtȩ pä'i'ätömä. Jahuätömä to'ija̧'a̧cu̧ a̧mö̧cuädä'cotö Salomón i̧tti̧ Roboam ö̧ja̧'a̧cu̧ 'chi̧nä̧tö̧, Roboam ji̧nö̧ mö̧ä̧ya̧ ö̧jä̧i̧mä̧ huo̧juȩcu̧nä̧mä̧ huocö pinö, ja̧'hua̧nö̧ hua̧ jo̧mȩttö̧ a̧mi̧'quiächi'ö juiyönä huinö. ⁸ Ja̧'hua̧nö̧ ja̧'a̧, ucutumä̧ pä'ätöjä Ö̧Ä̧NÄ̧HUA̧ mo̧ro̧jä̧ kö̧ ujurumä ta̧mi̧'quitächia'a'anö ja̧'a̧ David i̧tti̧mö̧ huettöttömä̧. Ucutumä su̧ro̧da̧u̧ recuätö huotöjä, ja̧'hua̧ta̧nö̧ Jeroboam aditinäcö̧ päcäyä i̧tti̧ sa̧rpa̧'i̧nä̧ ucututäcu kö̧ cu̧ä̧nä̧hua̧tu̧cu̧tu̧ jö̧nä̧ a̧di̧cua̧mä̧. ⁹ ¿TÖ̧Ä̧NÄ̧HUA̧ u̧mö̧huäyotö sacerdote jö̧nä̧ huotö Aarón'i̧nä̧ Leví ahuaruhuärö'i̧nä̧ rä'epömä̧ icuocotö pinä̧tö̧? ¿Ko̧ro̧jä̧ ttö̧ja̧ ttu̧mö̧huäyotö Sacerdotetö jä̧'i̧ja̧'a̧nö̧ jȩpo̧co̧tö̧ pinätö̧jä̧ cu̧mö̧huäyotörömä? Ya̧tȩ päcäyärö'i̧nä̧ ja̧'hua̧ta̧nö̧ u̧mä̧tö̧ ovejastö̧rö̧ sietenö huotörö ku icu iyö ichömä a̧mö̧nä̧ pa̧ja̧tö̧tä̧, ko̧ro̧jä̧ ttö̧ja̧ ttö̧ä̧nä̧hua̧ u̧mö̧huäyotö sacerdotetö jä̧'i̧ja̧'a̧nö̧tä̧ jä̧cua̧. ¹⁰ Ja̧'hua̧nö̧ ja̧'a̧nä̧ ujuturumä, TÖ̧Ä̧NÄ̧HUA̧ ja̧'a̧, jaroti'oca'attö. Ujutumä ku̧nä̧rä̧tö̧jä̧ sacerdoterö'inä, Aarón ahuaruhuä 'cotöttö, TÖ̧Ä̧NÄ̧HUA̧RÖ̧ tta̧u̧ huä̧nä̧rö̧ ko̧cuä̧tö̧rö̧, ja̧'hua̧ta̧'a̧nö̧ Levi ahuaruhuä 'cotörö'inä, ja'huätö'inä aditö ko̧cuä̧tö̧. ¹¹ Mo̧ro̧ juoöta'anö ja̧'hua̧ta̧'a̧nö̧ ni̧pä̧ro̧mä̧ juoöta'anö, ja'huätönä ku icu iyähuä iyätö TTÖ̧Ä̧NÄ̧HUA̧RÖ̧ kuättö a̧mȩu̧nä̧ 'chopänä'inä. Ja'huätömä pan'inä rotätö surojö juiyönä rötähuome'inä; ja'huätömä orotö adicuo ocä ra̧pa̧ra̧cu̧ ku̧nä̧tö̧, ja̧'cuo̧ppö̧nä̧ cuo'ö icua pä'ö. Ujutumä TÖ̧Ä̧NÄ̧HUA̧ päinötä jȩpö̧ ko̧cuä̧tö̧jä̧, ja̧'hua̧nö̧ ja̧'a̧nä̧ ucutumä jaropi'inätö̧jä̧. ¹² Topätucui, TÖ̧Ä̧NÄ̧HUA̧MÄ̧ ujututäcu kö̧, ja̧u̧tä̧ ja̧'a̧ tu päi'önä kö̧mä̧, ja̧'hua̧ta̧'a̧nö̧ sacerdote huotö'inä pȩnȩtä̧ ko̧cuä̧tö̧ ttiäre trompetacu ucuturu huȩnȩ jo̧mȩnä̧ ppötta pä'ö. Israél ttö̧ja̧, curohuähuätucuä TÖ̧Ä̧NÄ̧HUA̧CU̧MÄ̧, ja̧u̧tä̧ ja̧'a̧ cuä̧do̧tu̧cu̧ mi̧nä̧'i̧nä̧ TÖ̧Ä̧NÄ̧HUA̧ pinömä, ucutu ja̧u̧ru̧mä̧ rohuäu iso juo'epocotöjä." ¹³ Ja̧'hua̧nö̧ ja̧'a̧nä̧ Jeroboam'mä jahuätö ttieruhuomenä ji̧yȩtȩ jȩpö̧ku̧ni̧nö̧, umuhuäyotö su̧ru̧da̧u̧mä̧ ki̧nä̧tö̧ Judá sotö ttä'ca jo̧mȩ, ja̧'hua̧nö̧ ja̧'a̧nä̧ jahuätö ttabobänämä ki̧nä̧tö̧ jo̧mȩnö̧ ttörohuähua pä'ö. ¹⁴ Judá o'ca'acu to'äcuähuomenä ki̧na̧'a̧ rohuähuäcuähuämä ä'cacu'inö aboja'acu'inä. Ja̧'hua̧nö̧ jä̧u̧ jahuätömä TÖ̧Ä̧NÄ̧HUA̧RÖ̧ huopönö jäepinä̧tö̧, ja̧'hua̧nö̧ jo̧mȩnä̧ sacerdotes huotömä trompetas ppöinä̧tö̧. ¹⁵ Ja̧'hua̧nö̧ jo̧mȩnä̧ Judá umuhuäyotö huopinä̧tö̧ , huottomenä, ji̧yȩtȩ 'cuä'opina̧'a̧ Dios Jeroboamrö̧ cuä'inö̧ ja̧'hua̧ta̧nö̧ Israelrömä o'catoinä̧rö̧ Abías ja̧hua̧ta̧nö̧ Judá ttä'ca jo̧mȩttö̧. ¹⁶ Israel ttö̧ja̧mä̧ Judá ä'ca jo̧mȩttö̧mä̧ ttöipächinä̧tö̧, ja̧'hua̧nö̧ ja̧'a̧nä̧ Diosmä jahuätörömä Judá u̧mu̧nä̧tä̧ iyipinö. ¹⁷ Abías umuhuäyotö su̧ru̧da̧u̧cu̧mä̧ rö̧ä̧ö̧nä̧ cuäö'icuinö; 500,000nö̧ jö̧nä̧ huotörö Israeltö pojopö ku̧nä̧cuo̧tö̧mä̧ toeinä̧tö̧. ¹⁸ Pa̧'a̧nö̧ ji̧na̧'a̧, Israel ttö̧ja̧mä̧ ja̧u̧nu̧ pä̧nä̧mä̧ huȩtä̧u̧tä̧ ko̧cui̧nä̧tö̧, Judá umuhuäyotö ttä̧do̧tö̧ mi̧nä̧ TTÖ̧Ä̧NÄ̧HUA̧ Diosrö tta̧u̧ ttu̧huä̧nä̧ra̧'a̧tö̧ iso juoepinä̧tö̧. ¹⁹ Abíasmä Jeroboamrö̧ ru̧ä̧ri̧nö̧; ja̧u̧ (Abíasmä) 'choipinö (Jeroboam) öäre ötahuiyä ji̧nö̧mä̧: Betel'inä ippeyänä ka̧cu̧'i̧nä̧, Jesana'inä ippeyänä ka̧cu̧'i̧nä̧ ja̧hua̧ta̧nö̧ Efraín'inä ippeyänä ka̧cu̧'i̧nä̧ . ²⁰ Abías a̧'cua̧rö̧ ö̧jö̧ mo̧ro̧ Jeroboam'mä pä'äjita'anömä ujuru hui'inö; TÖ̧Ä̧NÄ̧HUA̧ cuäö ro̧ȩpi̧na̧cu̧' ,ja̧u̧mä̧ ja̧'hua̧nö̧ ja̧'a̧ttö̧ 'corujuoächinö. Ja̧'hua̧nö̧ ja̧'a̧nä̧ ²¹ Abíasmä ucuo rö̧ä̧chi̧nö̧; ja̧u̧mä̧ irecuamu̧rö̧mä̧ ȩmi̧nö̧ cartocenö huotörö ja̧'hua̧nö̧ ja̧'a̧tö̧ ttä'o pinö veintidosnö u̧mä̧tö̧rö̧ ku̧nä̧ri̧nö̧ ja̧'hua̧ta̧nö̧ diesciseisnö huotö nä̧tö̧rö̧ . ²² . Abías koro jȩi̧nö̧mä̧ , ö̧ji̧nö̧ ja̧'hua̧ta̧nö̧ i̧huȩnȩ ucuocuinö ji̧nö̧mä̧ huȩyu̧cua̧'a̧ ka̧'a̧ profeta Iddonä jiähuä'a.